Pene 5

Te faaroo e te tatarahapa

« Te mea titauhia no tatou i roto i te Ekalesia, e i rapae atoa, o te tatarahapa ïa. Te mea titauhia no tatou, o te faaroo rahi atu e te hinaaro rahi atu no te tavini i te Fatu ».

No roto mai i te oraraa o Joseph Fielding Smith

Ua haapii mai te peresideni Joseph Fielding Smith e, « E tupu mai te faaoreraa hara na roto i te faaroo e te tatarahapa mau ».¹Ua parau oia e, « E mea titauhia ia tatou, eiaha ia ti‘aturi noa, ia tatarahapa roa râ », e ua haapii atoa mai oia e, ia rave ana‘e tatou i te ohipa maitai ma te faaroo e tae noa’tu i te hopea ra, e « farii tatou i te utu‘a a te feia faaroo ra, e i te hoê parahiraa i roto i te basileia tiretiera o te Atua ».² I roto i to’na hinaaro ia farii te mau taata atoa i teie utu‘a, ua faaite papû mai oia no ni‘a ia Iesu Mesia e ua poro i te tatarahapa i roto i te roaraa o ta’na tau taviniraa.

I te omuaraa roa o ta’na ohipa taviniraa ei Aposetolo, ua parau oia e : « Ua feruri au e, o ta’u misioni, no te haaputapuraa rahi, ia’u i mana‘o, na te Varua o te Fatu i roto i to’u mau tere na roto i te mau tĭtĭ no Ziona, te parauraa ïa i te mau taata e, i teie neite mahana tatarahaparaa e no te ti‘aoro i te Feia Mo‘a i te Mau Mahana Hopea Nei ia haamana‘o i ta ratou mau fafauraa, te mau euhe ta ratou i rave i mua i te Fatu, ia haapa‘o i ta’na mau faaueraa, e ia pee i te mau haapiiraa e te mau arata‘iraa a te mau peresibutero no Iseraela—te mau peropheta o te Atua—mai tei papa‘ihia i roto i teie mau papa‘iraa mo‘a. I roto i te mau mea atoa e haere tatou ma te haehaa e te au maite i mua i te Fatu ia haamaitaihia tatou e ia arata‘ihia ho‘i e to’na Varua Mo‘a. Te mana‘o nei au e, e mahana faaararaa teie. Ua tae a‘ena mai te tau no te faaararaa i te taime a farii ai te peropheta i te faaiteraa no te ra‘i mai e, e faaho‘i-faahou-hia mai te evanelia.³

I te hoê Sabati i roto i te pureraa oro‘a, ua parau atu te peresideni Smith i te amuiraa e, no te aha oia i parau ai ma te reo faaara. I muri a‘e, ta’na tamaiti o Iosepha, tei parahi atoa i roto i te reira pureraa, ua papa‘i oia e : « Te haamana‘o papû nei au i te mau parau ta [to’u metua tane] i parau i taua taime ra. ‘O vai to outou hoa, e aore râ, o vai te here rahi a‘enei ia outou ?’ ta’na uiraa i te amuiraa. ‘Te taata anei e parau ia outou e, e mea maitai i Ziona, tei mua mai te auhuneraa, e aore râ, te taata anei e faaara ia outou i te mau ati e te mau fifi i fafauhia maoti a‘e te haapa‘oraa i te mau parau tumu o te evanelia ? Te hinaaro nei au ia ite outou e, ua here au i te mau melo o te Ekalesia, e aita vau e hinaaro i te hoê o ratou ia faatoro mai i te rima faahapa ia’u ia haere ana‘e tatou na roto i te paruru o te oraraa tahuti nei e ia parau mai e, « Ahiri oe i faaara mai ia’u, aita ïa vau i roto i teie huru ». E no reira te faateitei nei au i te reo faaara ma te ti‘aturi e, e ineine to’u mau taea‘e e to’u mau tuahine no te hoê basileia hanahana.⁴

Ua faaite te peresideni Joseph Fielding Smith i te tumu oia e pii ai i te Feia Mo‘a i te Mau Mahana Hopea Nei ia tatarahapa : « Ua here au i te mau melo o te Ekalesia ».

