Umanhi ka, ug Sumunod Kanako: Pagtudlo sa mga Sukaranan diha sa Panimalay
Bahin 1
Ang mga tagsulat nagpuyo sa Utah, USA.
Ang kurikulum sa Dominggo alang sa kabatan-onan—Umanhi ka ug Sumunod Kanako—nagtudlo og usa ka sukaranan nga doktrina sa ebanghelyo matag bulan. Ania ang pipila ka mga paagi sa pagkat-on niadto nga mga baruganan sa doktrina sa inyong pamilya.
Naglingkod diha sa family home evening, ang usa ka inahan misugod pinaagi sa pagpangutana sa iyang duha ka mga anak, “Kanus-a man kamo mibati nga gigiyahan sa Espiritu?”
Ang iyang 17 anyos nga anak nga babaye mireklamo, “Katulo nako maleksyoni bahin sa Espiritu niining bulana.”
“Maayo, sa ato pa aduna na kay daghang ikatampo,” mitubag ang iyang papa. Dihay kahilom samtang si Mama ug Papa mapailubon nga mihulat sa ilang mga anak nga naghunahuna kabahin sa pangutana.
Sa katapusan, ang ilang 14 anyos nga anak nga lalaki mipakigbahin og kasinatian gikan sa eskwelahan nianang adlawa.
“Oo,” mitubag ang iyang inahan, “kana nakapahinumdom nako ni Nephi nga misunod sa Espiritu sa dihang wala siya masayud kon unsaon sa pagkuha sa mga palid gikan ni Laban.”
Ang iyang anak nga babaye mitingog, mipakigbahin kon giunsa niya pagsunod ang pag-aghat nga makig-istorya sa nag-inusara nga babaye diha sa bus. Ang iyang papa midayeg sa iyang desisyon ug miasoy sa iyang kasinatian sa trabahoan.
Ilang gitapos ang panaghisgutan pinaagi sa pagkanta sa “Let the Holy Spirit Guide” (Hymns, nu. 143).
Usa ka yano nga pamaagi sa pagtudlo—pagpakigbahin sa mga kasinatian mahitungod niini nga doktrina—nakahimo niini nga family home evening nga malampuson.
Kini nga artikulo naghatag og mga ehemplo gikan sa tinuod nga kinabuhi kon sa unsa nga paagi nga ang mga tawo nakat-on sa mga baruganan diha sa kurikulum sa kabatan-onan sa Dominggo, gihan-ay pinaagi sa bulan. Siyempre, kini nga mga ehemplo dili ang bugtong paagi sa pagkat-on mahitungod niining mga doktrina. Mahimo kang magtinguha sa inspirasyon alang sa mga panginahanglan sa imong pamilya.
Enero Ang Dios nga Kapangulohan
Ang mga sakop sa Dios nga Kapangulohan—ang Langitnong Amahan, si Jesukristo, ug ang Espiritu Santo—ang tulo ka managlahi nga personahe apan nagkahiusa sa katuyoan ug himaya.
Usa ka batan-ong babaye misulti sa pagkat-on mahitungod sa Dios nga Kapangulohan: “Importante kanako nga ang akong Langitnong Amahan, ang akong Manluluwas, ug ang Espiritu Santo managlahi nga mga Binuhat nga mahimo nakong mailhan sa tinagsa apan masunod sa pagkahiusa. Akong naamgohan uban sa pasalamat nga ako mahimong mahisama sa Dios tungod kay ang Dios nga Kapangulohan dili usa ka binuhat nga dili mahulagway ug dili masabut apan balaan nga mga Binuhat kinsa mohigugma, mopanalangin, mogiya, ug nakaila kanako.”
Sa pagtudlo niini nga doktrina, mahimo kamong maghisgut sa mga pangutana sama sa, “Unsa ang atong makat-unan gikan sa Dios nga Kapangulohan kabahin sa pagtrabaho nga magkahiusa?” o “Sa unsang paagi nga atong mapalig-on ang atong relasyon uban sa mga sakop sa Dios nga Kapangulohan?”
Ang pagtandi sa Juan 10:30 ug Doktrina ug mga Pakigsaad 50:43 mahimong moaghat sa maayong panaghisgutan ug mohatag og panabut mahitungod sa panaghiusa.
Pebrero Ang Plano sa Kaluwasan
Ang plano sa kaluwasan motubag sa labing sukaranan sa tawhanong mga pangutana, sama sa, “Kinsa ba ako?” ug “Unsa man ang katuyoan sa kinabuhi?” Ang pagpangutana sa atong kaugalingong mga pangutana ug pagpangita og mga tubag mahimong usa ka gamhanan nga paagi sa pagkat-on mahitungod sa plano sa kalipay sa Amahan.
