Unsa ang Atong Gituohan
Kita Nagtuo sa Pagkapositibo
Kita kanunay makakita og tambag sa mga kasulatan nga “managkalipay” ug “magmaya.” Ang Ginoo nagsulti kanato sa 2 Nephi 2:25, “Ang mga tawo naingon, nga sila unta makabaton og hingpit nga kalipay.” Ang katuyoan niini nga kinabuhi mao ang paggiya kanato ngadto sa hingpit nga kalipay nga gisaad sa Ginoo sa katapusan.
Ang pagmaya wala magpasabut nga ignorante o walay kasinatian sa mga hagit sa kinabuhi. Si Elder Neal A. Maxwell (1926–2004) sa Korum sa Napulog Duha ka mga Apostoles mihulagway sa pagmaya isip “usa ka lawom nga pagsalig sa gipakita nga mga katuyoan sa Dios—dili lamang alang sa tanan nga mga katawhan, apan alang sa matag usa kanato isip mga indibidwal.”1 Ang mga hagit siguradong moabut, kay kini natural nga bahin sa pagka-mortal, apan dili kita kinahanglan nga mabug-atan sa kasagmuyo ug kasub-anan. Mahimo natong ibutang ang atong pagsalig sa Ginoo ug mag-positibo.
Si Jesukristo misaad kanato nga kita makasinati og kalisdanan, apan Siya usab miawhag, “Sumalig kamo, gidaug ko na ang kalibutan” (Juan 16:33). Si Presidente Ezra Taft Benson (1899–1994) nagtudlo nga tungod kay ania nato ang ebanghelyo, “kita isip mga Santos sa Ulahing mga Adlaw mao unta ang labing malaumon ug dili kaayo negatibo.”2
Kitang tanan mobati og kasubo ug kasagmuyo sa matag karon ug unya, apan kita mahimo gihapon nga magmaya. Si Eder Richard G. Scott (1928–2015) sa Korum sa Napulog Duha ka mga Apostoles miingon, “Ako mosaksi nga uban sa hugot nga pagtuo sa Manluluwas ug sa pagsunod sa Iyang mga pagtulun-an, ang kalipay dili gayud mahuman, apan ang kaguol matapos.”3 Kita makapuyo uban sa hingpit nga kalipay nga nasayud nga ang atong “mga kasakitan sulod lamang sa mubo nga higayon” (D&P 121:7).
Samtang atong ibutang ang atong pagsalig sa plano sa Dios alang kanato ug mopili sa pagpuyo og positibo nga kinaiya, ang atong abilidad sa pag-atubang sa mga hagit sa kinabuhi molig-on. Ang atong mga kabalaka ug kahadlok dili na kaayo makaapekto kanato, ug kita makasinati sa hingpit nga kalipay nga Iyang gusto alang kanato.