Pagtulun-an human sa usa ka Pagtulun-an
2 Nephi 31:20
Ang tema sa Mutual niining tuiga makatabang kanato nga makita kon sa unsang paagi kita mahimong mopadayon sa unahan samtang nagbarug nga lig-on.
20 Busa, kamo kinahanglan gayud mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa, sa ingon miingon ang Amahan: Kamo makabaton ug kinabuhi nga dayon.
Paglahutay hangtud sa katapusan
“Ang pagsulay sa mahigugmaong Dios nga gihatag ngari kanato dili ang pagsuta kon kita makalahutay ba sa kalisud. Kini gisuta kon kita makalahutay ba og maayo. Kita makapasar sa pagsulay pinaagi sa pagpakita nga kita nahinumdum Kaniya ug sa mga sugo nga Iyang gihatag kanato.”
Presidente Henry B. Eyring, Unang Magtatambag sa Unang Kapangulohan, “Diha sa Gahum sa Ginoo,” Liahona, Mayo 2004, 17.
Kamo makabaton og kinabuhing dayon
Pinaagi sa Pag-ula ni Jesukristo, ang Amahan misaad kanato og kinabuhing dayon—aron mahisama Kaniya—kon kita mobuhat sa piho nga mga butang. Ania ang pipila sa mga kasulatan nga naghisgot og pipila niadto nga mga butanga:
Magbusog sa mga Pulong ni Kristo
“Ang pagbusog nagpasabut og labaw pa sa pagtilaw. Ang pagbusog nagpasabut og pagtagamtam. Atong tagamtamon ang mga kasulatan pinaagi sa pagtuon niini diha sa diwa sa maanindot nga pagdiskobre ug sa matinud-anon nga pagsunod. Kon kita magbusog sa mga pulong ni Kristo, kini … mahimong kabahin sa atong kinaiyahan.”
Presidente Russell M. Nelson, Presidente sa Korum sa Napulog Duha ka mga Apostoles, “Living by Scriptural Guidance,” Ensign, Nob. 2000, 17.
Usa ka gugma sa Dios ug sa tanang katawhan
“Usa ka gugma sa Dios ug sa tanan nga mga tawo” midala sa duha ka dagkong mga sugo (tan-awa sa Mateo 22:37–40). Laing pulong alang niini nga matang sa gugma mao ang gugma nga putli, o ang tiunay nga gugma ni Kristo (tan-awa sa Moroni 7:47).
Hingpit nga kahayag sa paglaum
“Samtang ang mahuyang nga paglaum mopaubos kanato diha sa pagbati ug mga panghitabo, ‘ang kahayag sa paglaum’ makapahimo sa mga indibidwal nga mapuno sa kahayag. Ang ilang pag-amag [luminosity] makita, ug ang mga butang makita usab pinaagi niini! … Usahay diha sa mangil-ad nga panahon walay makitang paglaum nga gikan sa kalibutan—usa ka tinubdan lamang diha sa kaugalingon aron sa paggiya ug sa pagsiguro.”
Elder Neal A. Maxwell (1926–2004) sa Korum sa Napulog Duha ka mga Apostoles, “Brightness of Hope,” Ensign, Nov. 1994, 35.
Padayon sa unahan
Unsa ang kinahanglan ninyong buhaton samtang kamo magpadayon sa unahan diha sa dalan sa kinabuhing dayon? Basaha unsa ang gibuhat sa mga tawo diha sa panan-awon ni Lehi sa kahoy sa kinabuhi (tan-awa sa 1 Nephi 8:30). Makahunahuna ba kamo sa laing mga ehemplo gikan sa mga kasulatan?
Pagkamakanunayon kang Kristo
Ang pagkamakanunayon nagpasabut sa pagbarog nga lig-on, dili matandog. Ang pagkamakanunayon diha kang Kristo nagpasabut og dili mapaling-paling nga hugot nga pagtuo diha Kaniya ug ang kamasulundon sa Iyang mga sugo, lakip ang pagdawat sa mga ordinansa ug paghimo ug pagtuman sa mga pakigsaad.