Te oraraa e te tau faatereraa a Joseph Fielding Smith

Ua fanauhia o Joseph Fielding Smith « ei tamarii no te fafauraa », te na reira ra o Elder Bruce R. McConkie no te Pŭpŭ no te Tino Ahuru Ma Piti Aposetolo. E hunoa o Elder McConkie na te peresideni Smith, te faaite nei oia e, « e toru tamahine ta Julina Lambson Smith, aita râ e tamaroa, e no reira, ua haere oia i mua i te Fatu, e mai ia Hana i tahito ra, ‘ua euhe ihora oia i te euhe ra’. [1 Samuela 1:11.] Ta’na fafauraa : Mai te mea e, e horo‘a mai te Fatu i te hoê tamaiti na’na, ‘e horo‘a oia i to’na puai hope no te tauturu ia’na ia riro ei faufaa na te Fatu e na to’na metua tane’. Ua faaroo te Fatu i ta’na mau pure, e ua haapa‘o o Julina i ta’na fafauraa i mua i te Fatu ».³ I te 19 no tiurai 1876, ua farii o Julina e ta’na tane o Joseph F. Smith, i te hoê tamaiti fanau apî i roto i to raua utuafare. Ua topa ihora raua i to’na i‘oa o Joseph Fielding Smith Tamaiti, mai to’na metua tane.

I te fanauraa, ua tomo mai o Joseph Fielding Smith i roto i te hoê utuafare ona i roto i te faaroo, te tavini e te faatere. To’na papa ruau o Hairamu Semita, e taea‘e ïa no te peropheta Iosepha Semita, e hoê ite itoito no te Faaho‘iraahia mai te evanelia. Ua faataa te Fatu ia Hairamu ia « riro ei peropheta, ei hi‘o, e ei heheu parau i [Ta’na] ekalesia », ma te parau e, « ia haamana‘o-noa-hia [te i‘oa o Hairamu] ma te tura mai tera u‘i e tae noa’tu i tera u‘i ra, e a muri e a muri noa’tu » (PH&PF 124:94, 96). Ua titiro o Hairamu i to’na iteraa papû i to’na toto, e to’na atoa taea‘e o Iosepha, tei taparahi-pohe-hia e te hoê pŭpŭ taata iino i te 27 no tiunu 1844 (a hi‘o PH&PF 135).

Hōho’a

Joseph Fielding Smith’s parents, Joseph F. Smith and Julina Lambson Smith, standing together.

Ua amo te metua tane o Joseph Fielding Smith, oia ho‘i, o Joseph F. Smith, i te mau hopoi‘a teimaha mai to’na tamariiraa mai â. Ei tamarii matahiapo na Hairamu e o Mary Fielding Smith, e pae matahiti to’na a taparahi-pohe-hia ai to’na metua tane, e e iva matahiti to’na a tauturu ai oia i to’na metua vahine ivi i te faahororaa i to’na pereoo puaahorofenua mai Navu, Illinois, haere ti‘a’tu i te Afaa no Roto Miti. I muri a‘e, ua tavini oia ei misionare e ei melo no te Pŭpŭ no te Tino Ahuru Ma Piti Aposetolo. E tauturu oia i roto i te Peresideniraa Matamua i te taime a fanauhia mai ai ta’na tamaiti o Joseph. Mai te 17 no atopa 1901 e tae atu i te 19 no novema 1918, ua tavini oia ei Peresideni no te Ekalesia.

O Julina Lambson Smith, te metua vahine o Joseph Fielding Smith, te hoê o te mau utuafare pionie matamua i roto i te Afaa no Roto Miti. Mai te iva o to’na matahiti, ua faaamuhia oia i roto i te utuafare o to’na metua tane fetii (oncle) o George A. Smith, e melo no te Pŭpŭ no te Tino Ahuru Ma Piti Aposetolo i taua taime ra, e to’na metua vahine fetii (tante) o Bathsheba W. Smith. (I muri mai ua tavini o Elder Smith ei tauturu hoê i roto i te Peresideniraa Matamua, i raro a‘e i te peresideni Brigham Young, are‘a te tuahine Smith ra, ua tavini ïa oia ei peresideni rahi no te Sotaiete Tauturu.) I to’na paariraa mai, ua riro o Julina ei vahine e ei metua vahine itoito, e ei melo haapa‘o no te Sotaiete Tauturu. Ua mâtauhia oia no to’na aroha e no to’na aravihi ei vahine faafanau, tei faatae mai « fatata e 1 000 aiû i te ao nei » e tei aupuru atoa i to ratou mau metua vahine.⁴ Mai te ava‘e atopa 1910 e tae atu i te ava‘e eperera 1921, ua tavini oia ei tauturu piti i roto i te peresideniraa rahi no te Sotaiete Tauturu.

Ua haapii o Joseph e nahea i te rave i te ohipa i to’na apîraa ra. E fare faaapu ta to’na utuafare i Taylorsville, Utah, fatata 10 maire (16 km) i te atea i to ratou fare, i reira oia e to’na mau taea‘e i te raveraa i te ohipa mai te heruraa i te apoo faahoro pape, te tapuraa i te maa animara, e te atuaturaa i te animara. I te fare, e atuatu ïa te utuafare i te hoê faaapu maa rahi, e rave rahi tumu raau maa hotu, e toru ana‘iraa tumu vine, te moa faaamu, e toru puaatoro e te tahi tau puaahorofenua. Ua rave te peresideni Joseph F. Smith i te faaipoiporaa vahine rau, no reira, e rave rahi vaha e faaamu i roto i te utuafare e e rave rahi rima no te tauturu i te ohipa. Ua horo‘ahia ia Joseph Fielding Smith te tahi mau hopoi‘a a te taata paari, no te mea, o oia te hoê o te mau tamaroa paari a‘e i roto i te utuafare rahi. Taa ê atu te reira mau hopoi‘a, te vai atoa ra ta’na mau ohipa no te haapiiraa ta’na i haapa‘o maitai.

