Si Moroni, ang Akong Mama, ug usa ka Leksyon alang sa Akong Kinabuhi
Ang tagsulat nagpuyo sa Singapore.
Kini nga leksyon gikan sa Basahon ni Mormon nakatabang kanako nga masayud nga wala gayud ako mag-inusara sa espirituhanong paagi.
Detalye gikan sa Moroni Naglubong sa mga Palid, ni Gary Ernest Smith
Daghang mga butang ang nausab alang kanako sa tuig nga ako nag-edad og 17 anyos. Nagpadayon ko sa pagtungha ngadto sa bag-ong eskwelahan ug miuswag na sa akong ikatulo nga tuig sa seminary. Dili lang kana, apan aduna usab akoy usa ka bag-o nga magtutudlo sa seminary: ang akong mama.
Nakahisgot ba ko nga ako lang ang estudyante diha sa iyang klase? Gumikan kay ang eskwelahan nga akong gitambongan usa man ka oras biyahion sa tren gikan sa akong gipuy-an. ang akong inahan mihukom nga tudloan ko sa sayo sa buntag nga seminary diha sa balay aron makaabut ko sa eskwelahan sa hustong oras. Swerte ko nga siya ang motudlo nako kada adlaw, apan aduna usab kini gamayng kakulba. Kinahanglan akong ihatag ngadto niya ang hingpit nakong pagtagad, nga lisud kaayong buhaton sa alas 5:30 sa buntag.
Sa dihang nagtuon kami sa Basahon ni Mormon, nagtuon kami mahitungod ni Moroni, usa ka propeta nga nakadayeg kaayo ko. Hinoon, dugay na ko nga natingala: Ngano nga si Moroni nag-inusara? Nganong wala man mipadala ang Langitnong Amahan og tawo nga makauban kaniya? Nganong wala man siya moreklamo sa dihang gipasagdan siya sa Ginoo nga nag-inusara aron sa pagtiwas sa Basahon ni Mormon?
Ang akong mama mipasabut nga tungod sa iyang pagkamatarung ug hugot nga pagtuo sa Langitnong Amahan, si Moroni nasayud nga siya wala nag-inusara. Anaa kaniya ang Langitnong Amahan ug si Jesukristo aron sa pagtabang kaniya sa pagkompleto sa Basahon ni Mormon. Nakaamgo dayon ko nga si Moroni wala nagkinahanglan ni bisan kinsa nga pisikal nga naa didto tungod kay nasayud siya nga adunay nagbantay niya sa espirituhanon nga paagi. Siya nasayud nga ang Langitnong Amahan dili gayud mobiya sa iyang kiliran.
Kana adunay dakong epekto ngari kanako. Karon ako nasayud na nga kon makahunahuna ko nga ako nag-inusara, wala ko nag-inusara sa espirituhanong paagi tungod kay ako makabaton sa pakig-uban sa Espiritu Santo, kinsa motabang nako nga mobati nga mas duol sa akong Langitnong Amahan ug ni Jesukristo. Nasayud ko nga hangtud magbaton ko sa hugot nga pagtuo ug pagsalig sa Ginoo, dili gayud ako maglakaw nga nag-inusara.
Kining partikular nga leksyon nakahimo og dakong epekto sa akong hugot nga pagtuo ug pagpamatuod sa Langitnong Amahan ug ni Jesukristo. Bisan tuod ako nabalaka nga mag-seminary diha sa balay, karon mapasalamaton ako tungod kay kini naghatag kanako og espesyal nga mga kasinatian sa pagkat-on uban sa akong mama.