Ang Pagkaila sa Dios nga Kapangulohan
Ni Elder Jeffrey R. Holland
Sa Korum sa Napulog Duha ka mga Apostoles
Gikan sa pakigpulong, “Ang Dios nga Kapangulohan,” nga gihatag atol sa seminar sa bag-ong mga presidente sa misyon sa Provo Missionary Training Center niadtong Hunyo 23, 2013.
Kita kinahanglan nga makaila niining Balaan nga mga Binuhat kutob sa atong mahimo. Kita kinahanglang mahigugma Kanila, magpaduol Kanila, mosunod Kanila, ug maningkamot nga mahisama Kanila.
Unang Panan-awon, ni Walter Rane
Si Propeta Joseph Smith miingon, “Kini ang unang baruganan sa ebanghelyo nga makahibalo sa kasigurohan sa kinaiya sa Dios.”1 Dugang pa, siya miingon, “Ako gusto nga kamong tanan makaila Kaniya, ug makasinati Kaniya.”2 Kita kinahanglan nga adunay “usa ka sakto nga ideya sa iyang … kahingpitan, ug mga hiyas” ug pagdayeg alang sa “kahamili sa [Iyang] kinaiya.”3
Gusto nakong palapdan ang hagit sa Propeta ngari kanato ug moingon nga kita ug ang atong mga misyonaryo, ang atong mga miyembro, ug atong mga investigator kinahanglan nga siguradong makahibalo sa kinaiya sa mga sakop sa Dios nga Kapangulohan. Kita kinahanglan adunay sakto nga ideya sa Ilang indibidwal nga kahingpitan ug mga hiyas ug pagdayeg alang sa kahamili sa Ilang personal nga kinaiya.
Dili sulagma nga ang unang artikulo sa atong hugot nga pagtuo mao ang “Kami nagtuo sa Dios, ang Amahan sa Kahangturan, ug sa Iyang Anak, si Jesukristo, ug sa Espiritu Santo” (Mga Artikulo sa Hugot nga Pagtuo 1:1). Ang mensahe klaro alang sa tanan nga motudlo sa ebanghelyo. Walay hinungdan ang paghisgot sa ubang mga kamatuoran nga atong gituohan kon wala masulod sa atong mga hunahuna ug sa mga hunahuna niadtong atong gitudloan ang labing importante nga tahas sa Dios nga Kapangulohan diha sa atong doktrina ug sa atong mahangturong kapalaran. Kita kinahanglan nga makaila niining Balaan nga mga Binuhat kutob sa atong mahimo. Kita kinahanglang mahigugma Kanila, magpaduol Kanila, mosunod Kanila, ug maningkamot nga mahisama Kanila.
Kon kita modala og mga tawo ngadto sa Simbahan, wala nato sila bunyagi ngadto sa Simbahan sa usa ka tawo, bisan kanang tawhana mao si Joseph Smith o si Brigham Young o si Thomas S. Monson—bisan kon gitahud nato kadto nga mga propeta. Ug kita wala magbunyag kanila ngadto sa Simbahan sa malipayong pamilya o sa Mormon Tabernacle choir.
Kon kita modala og mga tawo ngadto sa Simbahan, gibunyagan nato sila pinaagi sa pangalan sa Amahan, ug sa Anak, ug sa Espiritu Santo. Sa pagbuhat niini, gigiyahan nato sila balik ngadto sa presensya sa Amahan pinaagi sa pangalagad, Pag-ula, ug grasya sa Iyang Anak, uban sa impluwensya sa Espiritu Santo nga naggiya kanila niini nga tumong. Kinahanglan atong isipon kanunay sa atong mga hunahuna ang hilabihan nga pagkaimportante sa Dios nga Kapangulohan isip usa ka tumong ug paagi sa pagkab-ot niana nga tumong samtang kita nagpahigayon sa buhat sa kaluwasan.
