“Te u Teuteu Nai ki he Hāʻele ʻAnga Ua Mai ʻa Kalaisí?,” Liahona, ʻOkatopa 2023.
Haʻu, ʻo Muimui ʻIate Au
Te u Teuteu Fēfē Nai ki he Hāʻele ʻAnga Ua Mai ʻa Kalaisí?
Naʻe akoʻi ʻe Paula ʻe hoko mai ʻa e ʻaho ʻo e toe hāʻele mai ʻa Sīsū Kalaisí “ʻo hangē ko e kaihaʻa ʻi he poʻulí,” ʻo fakafehoanaki ia ki ha “fefine feitama” ʻoku langā fakafokifā (1 Tesalonika 5:2–3). ʻOku fakatātaaʻi ʻe he ngaahi lea fakatātā ko ʻení ʻa e hāʻele mai ʻa Kalaisi ʻi ha taimi ʻoku ʻikai ke tau ʻamanaki ki ai.
Neongo ʻoku ʻikai ke tau ʻiloʻi pau ʻa e taimi ʻe hoko ai ʻa e Hāʻele ʻAnga Ua Maí, ka te tau lava ʻo mateuteu ʻi he taimi ʻe hoko aí. Ko ha founga ʻeni ʻe fā te tau lava ai ʻo mateuteu.
Te u lava ʻo vahevahe ʻa e ongoongoleleí ki he niʻihi kehé.
“Ko kitautolu ʻa e kakai kuo fakafatongia ʻaki [ʻa hono talitali ʻo] e Hāʻele ʻAnga Ua Mai ʻa Sīsū Kalaisí; kuo pau ke tau tānaki ʻa e fānau ʻa e ʻOtuá, ʻa kinautolu te nau fanongo mo tali ʻa e moʻoní, ngaahi fuakavá, mo e ngaahi talaʻofa ʻo e ongoongolelei taʻengatá.”1
Te u lava ʻo fakaafeʻi ʻa e Laumālie Māʻoniʻoní ʻo fakafou ʻi heʻeku ngaahi ngāué.
“ʻOku fai hotau lelei tahá ke maluʻi ʻetau ngaahi aʻusia fakaʻahó, ke nofoʻia kitautolu ʻe he ivi tākiekina ʻo e Laumālie Māʻoniʻoní. Ko ha maama kitautolu ki māmani, pea ʻo ka fiemaʻu, ʻoku tau loto-fiemālie ke fili ke kehe mei he niʻihi kehé.”2
Te u lava ʻo fakahoko mo tauhi ʻa e ngaahi fuakava mo e ʻOtuá.
“Ko e mālohi ʻoku tau fiemaʻu ke matuʻuaki ʻa e faingataʻa ʻo e ʻahó ʻa e mālohi [ʻo] e ʻEikí, pea ʻoku tafe mai Hono mālohí ʻi heʻetau ngaahi fuakava mo Iá. … Naʻa mo e taimi ʻoku tau humu aí, ʻokú Ne ʻi ai.”3
Te u lava ʻo ʻalu maʻu pē ki he temipalé.
“Ko e fungani siueli ʻo e Fakafoki mai e Ongoongoleleí ko e temipale māʻoniʻoní. Ko hono ngaahi ouau mo e fuakava toputapú ʻoku mātuʻaki mahuʻinga ia ki hono teuteu ha kakai ʻoku mateuteu ke talitali lelei ʻa e Fakamoʻuí mo ʻEne Hāʻele ʻAnga Ua Maí.”4