Mensahe sa Unang Kapangulohan
Kalipay alang Niadtong Atong Gihigugma
Ni Presidente Henry B. Eyring
Unang Magtatambag sa Unang Kapangulohan
Kitang tanan gusto nga malipay kadtong atong gihigugma, ug gusto nga sila dili kaayo masakitan kutob sa mahimo. Samtang basahon nato ang mga istorya sa kalipay—ug kasakit—diha sa Basahon ni Mormon, ang atong mga kasingkasing matandog samtang maghunahuna kita sa atong mga minahal. Ania ang usa ka tinuod nga istorya sa usa ka panahon sa kalipay:
“Ug nahinabo nga walay panagbingkil diha sa yuta, tungod sa gugma sa Dios nga anaa sa mga kasingkasing sa mga katawhan.
“Ug wala nay mga kasina, ni panagbangi, ni kagubot, ni malaw-ay nga mga buhat, ni mga pamakak, ni mga pagbuno, ni bisan unsa nga matang sa pagkamaulagon; ug sa pagkamatuod wala nay mga katawhan nga labaw pa ka malipayon sa tanan nga mga katawhan nga gilalang sa kamot sa Dios.”
Dayon atong mabasa:
“Ug pagkabulahan kanila! Kay ang Ginoo mipanalangin kanila sa tanan nila nga mga kalihokan; oo, sila gipanalanginan ug gipauswag hangtud milabay ang usa ka gatus ug napulo ka mga tuig; ug ang unang kaliwatan gikan kang Kristo namatay na, ug wala nay panagbingkil sa tibuok yuta” (4 Nephi 1:15–16, 18).
Ang mahigugmaon nga mga disipulo ni Kristo mag-ampo ug motrabaho alang sa ingon niana nga panalangin alang sa uban ug sa ilang mga kaugalingon. Gikan sa istorya sa Basahon ni Mormon ug, sa kadaghanan nato, gikan sa atong kaugalingong kasinatian, kita nasayud nga ang gasa sa kalipay makab-ot. Kita nasayud nga ang dalan sa kalipay maayo pagkamarka. Kita usab nasayud nga ang pagmintenar sa kalipay dili sayon gawas kon, sama sa mga Nephite human sa pagbisita sa Manluluwas, “ang gugma sa Dios” nagpabilin sa atong mga kasingkasing.
Kana nga gugma diha sa mga kasingkasing sa mga Nephite tungod kay sila mituman sa balaod nga nakapaposible niini. Ang summary niana nga balaod makita diha sa mga pag-ampo sa sakrament, diin nagsugod sa kinasingkasing nga pagpangamuyo ngadto sa atong mahigugmaong Langitnong Amahan. Kita mag-ampo uban sa usa ka kasingkasing nga puno sa hugot nga pagtuo, ug uban sa usa ka dakong paghigugma alang, sa atong personal nga Manluluwas. Mopasalig kita sa tinuod nga katuyoan sa pagdala diha kanato sa Iyang ngalan, sa paghinumdom Kaniya, ug sa pagsunod sa Iyang mga sugo. Sa katapusan, atong gamiton ang hugot nga pagtuo nga ang Espiritu Santo, ang ikatulo nga sakop sa Dios nga Kapangulohan, kanunay nga magauban kanato, nga nagpamatuod sa atong mga kasingkasing sa Amahan ug sa Iyang Hinigugmang Anak. (Tan-awa sa D&P 20:77, 79.)
Sa pagpakig-uban sa Espiritu Santo, ang atong mga kasingkasing mausab aron kita buot ug mo-welcome sa gugma sa atong Langitnong Amahan ug ni Ginoong Jesukristo. Ang paagi aron ang gugma sa Dios mosulod sa atong mga kasingkasing yano ra, sama sa paagi nga mawala ang pagbati niana nga gugma sa atong mga kasingkasing. Sama pananglit, mahimong ang usa ka tawo mopili nga dili kaayo mag-ampo sa Langitnong Amahan o dili mobayad og hingpit nga ikapulo o mohunong sa pagbusog sa pulong sa Dios o pagbaliwala sa mga kabus ug timawa.
Ang bisan unsang pagpili sa dili pagtuman sa mga sugo sa Ginoo makapabiya sa Espiritu gikan sa atong mga kasingkasing. Uban niana nga pagkawala, ang kalipay makuhaan.
Ang kalipay nga gusto nato alang sa atong mga minahal nag-agad sa ilang mga pagpili. Bisan og gihigugma nato ang usa ka bata, usa ka investigator, o ang atong mga higala, dili kita makapugos kanila sa pagtuman sa mga sugo aron sila mokwalipay sa Espiritu Santo sa pagtandog ug pag-usab sa ilang mga kasingkasing.
Busa ang labing maayong tabang nga atong mahatag mao ang paggiya niadtong atong gihigugma sa pagbantay sa ilang kaugalingong mga pagpili. Gibuhat kini ni Alma uban sa usa ka pagdapit nga mahimo ninyong itanyag:
“Magpaubos sa inyong mga kaugalingon sa atubangan sa Ginoo, ug motawag sa iyang balaan nga ngalan, ug magbantay ug mag-ampo sa kanunay, nga kamo mahimo nga dili matintal labaw niana nga kamo makalahutay, ug sa ingon giyahan pinaagi sa Balaang Espiritu, magmapainubsanon, magmaaghup, masinugtanon, mapailubon, puno sa gugma ug mainantuson;
Mag-angkon og hugot nga pagtuo diha sa Ginoo; mag-angkon og paglaum nga kamo makadawat og kinabuhi nga dayon; mag-angkon og gugma sa Dios sa kanunay diha sa inyong mga kasingkasing, nga aron kamo bayawon sa katapusan nga adlaw ug makasulod ngadto sa iyang kapahulayan” (Alma 13:28–29).
Ako nag-ampo nga kadtong inyong gihigugma modawat sa usa ka dinasig nga pagdapit sa pagpili sa dalan sa mahangturong kalipay.