Itugot nga ang Dios Mao ang Inyong Arkitekto
Ang inyong kinabuhi mamahimong mas maayo pa kay sa inyong gihunahuna.
Mga paghulagway pinaagi ni Bryan Beach
Daghan kamo og malagpasan sa kinabuhi pinaagi sa pagbaton og salabutan samtang inyong masinati ang bag-ong mga sitwasyon. Maskin nagpasabut kana sa inosenting pagbaliwala sa sinulat nga mga instruksyon kon unsaon sa pag-asembol sa usa ka milyon ka piraso nga kasangkapan [furniture] o pagtudlo sa inyong kaugalingon sa paggamit og instrumento sa musika sa pinataka nga paagi nga kutob lang sa unsay labing maayong paminawon, ang inyong kapasidad sa pagkat-on pinaagi sa pagsulay ug pagkasayop [trial and error] praktikal nga walay kinutuban.
Ang problema lang mao nga, sa kasagaran dili sayon ang ingon ana nga paagi.
Paghunahuna og usa ka butang nga tinuoray nga komplikado. Unsa kaha kon ikaw ang sangunan sa pagtukod sa imong kaugalingong balay ug ang tanang mga materyales anaa sa imong atubangan. Mahunahuna ba nimo ang dakong tapok sa mga butang? Mga tabla, lansang, tubo, alambre, kahimanan ug tanang butang nga imong kinahanglan nga makatukod og usa ka nindot nga balay alang kanimo ug sa imong pamilya.
Gusto pa ba gihapon nimo kining pormahon atol sa proseso sa pagtukod? O gusto ka nga matabangan sa tawo nga tinuoray nga makamao unsay labing maayong buhaton sa materyales?
Ang atong dalan sa kinabuhi anaa sa samang paagi. Kitang tanan nagkinahanglan og tabang sa pagtukod sa atong mga kinabuhi. Ug walay mas maayo nga tigtukod nga atong kaduolan kay sa Dios.
Sama sa gipasabut diha sa Alang sa Kalig-on sa mga Kabatan-onan. “Ang Ginoo mohimo og daghan sa inyong kinabuhi kay sa inyong mabuhat sa inyong kaugalingon. Siya modugang sa inyong mga oportunidad, mopalapad sa inyong panan-aw, ug molig-on kaninyo. Siya mohatag kaninyo sa tabang nga inyong gikinahanglan aron sa paglahutay sa inyong mga pagsulay ug mga hagit Makaangkon kamo og mas lig-on nga pagpamatuod ug makakaplag sa tinuod nga kalipay samtang kamo makaila sa inyong Amahan sa Langit ug sa Iyang Anak, nga si Jesukristo, ug mobati sa Ilang gugma alang kaninyo.” ([2011], 43).
Kon kita mosunod sa mga sugo sa Dios ug iapil Siya sa atong mga plano, kita mamahimo kon unsa kita angay nga mamahimo—dili kon si kinsa sa atong pagtuo nga gusto natong mamahimo.
Ania ang pipila ka mga tawo kinsa, uban sa tabang sa Dios, nakakaplag og mas maayong dalan kay sa ilang gipili alang sa ilang mga kaugalingon.
Paghikalimot sa Kabayolente
Diha sa serye sa mga video sa mormonchannel.org, usa ka batan-ong lalaki nga ginganlan og Bubba mipakigbahin sa iyang istorya mahitungod sa unsang paagi nga ang iyang kinabuhi nag-ungaw sa kalaglagan.1 Siya nagtubo sa usa ka bayolente nga panimalay, diin ang iyang amahan gipatay sa dihang tres anyos pa lang si Bubba.
Si Bubba mitubo nga nagpili sa mao gihapon nga kinabuhi nga kanunay niyang nakita. Siya miapil sa usa ka gang ug nakig-away ni bisan kinsa nga musupak kaniya. Pagka-high school nahunahunaan niya nga sa bilanggoan ang iyang dangatan sa dili madugay. Ug wala siya manumbaling.