Kon, sama sa gitambag ni Haring Benjamin, kita tinud-anay nga nakaila niining Balaan nga mga Binuhat nga atong gialagaran ug nakasiguro nga Sila dili mga langyaw ngari nato ug dili layo gikan sa mga hunahuna ug katuyoan sa atong kasingkasing (tan-awa sa Mosiah 5:13), nan kita makabaton sa mga resulta nga nasinati ni Haring Benjamin. Ug unsa kadto? Ang iyang mga katawhan nakasinati og “dako nga kausaban,” “wala nay hilig sa pagbuhat og dautan, apan sa pagbuhat og maayo sa kanunay”, ug “mauyunon sa pagsulod ngadto sa usa ka pakigsaad … sa pagbuhat sa kabubut-on [sa Dios], ug magmasulundon sa iyang mga sugo diha sa tanan nga mga butang nga siya [kinahanglan] mosugo [kanila], sa tanan nga nahibilin sa [ilang] mga adlaw” (Mosiah 5:2, 5).
Wala: Diha sa Pag-alagad sa Inyong Dios, ni Walter Rane, sa maayong kabubut-on sa Church History Museum; tuo: detalye gikan sa Bunyag, ni J. Kirk Richards
Mao kana ang epekto sa mga pagtulun-an ni Haring Benjamin diha sa iyang kongregasyon, ug kini usa ka hingpit nga kahulugan sa tinuod nga kalamboan sa atong mga kinabig nga atong gihatagan og gibug-aton samtang atong i-establisar ang Simbahan sa “tibuok kalibutan” (Marcos 16:15).
Sama sa gitudlo sa Manluluwas Mismo, ang misyonaryo nga buhat—ang buhat sa kaluwasan—sama sa usa ka pukot nga gitaktak ngadto sa usa ka nagkalapad nga kalibutan sa mga kanasuran, kultura ug katawhan. Sa ingon, pundukon nato, sama sa gisulti sa sambingay, mga isda “nga nagkalainlain” (Mateo 13:47). Daghan niadtong mga “isda” sa nagkadaghan nga mga dapit nga atong gisangyawan sa ebanghelyo wala makaila kinsa ang Dios o kon unsa nga matang Siya sa Pagkaamahan; wala sila makaila kinsa gayud si Jesukristo o ngano nga ang Iyang pangalan mao lamang ang pangalan nga gihatag sa silong sa langit nga pinaagi niini maluwas kita (tan-awa sa Mga Buhat 4:12); sila wala makaila kinsa ang Espiritu Santo o nganong kini nga sakop sa Dios nga Kapangulohan “gipadala aron sa pagtudlo sa kamatuoran” (D&P 50:14).
Kahibalo kabahin sa Dios nga Kapangulohan
Siyempre, adunay daghang laing mga butang nga wala mahibaloi niini nga mga tawo nga nagpundok, apan aron sila modawat sa gipahiuli nga ebanghelyo ug sa tinud-anay makakita sa kaluwasan alang sa ilang mga kalag, kinahanglang magsugod kini sa kahibalo ug pagsabut sa mga sakop sa Dios nga Kapangulohan. Sa katapusan, “ang tinuod ug makaluwas nga pagsimba makita lamang niadtong kinsa nasayud sa kamatuoran mahitungod … sa Dios nga Kapangulohan ug kinsa nakasabut sa tinuod nga relasyon nga kinahanglan anaa sa mga tawo uban sa matag sakop sa [unsay gitawag sa usa sa mga Kaigsoonan] nga Mahangturon nga Kapangulohan.”4
Si Elder Bruce R. McConkie (1915–85) sa Korum sa Napulog Duha Ka mga Apostoles mipahinumdom kanato nga si Lucifer nakasabut sa kaimportante sa ingon nga doktrina, bisan kon kita wala. Siya miingon:
“Walay kaluwasan sa pagtuo … sa sayop nga doktrina, ilabi na sa sayop o dili maalamon nga pagsabut sa Dios nga Kapangulohan o sa bisan kinsa nga mga sakop niini. …
