Ikaw Nasayud nga Kini Tinuod!
Henry (Hank) Brown, Utah, USA
Paghulagway pinaagi ni Allen Garns
Usa ka adlaw samtang ako nagtrabaho sa usa ka department store sa Oakland, California, USA, usa ka higala mibisita ug midapit kanako sa panihapon. Siya miingon nga aduna siyay duha ka mga misyonaryo nga Mormon nga moapil kanamo.
Human sa panihapon ang mga misyonaryo mipahimutang og gamayng flannel board ug misugod sa pagpangutana kanako. Medyo nairitar ko og gamay. Gusto lang ko nga maminaw nila ug mobiya.
Sa pagtapos sa diskusyon, hinoon, ang usa ka batan-ong misyonaryo gikan sa Utah mibira sa iyang lingkuranan, mitan-aw kanako diha sa mata, mihatag kanako og Basahon ni Mormon, ug mihatag sa iyang pagpamatuod. Siya miingon nga siya nasayud nga ang Simbahan tinuod ug nga ako usab masayud pinaagi sa pagbasa sa basahon. Dayon siya mikutlo sa Moroni 10:4 ug miingon nga kon ako mangutana sa Dios sa kinasingkasing ug sa tinuod nga katuyoan, Siya mopakita sa kamatuoran sa basahon kanako pinaagi sa gahum sa Espiritu Santo.
Atol sa misunod nga semana ako mibasa sa pipila ka mga kapitulo, ug kami nagkita pag-usab sa balay sa akong higala. Human sa among ikatulo nga diskusyon, ang misyonaryo nga gikan sa Utah nahuman sa iyang misyon ug mipauli sa ilang panimalay.
Nagpadayon ko sa pagbasa ug sa pag-ampo matag gabii, nangutana kon ang basahon tinuod. Human sa pag-ampo sa usa ka gabii, mihigda ko sa higdaanan ug mibasa sa pipila ka dugang nga mga kapitulo. Sa kalit lang nakadungog ko og tingog nga misulti og upat ka yano nga mga pulong: “Ikaw nasayud nga kini tinuod!”
Wala pa gayud ako sukad nakadungog sa Espiritu nga mamulong ngari kanako. Apan ako nasayud dayon nga ang Dios nakaila kanako ug nahigugma kanako. Nabuntog ko sa emosyon nga dili nako kapugngan ang akong mga luha. Nasayud ko nga kinahanglan magpasakop ko sa tinuod nga Simbahan ni Jesukristo. Usab akong nasabtan kon sa unsang paagi nga ang batan-ong misyonaryo nga gikan sa Utah nakaingon nga siya nasayud nga ang Simbahan tinuod.
Nagpasakop ko sa Simbahan ug sa wala madugay nagminyo sa usa ka matahum nga batan-ong babaye sa Templo sa Oakland California. Aduna na kami walo ka mga anak ug mipuyo sa California sulod sa 33 ka tuig sa wala pa mobalhin ngadto sa Utah.
Pipila ka tuig ang milabay samtang ang among kinamanghuran nga anak nga babaye nag-andam sa pagbiya alang sa iyang misyon, siya nangutana kon ako ba naningkamot sa pagkontak sa batan-ong misyonaryo kinsa mitudlo kanako.
“Naghunahuna ko kabahin niya sulod niining katuigan,” ako mitubag, “apan wala ko kahibalo kon unsaon sa pagkontak kaniya.”
Sulod sa 10 minutos nga pagpangita miduol siya nako ug miingon, “Ania ang iyang numero sa telepono.”
Sa dihang mitawag na ko, nagka-istorhanay kami og dugay. Nangayo siya sa akong email address aron siya “makapahibalo nako sa mga panghitabo sa iyang kinabuhi.” Sa iyang email sa sunod nga adlaw, siya misulti nako nga dili na siya miyembro sa Simbahan kapin na sa 40 ka tuig ug nanghinaut nga dili ko mahiubos.
“Unsaon nako pagkahiubos?” Diha-diha dayon nag-email ako og balik niya. “Ikaw ang nakapausab sa akong kinabuhi!”
Nagbinayloay mi og mas daghang email ug nagkasabut nga magkita. Sa wala madugay mibisita ko sa iyang panimalay, diin siya mipadayon kanako ug mipaila-ila kanako sa iyang asawa. Samtang kami nag-istoryahanay kabahin sa among nangagi, nangutana ko niya kon siya aduna bay Basahon ni Mormon. Misaka siya sa taas ug mibalik dala ang usa ka kopya. Akong gikuha ang basahon, mitan-aw kaniya sa mga mata, gitunol ang basahon balik ngadto kaniya, ug miingon: “Ako nasayud nga kining basahon tinuod! Kon ikaw mobasa sa Moroni 10:4 ug mag-ampo mahitungod niini, ikaw usab makaangkon og pagpamatuod sa katinuod niini.”
Sa misunod nga pipila ka bulan, siya mibasa, nag-ampo, ug naghinulsol. Sa wala madugay ang iyang 18 anyos nga anak nga lalaki mibunyag pag-usab niya, ug ako napanalanginan sa pagkumpirmar kaniya.
Ako nasayud nga ang akong anak nga babaye nadasig sa pagpangutana, ug ako nasayud nga ang Langitnong Amahan miandam namong duha aron magtagbo pag-usab human sa 45 ka tuig. Ako nakat-on sa gahum sa Basahon ni Mormon. Ako nakat-on usab nga dili gayud moundang sa usa ka tawo kinsa nahilayo sa Simbahan.