Te feia tei haa i piha‘iho i te peresideni Smith ua ite ratou e, tapiri i teie mau faaararaa etaeta, te vai ra hoê taata aau aroha no te mau taata tei tafifi i roto i te hara. E mea pinepine o Elder Francis M. Gibbons, tei tavini ei papa‘i parau no te Peresideniraa Matamua, i te faaroo i te peresideni Smith ia paraparau i te mau ohipa faatitiaifaroraa a te Ekalesia. Te haamana‘o ra Elder Gibbons e : « I te mau taime atoa e rave oia i ta’na mau faaotiraa na roto i te mărû, te here e i roto i te aroha rahi e au ia faaohipahia i reira. Ia ite oia i te u‘anaraa o te hoê hapa, e mea pinepine oia i te parau e, ‘No te aha aita te taata e faaafaro ia ratou iho ?’ E ere teie parau ta’na no te pari e aore râ, no te faahapa, te parau ra râ oia ma te pe‘ape‘a e te oto ».⁵ Ua parau te peresideni Spencer W. Kimball, tei tavini i piha‘iho i te peresideni Smith ei melo no te Pŭpŭ no te Tino Ahuru Ma Piti Aposetolo e, « E rave rahi taime to matou parauraa e, mai te mea e, o te Tino Ahuru Ma Piti te mau haava o Iseraela, pauroa matou e oaoa ia topa’tu i roto i to’na rima, no te mea, e haavaraa mărû ta’na, e te aroha, e te ti‘a e te mo‘a ».⁶ Ia faatoro‘a ana‘e te peresideni Smith i te mau episekopo, pinepine oia i te a‘o e : « Haamana‘o, e paruparu to te mau taata atoa, e te vai ra e piti pae i te mau aamu atoa. Mai te mea noa’tu, e hape outou i roto i te hoê haavaraa, e mea tano ia hape’tu outou i te pae no te here e te aroha ».⁷

Te mau haapiiraa a Joseph Fielding Smith

Te parau tumu matamua o te evanelia o te faaroo ïa i te Fatu ra ia Iesu Mesia.

Ua faatumuhia to tatou faaroo i ni‘a i te Fatu ia Iesu Mesia, e na roto ia’na i ni‘a i te Metua. Te ti‘aturi nei tatou i te Mesia, te farii nei ia’na ei Tamaiti na te Atua, e ua rave tatou i to’na i‘oa i ni‘a ia tatou i roto i te pape o te bapetizoraa.⁸

Ia vai matamua roa i roto i to outou feruriraa, i teie nei e i te mau taime atoa e, o Iesu te Mesia, te Tamaiti a te Atua ora tei haere mai i roto i te ao nei no te pûpû i to’na ora ia ora tatou. O tera te parau mau, e e mea faufaa roa. I ni‘a i te reira to tatou faaroo e patuhia ai. E ore te reira e mou. Titauhia ia tatou ia tape‘a i teie haapiiraa taa ê noa’tu te mau haapiiraa a te ao nei, e te iteraa o te taata ; no te mea, e mea hau roa teie, e e mea faufaa ho‘i no to tatou faaoraraa. Ua faaora te Fatu ia tatou i to’na toto, ua horo‘a mai oia ia tatou i te faaoraraa, mai te mea e—e tera te titauraa eiaha roa tatou e haamo‘e—e ia haapa‘o tatou i ta’na mau faaueraa, e e haamana‘o noa ia’na. Mai te mea e, e rave tatou i te reira, e faaorahia ïa tatou, are‘a te mau mana‘o e te maamaa o te taata nei ra, e mo‘e ïa i te fenua nei.⁹