“Dayon ang yawa mas mopakatap og sayop nga doktrina kabahin sa Dios ug sa Dios nga Kapangulohan, ug mohimo og sayop nga mga pagbati kalabut sa bisan hain kanila, kay sa bisan unsa nga butang nga iyang mahimo.”5
Mao nga walay investigator ang magpasakop niini nga Simbahan uban sa tinuod nga pagpamatuod, uban sa tinuod nga pagkakabig, sa unsay atong gitinguha ug nagtawag og tinuod nga paglambo sa matag kinabig, gawas kon siya adunay bisan gamay sa sinugdanan sa pipila ka personal, espirituhanon, tinuod nga kasinatian uban sa Dios. Kana nga matang sa tinuod nga kasinatian moabut lamang kon nakaamgo nga Siya usa ka tinuod nga binuhat, usa ka aktwal nga tawo, usa ka literal nga Amahan sa unod ug bukog kinsa mamulong ug makakita ug mobati, kinsa nakaila sa mga pangalan sa Iyang tanang mga anak ug sa tanan nilang panginahanglan, kinsa maminaw sa ilang tanan nga mga pag-ampo, ug gusto nga ang tanan Niyang mga anak anaa sa Iyang Simbahan. Kini nga mga investigator kinahanglan nga masayud nga Siya adunay plano alang sa ilang kaluwasan ug nga Siya mihatag sa mga sugo aron kita makakita sa dalan balik ngadto Kaniya.
Ang usa ka Dios kinsa nag-amuma kanila sama ka malumo sa pag-amuma sa ginikanan sa usa ka bata dili mahimong usa ka tawo sa kalangitan nga walay porma o walay pagpakabana nga tag-iya sa kalibutan. Kinahanglang mailhan Siya kon unsa gayud Siya—usa ka maloloy-on, mapuanguron nga Amahan, kansang panagway sama sa matag usa sa Iyang mga anak ug moabut ang adlaw nga kitang tanan moatubang pag-usab—ug dayon moluhod! Pipila sa atong mga investigator makahibalo niana nga matang sa Dios karon, miyembro man sila o dili sa modernong Kristiyano nga mga simbahan.
Kabahin niana, labing importante nga ang leksyon 1 sa Isangyaw ang Akong Ebanghelyo nagsugod uban sa yanong pamahayag nga “ang Dios mao ang atong Langitnong Amahan.”6 Niana nga leksyon ang unang angay nga masayran sa mga misyonaryo diha sa matag tawo nga gitudloan mao ang unsay ilang nasabtan kabahin sa tinuod nga kinaiya sa Dios.
Kon ang mga misyonaryo adunay tukma nga pagsabut kon unsa ang Dios diha sa mga hunahuna ug mga kasingkasing sa ilang mga investigator sa sinugdanan sa ilang mga pagtudlo, sayon ra nga masabtan ang tanang panudlo nga mosunod.
Ang Misyon ug Mensahe ni Jesukristo
Wala: Diha sa Pag-alagad sa Inyong Dios, ni Walter Rane, sa maayong kabubut-on sa Church History Museum; tuo: detalye gikan sa Bunyag, ni J. Kirk Richards
Sa samang paagi, ang elder, sister, ug investigator kinahanglan nga mas makasabut pa kay sa ilang nahimo na sa kahalangdon sa misyon ug mensahe ni Jesukristo, kinsa nanaog gikan sa Amahan ug nagtudlo unsay gitudlo sa Amahan Kaniya. Ang tanan kinahanglang makaamgo nga si Jesus mianhi sa pagkamortal aron ipakita kanato ang dalan, ang kamatuoran, ug ang kinabuhi. Sa pagkatinuod, Siya mao ang bugtong paagi, ang tibuok kamatuoran, ug ang hingpit nga kinabuhi. Sa ingon, Siya mao ang bugtong anak sa tawhanong pamilya nga ang Amahan hingpit ug kompletong makasulti, “Kini mao ang akong Anak nga pinalangga, nga kaniya may kalipay ako” (Mateo 17:5).
