“Houngaʻia ʻi he Kau Palōfita mo e Kau ʻAposetolo Moʻuí,” Liahona, ʻOkatopa 2023.
Talitali Lelei Kimoutolu ki he Makasini ko ʻEní
Houngaʻia ʻi he Kau Palōfita mo e Kau ʻAposetolo Moʻuí
ʻI he pekia ʻa e kau ʻAposetolo ʻa e ʻEikí pea mo e kamataʻanga ʻo e Hē Fakaʻaufuli mei he Moʻoní, naʻe fakapoʻuli fakalaumālie ʻaupito ‘a e māmaní. Pea ʻi ha ngaahi senituli kimuʻa ʻi he kuonga ʻo Siosefa Sāmitá, naʻe kamata ke fokotuʻu ʻe he ʻEikí ʻa e fakavaʻe ki hono Fakafoki Mai ʻo e kakato ʻo e ongoongoleleí.
Naʻe hoko hono faʻu ʻo e mīsini pākí, Kuonga Hono Fakakake ʻo e ʻIló, Mavahevahe ʻo e Ngaahi Siasí, ko hono ʻiloʻi ʻe he kau ʻIulopé ʻa e ongo ʻAmeliká, pea pehē ai pē foki ki he teuteu ki he meʻa ʻe hoko ʻi he Vaoʻakau Tapú “ko e pongipongi ia ʻo ha ʻaho fakaʻofoʻofa, mo langi maʻa, ʻi he kamataʻanga ʻo e tō-taʻu ʻo hono taha afe valungeau mā uofulu ʻo e taʻú” (Siosefa Sāmita—Hisitōlia 1:14). ʻI he pongipongi failau ko iá, naʻe toe ʻi māmani ai ha palōfita ʻa e ʻOtuá, pea kuo faifai pea ʻosi ʻa e kuonga ʻo e fakapoʻuli fakalaumālié!
ʻI he Liahona ʻo e māhina ní, ʻoku akoʻi ai kitautolu ʻe Palesiteni Tāleni H. ʻOakesi, Tokoni ʻUluaki ʻi he Kau Palesitenisī ʻUluakí, ki he fatongia mahuʻinga ʻo e kau palōfita mo e kau ʻaposetolo ʻo onopōní, ko ʻenau ngaahi kī mo e mafai ʻo e lakanga fakataulaʻeikí, mo honau fatongia ko e kau fakamoʻoni makehe ki he huafa ʻo Sīsū Kalaisí (peesi 4).
Ko ha ʻelemēniti mahuʻinga ʻo ʻenau fakamoʻoní ko e natula mo e ʻulungaanga fakalangi ʻo e Fakamoʻuí, pea ʻoku nau toe fakaongo atu ʻEne fakaafe ke tau “hangē pē ko aú” (3 Nīfai 27:27).
ʻI he peesi 10, ʻoku ou vahevahe ai ha ngaahi fakakaukau ki he founga te tau takitaha lava ai ʻo “ngāue ʻaki ʻa e angamaʻá” (Tokāteline mo e Ngaahi Fuakava 46:33) ʻi heʻetau feinga ke hoko ʻo hangē ko Sīsū Kalaisí.
ʻOku ou houngaʻia ʻi he kau palōfita mo e kau ʻaposetolo moʻuí—ko e kau fakamoʻoni makehe ʻo Sīsū Kalaisí!
ʻEletā Lynn G. Robbins
Fitungofulu Taki Māʻolunga Mālōlō