Na roto i te faaroo tatou e haere ai i te Atua ra. Ia ore tatou e ti‘aturi i te Fatu ia Iesu Mesia, ia ere tatou i te faaroo Ia’na e aore râ, i To’na taraehara, eita ïa tatou e hinaaro e haapa‘o i Ta’na mau faaueraa. No taua faaroo to tatou ra, i tupu ai to tatou au i Ta’na parau mau, e i tupu ai te hinaaro i roto i to tatou aau no te tavini Ia’na…

Te parau tumu matamua o te evanelia o te faaroo ïa i te Fatu ia Iesu Mesia ; e papû roa ïa, eita tatou e faaroo i te Fatu ia Iesu Mesia ma te ore e faaroo i To’na Metua. No reira, mai te mea e, e faaroo to tatou i te Atua te Metua e i te Tamaiti e ua arata‘ihia tatou, mai tei titauhia, na te Varua Maitai, e roaa ïa to tatou faaroo i te mau tavini o te Fatu na roto ho‘i ia ratou Oia i paraparau mai ai.¹⁰

Te faaroo, o te ohipa ïa.

« O te faaroo te tumu tura‘i i te mau ohipa atoa ». [Haapiiraa no ni‘a i te Faaroo, haapiiraa 1.] Mai te mea e faaea outou hoê taime no te feruri i te reira, te mana‘o nei au e, e farii outou e, ua ti‘a te reira i roto i te mau mea no te tino nei e i roto atoa i te mau mea no te pae varua. E parau mau te reira no tatou i roto i ta tatou iho mau ohipa, e i roto atoa i te mau ohipa a te Atua…

« Te faaroo aore e ohipa ra, e mea pohe ïa » [Iakobo 2:26]—oia ho‘i, aita ïa e faaroo. Te mana‘o nei au e, te parau nei o Iakobo e, « Faaite mai outou i to outou faaroo ma te ohipa ore, aore hoê mea e tupu ; e faaite atu râ vau ia outou i to’u faaroo e ta’u ohipa, e tupu ïa te hoê ohipa ». [A hi‘o Iakobo 2:18.] Te faaroo o te ohipa ïa… No reira, e mea puai a‘e te faaroo i te ti‘aturi…

Te faaroo, o te horo‘a ïa a te Atua. Te mau mea maitai atoa ra, o te horo‘a ïa a te Atua. Te hoê teie haapiiraa i roto i te mau papa‘iraa mo‘a mai tei papa‘ihia i roto i te pene 11 no Hebera—te pene no te hoê tatararaa maitai roa o te parau no te faaroo—[e] i roto i te mau heheuraa ta te Fatu i horo‘a mai ia tatou i roto Te Parau Haapiiraa e te Mau Parau Fafau. Eita te faaroo e roaa na roto i te ohipa ore e aore râ, na roto i te tau‘a ore e aore râ, te parahi-noa-raa i roto i te ti‘aturi. Eita te faatupu-noa-raa i te hinaaro ia roaa te faaroo e horo‘a mai i te faaroo, mai te hinaaro i te aravihi i roto i te pehe te peni hoho‘a, e ore e roaa mai ma te ore e rave maramarama i te ohipa. No ô mai to tatou fifi. Te farii nei tatou i te hoê iteraa papû no ni‘a i te Evanelia, te ti‘aturi nei tatou ia Iosepha Semita, te ti‘aturi nei tatou ia Iesu Mesia, te ti‘aturi nei tatou i te mau parau tumu o te Evanelia, tera râ, eaha te puai o ta tatou ohipa no te reira mau mea ?

… Mai te mea e, e hinaaro tatou ia roaa ia tatou te hoê faaroo ora e te tamau, ia itoito ïa tatou i te rave i te mau ohipa atoa ei melo no teie Ekalesia…

Ahani pai to tatou faaroo mai te faaroo o Nephi ! A tai‘o i roto i te pene 17 no te 1 Nephi tei reira to’na na taea‘e i te pato‘iraa ia’na e te faaooraa ia’na i te mea e, te hamani ra oia i te hoê pahi, ua na ô raua :

« E taata maamaa to taua teina, no te mea ua mana‘o oia e, e ti‘a ia’na ia hamani i te pahi ; e ua mana‘o atoa oia e, e tae atu oia i tera pae mai o teie nei miti rahi ». [1 Nephi 17:17.]