Kinahanglan kita nga adunay hugot nga pagtuo kang Kristo, mosalig nga Siya mitubos kanato gikan sa kamatayon sa pisikal nga paagi ug ang impyerno sa espirituhanong paagi, modawat sa Iyang Pag-ula isip ang bugtong paagi sa pagpakig-uli sa atong mga kaugalingon sa atubangan sa Dios, ug moila nga walay laing dalan sa kaluwasan. Kon kinahanglang matubos ang kalibutan, kinahanglan kining moluhod ug mokumpisal nga si Jesus mao ang Kristo, ang buhing Anak sa buhi nga Dios. Kinahanglan kitang motudlo uban sa hugot nga pagtuo ug kadasig sa “doktrina ni Kristo” (Mga Hebreohanon 6:1; 2 Juan 1:9; 2 Nephi 31: 2, 21; 32:6; Jacob 7:2, 6) sumala sa gipahayag sa mga kasulatan ug sa gi-summarize sa leksyon 3 sa Isangyaw ang Akong Ebanghelyo.
Ang mga investigator nga atong gipangita kinahanglan nga masayud nga ang Espiritu Santo mao ang sakop sa Dios nga Kapangulohan diin sila sa kanunay adunay suod nga relasyon samtang sila modawat sa mga misyonaryo ug mag-ampo alang sa langitnon nga giya kabahin sa ilang mensahe. Kini ang sakop sa Dios nga Kapangulohan kinsa mogiya sa mga investigator ngadto sa kamatuoran ug dayon mosaksi niana nga kamatuoran kon masugatan nila kini. Ang mga investigator kinahanglang tudloan sa pag-ila sa Espiritu kon kini magpabatyag atol sa mga leksyon. Sigurado nga ang mga misyonaryo kinahanglang makasabut sa balaanong tahas sa Espiritu Santo sa proseso sa pagkakabig ug kinahanglan nga maningkamot sa pagdala sa Espiritu uban kanila sa tanang panahon.
“Ngadto sa unsa kamo gi-orden?” nangutana ang Ginoo. “Sa pagsangyaw sa akong ebanghelyo pinaagi sa Espiritu, gani ang Maghuhupay gipadala aron sa pagtudlo sa kamatuoran. …
“Busa, siya nga nagsangyaw [pinaagi sa Espiritu] ug siya nga nakadawat [pinaagi sa Espiritu], nakasabut sa usag usa, ug ang duha makadawat og kaayohan ug maglipay nga maghiusa” (D&P 50:13–14, 22).
Kita makasiguro gayud nga kini dili maayo—alang sa mga misyonaryo o sa ilang mga investigator—kon dili nato tarungon pagtudlo bahin sa Dios nga Kapangulohan. Kinahanglang dili kita motudlo kabahin sa mortal nga mga lider sa dili pa kita motudlo ug mopamatuod sa celestial nga mga lider. Kinahanglang dili kita mosulay sa pagtudlo sa nagsuportang mga kamatuoran kon wala pa nato matudlo ang sukaranang mga baruganan. Kinahanglan dili kita magdalidali sa bunyag ug sa tumong sa pagdala sa bag-ong kinabig ngadto sa Simbahan sa wala pa kita makatudlo sa tinuod nga hugot nga pagtuo sa Dios, makapasabut sa mga panginahanglan sa tinuod nga paghinulsol diha kang Kristo, ug nakasiguro nga ang importanting sinugdanan sa nagtubo nga pagpamatuod sa usa ka kinabig nagpabiling lig-on pinaagi sa maamumahong impluwensya sa Espiritu Santo.
Kalibug sa Kristiyano
Kabahin sa talagsaong kinaiya niining Balaang mga Binuhat, ang mga pagpadayag sa ulahing mga adlaw nagtudlo nga “ang Amahan adunay lawas nga unod ug mga bukog nga mahikap ingon sa tawo; ang Anak usab; apan ang Espiritu Santo walay lawas nga unod ug mga bukog, apan usa ka personahe sa Espiritu” (D&P 130:22).
