Mga Pagpamalandong
Dili mao ang Milagro nga Among Gusto
Ang tagsulat nagpuyo sa Utah, USA.
Usahay magsige kita og ampo hangtud manghapdos na ang atong mga tuhod alang sa milagro nga atong gusto, apan ang Dios maghatag kanato sa milagro nga atong gikinahanglan.
Sulod nalang sa pila ka bulan makahuman nako sa kolehiyo ug, naglaum ko, nga makaangkon na sa akong unang anak. Ang akong bana sama usab ka mahinamon nako sa pagsugod nga makabaton og mga anak.
Human sa usa ka tuig, upat ka bulan, dinusina nga negatibong pregnancy test, lima ka negatibong ovulation test, duha ka bulan sa makalolooy nga pagpatambal, ug pagpaagas og daghang mga luha, kami wala makaanak ug gamay ra ang paglaum nga manamkon sa natural nga paagi. Sa dihang nakadawat kami og tawag gikan sa opisina sa doktor ug mitanyag nga ipaila-ila kami ngadto sa usa ka espisyalista sa infertility, mibalibad kami. Makaugtas na kaayo para dugangan pa, nagkinahanglan kami og pahulay. Sa wala pa nako nabutang ang telepono, ang nurse miingon, “Tawagi mi kon kamo adunay usa ka milagro.”
Ang mga milagro, hinoon, milagruso. Moabut kini dako ug gamay. Moabut kini kon wala kaayo kita magdahum niini ug kon nagkinahanglan gayud kita niini. Ug usahay magsige kita og ampo hangtud manghapdos na ang atong mga tuhod alang sa milagro nga atong gusto, apan ang Dios maghatag kanato sa milagro nga atong gikinahanglan.
Sulod sa dugayng panahon nag-ampo kami og maayo alang sa usa ka anak, apan ingon og wala gayud kami nakadawat og tubag sa among pag-ampo. Sa katapusan nakaamgo kami nga nag-ampo kami alang sa sayop nga butang. Ang Dios nasayud unsa nga mga panalangin ang atong gikinahanglan ug kanus-a nato kini kinahanglana. Mas halapad ang Iyang panglantaw. Ang among gilantaw mao lang ang karon. Busa nag-usab kami. Mihunong mi sa pag-ampo alang sa unsay among gusto ug hinoon misugod sa pag-ingon nga “salamat.”
Langitnong Amahan, salamat sa Imong pagpanalangin kanamo sa usag-usa.
Salamat Kanimo alang sa maamumahon nga mga pamilya ug mga higala.
Salamat Kanimo alang sa mga bata libut kanamo nga kami malingaw hangtud nga kami adunay among kaugalingon.
Salamat Kanimo sa mga doktor ug siyensya nga nakatabang sa pagdiskobre sa unsay maayo ug dili maayo alang sa among mga lawas.
Ug (karon ang labing lisud nga butang nga isulti) salamat Kanimo alang niini nga pagsulay.
Ang magpasalamat alang sa butang nga maoy nakaingon sa among kagul-anan malisud, apan kami nasayud nga ang Langitnong Amahan nahigugma kanamo. Busa dinhi niini nga pagsulay may mga panalangin gihapon. Dili gayud namo makaplagan ang mga panalangin kon among itugot nga ang mga pagsulay mobuntog kanamo. Hinoon, mipili kami nga magmapasalamaton—ug sa dihang among gibuhat, ang mga panalangin naklaro:
Mas labaw kaming misalig sa usag usa, mas mipakigbahin sa among mga pagbati, mas naghinigugmaay sa usag usa.
Mas misalig kami sa Ginoo ug mas miampo.
Mas naduol kami sa Manluluwas, mas mibati sa Iyang presensya, mas nahigugma Kaniya.
Among gibati ang gugma sa pamilya ug mga higala kinsa nag-ampo alang kanamo.
Ug sa dihang among giila ang tanan niining mga panalangin, napuno kami sa labing lunsay, labing tam-is nga kalinaw nga mahunahunaan sa tawo.
Nga wala man tuod kami makabaton og usa ka pamilya wala magpasabut nga ang Dios wala magpakabana. Nagkinahanglan lang gayud kami nga mosalig sa Iyang tukma nga panahon, ug nagkinahanglan kami sa Iyang kalinaw aron kana nga pagsalig magpabiling buhi. Nagkinahanglan kami sa Iyang kalinaw sa paghupay sa nagmagul-anon namong kasingkasing ug hatagan kami sa hugot nga pagtuo aron makapadayon sa unahan.
Ang kalinaw mao ang milagro nga among gikinahanglan—dili ang milagro nga gisigihan namo og pangayo, apan ang usa nga gikinahanglan gayud namo.