Ua pahono atura Nephi ia raua :

« Ahiri e faaue mai te Atua ia’u e rave i te mau mea atoa, e ti‘a ïa ia’u i te rave. E ahiri oia e faaue mai ia’u e parau atu i teie nei miti e, ia riro ei fenua, ua riro ïa ei fenua ; e ahiri au e parau, ua na reirahia ïa ». [1 Nephi 17:50.]

O tera to’na faaroo.¹¹

Aita tatou e haere nei na roto i te ite mata i teie nei, mai ta tatou i na reira hou a haere mai ai i roto i teie nei ao, te hinaaro nei râ te Fatu ia haere tatou na roto i te faaroo [a hi‘o 2 Korinetia 5:7] ; e ia haere tatou na roto i te faaroo, e farii tatou i te haamaitairaa o te parau-ti‘a, mai te mea e, e haapa‘o tatou i te reira mau faaueraa tei horo‘ahia mai no to tatou faaoraraa.¹²

Ia ore te hoê taata e haapa‘o i te haapiiraa tumu e ia haere na roto i te faaroo, ma te farii i te parau mau e ma te haapa‘o i te mau faaueraa mai tei au i tei horo‘ahia mai, eita ïa oia e farii i te ora mure ore, noa’tu e, e faî to’na vaha e, o Iesu te Mesia, e aore râ, noa’tu e, e ti‘aturi oia e, ua tono mai to’na Metua ia’na i roto i te ao nei no te faaoraraa o te taata nei. No reira, ua tano Iakobo a parau ai oia e, « ua faaroo e ua rurutaina » te mau demoni, aita râ ratou i tatarahapa [a hi‘o Iakobo 2:19].¹³

Te tatarahapa te piti o te parau tumu o te evanelia e e mea faufaa te reira no to tatou faaoraraa e to tatou faateiteiraa.

O te tatarahapa te piti o te parau tumu faufaa o te evanelia e te oteoraa no te faaroo.¹⁴

Te mea titauhia no tatou i roto i te Ekalesia, e i rapae atoa, o te tatarahapa ïa. Te titau nei tatou i te faaroo rahi atu e te opuaraa rahi atu no te tavini i te Fatu ».¹⁵

Parau mau, te vai nei te tahi pae o tatou o te feruri nei e, aita e fifi ia rave tatou i te hara, mai te mea e, e ere i te hara teimaha, e ere i te hara haapohe taata, e e faaorahia ihoa tatou i roto i te basileia o te Atua ? Ua ite atea mai Nephi i to tatou tau. Te parau ra oia e, e na reira te taata i te parau [a hi‘o 2 Nephi 28:7–9]. Te parau atu nei râ vau ia outou, e ore e nehenehe ia tatou ia fariu ê i te e‘a o te parau mau e te parau-ti‘a a tape‘a noa ai i te arata‘iraa a te Varua o te Fatu.¹⁶

Aore e parahiraa i Ziona no te feia hinaaro rave hara. Te vai ra te parahiraa no te taata tatarahapa rave hara, no te taata e fariu ê nei i te ino ma te imi i te ora mure ore e i te maramarama o te Evanelia. Eiaha tatou e faati‘a i te hara hoê vahi iti noa a‘e, ma te ore e ti‘a i te Fatu ia na reira, e haere ra tatou i mua i te Fatu ma te parau-ti‘a e te maitai roa.¹⁷