Detalye gikan sa Pag-ayo sa Buta nga Tawo, ni Carl Heinrich Bloch
Walay mas klaro nga pamahayag kay sa niana! Apan walay swerte, hapit duha ka libo ka tuig sa kasaysayan sa Kristiyano nakahimo og dakong kalibug ug grabe nga sayop kabahin niini. Daghang ebolusyon ug mga bersyon sa relihiyuso nga mga tinuohan nga miusab sa yanong kaklaro sa tinuod nga doktrina, nga nagpahayag sa Amahan, Anak, ug Espiritu Santo nga hunahuna lamang, mapig-ot, labaw sa tanan, anaa sa tanang lugar, pareha ra, kauban sa kahangturan, ug dili masayran; walay lawas, parte sa lawas, o pasyon; ug nagpuyo sa gawas sa kawanangan ug panahon.
Sa ingon niana nga mga tinuohan, ang tanang tulo ka mga sakop managlahi nga mga tawo, apan usa ra nga binuhat, ang kanunay nga gihisgutan nga “misteryo sa trinidad.” Tulo sila ka managlahi nga mga tawo, apan dili tulo ka mga Dios apan usa. Ang tanang tulo ka mga tawo dili masabut, apan ang usa ka Dios dili gayud masabut.
Mouyon kita sa atong mga kritiko niana nga punto—nga ang ingon nga paghan-ay sa pagkabalaan dili masabut. Sa ingon nga makalibug nga kahulugan sa Dios nga gihatag sa Simbahan, dili kaayo ikahibulong nga ang ikaupat nga siglo nga mongha misinggit, “Alaot ako! Gikuha nila ang akong Dios gikan kanako, … ug ako wala na masayud kon kinsa ang ampoan o sangpiton.”7 Unsaon man nato sa pagsalig, paghigugma, ug pagsimba, o bisan maningkamot nga mahisama, sa Usa ka Tawo nga dili masabut ug dili masayran? Unsa may gipasabut sa pag-ampo ni Jesus nga “ang kinabuhing dayon mao kini, ang ilang pagpakaila kanimo nga mao, ang bugtong tinuod nga Dios, ug kang Jesukristo, nga imong pinadala”? (Juan 17:3; empasis gidugang).
Dili gayud nato tuyo nga modaut sa pagtuo ni bisan kinsa nga tawo o sa doktrina sa bisan unsang relihiyon. Atong ipaabut ngadto sa tanan ang susama nga pagtahud alang sa ilang mga doktrina nga atong gihangyo alang sa atoa. (Kana usab usa ka artikulo sa atong hugot nga pagtuo.) Apan ang kasaligan nga Harper Bible Dictionary, giisip nga dunay awtoridad kabahin sa pagtuon sa Biblia, nagrekord nga “ang pormal nga doktrina sa Trinity sumala sa gipasabut sa halangdong mga konseho sa simbahan sa ikaupat ug ikalima nga siglo dili makita [bisan asa] sa [Bag-ong Tugon].”8
Mao nga komportable kaayo kita, sa tinud-anay, sa pagpahibalo niini nga kita wala magsunod sa ikaupat o ikalima ka siglo nga pagsabut kabahin sa Dios nga Kapangulohan nga naimpluwensya sa pagano, ni kadtong unang mga Santos nga Kristiyano kinsa mga saksi sa buhi nga Kristo.9 Kita mga Kristiyano sama sa mga kristiyano sa Bag-ong Tugon—dili sama niadtong nagsunod sa Nicene Creed.
Ang Panaghiusa sa Dios nga Kapangulohan
Hinoon, karon akong ipasabut pag-ayo nga kon kita nakapasabut sa atong punto mahitungod sa kalahi sa Ilang pagkatawo, sama ka importante ang pagpasabut sa Ilang pagkahiusa ug sa unsang paagi ang Dios nga Kapangulohan Usa. Sa akong pagtuo luwas ra ko sa pag-ingon nga kabahin sa rason nga kita wala masabti sa uban sa Kristohanong tradisyon tungod kay sa pagpasabut sa indibidwal nga mga personahe sa Dios nga Kapangulohan, wala nato kini sundi pirme sa pagdawat ug paghatag og gibug-aton sa Ilang panaghiusa sa tanang mahunahunaan nga paagi. Tungod niini kita nakaani og wala kinahanglana nga pagpanaway, ug atong nahimo nga mas lisud masabtan ang atong LDS nga pagtuo kay sa gikinahanglan.
