Kolo—Ko ha Helo ʻo e Foakí

Kapau ko e fakalea tuʻuakí ko e, “Foaki ha toto, pea fakahaofi ha ngaahi moʻui” ko ha meʻa ia ke tau muimui ki ai, ta ko e mēmipa ʻo e Uooti Hemilitoni Hahaké, ʻa Kolonilia (Kolo) Amai, ko e hako ʻo e faʻahinga Nga Tuhoé mo Ngati Kahungunu Ki Uailoá, ko ha helo ʻeni ʻi he foakí ʻokú ne fakahaofi maʻu pē ha ngaahi moʻui. ʻI he uike kuo ʻosí pē naʻá ne foaki ʻa e palesema (vai ʻoku ʻi ai ʻa e totó) ko hono tuʻo 244 ia. Ko ʻene taumuʻá ke aʻu ʻo tuʻo nimangeau. ʻI hono taʻu 51 kuó ne foaki e vaeua ʻo ʻene moʻuí pea ʻoku teʻeki ai ke ne liʻaki tuʻo taha ʻene ngaahi ʻapoinimeni fakauike uá ʻi he Senitā Foaki Toto ʻo e Falemahaki Uaikató. ʻOkú ne tangutu kae huka ki ai ʻa e mīsini toʻo palesemá, lolotonga ko iá ʻokú ne tauʻatāina ʻi hono kai ʻa e ngaahi pisikete mo e inu ʻoku foaki angé.

ʻOku pehē ʻe Kolo, “ʻOku ʻilo lahi ange ʻa e kakaí ki hono foaki ʻo e totó kae siʻisiʻi ʻenau ʻilo ki he foaki ʻo e palesemá. “ʻE lava ke ngaohi mei he palesemá ha ngaahi meʻa fakahaofi moʻui ʻe valu” Hangē ko ia ʻoku hokó, ʻoku lahi ange ʻa e ngaahi meʻa ʻoku ngaohi mei he palesema ʻo e houʻeiki tangatá ʻi he palesema ʻo e houʻeiki fafiné. ʻOku pehē ʻe Kolo, “ʻOku lahi ange ʻa e fiemaʻu ke foaki ʻe he kakai tangatá koeʻuhí ʻoku lahi ange e ngaahi meʻa ʻoku ngaohi mei honau palesemá. “Ko e taha ʻo e ngaahi tefitoʻi meʻa mahuʻingá ko e Moʻoni hono 8 maʻá e kakai ʻoku fānoa ʻa e totó ʻo ka nau laveá he ʻoku tokoni ia ki hono taʻofi ʻa e fatu honau totó.”

ʻOku kau ʻa e kakai ʻoku fānoa ʻa e totó ʻo ka nau laveá ʻi he niʻihi tefito ʻoku ʻaonga kiate kinautolu ʻa hono toʻo ʻa e palesemá, kau ki ai mo kinautolu ʻoku moʻua ʻi he fokoutua kanisaá pea mo kinautolu ne lavea ʻi ha fakatuʻutāmaki ʻi ha meʻalele. Ko e faʻahinga fiemaʻu vivili hokohoko peheé ʻoku ʻuhinga ai hono fie maʻu lahi taha ʻa e palesemá ʻi he kotoa ʻo e kalasi foaki toto ʻe tolú. ʻOku lava ʻo foaki tuʻo ua fakamāhina, tatau pē mo e toʻo ʻo e toto peletileti (platelets), ʻoku vave fakatouʻosi pē hono fakafetongi ʻe he sinó. ʻI he tafaʻaki ʻe tahá, ko e foaki (toʻo) totó ʻoku toki fakahoko pē ʻi he māhina ʻe tolu kotoa pē.

Neongo ʻa e femoʻuekina ʻa Kolo ʻi hono uiuiʻi ʻi he kau palesitenisī ʻo e Lautohi Faka-Sāpate ʻo e uōtí, tamai ki ha fānau ʻe toko 5 (toko tolu ʻoku kei ʻi ʻapi kau ai ha taʻu 5 ʻoku faingataʻaʻia fakaesino), pea ngāue ko e Tokotaha Faifaleʻi maʻá e Fānau Ako ʻi Uinitekí, ka ʻokú ne faivelenga mo fakapapauʻi ʻokú ne faingamālie ʻi he miniti ʻe 60 ʻo e uike ua kotoa pē ke fakahoko ʻene foaki palesemá. ʻOkú ne fakaʻaongaʻi ʻa e taimi ko iá ke ako ʻa e folofolá, fanongo ki he ngaahi fasi ʻoku manako ai mei he valungofulú pe talanoa mo e kau ngāue anga fakakaumeʻa ʻi he senitā foaki totó.

ʻOku vēkeveke ʻa Kolo ke toe fakatokolahi mai ha kau foaki [toto]. “ʻE ʻikai ke mahuʻingamālie kiate koe ʻa e fiemaʻu ʻo e toʻo totó kae ʻoua leva ko koe tonu pe ko ho fāmilí ʻoku fie maʻu ki ai ʻa e ngaahi meʻa ʻoku ngaohi mei he totó, pea ko e ʻuhinga ia ʻoku ou feinga ke toe ʻilo lahia ange ʻa e fiemaʻu lahi ange ʻo e ngaahi foaki totó.”

Tupunga mei he mole e moʻui hono fohá ʻi ha fakatuʻutāmaki ʻi ha kā ʻi he taʻu e fā kuo hilí pea neongo ne ʻikai lava ʻe he ngaahi meʻa ne ngaohi mei he totó ʻo fakahaofi ia, ka kuó ne ʻai ʻa Kolo ke ne fakakaukau ki he mālohi fai fakahaofi moʻui ʻo e ngaahi foaki totó. “Ko e ʻuhinga ia ʻoku ou fakahoko ai ʻení. “ʻOku hanga ʻe he huhu totó ʻo uesia fakahangatonu e tuʻunga ʻo e moʻuí pea fakahaofi ai ha ngaahi moʻui.”

Fakatatau ki he Mōsaia 2:17 ʻokú ne fakamatala, [“Ko e founga pē ʻeni ʻe taha ʻo e ngāue tokoní.”] ʻOkú ne fakamoʻoniʻi ko e taha ʻo e ngaahi tāpuaki ʻo e foakí ko e mālohi ʻa e ongo ʻo e fie tokoni ki he niʻihi kehé. “Kapau ʻoku ʻi ai ha feilaulau ko e taimí pē mo hono kiʻi huhuʻi ʻo e nimá.”

ʻOku ʻi ai maʻu pē ʻa e fiemaʻu ke tokolahi ange ʻa e kau foaki totó pea ʻoku pehē ʻe Kolo ʻoku hanga ʻe he ngaahi tāpuaki ʻokú te maʻú ʻo ʻai ke ʻaonga ʻa e meʻa kotoa pē naʻá te fakahokó. ʻOku teʻeki ai ke ne ongoʻi ha ngaahi nunuʻa kovi mei heʻene toutou ʻalu ʻo toʻo totó pea ʻokú ne fakamālōʻiaʻi ʻa e Lea ʻo e Potó ʻi heʻene kei moʻui lelei ʻaupitó. Naʻe pehē ʻe Kolo ʻoku fie maʻu ke moʻui lelei ʻa e tokotaha toʻo totó pea mo aʻusia ha ngaahi tuʻunga moʻui lelei ʻoku fie maʻú ka ʻe lava pē ʻo sivi hoto totó ʻi ha senitā foaki toto fakalotofonua pe ʻokú te feʻunga ke toʻo hoto totó.