Sama pananglit, usa ka batan-ong lalaki misugod sa iyang pagtuon sa kasulatan pinaagi sa pagpangutana, “Sa unsang paagi ang kinaiya sa Dios matandi ngadto sa mga kinaiya nga akong naangkon didto sa kinabuhi sa wala pa dinhi sa yuta? nga akong naangkon karon? nga akong gilauman nga maangkon sa sunod nga kinabuhi?” Siya misulat sa mga tubag niini nga mga pangutana samtang iya kining nakita sa mga kasulatan ug migamit niini sa pagtudlo sa uban mahitungod sa plano sa kaluwasan.
Unsay mga pangutana sa inyong mga anak mahitungod sa plano sa kaluwasan?
Marso Ang Pag-ula ni Jesukristo
Unsaon nato sa pagkat-on dili lamang sa Pag-ula ni Jesukristo apan usab sa sinsero nga paglaum sa Manluluwas nga atong gamiton ang Iyang Pag-ula diha sa atong mga kinabuhi?
Tungod kay kitang tanan nag-inusara, nakahimo og kasaypanan, ug nagkinahanglan og kalig-on, kitang tanan nagkinahanglan nga mas masabtan ug magamit ang Pag-ula. Usa ka tigtambag sa Young Women migamit og video aron sa pagtabang sa iyang klase nga mas makasabut sa Pag-ula sa Manluluwas.
Ania ang kasinatian sa usa ka batan-ong babaye:
“Kami nagtan-aw sa ‘None Were with Him’ (video, LDS.org). Samtang nagtukar ang plahuta [flute] og usa ka masulob-on nga tuno, ang tingog ni Elder Jeffrey R. Holland sa Korum sa Napulog Duha Ka mga Apostoles miingon, ‘Usa sa dakong kahupayan niining kasaulugan sa Pagkabanhaw mao nga tungod kay si Jesus mibaktas sa ingon ka taas, masulub-ong agianan nga nag-inusara, kita dili na kinahanglang mohimo pa sa ingon.’
“Ako mibati og kaulaw nga nagkinahanglan sa Pag-ula sa Manluluwas, apan kusganong nabati ang Espiritu, akong nabati ang paglaum sa Iyang Pag-ula nga hingpit nga mitangtang sa mga pagbati sa kahasol sa konsensya. Ang Ginoo mihatag sa Iyang kinabuhi alang kanako; Siya wala magbasol niini, ug ako dili usab magbasol.”
Tungod kay ang Pag-ula mao ang labing nindot nga panghitabo sa atong kaluwasan, kinahanglan kitang magtudlo ug makakat-on mahitungod niini uban sa giya sa Espiritu Santo. Tingali magiyahan kamo sa paghisgot sa mga kasulatan o sa apostolikong pagpamatuod sama sa “The Living Christ: The Testimony of the Apostles” (Liahona, Abr. 2000, 2). Hunahunaa ang paghisgot og pangutana sama sa, “Kanus-a ninyo nabati ang pag-ayo, paglig-on, o ang matubsanon nga gahum sa Pag-ula?”
Abril Dispensasyon, Apostasiya, ug Pagpahiuli
Imahe sa mga baso © moodboard/Thinkstock
Ang pagsabut sa Apostasiya—usa ka pagtalikod sa tinuod nga ebanghelyo—makatabang kanato nga makasabut sa panginahanglan alang sa usa ka pagpahiuli sa ebanghelyo, sa priesthood, ug sa Simbahan ni Jesukristo.
Ang mosunod nga leksyon nakatabang sa pipila ka mga misyonaryo sa pagtudlo sa usa ka investigator mahitungod sa Apostasiya ug sa Pagpahiuli.
“Ang akong kompanyon ug ako migamit og plastik nga baso nga gisulatan og uban nga mga bahin sa tinuod nga Simbahan, nagtukod og piramid uban niini samtang nagpasabut kon giunsa sa pagtukod ni Jesukristo ang Iyang Simbahan.
“Dayon among gipasabut ang Apostasiya samtang kami motangtang sa mga baso nga nagrepresentar sa mga Apostoles ug magtan-aw sa tibuok straktura nga mahugno. Samtang kami mipasabut sa Pagpahiuli sa ebanghelyo pinaagi ni Propeta Joseph Smith, among gipabarog pag-usab ang tori, sa pagpakita nga ang Simbahan karon giorganisar sa samang paagi nga si Kristo unang miorganisar niini.
“Sa unang higayon, kining tawhana nakasabut. Ang Pagpahiuli sa katapusan aduna nay kahulugan alang kaniya sa dihang iyang nasabtan nganong kini gikinahanglan.”