Te ohipa matamua a Joseph i rapae i te utuafare e i te fare faaapu a te utuafare, tei piha‘i iho ïa i to’na metua vahine. Pinepine oia i te faahoro i te hoê puaahorofenua e te pereoo no te tauturu i to’na mama ia haere e rave i ta’na mau ohipa ei vahine faafanau tamarii. I te pae hopea o to’na tau taure‘are‘araa, ua itehia ia’na te hoê ohipa i roto i te hoê totaiete ohipa rave amui (ZCMI), i reira oia i te raveraa i te ohipa puai i te mahana taatoa. I muri a‘e, te parau ra oia e : « Ua rave au i te ohipa mai te hoê puaahorofenua i te mahana taatoa, e ua rohirohi roa vau i te ahiahi, i te amoraa i te mau pute faraoa ota e te mau pute tihota e te hamu e te « bacon » i ni‘a i to’u tua. E 150 paunu [68 kilo] to’u, tera râ, aita to’u mana‘o taiâ ia amo hoê pute e 200 paunu [91 kilo] e ia tuu i ni‘a i to’u na tapono ».⁵

No te faaau maite i te teimaha o ta’na mau hopoi‘a, ua ti‘a ia Joseph ia faataa i te tahi taime no te haʻuti. E mea au na’na e to’na mau taea‘e e te mau tuahine ia ha‘uti i te pô na rapae i te fare, te tapuniraa na roto i te mau tumu vine—« i te taime ihoa râ ua para te vine ».⁶ E mea au atoa na’na ia ha‘uti i te ha‘uti ta‘iri popo. Te vai ra ta te paroisa tata‘itahi hoê pŭpŭ ta‘iri popo, e e mea au roa na’na tera mau huru aroraa i rotopu i te mau hoa.

Noa’tu e, e mea faufaa na te taure‘are‘a Joseph Fielding Smith te ohipa ta‘iri popo, i te tahi taime, e vaiiho oi‘oi oia i te ha‘utiraa, no te mea, i to’na feruriraa, te vai ra hoê ohipa faufaa atu â. I taua mau taime ra, e nehenehe oia e itehia o’na ana‘e « i ni‘a i te aroaro e aore râ, i raro a‘e i te marumaru raau e tai‘o ra » i te Buka a Moromona.⁷ Te parau ra oia i muri a‘e e, « I roto i ta’u mau haamana‘oraa matamua, mai te taime a nehenehe ai ta’u e tai‘o, ua roaa ia’u te oaoa e te poupou rahi a‘e na roto i te tuatapaparaa i te mau papa‘iraa mo‘a, te tai‘oraa i te parau no ni‘a i te Fatu o Iesu Mesia, e no ni‘a i te peropheta Iosepha Semita, e no ni‘a i te ohipa i ravehia no te faaoraraa i te taata, hau atu â i te tahi atu mau mea i te ao atoa nei ».⁸ Ua haamata oia i te haamau i te hoê faanahoraa na’na iho no te tuatapapa i te evanelia, i te taime a farii ai oia i ta’na Buka a Moromona matamua i te va‘uraa o to’na matahiti. Ua tai‘o oia ma te anaanatae rahi i te mau buka papa‘iraa mo‘a e i te mau parau i nene‘ihia e te Ekalesia. Ua ta‘ita‘i oia i te hoê buka iti na‘ina‘i no te Faufaa Apî ia ti‘a ia’na ia tai‘o i te reira i te mau taime tamaaraa e i te taime a haere ai oia i ta’na ohipa i ZCMI e i te taime ho‘iraa. Ma te tamau e te tuutuu ore, ua faarahi atu â oia i te puai o to’na iteraa papû no ni‘a i te evanelia i faaho‘ihia mai.

Hōho’a

Joseph Fielding Smith as a young boy reading scriptures in hayloft

Tera râ, aita te tupuraa pae varua o Joseph i rave-noa-hia na roto i ta’na iho tuatapaparaa mamû. Ua haere tamau maite oia i te mau pureraa e i te mau haapiiraa a te Ekalesia, e ua farii oia i te mau oro‘a e te mau haamaitairaa o te autahu‘araa. E ume taa ê to’na no te hiero. A 23 matahiti te haamataraahia te hamaniraa o te hiero no Roto Miti a fanauhia mai ai oia. « I roto i te roaraa o to’na tau taure‘are‘araa, ua mata‘ita‘i noa o Joseph, ma te anaanatae rahi, i te nuuraa i mua, i te mau mahana atoa, i te hamaniraa o taua fare nehenehe ra. Ua ite mata oia i te mau ofa‘i rahi hopea i hopoihia mai na ni‘a i te pereoo auahi, mai te vahi i tapuhia mai ai te reira… Ua ite [oia] i te mau tira oeoe nehenehe i te hamaniraahia… [Ua parau oia e,] ‘Ua uiui noa vau ia’u iho e, e ora noa anei au no te ite i te otiraa o te hiero’ ».⁹

I te 6 no eperera 1893, ua amui atu o Joseph i roto i te tuhaa pureraa haamo‘araa matamua o te hiero no Roto Miti. Na te peresideni Wilford Woodruff, te maha o te Peresideni o te Ekalesia, i peresideni i te reira tuhaa pureraa e i pûpû i te pure haamo‘araa. I te vahi parahiraa o te feia faatere, i te pae aui o te peresideni Woodruff, te parahi ra to’na tauturu piti, te peresideni Joseph F. Smith.

