Hangtud sa Sunod Natong Panagkita
Ang Sambingay sa Owl Express
Gikan sa “Tulo Ka mga Sambingay—Ang Dili Maalamon nga Buyog, ang Owl Express ug Duha ka Lampara,” Liahona, Peb. 2003, 36–41.
Naghunahuna ko pag-ayo sa mga pulong sa engineer nga nagkabulingit, nabulit sa lana.
Image © Hemera/Thinkstock, iStock/Thinkstock
Sa nag-eskwela pa ko sa kolehiyo, usa ko sa gitahasan sa paghimo og fieldwork agig kabahin sa among gikuhang kurso nga geology. …
Usa ka piho nga buluhaton nakapalayo kanamo sa siyudad sulod sa daghang mga adlaw. … Samtang nagkaduol ang katapusan sa gitakda nga panahon sa imbistigasyon, naunhan kami sa usa ka mabangis nga unos, gisundan sa bagang snow—talagsaon alang niana nga panahon ug wala damha, apan, bisan pa man, nagkakusog kini mao nga nameligro kami nga matanggong sa kabungturan gumikan sa snow. Ang unos migrabe og maayo samtang milusad kami sa usa ka taas ug tikmad kaayo nga bukid pipila ka milya gikan sa gamay nga estasyonan sa tren diin among gilauman nga makasakay mi og [usa ka] tren nianang gabhiuna para makauli. Uban sa dakong paningkamot nakaabot mi sa estasyonan lawom nang gabii samtang naghasi pa ang unos. …
… Ang tren nga amo gayud nga gipaabut ug gilauman mao ang Owl Express—usa ka tren nga paspas nga magbiyahean sa dagkong mga dakbayan. …
Milabay ang tungang gabii miabut ang tren nga mipahuros sa hangin ug snow. Nagpaluyo ko sa akong mga kauban samtang nagdali-dali sa pagpanakay sa tren, kay nadani ko og tan-aw sa engineer nga, atol sa kadiyot lang nga paghunong, samtang ang iyang alalay mitubil sa tubig, bisi kaayong miatiman sa makina, giasitihan ang ubang pyesa, gi-adjust ang uban pa, ug sa kinatibuk-an gi-intero sa pagsusi ug pag-adjust ang nagastar nga locomotive nga makina. Nangarisgar ko sa pakig-istorya kaniya, bisan sa iyang ka bisi. Nangutana ko kon unsay iyang gibati nianang gabhiuna—bangis, werdo, ug nanghasi, sa dihang ang mga gahum sa kalaglagan daw gibuhian, bisan asang dapit ug dili mapugngan, sa dihang ang unos nag-agulo ug ang kakuyaw nagpanghulga gikan sa matag suok. …
Iyang tubag usa ka leksyon nga dili mahikalimtan. Sa pagkatinuod siya miingon, bisan og nagkaputol putol nga pagkaistorya: “Tan-awa ang headlight sa makina. Dili ba makaiwag kana nga kahayag sa rilis sulod sa usa ka gatos ka yarda? [90 m] o sobra pa? Nan, ang akoa lang nga mabuhat mao ang pagtadlas nianang usa ka gatos ka mga yarda sa nahayagan nga rilis. Kana akong makita, ug alang niana nga gilay-on ako nasayud nga ang agianan makita ug luwas. … Ang kahayag sa makina kanunayng nag-una kanako!”
Samtang siya misaka na ngadto sa iyang draybanan, midali ko og saka sa tren; ug sa akong pagpahimutang diha sa humok nga lingkuranan, diha sa makapahimuot ug sa kinatibuk-an nga kakomportable, nakahatag og dako nga kalainan ngadto sa kabangis sa kagabhion diha sa gawas, naghunahuna ko pag-ayo sa mga pulong sa engineer nga nagkabulingit, nabulit sa lana Sila napuno sa hugot nga pagtuo—sa hugot nga pagtuo nga makakab-ot og dagkong mga butang, sa hugot nga pagtuo nga naghatag og kaisug ug determinasyon. …
Mahimong wala kita masayud unsay anaa sa unahan sa atong umaabut nga katuigan, bisan gani sa mga adlaw o lapas lang sa mga oras. Apan alang sa pipila ka yarda, o posible lamang og bisan mas mubo pa, ang dalan klaro, ang atong katungdanan yano, ang atong agianan gidan-agan. Sulod nianang mubo nga distansya, alang sa sunod nga lakang, gidan-agan sa inspirasyon sa Dios, padayon!