Ang Halad sa Puasa ni Wilford
Ni Elder Chi Hong (Sam) Wong
Sa Seventy
Usa ka adlaw akong nakita ang akong kinamagulangan nga anak, si Wilford, nga nag-andam og sobre sa ikapulo. Siya tingali mga singko anyos pa niadtong higayuna. Wala pay kinitaan si Wilford, mao nga nahibulong ko nganong mobayad siya og ikapulo. Sa dihang nangutana ko niya, misulti siya kanako nga siya nagbayad sa halad sa puasa.
Si Wilford walay kwarta. Apan siya malipay gihapon mobayad og halad sa puasa.
Nadasig ako niini nga buhat sa pagkamabination. Ako nangutana kaniya nganong siya mihukom sa pagbuhat niini.
Mitubag si Wilford, “Wala koy bisan unsa nga mga panginahanglan. Apan ako nasayud nga ang uban aduna.” Siya nasayud nga ang iyang kwarta makatabang sa mga tawo. Siya nalipay kaayo kabahin niana.
Kining yano nga kasinatian nagtudlo kanako og usa ka maayong leksyon: ang mga bata nahiangay sa Espiritu ug adunay natural nga Kristohanong gugma. Si Wilford adunay usa ka butang nga wala niya kinahanglana ug nasayud nga kini makatabang sa ubang mga tawo. Siya andam nga mohimo og sakripisyo.
Ang pagtigum og kwarta maayo. Apan ang akong batan-ong anak nagtudlo kanako og laing leksyon pinaagi sa iyang ehemplo. Pinaagi sa pagpaminaw sa Espiritu, kita makapanalangin sa kinabuhi sa uban kon kita mopakigbahin sa unsay anaa kanato.