I te 19raa o te matahiti o Joseph Fielding Smith, ua farii oia i te hoê haamaitairaa patereareha. Ua faarahi atu â teie haamaitairaa, tei horo‘ahia e to’na metua fetii o John Smith, tei riro ei patereareha no te Ekalesia, i te puai pae varua o Joseph. Ua parauhia ia Joseph e :

« E haamaitairaa taa ê to oe ia ora i te hoê faito matahiti paari e o te hinaaro ho‘i o te Fatu ia riro mai oe ei taata puai i Iseraela… 

« E riro te reira ei hopoi‘a na oe ia parahi i roto i te apooraa e to oe mau taea‘e e ia peresideni i rotopu i te mau taata. E riro te reira ei hopoi‘a atoa na oe te ratere-rahi-raa i to oe iho fenua e i te tahi atu mau fenua, na ni‘a i te fenua e i te pape, ma te raveraa i te ohipa faatere. E te parau atu nei au ia oe, a faaetaeta i to oe upoo, a faateitei i to oe reo ma te măta‘u ore e te faatiatia ore, mai te au i ta te Varua o te Fatu e arata‘i atu, ei reira ho‘i te mau haamaitairaa a te Fatu e vai ai i ni‘a ia oe. Na To’na Varua e arata‘i i to oe feruriraa e e horo‘a ia oe i te parau e i te mana‘o, ia ti‘a ho‘i ia oe ia haamamû i te paari o te feia iino ra, e ia haafaufaa ore i te a‘o a te feia parau-ti‘a ore ra ».¹⁰

I muri rii mai i taua ihoa matahiti ra, i muri a‘e i te 20raa o to’na mahana fanauraa, ua farii oia i te mau rave‘a apî no te taviniraa e no te tupuraa pae varua. Ua faatoro‘ahia oia ei peresibutero i roto i te Autahu‘araa a Melehizedeka, e ua farii i te oro‘a hiero. I te pae hopea o to’na oraraa, a tavini ai oia ei Peresideni no te Ekalesia, ua parau oia e : « E oaoa rahi to’u i te mea e, te mau nei au i te autahu‘araa mo‘a. Ua imi au i te rave‘a i roto i to’u oraraa taatoa ia faateitei i to’u piiraa i roto i te reira autahu‘araa, e te ti‘aturiraa ia faaoroma‘i e tae roa’tu i te hopea o teie oraraa e ia fana‘o i te faahoaraa a te feia mo‘a haapa‘o i roto i te oraraa a muri a‘e ».¹¹

A tauturu ai te taure‘are‘a Joseph Fielding Smith i te paturu i to’na utuafare, a tuatapapa ai i te evanelia, e a faaineine no te mau haamaitairaa o te autahu‘araa, aita te reira mau tautooraa ta’na i vai ite-ore-hia na te hoê tamahine o Louie Shurtliff te i‘oa. Te ora ra na metua o Louie i Ogden, Utah, area o Louie, ua haere mai oia i te utuafare Smith e noho ai, ia ti‘a ho‘i ia’na ia haere i te fare haapiiraa teitei no Utah, tei te tahi noa’tu pae i te purumu i te fare o te utuafare Smith i taua taime ra.

I te haamataraa, e auraa hoa noa i rotopu ia Joseph e o Louie, tera râ, ua haere noa te reira i te papûraa i roto i te arapaeraa. No te iti o ta raua moni, ua vai noa ta raua arapaeraa i te rahiraa o te taime i roto i te tai‘o-amui-raa i roto i te piha faafaaearaa o te utuafare, te paraparauraa te tahi i te tahi, te hahaereraa amui, e te haereraa i te mau faaoaoaraa a te Ekalesia. E mea au roa na Joseph e faaroo ia Louie ia faata‘i i te piana. I te tahi mau taime, e haere raua e mata‘ita‘i i te tahi mau ha‘utiraa teata taata ora. I te hopea o te piti o te matahiti haapiiraa a Louie i te fare haapiiraa teitei, ua uaa mai ta raua arapaeraa i roto i te hoê here rahi—i tae roa ai o Joseph e taahi i to’na pereoo 100 maile (160 kirometera) haere e ho‘i mai, na ni‘a i te mau purumu iino, no te haere e hi‘o ia’na i Ogden, hoê e aore râ, e piti taime i roto i te faafaaearaa haapiiraa.¹²

I te pae hopea, ua aparau o Louie e o Joseph no te faaipoiporaa. Tera râ, hoê uiraa e vai noa ra i roto i to raua feruriraa : e piihia anei o Joseph ia tavini i te hoê misioni ? I taua anotau ra, te mau tamaroa e te mau tamahine e hinaaro e tavini i te hoê misioni, eita ratou e haere e farerei i to ratou episekopo no taua piiraa ra. Na te piha toro‘a o te Peresideni o te Ekalesia e faanaho mai i te piiraa ia tavini i te hoê misioni. Eita te hoê taure‘are‘a e ite e, ahea oia e ite ai i roto i te afata rata i te hoê piiraa no te misioni.