Ang Dios mipataliwala. Atol niining makuyaw nga pagdesisyon sa iyang kinabuhi, si Bubba nakahimamat og usa ka pamilya sa mga Santos sa Ulahing mga Adlaw kinsa mipakita kaniya sa mahigugmaong kamabination ug kamaayo. Wala pa siya sukad nakauban sa mga tawo sama niini—mga tawo kinsa mipakita og kalooy ug gugma. Siya misugod sa paggahin og daghang panahon uban kanila kutob sa mahimo. Sa dihang nangutana siya sa pamilya nganong nagbuhat sila sa ingon niana nga buhat, sila miingon nga tungod sa ilang hugot nga pagtuo diha ni Jesukristo.
Gusto niyang masayran kon unsa ang ilang nahibaloan. Siya misugod sa pag-ampo ug pagtuon sa mga kasulatan. Ug sa wala madugay siya mibati og usa ka butang nga wala gayud niya mabati sukad. “Sigurado gayud adunay Dios, ug Siya nahigugma kanako!” si Bubba miingon. Uban sa tabang sa Dios, si Bubba misugod sa pagtukod sa iyang kinabuhi pag-usab uban ni Jesukristo isip pundasyon, gibiyaan ang daan niya nga kinabuhi.
“Ang akong kinaiyahan nausab. Kon si kinsa man ako nga pagkatawo karon lahi na kon si kinsa ako kaniadto. Karon ako aduna nay katuyoan. Ako aduna nay kapadulngan,” siya miingon. “Ako aduna nay usa ka dapit nga akong kaadtoan.”
Niining mga adlawa nakita ni Bubba ang iyang kaugmaon uban sa kahayag, hugot nga pagtuo, ug paglaum. “Ako nasayud nga pinaagi lamang ni Jesukristo, sa akong hugot nga pagtuo diha Kaniya, nga makatabang kanako nga makaabut ko asa nako gusto,” siya miingon.2
Pag-usab sa Direksyon
Si President Hugh B. Brown (1883–1975), usa ka sakop sa Korum sa Napulog Duha Ka mga Apostoles ug sa Unang Kapangulohan, mipakigbahin og kasinatian diin ang Dios dako og nabuhat sa iyang kinabuhi kay sa nahimo niya sa iyang kaugalingon.
Si Hugh nagserbisyo sa Canadian military ug naghulat nga maindosar nga mahimong heneral. Siya nagtrabaho, naglaum, ug nag-ampo alang niana nga promosyon sulod sa 10 ka tuig.
Sa dihang nabakante na ang posisyon, hinoon, wala siya napili tungod lang kay siya usa ka miyembro sa Simbahan. Mao lang gayud na ang tinuod nga rason, ug sila miingon kaniya niini.
Si Hugh labihang sukoa. Siya miingon: “Misakay ko sa tren ug mipauli … nga may kasakit sa akong kasingkasing, may kapait nga gibati sa akong kalag. … Sa dihang miabut ko sa akong tulda, … gilabay nako ang akong kalo sa tejeras. Ako nagpangumo, ug akong gipakurog kini nga gitumong sa langit. Miingon ko, ‘Nganong nabuhat mo man kini kanako, Dios? Gibuhat nako ang tanan kutob sa akong mahimo aron lang mahimong sarang. Walay butang nga mahimo nakong buhaton—nga kinahanglan nakong buhaton—nga wala nako buhata. Nganong nabuhat mo man kini kanako?’ Hilabihan ang akong kasuko.”3
Dayon si Hugh nakahinumdom og usa ka kasinatian gikan sa nanglabay nga katuigan. Makausa mipalit siya og usa ka umahan nga adunay usa ka labong kaayo nga currant bush. Kon dili pul-ongan, kana nga bush dili gayud mamunga. Ang mahimo lang niini mao ra ang pagpataas.
Busa gipul-ongan kini og maayo ni Hugh. Pagkahuman, nakakita siya og tinulo nga likido sa kada tumoy sa pinul-ongan nga sanga. Mora kini og luha tan-awon. “Ako ang hardenero dinhi,” iyang giingnan ang currant bush. Si Hugh nasayud kon unsay gusto niya nga mahimo ang bush, ug kini dili para mahimong kahoy nga kapasilongan.
