“Tataki ki ha Ngāue,” Liahona, ʻOkatopa 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Tataki ki ha Ngāue
Naʻe ʻikai ke u lava ʻo maʻu ha ngāue, ka naʻá ku falala ʻe tāpuekina au ʻe he ʻEikí ʻi heʻeku feinga ke u moʻui fakafalala pē kiate aú.
ʻI hoku semesitā fakaʻosi ʻi he ʻunivēsití, naʻá ku ongoʻi ʻoku totonu ke u kamata kumi ngāue ʻi hoku malaʻe fakaakó, ʻa ia ko e faiakó. Naʻá ku palani ke u ngāue fakataimi ko ha faiako ʻi he lautohi siʻí. ʻI he taimi ko iá, kuo ʻosi lalahi ʻeku fānaú.
Ke teuteu ke hū ʻo maʻu ha ngāué, naʻá ku lesisita ki ha taha ʻo e ngaahi kalasi moʻui fakafalala pē kiate kita ʻa e Siasí ke tokoniʻi au ke maʻu haʻaku ngāue.1 ʻI heʻeku aʻu atu ki heʻeku ʻuluaki kalasí, ko au pē ʻa e tokotaha kei ako naʻe ʻi aí. Ko e faiakó ko ha tangata naʻe tō faka-ʻAmelika ʻene leá pea naʻá ne vēkeveke ke ne tokoniʻi ʻa e niʻihi kehé. Lolotonga ʻemau lēsoní, naʻá ne fakamatalaʻi ʻa e ngaahi tefitoʻi moʻoni ʻo e ongoongoleleí te ne tokoniʻi au ke fakatupulaki ʻeku tui ki he ʻEikí mo ngāue ʻi he tuí.
Naʻe houa ʻe ua ʻeku fononga ki he senitā moʻui fakafalala pē kiate kita ʻa e Siasí ʻi Sao Pauló, ka naʻá ku maʻu atu pē ʻa e taimi kalasí ʻi he uike kotoa pē. Naʻá ku tokanga lahi ki he kalasí he naʻe mahuʻinga ia kiate au.
Ka neongo ia, ʻi he ʻosi ʻa e kalasí, naʻe ʻikai ke maʻu haʻaku ngāue fakafaiako. Ka naʻá ku talaange ki heʻeku faiakó ʻoku ou falala ʻe tāpuekina au ʻe he ʻEikí pea he ʻikai fuoloa kuo maʻu haʻaku ngāue. Naʻá ku ako ki he ngaahi sivi naʻe fiemaʻu ke u fai kae lava ke maʻu ai haʻaku ngāue fakafaiakó, pea naʻe kamata ke u ʻalu ki ha kalasi moʻui fakafalala pē kiate kita ʻi he founga ke kamataʻi ai ha pisinisí.2
Hili pē ʻeku siví, naʻá ku fakavavevave leva ki heʻeku kalasi fakasiteiki ki he moʻui fakafalala pē kiate kitá. Naʻá ku talaange ki he tokotaha kotoa pē ʻi aí ʻa ʻeku ongoʻi mateuteu ki he ngaahi siví—fakamālō ki heʻeku akó mo ʻeku ngaahi kalasi moʻui fakafalala pē kiate kitá.
Naʻe faifai peá u maʻu ʻa e ngāue naʻá ku fiemaʻú. Naʻá ku ongoʻi ha fiefia lahi, pea naʻá ku houngaʻia ʻi heʻeku lava ke totongi vahehongofulu mo foaki ki he ʻEikí. Lolotonga ʻeku kalasi moʻui fakafalala pē kiate kita hono uá, naʻe ueʻi au ʻe he Laumālié ke u toʻo ʻa e EnglishConnect 2 pea kamata ʻeku ngāue ki hoku MA.3
Naʻá ku ongoʻi mohu tāpuekina ʻi he fakahinohino ko ʻeni mei he ʻEikí ki hono fakahoko ʻa e ngaahi fili mahuʻinga ki heʻeku moʻuí. ʻOku ou ʻiloʻi ʻokú Ne tauhi ʻEne ngaahi talaʻofá pea kapau te tau tauhi ʻEne ngaahi fekaú, te Ne tāpuakiʻi fakatuʻasino mo fakalaumālie kitautolu ʻaki ʻa e ngaahi meʻa ʻoku fiemaʻu ke tau tuʻumālie aí (vakai, Mōsaia 2:41).