Sa pagkatinuod, ang importanting tudling sa “doktrina ni Kristo” sa 2 Nephi 31 natapos uban niini nga pamahayag: “Kini mao ang doktrina ni Kristo, ug mao lamang ang tinuod nga doktrina sa Amahan, ug sa Anak, ug sa Espiritu Santo, nga usa ka Dios, nga walay katapusan” (2 Nephi 31:21).
Kitang tanan nakabasa sa Pangamuyo nga Pag-ampo sa Manluluwas sa Juan 17. Kita nasayud nga kini mao ang pamahayag sa panaghiusa tali sa Amahan ug sa Anak ug tali Kanila ug kanato, ang Ilang yutan-on nga mga disipulo. Basaha kini kanunay, ilabi na kay gitawag kini ni Presidente David O. McKay (1873–1970) kaniadto nga “ang labing importanting pag-ampo … nga sukad nalitok niini nga kalibutan.”10 Kinahanglan kitang maningkamot nga mahiusa uban sa Amahan, sa Anak ug sa Espiritu Santo, sama sa giampo ni Jesus nga kita mahiusa.
Usa ka Saksi sa Apostol
Akong tapusan uban sa akong pagpamatuod sa matag usa niining Balaan nga mga Binuhat, nga naglangkob niana nga “Mahangturong Kapangulohan” nga gihisgutan. Ako mosaksi sa Espiritu Santo pinaagi sa espiritu sa Espiritu Santo, tungod kay ang pagsaksi ug pagpamatuod mao ang duha ka importanting mga tahas niini. Ako mosaksi nga ang Espiritu Santo usa ka magtutudlo, usa ka Maghuhupay, ug tinugyanan sa personal nga pagpadayag. Ako mosaksi nga ang Espiritu Santo mopahinumdom nato sa tanang mga butang—usa ka piho nga panalangin tungod kay ang paghinumdom usa sa mahinungdanon nga mga sugo nga gihatag ngari kanato, lakip ang mga pag-ampo sa sakrament (tan-awa sa D&P 20: 77, 79).
Ako mopamatuod nga pinaagi sa gahum sa Espiritu Santo, kita mahimong mopapahawa sa kangitngit gikan kanato ug mapasidan-an batok sa kakuyaw ug batok sa sayop. Ako mosaksi nga ang Espiritu Santo mao usab ang Balaang Espiritu sa Saad, nagkumpirma ug nagmatuod sa mga pakigsaad ug mga ordinansa ug sa katapusan magbugkos sa tanang makaluwas nga mga panalangin ngadto sa kinabuhing dayon. Natingala ko nga kita aduna sa maong access sa usa ka sakop sa Dios nga Kapangulohan ug kini makanunayon ug magbalik-balik kon kita magpuyo nga takus niini. Akong ipahayag ang akong hapit dili matukib nga pasalamat sa gasa sa Espiritu Santo.
Ako mosaksi ni Jesukristo, ang buhi nga Anak sa buhi nga Dios, kinsa mibayad sa makapalingkawas nga lukat alang sa inyong kalag ug sa akong kalag ug sa kalag sa matag lalaki, babaye, ug bata gikan ni Adan hangtud sa katapusan sa kalibutan. Ako mopamatuod nga ang unang baruganan sa ebanghelyo mao ang hugot nga pagtuo diha ni Ginoong Jesukristo ug kini mao ang pundasyon ug ang importanting mensahe sa Ang Simbahan ni Jesukristo sa mga Santos sa Ulahing mga Adlaw.