Ua hope te haapiiraa a Louie i te pu‘e tau faatupuraa raau no 1897, e ua ho‘i atu i Ogden i to’na na metua ra. Hoê matahiti i muri mai, no te ore te piiraa o te misioni e tae mai, ua faaoti a‘era raua e faanaho i to raua faaipoiporaa. Mai ta Joseph i faati‘a i muri mai, « Ua taparu vau ia’na ia taui i to’na vahi nohoraa, e i te 26 no eperera 1898, ua haere atu maua i te hiero no Roto Miti e ua faaipoipohia maua no teie tau e no tau a muri atu na to’u metua tane, te peresideni Joseph F. Smith ».¹³ A haamata ai o Joseph e o Louie i to raua oraraa amui, ua faaea raua i roto i te hoê piha na‘ina‘i i roto i te fare o te utuafare Smith.

I te mau mahana matamua o te Ekalesia, e mea pinepine te mau tane faaipoipo i te piihia ia tavini i te hoê misioni rave tamau, no reira, aita o Joseph e o Louie i maere i te taeraa mai te hoê piiraa misioni tarimahia e te peresideni Lorenzo Snow, i roto i te afata rata i te 17 no mati 1899. Tera râ, ua maere rii paha o Joseph i te vahi i tonohia oia. Inaha, hou a farii ai oia i to’na piiraa, ua paraparau oia i te peresideni Franklin D. Richards, peresideni no te Pŭpŭ no te Tino Ahuru Ma Piti Aposetolo, no ni‘a i te fariiraa oia i te hoê piiraa no te misioni. Te faaite ra o Joseph e : « Ua ani mai [oia] ia’u eaha te vahi ta’u e hinaaro e haere. Ua parau vau ia’na e, aita e vahi taa ê ta’u i mana‘o, e haere au i te vahi e tonohia vau. Tera râ, ua parau maira oia e, ‘Te vai ra paha hoê vahi e mea au a‘e na oe ia haere’. Na ô atura vau e, ‘E mea au a‘e na’u e haere i te fenua Heremani’. E ua tono atura ratou ia’u i te fenua Peretane ! »¹⁴

Hōho’a

Elder Joseph Fielding Smith as a full-time missionary, wearing a white shirt, a bow tie, and a suit.

Ua faaoti o Louie e haere e ora i piha‘i iho i to’na na metua ia reva o Joseph. Ua feruri oia e, na te reira e tauturu ia’na ia faaoroma‘i i to’na taa-ê-raa e ta’na tane. E e rave oia i te ohipa i roto i te fare toa a to’na metua tane, ia roaa te moni no te tauturu i te misioni a Joseph.¹⁵

I te 12 no me 1899, hoê mahana na mua a‘e a reva’tu ai oia no ta’na misioni, ua farii o Elder Smith e te tahi atu mau misionare i te tahi mau arata‘iraa mai roto mai i te peresideni Joseph F. Smith e na Elders George Teasdale e o Heber J. Grant no te Pŭpŭ no te Tino Ahuru Ma Piti Aposetolo. O teie te tuhaa rahi no to ratou faaineineraa hou a reva ai ratou ei mau misionare rave tamau. I roto i teie apooraa, ua farii te misionare tata‘itahi i te hoê parau faaite misionare mana. I ni‘a i ta Elder Smith, e tai‘ohia :

« Te faaite papû nei teie parau e, te taata ra o Elder Joseph F. Smith Tamaiti tei roto mau oia i te faaroo e i te amuiraa a te Ekalesia a Iesu Mesia i te Feia Mo‘a i te Mau Mahana Hopea Nei, e ua faataahia oia e te Hui mana faatere o teie Ekalesia ia rave i te hoê misioni i te fenua Peretane, no te poro i te evanelia e no te rave i te mau oro‘a atoa ia au i to’na ra toro‘a.

« E te ani manihini nei matou i te mau taata atoa ia faaroo i ta’na mau Haapiiraa e ta’na mau Parau a‘o ei taata na te Atua, tei tonohia no te iriti i te uputa o te Ora e te Faaoraraa no ratou—e ia tauturu ia’na i roto i to’na mau tere, i roto i te mea atoa ta’na e hinaaro.

« E te pure nei matou i te Atua, te Metua Mure ore, ia haamaitai mai ia Elder Smith e i te mau taata atoa e farii ia’na e o te tauturu atu i to’na oraraa, i te mau haamaitairaa no te Ra‘i e no te Fenua, no teie tau e no te mau tau e a muri noa’tu, na roto i te i‘oa o Iesu Mesia ra, amene.

« Tuurimahia i Roto Miti, Utah, i te 12 no me 1899, ei ti‘a no te Ekalesia. Lorenzo Snow, George Q. Cannon, Jos. F. Smith, Te Peresideniraa Matamua ».¹⁶

Po‘ipo‘i a‘e, ua putuputu te utuafare no te faatau aroha ia Joseph e te hoê taea‘e paari a‘e tei pii-atoa-hia ia tavini i te fenua Peretane. Tera râ, te ma‘iri ra te hoê melo o te utuafare i roto i taua putuputuraa ra. O te teina tuahine ïa o Joseph, o Emily, te tapuni ra oia, no to’na haamâ i te hoê ohipa ta’na i rave a tau matahiti na na mua‘e. I te tau a arapae ai o Joseph raua o Louie, i te tahi taime, e faataoto oi‘oi o Joseph ia Emily e te tahi atu mau tamarii na‘ina‘i, ia ti‘a ia’na ia faaea ona ana‘e i piha‘i iho i to’na hoa here. No to’na mana‘o e mea tano ore teie ohipa, pinepine o Emily i te pure i te Fatu ia tono atu i to’na taea‘e i te misioni. I teie râ taime te reva mau nei oia, ua tatarahapa rii o Emily i te mea e, o oia te tahi tumu i roto i to’na revaraa.¹⁷

