“ʻOku Mau Kei ʻOfa ʻi he ʻEikí,” Liahona, ʻOkatopa 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻOku Mau Kei ʻOfa ʻi he ʻEikí
Naʻe ʻikai ko e ola ia naʻá ma ʻamanaki ki aí, ka naʻá ku ʻiloʻi naʻe ʻikai ke molenoa ʻeku lotua hoku fohá.
ʻI he taʻu nai ʻe tolu kuohilí, naʻe ʻilo ai ʻoku kanisā hoku foha ko Maʻaké. Naʻe tafa ia ʻe ha kau toketā, ka naʻe hokohoko atu pē ʻa e mafola ʻa e kanisaá. Naʻe lotua mo ʻaukai ʻa e fāmilí kotoa maʻana lolotonga ʻa e ngaahi māhina lōloa ko iá.
Naʻá ku lau ʻi he folofolá mo e ngaahi lea kehekehe mei he konifelenisí ʻa hono mahuʻinga mo moʻoni ʻo e mālohi ʻo e tuí. Naʻá ku fakakaukau ke u ʻaukai mo lotu, ʻi heʻeku ongoʻi ʻoku mālohi feʻunga ʻeku tuí ke hoko ai ha mana. ʻE moʻui hoku fohá, pe ko e holo hifo ʻa e ngaahi fakaʻilonga ʻo e kanisaá. Naʻá ku fakaʻosi maʻu pē ʻeku ngaahi lotu tāumaʻú ʻaki ʻa e “ke fai pē Ho finangaló.”
Naʻá ku lau ʻa e lea kotoa pē kau ki he tuí naʻe lava ke u maʻu mei he ngaahi konifelenisi lahi ʻi he kuohilí pe ʻoku ʻasi ʻi ha ʻū naunau kehe ne pulusi ʻe he Siasí. Naʻe fakanonga moʻoni ʻa e ngaahi lea ne u maʻu meia Palesiteni Lāsolo M. Nalesoní.
Naʻe mālōlō homa fohá ʻi he ʻaho 28 ʻo Sune 2021. Naʻa mau fuʻu loto-mamahi lahi hono kotoa. Naʻá ku ongoʻi naʻe ʻikai pē ke mālohi feʻunga ʻeku tuí.
ʻI ha ʻaho ʻe taha naʻá ku sio ki he takafi mui ʻo ha makasini ʻo e konifelenisi lahí ʻi he Liahona peá u sio ai ki ha laʻitā ʻo Palesiteni Nalesoni ʻoku tuʻu ʻi he tuʻunga malangá. Naʻe tohiʻi ʻi lalo ʻi he laʻitaá ha palakalafi mei ha taha ʻo ʻene ngaahi leá. Naʻá ne pehē ʻoku fiemaʻu ʻa e tuí ke kau ki he Siasí, muimui ki he kau palōfitá, ngāue fakafaifekau, moʻui ʻaki ʻa e fono ʻo e angamaʻá, mo akoʻi ʻa e ongoongoleleí. Naʻá ne toe pehē, “ʻOku fie maʻu e tuí ke tautapa maʻa ha moʻui ʻa ha ʻofaʻanga, mo ha tui lahi ange ke tali ha meʻa ʻoku fakamamahi.”1
Naʻá ku lau tuʻo tolu ʻa e sētesi ko iá kimuʻa pea toki mahino mai naʻe fakataumuʻa pē ia kiate au. Ne u maʻu ha ongoʻi nonga. Naʻá ku ʻiloʻi naʻe ʻikai ke molenoa ʻemau lotua hoku fohá. Naʻe mālohi ʻeku tuí ʻi ha founga naʻe ʻafioʻi mo tali ʻe he ʻEikí.
Kuo aʻusia ʻe homau fāmilí ʻa e ongoʻi ʻo e molé, ʻo kau ai ʻa e mālōlō hoku husepānití mo e makapuna tangata ʻe toko tolú. ʻOku fakahā mai ʻe heʻeku tui ki he Tamai Hēvaní mo Sīsū Kalaisí ʻoku nofo fakataha atu hoku foha ne maté mo hoku husepānití mo e makapuna tangatá. ʻOku ʻomi ʻe he ʻilo ko iá ha nonga kiate au. Neongo ʻa e faingataʻaʻia homau fāmilí, ka ʻoku mau kei ʻofa pē ki he ʻEikí mo ʻEne ongoongoleleí, pea kuo tupulaki ʻemau fakamoʻoní. ʻOku ou fakamoʻoni ko Palesiteni Nalesoní ko ha palōfita pea ko e faleʻi ʻokú ne faí ʻoku haʻu ia mei he ʻEikí.