Adunay daghang mga paagi aron sa pagrepresentar sa pagpuli-puli sa dispensasyon, apostasiya ug pagpahiuli. Kamo mahimong mobasa sa mga tudling sa kasulatan kabahin niini nga mga hilisgutan ug mosunod sa mga aghat sa Espiritu aron makamugna sa inyong kaugalingong representasyon sa unsay inyong nakat-unan (tan-awa, pananglitan, Amos 8:11–12; 1 Nephi 13; D&P 136:36–38; Moses 5:55–59).
Mayo Mga Propeta ug Pagpadayag
Ang Ginoo naghunahuna gayud kabahin sa pakig-istorya kanato. Atong madawat ang Iyang paggiya sa atong mga kinabuhi pinaagi sa pagpadayag nga Iyang gihatag ngadto sa Iyang mga propeta ug ngari kanato sa personal nga paagi.
Sa kasagaran mas masabtan nato ang mga baruganan sa ebanghelyo kon atong itandi kini ngadto sa mga butang ug mga kasinatian sa matag adlaw nga kinabuhi. Usa ka batan-ong babaye naghisgot kon sa unsang paagi ang usa ka pagtandi nakatabang kaniya nga mamatikdan ang pagpadayag:
“Akong nakat-unan ang mahitungod sa pagpadayag pinaagi sa moderno nga propeta. Si Elder David A. Bednar sa Korum sa Napulog Duha ka mga Apostoles namulong sa espiritu sa pagpadayag ug mipasabut niini pinaagi sa usa ka pasumbingay sa kahayag. Usahay, ang pagpadayag kalit ug klaro sama sa pagpasiga sa suga sa ngitngit nga kwarto. Mas sagad, kini moabut sa hinay-hinay sama sa nagsubang nga adlaw nga nag-anam og kahayag. Kasagaran, si Elder Bednar miingon, ang pagpadayag sama sa kahayag sa gabunon nga adlaw. ‘Adunay igo nga kahayag nga inyong … makita igo lamang nga makalakang kamo sa unahan sa gabon’ (sa “Patterns of Light: Spirit of Revelation [Sumbanan sa Kahayag: Spirit of Revelation]” [video], LDS.org). Kini nga pasumbingay, samtang yano, nakatandog kaayo kanako tungod kay akong naamgohan nga ang pagpadayag magamit kon ako mogahin og panahon sa pagsabut niini.”
Samtang kita mogahin og panahon sa pagtuon sa mga pasumbingay, sambingay, ug mga simbolo, ang atong pagsabut sa doktrina magpadayon sa paglambo. Kining pamaagi sa pagtudlo makatabang kanato sa pagkat-on og dugang pa kon atong tugutan ang Espiritu nga mopadayag og bag-ong mga panglantaw ngari kanato.
Hunyo Ang Priesthood ug Mga Yawe sa Priesthood
Ang priesthood mao ang usa ka importante nga hilisgutan alang sa tanan. Kini mao ang gahum sa Dios ug makapanalangin kanatong tanan. Matag usa kanato adunay importante nga bahin sa buhat sa priesthood.
Pipila ka mga tawo dili pamilyar sa mga katungdanan, ug kasaysayan sa priesthood. Ang usa ka eksamin makalingaw nga paagi sa pagkat-on niini nga mga ideya.
Depende sa unsay inyong gusto nga makat-unan, kamo makagamit sa mosunod nga mga pangutana ug dapita ang inyong mga anak sa pagpangita og mga tubag diha sa mga kasulatan ug mga pagtulun-an sa modernong mga propeta.
-
Unsa man ang mga katungdanan sa Aaronic Priesthood? sa Melchizedek Priesthood?
-
Unsa ang mga yawe sa priesthood? Kinsa ang naghupot niini? Ngano nga ang mga yawe gikinahanglan?
-
Unsay kalainan tali sa mga katungdanan sa priesthood, awtoridad, ug gahum?
-
Sa unsang paagi nga ang priesthood makapanalangin sa mga lalaki ug mga babaye?
Ang mga tubag makita diha sa pakisayran nga mga basahon sama sa Mga Baruganan sa Ebanghelyo (2009) ug Matinud-anon sa Tinuhoan: Usa ka Pakisayran sa Ebanghelyo (2004) ug sa mga kasulatan sama sa Doktrina ug mga Pakigsaad 13, 20, ug 107.
Ang tubag sa katapusan nga pangutana, “Sa unsang paagi nga ang priesthood makapanalangin sa mga lalaki ug mga babaye?” makita diha sa mga kasulatan apan ang labing importante sa pagpamalandong sa unsa nga paagi kini nga doktrina makaapekto kanato sa personal nga paagi.