Gipadayag nga mga Reyalidad sa Pagkamortal

Ang Dios miingon ngadto ni Adan, “Pinaagi sa singot sa imong nawong ikaw makakaon og pan, hangtud ikaw mobalik ngadto sa yuta” (Moises 4:25; tan-awa usab sa Genesis 3:19). Pipila ka mga tawo miila sa pulong sa Ginoo isip tunglo diha ni Adan ug sa iyang mga kaliwatan tungod sa pagkaon sa gidili nga bunga. Hinoon, nadungog nako kini nga mga pulong isip naggikan sa mahigugmaon nga Amahan nga nagpasabut ngadto sa usa ka batan-on ug kulang sa kasinatian nga anak nga lalaki sa mga kahimtang diha sa nalaglag, mortal nga kalibutan diin ang anak nga lalaki sa dili madugay mopuyo.

Sama sa yutan-ong amahan nga nag-andam sa anak nga lalaki nga hapit nang mobiya sa panimalay, ang Amahan nagtabang sa unang tawo nga maandam nga magpuyo sa iyang kaugalingon nga layo sa panimalay. Iyang gipasabut nga ang buhat mao ang bag-ong reyalidad—usa ka reyalidad sa pagka-mortal.

Ang Langitnong Amahan nasayud nga si Adan ug Eva sa dili madugay manlimbasug batok sa mga elemento ug sa yuta mismo. Sukwahi sa ilang mga kasinatian diha sa Tanaman sa Eden, diin gihatag ang tanan alang kanila, ang mortal nga kinabuhi nagkinahanglan og paningkamot sa pisikal ug paminsar, paghago, pailub, ug pagkamakanunayon aron mabuhi.

Ang pagkat-on sa pagbuhat—pagbansay ug pagdisiplina sa atong mga hunahuna, lawas ug espiritu sa pagpaningkamot, pagmugna, pagkab-ut, ug pag-uswag—mao ang usa ka pundasyon sa reyalidad sa matag mortal nga kinabuhi. Mao kini ang usa sa pamaagi nga kita mahisama sa Dios ug matuman ang Iyang mga katuyoan dinhi sa yuta. Ang Langitnong Amahan, si Jesukristo, ug ang Espiritu Santo tanan nagtrabaho. Ang Ilang buhat ug ang Ilang himaya mao “ang pagpahinabo sa pagka-imortal ug kinabuhi nga dayon sa tawo” (Moises 1:39). Ang reyalidad mao nga walay himaya kon wala ang buhat.

Ang usa sa importanting mga rason nga ang mga kalalakin-an kinahanglan nga motrabaho mao ang pagsangkap sa ilang mga pamilya. “Ang Pamilya: Usa ka Pamahayag ngadto sa Kalibutan” naglista sa “pagsangkap” isip usa sa tulo ka mga tahas nga pihong gihatag ngadto sa mga kalalakin-an.² Ang usa ka tawo kinsa nasayud kon unsaon sa pagtrabaho ug sa pagsangkap sa iyang kaugalingon adunay pagsalig nga siya makaminyo ug makasangkap alang sa usa ka asawa ug mga anak.

Si Bishop H. David Burton, kaniadto Presiding Bishop sa Simbahan, miingon: “Ang pagtrabaho—matinud-anon ug mabungahon—magdala og katagbawan ug usa ka pagbati sa bili sa kaugalingon. Pagkahuman nga nabuhat na ang tanan aron kita mahimong mapaningkamuton sa kaugalingon, sa pagsangkap sa atong kaugalingong mga panginahanglan ug sa atong pamilya, kita makaduol sa Ginoo nga masaligon sa paghangyo kon unsa pa may atong kulang.”³

Si Satanas alisto gayud aron sa pagguba sa mga katuyoan sa Dios ug sa pagpahuyang sa atong mortal nga kasinatian. Sa pagbatok sa gibug-aton nga gibutang sa Amahan diha sa trabaho, ang kaaway nakakombinser og daghan sa atong panahon nga ang nag-unang tumong sa kinabuhi mao ang paglikay sa trabaho. Sa mga katilingban karon, daghang mga tawo nag-focus sa pagpangita og mga trabaho nga maayo ang sweldo apan nagkinahanglan og gamayng buhat, mga investment o mga pinansyal nga mga stratehiya nga dakong kwarta ang mabalik sa walay pagpaningkamot, ug mga programa nga mobayad alang sa unsay gusto nila nga walay gasto ngadto kanila. Ang pipila nagtinguha nga makalikay sa buhat pinaagi sa paghulam ug paggamit sa kwarta nga wala silay tuyo nga bayaran. Dili sila gusto nga magtrabaho, magbadyet, ug magtigum sa dili pa sila mogasto. Ang mga lider sa Simbahan mitambag nga kita kinahanglan nga motrabaho alang sa unsay atong maangkon ug “maglikay og utang gawas lang sa kinahanglanon gayud nga mga panginahanglan.”⁴

