Mga Panalangin sa Pagpadayon sa Unahan

Ang pagpuyo isip usa ka matinud-anong miyembro sa Simbahan makahatag og talagsaong mga panalangin. Apan wala kana magpasabut nga ang kinabuhi wala nay panagsa nga kalisud. Mga tintasyon, mga higala nga dili tinuod, mga hagit sa pamilya, nganli lang. Daghang mga butang nga mosulay ug mobitad kaninyo palayo gikan sa dalan sa pakigsaad.

Mao nga ang tema sa Mutual niining tuiga, “mopadayon sa unahan uban ang pagkamakanunayon kang Kristo” (2 Nephi 31:20), naglangkob og ingon ka gamhanan nga mensahe. Kon kamo mopadayon sa unahan uban ang pagkamakanunayon kang Kristo, magpabilin nga matinud-anon sa inyong mga pakigsaad, ang Dios makahimo og kahibulongan nga mga butang alang kaninyo ug pinaagi kaninyo. Ug Siya makatabang kaninyo nga mobati sa paglaum, kahupay, ug kalinaw sa samang higayon.

Kini usa ka butang nga si Propeta Joseph Smith nasayud kaayo. Siya 14 anyos pa lang sa dihang iyang nasinati ang Unang panan-awon. Samtang siya miluhod aron sa pag-ampo didto sa Sagradong Kakahoyan, siya giatake sa usa ka dili makita nga pwersa nga ingon ka talagsaon nga gahum nga kini naghulga sa pagpatay kaniya. Pinaagi lamang sa paggamit sa tanan niyang gahum sa pagtawag sa Dios nga siya giluwas ug nakadawat og pagbisita gikan sa Amahan ug sa Anak.

Sa wala madugay, dihang si Joseph mipakigbahin sa iyang kasinatian, siya gibiay-biay sa mga higala ug sa lokal nga mga lider (tan-awa sa Joseph Smith—Kasaysayan 1:15–17, 21–26). Kana nga pagpanggukod wala gayud mohunong ug sa katapusan mikutlo sa iyang kinabuhi paglabay sa 24 ka tuig.

Apan si Joseph mipadayon sa unahan uban sa paglaum, ug siya nalipay sa pagbuhat sa ingon diha sa pag-alagad sa Ginoo. Samtang siya nagpabilin nga makanunayon diha kang Kristo ug migamit og hugot nga pagtuo sa pagbuhat unsay matarung, ang Dios mipanalangin ug misuporta kaniya. Ug Siya mobuhat sa samang butang alang kaninyo.

Busa padayon sa unahan. Pasalig nga mosunod sa ebanghelyo Ipadayon ang inyong kaugalingon nga lig-ong nakatutok diha sa Manluluwas. Magbaton og “usa ka hingpit nga kahayag sa paglaum, ug usa ka gugma sa Dios ug sa tanan nga mga tawo.” “[Pagbusog] sa mga pulong ni Kristo.” Pagserbisyo ubos sa direksyon sa priesthood. Tinguhaa nga mamahimong unsay gusto sa Dios nga kamo mamahimo.

Samtang kamo mopadayon sa unahan, naghimo ug nagtuman sa mga pakigsaad diha sa dalan sa kinabuhing dayon, kami mopamatuod nga kamo makakaplag og kalipay.