Ua ite o Joseph e o Louie e, teie piiraa ia tavini i te fenua Peretane no ô mai ïa i te Fatu ra. E hinaaro papû to Joseph ia rave i ta’na hopoi‘a, e ua mauruuru o Louie ia tavini ta’na tane i te hoê misioni, tera râ, te aro nei raua i te mana‘o no to raua taa-ê-raa. Ia tae i te taime ua titauhia ia Elder Smith ia reva no te haere i te vahi tape‘araa pereoo auahi, « ua tamata o Louie ia faaitoito, ua tamata ia paruru eiaha o Joseph ia ite ia’na ia oto. Tera râ, e ere i te mea ohie ia huna i te mata uteute. Ua mihi a‘ena’tura ïa o Joseph, i te mana‘o e, e te reva ra oia, no reira, aita oia i anaanatae faahou e paraparau i te hoê taata… Mai te huru ra e, ua piri roa te arapo‘a o Joseph a ti‘a ai oia i te uputa o te fare tahito i ni‘a i te purumu First North Street, e a apa ai oia i to’na fetii : O mama, papa, te mau taea‘e e te mau tuahine, te mau metua vahine fetii e i te hopea roa, o Louie. ‘Parahi e Louie, ta’u here. Ia haamaitai mai te Atua ia oe e ia paruru ia oe no’u’ ».¹⁸

Mai te taime a faareva ai to’na pereoo auahi—nahonaho ore e tei î roa i te auauahi avaava—ua horo‘a o Elder Smith i to’na mana‘o taatoa i roto i ta’na misioni. I roto i ta’na mau papa‘iraa i roto i ta’na buka aamu e ta’na mau rata i hapono e i farii, te faaitehia ra i reira te mau fifi ta’na i faaruru ei misionare, e to’na faaroo e to’na haapa‘o maitai i mua i te reira mau fifi.

I te hopea o ta’na mahana matamua no te ohipa misionare i Peretane, ua papa‘i oia i roto i ta’na buka aamu : « Ua riro teie mahana ei mahana faufaa roa i roto i to’u oraraa poto. Aita â i ava‘e i teie nei to’u faaru‘eraa i to’u utuafare no te haere mai e poro i te evanelia a to tatou Fatu… I teie mahana ua haere au e ma‘imi i te taata e ua opere au e 25 buka faatiani [buka iti]. Teie te matamua o teie huru ohipa o ta’u i ore a‘enei i tamata i te rave, e e ere ïa i te ohipa ohie roa… Ua faaite au i to’u iteraa papû i to te ao nei no te taime matamua i teie mahana, tera râ, e nehenehe ta’u e rave maitai a‘e i te reira. Na roto i te tauturu a te Fatu, e rave au i To’na hinaaro mai tei piihia ia’u ia rave ».¹⁹

A hapono ai to’na metua tane i te tahi maa moni na’na no to’na mau hinaaro, ua pahono mai oia e : « E haapa‘o maitai au i te mau rave‘a ta oe i hapono mai na’u. Eita vau e haamau‘a i te hoê mea maori râ, e tumu maitai ta’u no te reira ». Ua faaite atoa oia i to’na metua tane i to’na hinaaro tuutuu ore ia haapii mai e ia haapii atu i te evanelia : « Tei ô nei au no te poro i te evanelia, e o to’u e ti‘aturi nei, ia ti‘a ia’u ia rave i te reira ma te maitai… O to’u hiaai teie ia haamaitai roa i to’u feruriraa e ta’u mau tareni a vai ai au i ô nei, e ia riro noa vau ei faufaa no te hoê mea i roto i te oraraa… Te hinaaro nei au ia parau-ti‘a vau i roto i te mau mea atoa, e aita hoê mea ê atu e horo‘a mai i te mauruuru hau atu maori râ te haapiiraa mai i te hoê mea no ni‘a i te evanelia. To’u hinaaro ia mâtau vau i te reira e ia roaa ia’u te paari ».²⁰

Ua papa‘i te peresideni Joseph F. Smith i teie mau parau haapoupou i roto i te hoê rata ia Elder Joseph Fielding Smith : « E mea au na’u to oe varua, te ti‘aturi nei au i to oe parau-ti‘a, e ua oaoa e ua mauruuru vau ia oe. Te hinaaro nei au ia faahotu oe i te paari e i te haavâ ti‘a e i te faaoroma‘i e tae noa’tu i te Varua Mo‘a e te here i te Atua ».²¹ Ua faaite atoa te metua tane o Louie, o Lewis Shurtliff, i to’na ti‘aturi ia Elder Smith : « Ua ite mau noa na vau e, e rave oe i te hoê misioni hanahana, e e roaa ia oe te iteraa no te afa‘i ia oe i te vahi faateiteihia o tei faataahia no oe no te mau tau a muri a‘e ».²²

I roto i ta’na mau rata na Louie, ua faaite tamau noa o Joseph i to’na here ia’na : Pinepine oia i te tuu i te mau tiare tamarohia i roto i ta’na « mau rata mahanahana e te here ».²³ Ua papa‘i atoa oia no ni‘a i te mau tamataraa ta’na i farerei : « E rave rahi te taata i roto i teie nunaa tei ite e, e parau mau te evanelia ta tatou e haapii nei, aita râ to ratou e itoito i te pae morare ia haere mai i rapae i te ao e ia tauahi i te reira ».²⁴

E hapono o Louie i te mau rata hoê a‘e taime i te hepetoma. Ua papa‘i oia i te hoê taime, « A haamana‘o e, tei ô nei au no te here e no te pure no oe, e aita roa vau e haamo‘e nei ia oe i te hoê noa a‘e taime… Ia haamaitaihia oe, e ta’u tane faufaa rahi, ta’u ïa pure i te mau taime atoa ».²⁵ E mea papû maitai te haapa‘o o Louie no ta’na tane, e e mea papû atoa to’na haapa‘o no te Fatu e no Ta’na ohipa. Ua faahaamana‘o tamau noa oia ia Joseph eiaha oia e vaiiho i te mana‘o mihi fenua ia faaino i to’na hinaaro tuutuu ore ia tavini.