Laing maliputong taktika nga gihimo sa kaaway niini nga henerasyon mao ang pagtutok sa natural nga ambisyon sa tawo sa pagtrabaho ug pagkab-ot ngadto sa walay hinungdan nga mga kalihokan. Ang Dios mibutang diha sa batan-ong mga lalaki sa tinguha nga mokompetensya ug mokab-ot, uban sa katuyoan nga ilang gamiton kining ambisyon aron mamahimong matinud-anon nga mga tigsangkap sa pamilya. Sa batan-on pa kita, kini nga ambisyon nagtutok ngadto sa akademik, athletic, o ubang mga kalihokan nga makatabang sa pagtudlo sa pagpursigir, disiplina, ug buhat. Si Satanas, hinoon, naghinayhinay sa pagbalda niana nga ambisyon ug itutok kini ngadto sa mga dula sa video nga wala gibasi sa reyalidad ug nag-usik lang sa panahon ug sa mga ambisyon ug mosangput sa pagkaadik.

Bisan unsaon pa ninyo pagdula og mga dula sa video, ang pagtrabaho sa butang nga dili tinuod dili gayud makahatag kaninyo sa katagbawan nga nag-uban sa tinuod nga buhat. Ang tinuod nga trabaho mao ang paningkamot, pagkamakanunayon, pailub, ug disiplina aron makab-ot ang mapuslanon nga kahibalo, mabuhat ang gikinahanglan nga paghago, o matuman sa mahagiton nga mga tumong.

Kon kita wala magkat-on sa pagtrabaho samtang anaa dinhi sa pagkamortal, mapakyas kita sa pagkab-ot sa atong potensyal ug kalipay niini nga kinabuhi, ug dili nato mapalambo ang mga kalidad ug mga hiyas nga mahinungdanon alang sa kinabuhing dayon.

Imahe

A young couple talking together.

Ang Ginoo misaad sa panumpa ug pakigsaad sa priesthood:

“Kay kinsa kadto nga matinud-anon ngadto sa pagbaton niining duha ka mga pagkapari diin Ako nga gipamulong … mahimo nga … binhi ni Abraham, ug sa simbahan ug gingharian, ug ang pinili sa Dios.

“Ug usab silang tanan kinsa modawat niini nga pagkapari modawat kanako, miingon ang Ginoo;

“… Siya nga modawat kanako modawat sa akong Amahan;

“Ug siya nga modawat sa akong Amahan makadawat sa gingharian sa akong Amahan; busa ang tanan nga iya sa akong Amahan ihatag ngadto kaniya.

“Ug kini sumala sa panumpa ug pakigsaad nga nahisakop ngadto sa pagkapari.” (D&P 84:33–35, 37–39).

Ang atong mahigugmaong Amahan gusto nga ang matag usa sa Iyang mga anak makadawat sa tanang butang—usa ka kahingpitan, Iyang kahingpitan. Aron madawat kini nga kahingpitan, “ang tawo kinahanglan mosulod ngadto niini nga kapunongan sa pagkapari [ang gipasabut mao ang bag-o ug walay katapusan nga pakigsaad sa kaminyoon]” (D&P 131:2).

Ang mahangturon nga kaminyoon ug ang tanan nga gihimo niini aron sa pagtabang kanato nga makat-on ug makasinati maoy yawe sa pag-angkon sa tanang panalangin nga gustong ihatag sa Langitnong Amahan ngadto sa Iyang mga anak. Ang pamilya lamang—usa ka lalaki ug usa ka babaye kinsa nagpuyo nga takus sa pagsulod sa balay sa Ginoo ug i-seal sa usag usa—ang mahimong sarang. Ang hingpit nga mga panalangin sa priesthood madawat sa bana ug asawa nga mag-uban o dili gayud.

Makapainteres nga diha sa panumpa ug pakigsaad sa priesthood, ang Ginoo migamit sa mga verb nga pag-angkon og ug pagdawat. Siya wala mogamit sa verb nga orden. Diha sa templo nga ang mga lalaki ug babaye—mag-uban—moangkon ug modawat sa mga panalangin ug gahum sa Aaronic ug Melchizedek Priesthood. Human madawat sa usa ka magtiayon kini nga mga panalangin diha sa balay sa Ginoo, sa kinatibuk-an diha sa ilang panimalay diin sila makapalambo og diosnong mga kinaiya ug mga hiyas—pagsakripisyo alang ug pag-alagad sa usag usa, paghigugma sa usag usa uban sa hingpit nga pagkamaunungon, ug nagkahiusa sa ilang gugma alang sa usag usa ug sa Dios.