I roto ana‘e i te parau-ti‘a te taata e faaorahia ai e e faateiteihia ai i roto i te basileia o te Atua ; no reira, ia tatarahapa tatou i ta tatou mau hara e ti‘a ai, e ia haere ho‘i i roto i te maramarama mai te Mesia ra i roto i te maramarama [a hi‘o 1 Ioane 1:7], ia ti‘a ho‘i i to’na toto ia tamâ ia tatou i te mau hara atoa, e ia hoê ho‘i tatou e te Fatu e ia farii i to’na hanahana e to’na faateiteiraa.¹⁸

Titauhia ia tatou ia tatarahapa, e titauhia tatou ia parauhia mai ia tatarahapa.¹⁹

I roto i te parau tumu no te tatarahapa e ite-papû-hia ai te aroha o te Metua i te Ao ra e o Iesu Mesia.

Ua riro te tatarahapa ei hoê o te mau parau tumu mahanahana e te hanahana roa a‘e i roto i te evanelia. Tei roto i teie parau tumu e ite-papû-hia ai te aroha o to tatou Metua i te Ao ra e ta’na Tamaiti Fanau Tahi, o Iesu Mesia, e peneia‘e, hau atu i te puai i roto i te tahi atu parau tumu. Auê ïa ohipa ri‘ari‘a ahiri e aita e faaoreraa hara, e aita e rave‘a no te haamatara i te hara a te feia e tatarahapa nei ma te haehaa ! Te tahi noa maa tuhaa iti o te ri‘ari‘a rahi te ti‘a ia tatou ia feruri, ahiri e, na tatou iho e amo amuri e a muri noa’tu, i te utu‘a o ta tatou ofatiraa ture, ma te tia‘i ore ia tae mai te hoê tauturu. Nahea e noaa ai te reira tauturu ? Na roto ia vai e fariihia ai te reira ?

Ua parau to tatou Fatu e :

« I aroha mai te Atua i to te ao, e ua tae roa i te horo‘a mai i Ta’na Tamaiti Fanau Tahi, ia ore ia pohe te faaroo ia’na ra, ia roaa râ te ora mure ore.

« Aore ho‘i te Atua i tono mai i Ta’na Tamaiti i te ao nei e faahapa mai i to te ao ; ia ora râ to te ao ia’na ». [Ioane 3:16–17 ; a hi‘o atoa irava 18–21.]

Ahiri aita te Metua i tono mai ia Iesu Mesia i roto i te ao nei, aore ïa e vai te matararaa o te hara, e aita ïa e tupu te tatararaa hara na roto i te tatarahapa.²⁰

« Ua riro te tatarahapa ei hoê o te mau parau tumu mahanahana e te hanahana roa a‘e i roto i te evanelia ».

Ahiri tatou e taa maitai e e ite mai i te hoê tuhaa iti ha‘iha‘i roa no te here e te hiaai aroha o Iesu Mesia no te mamae no ta tatou mau hara, e tupu mau ïa te hinaaro i roto ia tatou ia tatarahapa i ta tatou mau ofatiraa ture atoa e ia tavini ia’na.²¹

Tei roto i te tatarahapa te oto mau no te hara e te huritua-hope-raa i te hara.

Te na ô ra te mau papa‘iraa mo‘a e :

« E pupu atu oe i te hoê tusia i te Fatu ra o to oe Atua na roto i te parau-ti‘a, oia ho‘i i te aau oto e i te varua haehaa ra ». PH&PF 59:8

Te auraa ra, e tatarahapa

… Te tatarahapa, ia au i te tatararaa i roto i te buka faatoro parau, o te oto mau ïa no te hara e te faautu‘araa ia’na iho, e te huritua-hope-raa i te hara… Aore e tatarahaparaa mau mai te mea e, aita e oto e aita e hinaaro ia faati‘amâhia mai te hara mai.