Wala: Dili Akong Pagbuot, Kondili ang Imo, Mao ang Matuman, ni Harry Anderson; tuo: detalye gikan sa Christus Consolator, ni Carl Heinrich Bloch
Ako mopamatuod nga ang matag tawo nga natawo dinhi sa kalibutan natawo uban sa Kahayag ni Kristo diha sa iyang kalag. Ako mosaksi nga Siya mao ang Una ug Katapusan, ang Sinugdanan ug Katapusan, ang Alpha ug Omega sa atong kaluwasan. Ako mopahayag nga Siya mao ang halangdong Jehova, ang matubsanong Ako Mao, ang Kordero sa Dios nga gipatay gikan sa wala pa ang katukuran sa kalibutan. Ako mopamatuod nga diha Kaniya ang kahingpitan mipuyo ug nga Siya natawo, nagpuyo, ug namatay sa usa ka hingpit, walay sala nga Tawo, walay mansa ug walay lama.
Ako mapasalamaton nga ang awtoridad ni Jesukristo, nga nagkontrol sa tanan nga may mahangturong importansya niini nga uniberso, nagdala sa Iyang ngalan—ang Balaan nga Priesthood sunod sa Kapunongan sa Anak sa Dios. Kon ako magpuyo nga moabut og usa ka libo ka tuig ang edad, dili gayud nako mapahayag sa hingpit ang akong katingala ug pagkadili angayan nga tawgon nga mahimong usa sa Iyang mga Apostoles, usa ka saksi sa Iyang ngalan sa tibuok kalibutan.
Ako nahingangha, nahibulong sa gugma,
Dako nga grasya kanako gitanyag niya.11
Ako mosaksi sa Dios ang Amahan sa Kahangturan, ang halangdong Elohim, ang akong Amahan ug inyong Amahan, kinsa mihatag kanato og espirituhanong kinabuhi. Ako mopamatuod nga Siya mao ang Tawo sa Pagkabalaan, nga ang mga pulong nga kalooy ug kaayo, gugma ug kapuangod nagsugod lamang sa pagtimaan sa Iyang labaw ug mahangturon nga kinaiya. Ako mopamatuod nga si Kristo miabut aron sa pagpakita kanato sa Amahan ug sa ingon tukma lang nga pagatawgon nga Anak sa Tawo (sa Pagkabalaan).
Ako mosaksi nga ang Dios atong Amahan mao ang tigsulat sa mahinungdanon nga plano sa kaluwasan ug nga ang nailhan nga ebanghelyo ni Jesukristo mao ang nailhan usab isip “ang ebanghelyo sa Dios” (Mga Taga-Roma 1:1; tan-awa usab sa mga bersikulo 2–3). Ako mosaksi nga ang Amahan mao ug ang Tiglalang sa tanang mga butang, nga nagtrabaho pinaagi ni Jehova ug sa ubang langitnong mga tinugyanan sa pagtuman niana nga Paglalang ug nakigbahin sa ulohan nga Tiglalang uban sa Iyang Hinigugmang Anak. Ako mopamatuod nga kita kinahanglan nga moserbisyo sa Amahan pinaagi sa ngalan sa Anak sama nga kita mag-ampo ngadto sa Amahan sa pangalan sa Anak.
Ako mopamatuod nga si Jesukristo mianhi sa pagbuhat sa kabubut-on sa Amahan, mitudlo sa doktrina sa Amahan, ug nagtrabaho sa Iyang kaugalingong kaluwasan pinaagi sa Amahan. Ako mohatag sa labing ligdong nga pagsaksi nga ang Amahan nahigugma kaayo sa kalibutan, sa Iyang mga anak, nga Siya mihatag sa Iyang labing maayo nga anak, Iyang hingpit nga anak, Iyang Bugtong Anak, nga bisan kinsa nga motuo diha Kaniya makabaton og walay katapusan nga kinabuhi (tan-awa sa Juan 3:36; 6:47; Helaman 14:8).
Mapasalamaton ako sa Amahan, sa Anak, ug sa Espiritu Santo, sa kansang mga pangalan ang sagrado ug makaluwas nga mga ordinansa gikan sa bunyag ngadto sa sealing sa templo gipahigayon niini nga simbahan. Akong dapiton ang matag usa kaninyo nga ilhon pag-ayo kining Balaan nga mga Binuhat.