Pagpangita sa Akong Agianan agi sa mga Gabon sa Kangitngit
Juventa Vezzani, California, USA
Paghulagway pinaagi ni Stan Fellow
Pipila ka tuig ang milabay miagi ko og usa ka ngitngit nga panahon sa akong kinabuhi. Nag-atubang ko og daghang lisud nga mga hagit, ug ako mibati og kaluya ugnalabian sa bug-at nga palas-anon.
Sa simbahan usa ka Dominggo niana, ako mitan-aw sa palibut sa tanan nga malipayong mga pamilya nga nanganta sa mga himno ug nagtagamtam sa gugma sa Dios. Gusto ko nga mobati sa samang paagi, apan mibati ko og pisikal nga kalainan.
Akong gibati ang Espiritu kaniadto, apan wala na nako mabati pipila na ka higayon karon. Sama sa panan-awon ni Lehi nga kahoy sa kinabuhi, mibati ko nga hingpit nga gilibutan sa gabon sa kangitngit—dili gani ko makakita sa kahoy (tan-awa sa 1 Nephi 8:2–24).
Sa dihang nagsugod na ang pag-ampo sa sakrament, mipiyong ko sa akong mga mata ug mihangyo sa Langitnong Amahan, nangaliyupo alang sa kasiguroan sa Iyang gugma. Ako nangutana Kaniya nganong ako dili makatilaw sa bunga sa kahoy sa kinabuhi.
Samtang namalandong ko sa damgo ni Lehi, duna koy naamguhan nga lisud kaayo. “Nganong wala ako makahinumdom niini kaniadto?” Naghunahuna ko. Ang paglakaw agi sa mga gabon sa kangitngit usa ka hingpit nga normal nga bahin sa plano sa Dios. Gitugot niya nga makasinati kita sa kalisud matag karon ug unya aron nga kita hingpit makasalig Kaniya ug sa Iyang Anak. Ang importanteng buhaton mao ang paggunit sa gunitanan nga puthaw. Nakita gihapon nako ang akong kaugalingon diha sa mga gabon sa kangitngit, apan ako adunay paglaum.
Samtang kining impresyon mibiya sa akong hunahuna, akong gibati ang usa ka matam-is nga kasiguroan gikan sa Espiritu Santo nga ang akong mga pagsulay molabay. Ang Espiritu mipamatuod nga ang Langitnong Amahan anaa. Akong gipahiran ang luha sa akong mga mata, mapasalamaton nga nabati nako ang Espiritu sa pag-usab.
Misugod ako sa pagbasa sa mga kasulatan. Ako aduna pa gihapoy daghang malisud nga mga adlaw, apan ako adunay hugot nga pagtuo nga kon ako mogunit sa gunitanan nga puthaw—sa pulong sa Dios (tan-awa sa 1 Nephi 11:25)—ako pagabuhian gikan sa mga gabon sa kangitngit. Dili ko sigurado kanus-a kini mahitabo, apan moabut ang adlaw nga ako makatilaw pag-usab sa gugma sa Dios. Sama kini sa mainit nga kahayag sa adlaw human sa usa ka taas nga tingtugnaw.
Samtang ako nanlimbasug panagsa sa mga hagit sa kinabuhi, akong nahinumduman ang akong saad sa paggunit og hugot sa gunitanang puthaw pinaagi sa pagtuon sa mga kasulatan ug sa mga pulong sa mga propeta. Ako nasayud nga kon moabut ang mga gabon sa kangitngit, duna koy mga himan nga gikinahanglan aron makita ang akong agianan agi niini ug sa saad sa usa ka mainit nga salo-salo sa pikas bahin niini.