Te varua haehaa, e faaiteraa ïa no te hoê varua oto, e aore râ, hoê varua haehaa no te hara i ravehia, e e haro‘aro‘a mau ïa i te ohipa haamâ o te hara, e e iteraa atoa i te aroha e te here o te Atua tei horo‘ahia i te taata hara tei tatarahapa… No reira te Fatu e parau nei e, mai ta’u i faahiti a‘enei e, titauhia ia tatou ia pûpû i te hoê tusia « na roto i te parau-ti‘a, oia ho‘i i te aau oto e i te varua haehaa ra »…

Te tatarahapa e horo‘a ïa na te Atua… E ere i te mea ohie no te tahi mau taata ia tatarahapa, tera râ, e horo‘ahia te horo‘a o te tatarahapa e te faaroo i te mau taata atoa e imi i te reira.²²

Ua haapii mai au na roto i ta’u iho mau iteraa e, mai te mea e, e hinaaro oe e taui, e hinaaro mau e taui, e nehenehe ta oe e taui. Na to tatou iho mana‘o haavâ e te mau papa‘iraa mo‘a e parau mai nei ia tatou eaha te haapa‘o—e te parau atoa mai nei te reira ia tatou eaha te mau peu e ti‘a ia tatou ia taui no to tatou maitai e te haereraa mure ore i mua.²³

I teie nei te taime no te tatarahapa.

Eita te Atua e faaora i te taatoaraa o te mau tane e te mau vahine i roto i te basileia tiretiera. Mai te mea e, ua hinaaro outou ia tae i reira, e e manuïa ore to outou, mai te mea e, te rave nei outou i te hara, mai te mea e, te ofati nei outou i te mau faaueraa a te Fatu e ua ite outou i te reira, e taime maitai teie ia tatarahapa e ia faaapî, e eiaha e feruri e, e ohipa iti ha‘iha‘i roa, e faaore mai te Fatu i ta outou hapa, te tahi noa ta‘iri iti, te tahi faautu‘a iti, e e faaorehia ta tatou hara ; no te mea, e riro outou i te ti‘avarûhia i rapae, mai te mea e, e onoono noa e e tamau outou i roto i te reira haerea.²⁴

Te faataimeraa, ia au i te mau parau tumu o te evanelia, o te eiâ ïa o te ora mure ore, oia te oraraa i mua i te aro o te Metua e te Tamaiti. E rave rahi i rotopu ia tatou, te mau melo iho o te Ekalesia, o te mana‘o nei e, aita e titau-rû-hia i te haapa‘o i te mau parau tumu o te evanelia e i te haapa‘o i te mau faaueraa…

Eiaha tatou e haamo‘e i te mau parau a [Amuleka] : « Inaha hoi, tei teie nei oraraa te taime ia faaineine te taata ia fareirei i te Atua ; oia ïa, o te mahana ïa, te mahana o teie nei oraraa, ia rave te taata i ta ratou ohipa.

« E teie nei, mai ta’u i parau na ia outou, ua tae mai ia outou te mau faaite e rave rahi, no reira te a‘o atu nei au ia outou e, eiaha outou e faaroaroa i te mahana o ta outou tatarahapa e tae roa i te hopea ; no te mea i muri i te mahana o teie nei oraraa ra, o tei horo‘ahia mai i te taata ia faaineine no te tau mure ore ra, inaha, ia ore outou ia rave maite i te ohipa a parahi ai outou i te ao nei e i reira e tae mai ai te pô poiri, e e ore e ti‘a ia ravehia te ohipa i reira.

« E ore e ti‘a ia outou ia parau, a arata‘ihia ai outou i taua hopea riaria ra, e tatarahapa vau, e fariu vau i to’u Atua. Eita, e ore e ti‘a ia outou ia parau i te reira ; no te mea e mana â to taua varua, tei roto i to outou tino i te mahana e pohe ai outou ra, i ni‘a i to outou tino i taua ao mure ore ra ». [Alama 34:32–34.]²⁵

E titauraa ta tatou ia faateitei i te reo faaara i to te ao nei.