Ua hinaaro mau o Elder Smith i taua huru faaitoitoraa ra, i te mea e, e mea varavara roa te taata e farii i teie parau poro‘i o te evanelia i faaho‘ihia mai. Tau matahiti i muri mai, ua « parau oia i ta’na tamaiti ia Joseph e, e mea ino roa te huru o te ohipa, e aita re‘a te taata i anaanatae, e ua tae roa oia i te feruri e, eita ta’na e nehenehe faahou e rave. I te hoê pô, ua tarava oia ma te feruri i te hinaaro ia ohipa no te tere ho‘iraa ».²⁶ Tera râ, ma te faaûruhia e te faaitoitoraa a te mau taata tei herehia e a‘na, e haapuaihia e ta ratou mau pure e to’na iho hinaaro ia tavini, ua faaore oia i taua mau mana‘o ra. Ua ite oia e, ua pii te Fatu ia’na, e ua ite oia e, titauhia ia’na ia rave i te ohipa ma te itoito ei maitai no te taata ta’na e tavini ra, e ei maitai no to’na utuafare. Ua papa‘i oia e : « E mea au a‘e na’u e faaea noa i ô nei e a muri noa’tu, i te ho‘i i te fare ma te hoê parau tapa‘o hanahana ore e te haamauruururaa hanahana ore… Te pure nei au e ia roaa te varua o te evanelia ia’u, e te hoê here i to’u taata tupu, e ia ti‘a ia’u ia parahi i ô nei e tae roa’tu i te taime e haamauruuruhia ai au ma te hanahana. Ahiri aita te mau pure e rave rahi tei pûpûhia no’u i te fare e tae noa’tu i ta’u iho mau pure, eita ïa vau e manuïa ».²⁷

Ua haamauruuruhia o Elder Joseph Fielding Smith ma te hanahana i ta’na misioni i te 20 no tiunu 1901. I roto i na matahiti e piti o ta’na taviniraa ma te itoito, « aita oia i faafariu i te hoê noa a‘e taata, aita i rave i te hoê a‘e bapetizoraa, noa’tu e, ua haamau oia i te hoê taata faafariu ».²⁸ Noa’tu râ, ua tanu oia e to’na mau hoa i te mau huero o te evanelia, ua tauturu i te mau taata e rave rahi ia ite i te hau e te haro‘aro‘araa rahi a‘e, e ua tupu oia iho i te rahi ei piahi e ei orometua no te evanelia, e ei ti‘a faatere no te autahu‘araa.

Ua tae mai o Joseph i Roto Miti i te 9 no tiurai 1901. Tau mahana i muri a‘e i to’na parahiraa i te utuafare o Louie i Ogden, ua ho‘i o Joseph e o Louie i to raua fare i te utuafare Smith, e ua haamata faahou i to raua oraraa amui. Ua tatara-maite-hia to raua faaipoiporaa na roto i te faaroo, te itoito e te taviniraa, a haa ai raua no te haamau i te hoê nohoraa e te hoê utuafare e no te tavini i roto i te Ekalesia.

Hōho’a

Louie Shurtliff Smith, President Joseph Fielding Smith’s first wife, in a white dress with her hair pulled back.

I muri noa a‘e i to Joseph ho‘iraa mai i te fare, ua haamata oia i te imi i te hoê ohipa ia ti‘a ia’na ia turu i to’na utuafare. Na roto i te tauturu a te hoê melo o te utuafare, ua roaa ia’na te hoê ohipa no te hoê tau, i te piha papa‘i parau no te oire i Roto Miti. E pae hepetoma i muri mai, ua farii oia i te hoê ti‘araa i roto i te piha toro‘a a te Tiaau aamu o te Ekalesia. A haapii rahi mai ai oia no ni‘a i te aamu o te Ekalesia, ua rahi atoa mai to’na ite no ni‘a i te feia o te imi ra ia haafaufaa ore i te Ekalesia e i to’na mau ti‘a faatere. Ua haa oia ma te rohirohi ore no te horo‘a mai i te haamaramaramaraa no te paruru i te faaroo. Teie te haamataraa o te ohipa o tei haamaitai mai i te Ekalesia no te mau matahiti i muri nei.

I te pu‘e tau faatupuraa raau no 1902, ua hapû o Louie. Ua mauruuru roa oia e o Joseph no to raua nohoraa iti na‘ina‘i, tera râ, te opua ra raua e hamani i to raua iho fare. Na roto i te ohipa a Joseph ua ti‘a ia raua ia haamata i te faanaho i te mau opuaraa. Ua tarahu raua i te hoê taiete patu fare, e ua faaoti i te tahi mau faanahoraa ia ti‘a ia Joseph ia rave oia iho i te rahiraa o te ohipa, no te faaiti i te mau haamau‘araa. Ua fanauhia mai ta raua tamarii matamua, e tamahine tei piihia o Josephine, i te ava‘e setepa 1902, e ua tomo raua i roto i to raua fare apî fatata hoê 10 ava‘e i muri mai. I te matahiti 1906, i muri a‘e i te mamae no te hâpuraa i farereihia e Louie, ua farii raua i te tahi faahou tamahine i roto i to raua utuafare, e ua topahia to’na i‘oa o Julina.