Kana nga kasinatian miabut sa iyang hunahuna samtang siya nanlimbasug sa kasuko tungod kay gilabyan sa promosyon. “Nakadungog ko og usa ka tingog, ug nakaila ako sa tono niini nga tingog. Akoa kadtong kaugalingong tingog, ug ang tingog miingon, ‘Ako ang hardenero dinhi. Ako nasayud unsay akong gusto nga imong buhaton.’ Ang kasuko mipahawa sa akong kalag, ug miluhod ako diha tungod sa tejeras aron sa pagpangayo og pasaylo sa akong pagkadili mapasalamaton. …
“… Ug karon, hapit na mag 50 ka tuig ang milabay, mohangad ako sa Dios ug moingon ‘Salamat, Mr. Hardenero, sa pagpul-ong kanako, sa dakong paghigugma kanako aron pasakitan ako.’”4
Si Hugh wala gayud nahimong usa ka heneral. Ang Ginoo adunay laing mga plano alang ni Presidente Brown. Uban sa Ginoo isip iyang arketikto, ang kinabuhi ni Presidente Brown nahimong ubra nga estraktura.
Pagtukod sugod sa Uno
Kon tawagon ka sa usa ka propeta sa Dios nga “anak sa impyerno” mura og ang imong kinabuhi wala masubay sa maayo nga direksyon. Apan mao gayud kana ang nahitabo ngadto kang Zeezrom, usa ka abogado diha sa Basahon ni Mormon. (Tan-awa sa Alma 11:23.)
Si Alma ug Amulek nagsangyaw diha sa yuta diin si Zeezrom naningkamot nga makakwarta isip usa ka abogado pinaagi sa pagsulsol sa mga tawo batok nilang Alma ug Amulek. Si Zeezrom misulay sa paglit-ag ni Alma ug Amulek uban sa iyang mga pangutana, apan sila mitubag ug mibadlong kaniya. Ang mga hunahuna ni Zeezrom gipadayag ngadto kanila pinaagi sa Espiritu. (Tan-awa sa Alma 11–12.)
Samtang nagpadayon ang panag-istoryahanay, si Zeezrom nakalitan nga wala na katingog. Siya misugod sa pag-angkon sa iyang mga sayop ug mibati og grabeng kahasol sa konsensya tungod sa iyang mga sala ug sa iyang nabuhat sa pagpahisalaag sa mga katawhan. Dayon naningkamot siya sa pag-ayo sa mga kadaot nga iyang nahimo, nag-ingon, “Tan-awa, ako nasayop, ug kini nga mga tawo walay lama sa atubangan sa Dios” (Alma 14:7).
Apan kini wala magsilbi. Ang mga tawo mipapahawa ni Zeezrom gikan sa ilang siyudad. Ang iyang kasaypanan ug kasubo sa unsay iyang nabuhat—lakip ang usa ka sayop nga kahadlok nga ang iyang pagsangyaw batok kang Alma ug Amulek miresulta sa ilang kamatayon—maoy hinungdan nga si Zeezrom nagdaot uban sa taas kaayo nga hilanat, “misugod siya sa pagkasunog uban sa nagkayo nga kainit” (Alma 15:3).
Ang estraktura nga iyang gitukod sa iyang kinabuhi napulpog ngadto sa pundasyon niini. Apan wala diha matapos ang istorya bahin ni Zeezrom.
Sa higayon nga nahibaloan niya nga si Alma ug Amulek buhi pa, si Zeezrom nagbaton og kaisug ug mihangyo kanila sa pag-adto kaniya. Sa dihang miadto sila, si Zeezrom mihangyo nga ayohon. Pinaagi sa iyang hugot nga pagtuo si Zeezrom hingpit nga naayo. Siya dayon gibunyagan ug misugod gikan niana nga panahon sa pagsangyaw (tan-awa sa Alma 15:11–12).
Ang bag-o nga kinabuhi ni Zeezrom, niini nga panahon uban sa Dios isip iyang arketikto, nagsugod na.
Dili lang Kutob sa Martilyo ug Lansang
Ang maayong balita mao nga kita dili gayud angayan nga mag-inusara sa kinabuhi. Ang Dios gustong motabang kanato sa matag lakang. Ug kon tugutan nato Siya nga motabang, walay kinutuban kon unsay atong mahimo.