“Mei he Mole e Ongoʻi ʻa e Laumālié ki he ʻI Ai ha Taumuʻá,” Liahona, ʻOkatopa 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Mei he Mole e Ongoʻi ʻa e Laumālié ki he ʻI Ai ha Taumuʻá
Naʻe tokoniʻi au ʻe he ʻOtuá ke u ʻiloʻi ʻa e founga te u lava ai ʻo fakaʻaongaʻi ʻeku faingataʻaʻiá ke tokoniʻi ʻa e niʻihi kehe ʻoku nau foua ʻa e faingataʻa tataú.
Ko ha fakaʻilonga angamaheni ʻoku ongoʻi ʻe he kakai ʻoku nau fefaʻuhi mo e loto-mafasiá mo e ngaahi palopalema ki he moʻui lelei fakaeʻatamaí, ko e ʻikai ke toe ongoʻi ʻa e Laumālie Māʻoniʻoní. ʻOku nau faʻa fefaʻuhi ke ongoʻi ʻa e ongoʻi maama mo māfana ko iá.
Naʻe taʻu lahi ʻeku feʻao mo e faʻahinga fokoutua ko e hulutuʻa ʻa e kulukiatamakí mo e ʻikai lava ʻo tuku ʻa e fakakaukau maʻunimaá (ocd). Naʻe ʻikai ke u ʻiloʻi pe naʻe fēfē ʻa e ongo ʻa e Laumālié. ʻI he fakaʻau ke kovi ange ʻeku puké lolotonga ʻeku ʻi he ʻunivēsití, naʻá ku iku tokoto falemahaki ai ʻi ha uike ʻe taha.
ʻI he lolotonga ʻa e taimi faingataʻa ʻo ʻeku fefaʻuhi mo ʻeku ngaahi fakakaukaú mo e moʻui lelei fakaeʻatamaí, naʻá ku fifili ai pe ʻe tokoniʻi fēfē au ʻe he ngaahi fokoutua ko ʻení ʻi he kahaʻu lōloá. ʻE fakaʻaongaʻi fēfē nai ʻe he ʻOtuá ʻa e aʻusia faingataʻa ko ʻení ki ha meʻa ʻe lelei kiate aú? Ko e hā ʻEne taumuʻa maʻaku ʻi heʻeku foua ʻa e faingataʻá ni?
Naʻá ku kole ha ngaahi tāpuaki ʻo e lakanga fakataulaʻeikí lolotonga ʻa e taimi ko ʻení, pea naʻe ʻi ai maʻu pē ha foʻi sētesi ne u toutou fanongo ai: “Kuo foaki atu ʻe he ʻOtuá ʻa e ngaahi maʻuʻanga tokoni ke ke ikunaʻi ʻaki ʻa e faingataʻa ko ʻení.” ʻI heʻeku tui te Ne tataki au ki he meʻa naʻá ku fiemaʻu ke fakamoʻui ai aú, naʻá ku fakakaukau ke falala ki heʻeku kau toketaá. Naʻá ku maʻu māmālie ʻa e tokoni naʻá ku fiemaʻú. ʻI he fakalau atu ʻa e taimí, ne u vahevahe ʻeku aʻusia ʻo e moʻui lelei fakaeʻatamaí ʻi he ʻinitanetí.
Ne ʻikai fuoloa mei ai, kuo kamata ke u maʻu ha ngaahi pōpoaki mei hoku ngaahi kaungāmeʻa tangatá, ʻoku nau ʻeke mai fekauʻaki mo ʻeku moʻui lelei fakaeʻatamaí mo vahevahe mai ʻenau ngaahi fakakaukau mo e ongo tatau. Naʻa nau kole tokoni mai leva ke ʻiloʻi ha founga ke fakafepakiʻi ʻaki ʻa e ongonoá. Naʻá ku ʻohovale ʻi he kamataʻangá.
ʻI ha ngaahi anga fakafonua lahi, ʻoku fiemaʻu ia ke hā ngali mālohi maʻu pē ʻa e kakai tangatá pea ʻoua naʻa nau teitei fakahaaʻi ʻenau ongo fakaelotó. ʻOku hoko leva ia ke faingataʻa ai haʻanau tala ʻoku nau fiemaʻu ha tokoni, pea ʻoku nau faʻa fefaʻuhi fakalongolongo pē.
ʻI he tuʻo tolu ʻa e hoko ʻa e meʻá ni, ne u ʻiloʻi leva naʻe teuteuʻi au ʻe hoku ngaahi faingataʻaʻiá ke u fai ha tokoni. Naʻe hoko ʻa e ngaahi taimi faingataʻa kotoa ko iá, ʻa e ngaahi houa faifaleʻí, ʻa ʻeku ngaahi lotú kotoa, pea mo ʻeku ngaahi feinga kotoa pē ke fakaʻaongaʻi ʻeku tuí ʻi heʻeku fekumi ki ha tokoni fakalangí, ke u ako ai ke ʻiloʻi ʻa e taimi ʻoku fehangahangai ai ʻa e niʻihi kehé mo e ngaahi faingataʻa tatau pea mo e founga ke fakahinohinoʻi kinautolu ke nau kumi ha tokoní.
Naʻá ku ʻiloʻi ʻa e moʻoni ʻo e ngaahi lea ko ʻení meia ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá: “Kapau ʻokú ke puke ʻi he ʻapenitikí, ʻe finangalo ʻa e ʻOtuá ke ke feinga ke maʻu ha tāpuaki lakanga fakataulaʻeiki mo e tokoni fakafaitoʻo lelei taha ʻe ala maʻú. ʻOku pehē pē ʻa e loto-taʻotaʻomiá pe mafasia fakaelotó. ʻOku finangalo ʻa e Tamai Hēvaní ke tau fakaʻaongaʻi e ngaahi meʻafoaki fakaofo kotoa pē kuó Ne foaki mai ʻi he kuonga fakakōsipeli nāunauʻiá ni.”1