Kahingpitan, priesthood, pamilya—kining tulo nga konektado nga mga pulong kabahin sa reyalidad sa mahangturon nga kaminyoon. Ang pagbuhat kutob sa atong mahimo aron himoon ang mahangturon nga kaminyoon nga usa ka reyalidad sa atong mortal nga kinabuhi makapasiguro nga kita wala mag-usik sa atong panahon dinhi sa yuta.

Si Satanas, nga kanunay usa ka manlilingla, naghago karon sa atong panahon naglubag ug nagtuis sa reyalidad sa pagkamortal. Siya padayon nga nagtrabaho aron sa pagguba sa kahulugan ug kaimportane sa kaminyoon diha sa mga hunahuna sa mga lalaki ug mga babaye. Iyang gikombinser ang uban sa bakak nga ang kaminyoon dili kinahanglanon, nga ang gugma igo na. Aron mailad ang uban, siya misulay sa paggamit sa bag-o nga legal nga mga kahulugan sa kaminyoon aron mahimong legal ang imoral nga mga pakigrelasyon. Niadtong mituo sa kaminyoon sumala sa pagpasabut niini sa Dios, siya mihimo niining ubos og importansya kay sa edukasyon ug seguridad sa pinansyal. Iyang gihadlok ang mga tawo sa mga sakripisyo ug mga kalisdanan nga may kalabutan sa kaminyoon. Walay mahimo tungod sa kahadlok, daghan sa mga tawo daw mga butang nga pagaaghaton kay sa magpadayon sa unahan ug molihok diha sa hugot nga pagtuo.

Pipila ka mga tawo, nabug-atan sa lisud nga tahas sa pagtukod og tinuod nga pakigrelasyon apan mibati og tinguha alang sa pakig-uban ug kasuod, gilaang pinaagi sa mini nga mga paglaum ngadto sa pakigsandurot diha sa internet. Ang ilang mga paningkamot sa pakigsuod diha sa internet walay nahatag kondili ang kahaw-ang, mga pangandoy, ug kaulaw. Daghan ang nadani ngadto sa dili mabungahon nga balik balik nga pagpangita hangtud nga nahimo kining adiksyon nga wala na gayuy katagbawan.⁵ Sila nabitik sa usa ka pagbalik-balik nga hinay-hinayng miguba sa ilang kabubut-on sa pagsukol. Anaa pa gihapon kanila ang ilang kabubut-on apan wala nay igong paglaum sa ilang abilidad sa pagsukol. Nabitik niining lit-ag, sila mirisgo nga dili makaangkon sa kahingpitan ug sa hingpit nga kalipay sa usa sa labing balaan nga mga reyalidad sa pagka-mortal—mahangturon nga kaminyoon.

Kon kamo nabitik niining lit-ag, pangayo og tabang. Ayaw og paabut. Ang pagbuhat sa ingon makapalangay sa inyong paglambo ug pag-uswag dinhi sa pagkamortal.

Susiha ang inyong kinabuhi. Siguroa nga ang inyong hunahuna wala mangitngiti sa mini nga mga ideya kalabut sa kaminyoon. Hinumdumi nga ang malampuson nga kaminyoon gitukod diha sa “hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat, ug maayo nga mga kalihokan.”⁶

Magsugod karon sa pagtukod niadto nga mga hiyas sa inyong personal nga kinabuhi. Samtang inyong buhaton, ang Ginoo moabli sa agianan alang kaninyo sa pagdawat sa kahingpitan sa mga panalangin nga Iyang giandam alang sa Iyang mga anak—ang bag-o ug walay katapusan nga pakigsaad sa kaminyoon. Ayaw itugot nga ang inyong pagka-mortal “pagalaglagon sa hingpit” (Joseph Smith—Kasaysayan 1:39).

Imahe

A young family in England.