Ua opua te Fatu ia roaa te oaoa i te taata—tera ta’na opuaraa—te pato‘i nei râ te taata ia oaoa, e te imi nei i to ratou iho ati, no te mea, te feruri nei ratou e, e mea maitai a‘e to ratou haerea i to te Atua, e no te aau pipiri e te nounou e te ino i roto i to ratou aau ; tera ïa to tatou fifi i teie mahana.²⁶

Na roto i te mau mea ta matou i ite i roto i to matou mau tere i tera vahi e tera vahi, e na roto i te mau mea ta matou i tai‘o i roto i te mau ve‘a, ua arata‘i-ti‘a-hia matou i te iteraa e, e mea faufaa mau te tatarahaparaa i te hara i roto i te ao taatoa i teie mahana.²⁷

Eiaha e mana‘o e, ua tae‘ahia ia tatou te faito ino a‘e o te mau mea. Ahiri e, aita e tatarahapa, ua rahi atu â to te reira ino. E no reira, te ti‘aoro nei au i te tatarahapa i teie mau taata, i te Feia Mo‘a i te Mau Mahana Hopea Nei… e i te mau nunaa o te fenua i te mau vahi atoa.²⁸

E titauraa ta tatou ia faateitei i te reo faaara i to te ao nei, i te mau melo ihoa râ o te Ekalesia [a hi‘o PH&PF 88:81].²⁹

E hopoi‘a na tatou ia tia‘i te tahi i te tahi, ia paruru te tahi i te tahi, ia faaara te tahi i te tahi i te mau fifi, ia haapii te tahi i te tahi i te mau parau tumu o te Evanelia o te basileia, e ia ti‘a amui ei reni hoê i mua i te hara o te ao nei.³⁰

Aita vau i ite i te hoê mea faufaa atu e aore râ, titau-roa-hia a‘e i teie taime maori râ, te ti‘aororaa i te tatarahapa, i rotopu atoa i te Feia Mo‘a i te Mau Mahana Hopea Nei, e te ti‘aoro nei au ia ratou e tae noa’tu i te feia e ere i te melo no te Ekalesia, ia faaroo i teie mau parau a to tatou Faaora. Ua parau papû oia e, e ore roa te hoê mea viivii e tomo i mua i to’na aro. O ratou ana‘e tei faaite i te faaroo, e tei tamâ i to ratou ahu i roto i to’na toto na roto i to ratou faaroo e ta ratou tatarahapa—aore taata ê e ite atu i te basileia o te Atua.³¹

« Inaha râ, e parahi hau to te mau fenua atoa, e to te mau reo atoa, e to te mau opu atoa, e to te mau nunaa atoa, i roto i tei Mo‘a i Iseraela nei, ia tatarahapa ratou ». [1 Nephi 22:28.] E te pure nei au ia tatarahapa ratou. Ua hinaaro vau ia parahi ratou ma te hau. Ua hinaaro vau ia ti‘aturi ratou i Tei Mo‘a i Iseraela, tei haere mai i te ao nei e ua pohe no ta tatou mau hara, no te mau hara a te mau taata atoa, tei horo‘a mai ia tatou nei i te faaoraraa i te pohe, tei fafau mai ia tatou i te faaoraraa e i te matararaa ta tatou mau hara mai te mea e, e tatarahapa tatou.

Auê to’u hinaaro rahi ia ti‘aturi te mau taata atoa ia’na, ia haamori ia’na e i to’na Metua, e ia tavini i te Fatu to tatou Atua i te i‘oa o te Tamaiti, ei reira ho‘i te hau e tae mai ai, ei reira te parau-ti‘a e upooti‘a ai, ei reira te Fatu e haamau ai i to’na basileia i ni‘a i te fenua nei.³²

Te taparu nei au i to te ao nei ia tatarahapa e ia ti‘aturi i te parau mau, ia vaiiho i te maramarama o te Mesia ia anaana i roto i to ratou oraraa, ia haapa‘o i te mau parau tumu maitai e te ti‘a na ratou ra, e ia amui atu i te reira i te tahi atu maramarama e te ite tei tae mai na roto i te heheuraa i teie mahana. Te taparu nei au ia ratou ia tomo mai i roto i te Ekalesia a Iesu Mesia i te Feia Mo‘a i te Mau Mahana Hopea Nei e ia ooti i te mau haamaitairaa o te evanelia.