Ua vai noa te hinaaro i roto ia Joseph ia rave i te ohipa no te faaoraraa a te Fatu, e ua farii oia i te mau rave‘a e rave rahi no te rave i te reira. I te matahiti 1902 ua piihia oia ia tavini ei hoê o te mau peresideni no te pŭpŭ hitu ahuru, te pŭpŭ piti ahuru ma maha, oia’toa te mau hopoi‘a ei orometua haapii no te pŭpŭ. (I taua taime ra, ua hau i te 100 pŭpŭ o te hitu ahuru i roto i te Ekalesia. E ere te mau melo no taua mau pŭpŭ ra i te Hui mana faatere rahi.) Ua pii-atoa-hia o Joseph ia tavini i roto i te apooraa rahi no te Taatiraa na te Feia Apî Tamaroa, e ei melo no te apooraa teitei no te tĭtĭ no Roto Miti. Ua faatoro‘ahia oia ei tahu‘a rahi e to’na taea‘e o Hairamu, hoê melo no te Pŭpŭ no te Tino Ahuru Ma Piti Aposetolo. I roto i te amuiraa rahi no eperera 1906, ua paturuhia oia ei hoê Tauturu no te Tiaau aamu o te Ekalesia, e i te ava‘e tenuare i muri iho, ua tuuhia oia i roto i te hoê tomite taa ê, te opuaraa « no te faaineine ïa i te mau haamaramaramaraa no te paruru i te ekalesia i mua i te mau faahaparaa a te mau enemi ».²⁹

A tavini ai te metua tane o Joseph ei peresideni no te Ekalesia, pinepine o Joseph i te tauturu ia’na i roto i te mau rata e papa‘i e i roto i te tahi atu mau hopoi‘a no te faatereraa, e i te tahi taime, e apee atoa oia na muri iho i to’na metua tane i roto i ta’na mau ohipa. I te hoê taime, ua tere roa o Joseph ei mono no te peresideni Smith. Ua papa‘i oia e : « Ua haere atu vau i Brigham City [Utah] na roto i te aniraa a to’u metua tane no te haamo‘a i te fare pureraa a te paroisa piti i Brigham City. E hinaaro rahi to ratou ia pûpû oia i te pure haamo‘araa, tera râ, i taua taime ra, ua putahia oia i te to‘eto‘e, no reira, ua tono oia ia’u ei mono ia’na ». I to te peresideni tĭtĭ e to te episekopo farereiraa ia Joseph i te tapaeraa pereoo auahi, aita raua i oaoa i te iteraa ia’na.³⁰ Ua parau paha te peresideni tĭtĭ e : « E nehenehe ta’u e vaha rahi. Ua tia‘i matou i te peresideni o te Ekalesia, e tamaiti ïa teie e haere mai nei ». Ia au i te hoê faati‘araa o te aamu, ua pahono ha‘uti o Joseph, « e nehenehe atoa ta’u e vaha rahi ».³¹

Noa’tu te rahiraa o te ohipa a Joseph i roto i te Ekalesia, ua faaatea te reira ia’na i to’na utuafare, ua ite-atoa-hia râ ia raua o Louie te taime no te tavini amui e no te fana‘o i te hoaraa o te tahi e te tahi. I roto i ta’na papa‘iraa i ta’na buka aamu i te 1 no novema 1907, te na ô ra oia e, « Ua faaea maua o Louie i te pae rahi o teie mahana i roto i te hiero no Roto Miti, te hoê o te mau mahana oaoa roa a‘e o to maua oraraa, e te mahana maitai roa a‘e no maua ».³²

Ua tuu o Joseph i te hiti e rave rahi o ta’na mau hopoi‘a i roto i te Ekalesia i te ava‘e mati 1908, i te mea e, ua mana‘o oia e, ua ti‘a roa ia’na ia faaea rii i te fare i piha‘i iho ia Louie. Inaha, te pohehia ra oia i te hoê ma‘i rahi e te ati mau i te omuaraa o to’na hâpuraa no te toru o te taime. Noa’tu te mau pure, te mau haamaitairaa autahu‘araa, te mau aupururaa a ta’na tane, e te utuuturaa maitai a te mau taote, ua haere noa oia i te inoraa. Ua pohe oia i te 30 no mati.

I roto i to’na oto ua papa‘i o Joseph : « I te roaraa o teie ava‘e tei riro ei ava‘e pe‘ape‘a e te oto no’u, ua faaruru vau i te mau tamataraa e te mau iteraa huru rahi e te mauiui mau ho‘i. E i roto i te taatoaraa o te reira, ua turu‘i noa vau i ni‘a i te Fatu no te horo‘a mai i te puai e te tamahanahana. I muri a‘e e toru e aore râ, e maha hepetoma i te faarururaa i te mamae rahi, e i muri a‘e fatata e piti ava‘e i te vairaa i roto i te ma‘i, ua iritihia te mamae i ni‘a i ta’u vahine here… e ua faaru‘e mai oia ia’u e i ta maua nau aiû faufaa rahi, no te haere atu i roto i te hoê ao maitai a‘e, i reira matou e tia‘i ai, ma te faaoroma‘i e i roto i te oto, i te hoê farereiraa hanahana a‘e ». Ua parau o Joseph e, « ua pohe ta’na vahine ma te vai papû i roto i te faaroo e te haapa‘o i te mau parau tumu atoa o te evanelia ».³³

Aita i maoro roa ua teimaha o Joseph i roto i te mau ohipa no te faaamuraa e piti na tamahine na‘ina‘i i roto i te hoê utuafare aore e metua vahine. Ua ani atura to’na na metua i te utuafare iti apî ia ora i piha‘i iho ia raua. Noa’tu teie tauturu, ua ite mau te metua tane ivi e, e titauhia te aupuru a te hoê metua vahine here no ta’na na tamahine iti.