Sa panahon Siya “mipanalangin”, o mi-seal, ni Adan ug Eva sa paghimo sa unang pamilya dinhi sa yuta,⁷ ang Dios mihatag kanila og sugo: pagmabungahon, pagsanay ug pagpuno sa yuta (tan-awa sa Genesis 1:28; Moises 2:28). Ang kaminyoon ug mga bata konektado sa usag usa. Ang mga gahum sa paglalang nga mihimong posible sa mortal nga pagkatawo gamiton lamang tali sa usa ka lalaki ug babaye, kinsa legal nga naminyo.⁸

Si Adan ug Eva nakasabut nga ang pagpanganak usa ka importante nga reyalidad sa pagkamortal. Sila misunod sa sugo sa Dios, “ug si Adan nakigdulog sa iyang asawa, ug siya nanganak ngadto kaniya og anak nga mga lalaki ug anak nga mga babaye, ug sila nagsugod sa pagsanay ug pagpuno sa yuta” (Moises 5:2). Ang mga propeta sa atong panahon mipahayag nga “Kami mopahayag nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman.”⁹

Sa kalibutan karon, hinoon, daghang mga tawo dili na motuo nga ang “ang mga kabataan mao ang panulundon sa Ginoo” (Salmo 127:3).

Pipila ka tuig ang milabay, usa ka magtiayon nga hapit na magminyo miduol kanako. Sila mihangyo alang sa akong tambag kalabut sa mga anak. Gipahinumduman nako sila sa sugo nga ilang madawat kon sila ma-sealed, ug ako mitambag kanila nga ilang tumanon kini nga sugo agi og tambag sa Ginoo. Gipahinumduman nako sila nga kini usa ka sugo nga sama sa ikapulo, pagbalaan sa Igpapahulay, o ubang mga sugo. Sa higayon nga ang pakigsaad nahimo, ang pangutana dili kon angay ba kining tumanon apan unsaon sa pagtuman niini sa paagi nga ikahimuot ngadto ug gitugutan sa Ginoo.

Nagtan-aw ko samtang sila nagsugod sa ilang kaminyoon. Ang bana kulang nalang og usa ka tuig aron mogradwar, ang asawa aduna pay laing usa ka tuig sa masteral. Sila mibati nga sugdan ang ilang pamilya diha-diha dayon—bisan pa sa pag-eskwela ug walay kasiguroan sa umaabut nga mga trabaho. Dili kadto sayon o hayahay nga makabaton dayon og anak. Ang bana kinahanglan nga mangita og trabaho, sila kinahanglan nga mobalhin, ug ang asawa kinahanglan mohuman sa iyang kurso. Nag-atubang sila og kakapoy ug sakripisyo. Ang bana kinahanglan magdali sa pagpauli kada adlaw ug magbantay sa bata samtang ang asawa magkompleto sa iyang thesis ug praktikal nga training. Ang asawa nagtuon ug nagsulat taliwala sa pagpasuso ug pag-ilis og diaper.

Ang Ginoo mipanalanginan ug mipauswag kanila. Samtang ang uban nawad-an og trabaho diha sa ekonomikanhong paghagba niadtong 2008, ang bana gipabilin ug na-promote. Tungod kay sila nagpuyo nga madaginuton, nakalingkawas sila sa utang gawas lang sa utang sa balay, ug sila nakahimo sa hingpit nga pagbayad alang sa usa ka master‘s program nga walay utang. Sa tibuok kasinatian, nagpadayon sila sa pagkat-on sa bililhong mga leksyon nga mahimong moabut lamang sa pagkaginikanan. Ang pagpanganak dili sayon o hayahay, apan kini usa ka sugo nga makatabang kanato nga makaamgo sa tinuod nga mga panalangin sa pagkamortal.

Ang pagkamortal maoy usa sa labing mahinungdanon nga gasa nga gihatag kanato sa atong Amahan. Siya nahigugma kanato ug gusto nga atong gamiton kini nga gasa sa hingpit ug sa kompleto nga paagi. Pinaagi lamang sa pagdawat ug pagtutok sa mga reyalidad nga gipadayag sa Dios nga atong matuman ang mga katuyoan nga kita mianhi sa yuta. Si Satanas nasayud nga siya walay mahimo sa paghunong kanato gikan sa pag-angkon og lawas, busa siya misulay sa paglinga kanato gikan sa mga katuyoan diin kini gilalang—sa pagtrabaho, sa pagminyo, ug pagmatuto sa mga anak.

Dili nato itugot nga magpuyo kita nga walay tumong ug walay katuyoan, nga sa katapusan ato nalang mahibaloan nga atong gigahin ang atong panahon sa yuta nga wala makonektar sa gipadayag nga mga reyalidad sa pagkamortal nga mahinungdanon sa pagkab-ot sa atong nga katuyoan dinhi. Atong likayan ang sayop nga mga ideya nga gibasi sa mga lagda sa mga tawo ug magpabilin nga matinud-anon ngadto sa gipadayag nga mga reyalidad nga gihatag sa Dios aron ang atong panaw sa pagkamortal may kabililhon, hingpit, ug tinuod.