Te taparu nei au i te mau melo o te Ekalesia ia rave i te mau ohipa o te parau-ti‘a, ia haapa‘o i te mau faaueraa, ia imi i te Varua, ia here i te Fatu, ia tuu na mua roa i roto i to ratou oraraa i te mau mea o te basileia o te Atua, e i reira a rohi ai no to ratou faaoraraa ma te măta‘u e te rurutaina i mua i te Fatu [a hi‘o Philipi 2:12].³³

Te mau mana‘o tauturu no te tuatapaparaa e te haapiiraa

Uiraa

I roto i te « No roto mai i te oraraa o Joseph Fielding Smith », a hi‘o faahou i te mau mana‘o o te peresideni Smith no ni‘a i te tumu i hinaaro ai oia « ia faateitei i reo faaara ». Nahea te ti‘aororaa ia tatarahapa e riro ai ei tapa‘o faaite no te here ?
Eaha te auraa no outou ia faatumu i to outou faaroo i ni‘a i te Metua i te Ao ra e ia Iesu Mesia ? (A hi‘o i te tuhaa 1.)
No te aha te faaroo mau e arata‘i ai i te ohipa ? (No te tahi mau hi‘oraa, a hi‘o i te tuhaa 2.) Eaha te tahi mau rave‘a e nehenehe ai ta tatou e faaite i to tatou faaroo na roto i ta tatou mau ohipa ?
Nahea te tatarahapa e riro ai ei « oteoraa no te faaroo » ? (A hi‘o i te tuhaa 3.)
A feruri ma te mamû i te hoê taime a tatarahapa ai outou e a ite ai outou i te aroha e te here o te Metua i te Ao ra e o Iesu Mesia (a hi‘o i te tuhaa 4). Eaha ta outou e nehenehe e faaite no ni‘a i to outou aau mehara no te Taraehara a te Faaora ?
No te aha aita e tatarahapa mai te peu « aita e oto e aita e hinaaro ia faati‘amâhia mai te hara mai » ? (A hi‘o i te tuhaa 5.) Nahea e ti‘a ai i na paratarafa hopea e piti i roto i te tuhaa 5 i te horo‘a mai i te ti‘aturiraa i te hoê taata tei roto i te oto no te hara ?
Mai te aha te huru te faataimeraa e riro ai ei « eiâ no te ora mure ore » ? (A hi‘o i te tuhaa 6.) Eaha te mau fifi e noaa mai no te faataimeraa i to tatou tatarahaparaa ?
Ia hi‘o ana‘e outou i te tuhaa 7, a feruri eaha te auraa e « faateitei i te hoê reo faaara ». Nahea e ti‘a ai ia tatou ia vai mărû e ia here i roto i ta tatou tautooraa ia faaara ia vetahi ê ?

Te mau papa‘iraa mo‘a

Hebera 11:1–6 ; Mosia 4:1–3 ; Alama 34:17 ; Etera 12:4 ; Moroni 7:33–34 ; PH&PF 18:10–16 ; Hiroa Faaroo 1:4

Tauturu haapiiraa

« O te piahi o te ti‘a ia faaohipahia. Ia huri ana‘e te orometua haapii i te mori i ni‘a ia’na, ia riro ana‘e oia ei taata tumu no te ha‘utiraa, ia paraparau ana‘e oia oia ana‘e, e ia rave ana‘e oia i te mau ohipa atoa, e mea papû roa e, te haafifi ra ïa oia i te aporaa o te mau melo no te piha haapiiraa » (Asahel D. Woodruff, Teaching the Gospel [1962], 37 ; in Virginia H. Pearce, « The Ordinary Classroom—A Powerful Place for Steady and Continued Growth », Ensign, Novema 1996, 12).