Igo na Ba ang Akong Pagtuon?

Matinud-anon akong nagbasa sa Basahon ni Mormon kada adlaw sukad pa sa akong pagkatin-edyer. Bisan sa mga gabii nga padulong nako sa pagkatulog ug gikapoy ug makaamgo nga wala pa ko makabasa nianang adlawa, kuhaon kini nako ug mobasa bisag pipila ka mga bersikulo.

Duha ka tuig na ang milabay ako gihangyo sa pagtudlo sa Daang Tugon sa sayo sa buntag nga seminary. Dili kaayo ko pamilyar sa Daang Tugon kay sa bisan hain nga basahon sa kasulatan, mao nga sa ubang mga adlaw ako mogahin og tulo ngadto sa upat ka oras sa pagtuon ug pag-andam sa akong mga leksyon. Tungod kay naggahin ko og daghang panahon sa pagtuon sa Biblia ug mga pagpadayag sa ulahing mga adlaw, mihunong ko sa pagbasa sa Basahon ni Mormon matag adlaw. Kami nagbasa niini isip usa ka pamilya inigka gabii, ug kini akong gamiton panagsa isip cross-reference, mao nga akong gibati nga igo na ang akong inadlaw nga pagtuon sa ebanghelyo.

Sa tunga-tunga sa tuig sa tingklase niadtong Enero, ang akong presidente sa stake mihagit sa tibuok stake sa pagbasa og usa ka kapitulo sa Basahon ni Mormon matag adlaw. Bisan kon naghunahuna ko kon unsaon nako pagpangita og panahon tungod sa hilabihang pagtuon sa seminary, mihukom ko nga akong dawaton ang hagit. Kinahanglan buhaton ko kini dili lamang sa paglig-on sa akong kaugalingon apan usab mopakita og ehemplo alang sa akong mga anak ug sa mga estudyante.

Gikan niana nga higayon ako mobasa og usa ka kapitulo gikan sa Basahon ni Mormon matag adlaw sa pagsugod nako sa pag-andam sa akong mga leksyon sa seminary o samtang nangandam sa pagkatulog. Ang espiritu ug gahum nga wala nako mahibaloi nga nawala mibalik sa akong kinabuhi. Ang akong mga leksyon sa seminary, nga maayo ra, nahimong mas maayo. Ang mga bahin sa Daang Tugon nga lisud sabton nahimong mas klaro. Ako usab nakaamgo nga ako mas nakasabut sa Basahon ni Mormon isip resulta sa hilabihang seryuso nga pagtuon nga akong gihimo sa mga propeta ug sa balaod ni Moises.

Ang pasiuna sa Basahon ni Mormon naglakip niini nga kinutlo gikan ni Propeta Joseph Smith: “Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.”

Ang Basahon ni Mormon naghiusa sa tanan nga mga bahin sa ebanghelyo ug naglangkob og usa ka gamhanan nga pagpamatuod ni Jesukristo ug sa plano sa kaluwasan. Nagtabang kini nga masabtan ang tanang butang sa akong kinabuhi. Mapasalamaton ako nga ang Basahon ni Mormon kabahin sa akong inadlaw-adlaw nga kinabuhi.