Mensahe sa Visiting Teaching
Ang Pamilya: Usa ka Pamahayag ngadto sa Kalibutan
Tun-i sa mainampuong paagi kini nga materyal ug tinguhaa nga masayud unsay angay nga ipakigbahin. Sa unsang paagi nga ang pagsabut sa doktrina sa pamilya makapanalangin niadtong inyong giamumahan pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Sa kinatibuk-ang miting sa Relief Society niadtong 1995, sa dihang si Presidente Gordon B. Hinckley (1910–2008) unang mibasa sa “Ang Pamilya: Usa ka Pamahayag ngadto sa Kalibutan,” si Bonnie L. Oscarson, kinatibuk-ang presidente sa Young Women, miingon: “Atong gipasalamatan ug gimahal ang ka klaro, kayano, ug kamatuoran niining pinadayag nga dokumento. … Ang pamahayag kalabut sa pamilya nahimong atong sukdanan sa paghukom sa mga pilosopiya sa kalibutan, ug ako magpamatuod nga ang mga baruganan … ingon ka tinuod karon sama kaniadto dihang kini gihatag kanato sa propeta sa Dios hapit 20 ka tuig na ang milabay.”1
“Gikan sa pamahayag sa pamilya,” midugang si Carole M. Stephens, unang magtatambag sa kinatibuk-ang kapangulohan sa Relief Society, “kita makakat-on, ‘Sa kinabuhi nga wala pa dinhi sa yuta, ang espiritu nga anak nga mga lalaki ug anak nga babaye nakaila ug nagsimba sa Dios ingon nga ilang Amahan sa Kahangturan’2 …
“… Tanan kita nahisakop ug gikinahanglan sa pamilya sa Dios .”3
Kita nagpuyo sa panahon nga ang mga ginikanan kinahanglang manalipod sa ilang mga panimalay ug sa ilang mga pamilya. “Ang Pamilya: Usa ka Pamahayag ngadto sa Kalibutan” makagiya kanato.
Dugang nga mga Kasulatan
Mga Buhi nga mga Sugilanon
“Si Lee Mei Chen Ho nga taga Tao Yuan Third Ward, Tao Yuan Taiwan Stake, miingon nga ang pamahayag nagtudlo kaniya nga ang mga relasyon sa pamilya makatabang sa pagpalambo og balaanong hiyas sama sa hugot nga pagtuo, pasensya, ug paghigugma. ‘Kon mosulay ko sa pagpalambo sa akong kaugalingon sumala sa pamahayag, makasinati ko og tinuoray nga kalipay,’ siya miingon.”4
Si Barbara Thompson, kinsa anaa sa dihang ang pamahayag gibasa sa unang higayon ug wala madugay miserbisyo isip magtatambag sa kinatibuk-ang kapangulohan sa Relief Society, miingon: “Naghunahuna ko sa makadiyot nga [ang pamahayag sa pamilya] wala kaayo magtumong kanako kay wala man ko maminyo ug walay mga anak. Pero ingon ako kadali nga naghunahuna, ‘Apan kini may kalabutan kanako. Ako sakop sa usa ka pamilya. Ako anak nga babaye, usa ka igsoon nga babaye, usa ka iyaan, usa ka ig-agaw, usa ka pag-umangkon, ug usa ka apo nga babaye. … Bisan kon ako lang ang buhi nga miyembro sa akong pamilya, ako miyembro gihapon sa pamilya sa Dios.’”5