Hōho’a

Portrait of Ethel Smith, Joseph Fielding Smith's second wife.

Mai tei matarohia e a’na i roto i te mau faaotiraa faufaa atoa, ua faariro o Joseph i teie opuaraa ei tumu no te pure u‘ana. Ua riro mai o Ethel Georgina Reynolds, papa‘i parau i roto i te piha toro‘a a te Tiaau aamu o te Ekalesia, ei pahono i ta’na mau pure. Ua ani atura o Joseph ia’na ia haere mai na muri iho ia’na e ta’na na tamahine i ni‘a i te mahora ori-haere-raa i te 6 no tiurai 1908. Ua manuïa maitai te ori-haere-raa, i te mea e, ua au roa ratou e maha i te tahi e te tahi. Ahuru mahana i muri mai, ua haere apipiti atura o Joseph raua o Ethel e ori haere ma te apee-ore-hia e te mau tamarii, e aita i maoro i muri mai, ua fafau a‘era raua e faaipoipo.

Ua taatihia o Ethel e o Joseph i roto i te hiero no Roto Miti i te 2 no novema 1908. Tau matahiti i muri mai i roto i te hoê rata ta Joseph i papa‘i ia Ethel, te na ô ra oia, « Aita oe i ite i te pinepine o to’u haamauruururaa i te Fatu i te mea e, aita vau i hape i te taime a hinaaro ai au i te hoê hoa. Ua tonohia mai oe ia’u ra ».³⁴ Taa ê noa’tu te riroraa o Ethel ei hoa here no Joseph, ua riro oi‘oi atoa oia ei metua vahine piti no Josephine e no Julina.

Na mua noa a‘e i te amuiraa rahi no eperera 1910, ua pohe o John R. Winder, tauturu hoê i roto i te Peresideniraa Matamua. Ua piihia o Elder John Henry Smith ia tavini i roto i te Peresideniraa Matamua, o tei tavini na ho‘i i roto i te Pŭpŭ no te Tino Ahuru Ma Piti, e no reira, ua vata ïa te hoê ti‘araa i roto i te Pŭpŭ no te Tino Ahuru Ma Piti. Ua putuputu te Peresideniraa Matamua e te Pŭpŭ no te Tino Ahuru Ma Piti i roto i te hiero no Roto Miti no te tuatapapa i te mau taata o te ti‘a ia mono i teie parahiraa vata. I muri a‘e hoê hora te aparau-amui-raa, aita i ti‘a ia ratou « ia hoê te mana‘o i ni‘a i taua tumu parau ra. I te pae hopea ua haere atura te peresideni Joseph F. Smith i roto i te hoê piha o’na ana‘e, e ua tuturi i raro no te pure ia roaa te arata‘iraa. I to’na ho‘iraa mai, ua otiatia rii oia ia ani i na 13 taea‘e e, e ti‘a anei ia ratou ia feruri i ta’na tamaiti o Joseph Fielding Smith Jr. no taua ti‘araa ra. Te parau ra oia e, aita roa oia i hinaaro roa e ani i te reira, no te mea e melo a‘ena ta’na tamaiti o Hairamu, no te pŭpŭ, e ta’na tamaiti o David e tauturu ïa i roto i te Episekoporaa Faatere Rahi. Ua măta‘u atoa oia i te mau melo o te Ekalesia, o te riri ratou ia ravehia te tahi faahou o ta’na mau tamaiti ei hui mana faatere rahi. Noa’tu râ, ua ite oia i te faaûruraa ia tuu i te i‘oa o Joseph i roto i te feruriraa. Mai te mea ra e, ua farii oi‘oi te tahi mau taea‘e i teie mana‘o e ua paturu ratou i te peresideni Smith i roto i te reira mana‘o.

« Ua faaite te peresideni Smith i te reira ma‘itiraa to Joseph i to’na metua vahine [te metua vahine o Joseph] hou a faaarahia ai i roto i te amuiraa. Te parau ra te tuahine o Joseph, o Edith S. Patrick, ‘Te haamana‘o nei au ia mama i te parauraa ia matou e, i te matahiti 1910 ua ho‘i mai o papa i te fare na ta’na apooraa mai i roto i te hiero, e mai te mea ra e, e mana‘o pe‘ape‘a to’na. Ia uihia’tu oia e, eaha te mea e haape‘ape‘a nei ia’na, na ô maira oia e, ua ma‘itihia o Joseph ei hoê o na Tino Ahuru Ma Piti. Na ô maira oia e, ua hoê te mana‘o o te mau taea‘e atoa no te ma‘iti ia’na e ua na ô maira oia e, i teie nei, i roto i to’na ti‘araa peresideni, e faaino-rahi-hia oia, no te faariroraa i ta’na tamaiti ei aposetolo. Ua parau atura o mama ia’na e, eiaha e haape‘ape‘a hoê a‘e minuti no te mea ta te taata e parau. Ua ite o mama e, ua ma‘iti te Fatu ia’na e na ô atura e, ua ite oia e e riro oia ei maitai no to’na piiraa’.

«… E peu matarohia i taua tau ra eiaha e faaara i te taata i ma‘itihia, e vaiiho râ ia’na ia faaroo i to’na piiraa a tai‘ohia ai to’na i‘oa i roto i te amuiraa no te patururaa. E no reira, i te haereraa mai o Joseph Fielding i te amuiraa i te 6 no eperera 1910, aita oia i ite e, ua ma‘itihia oia ». A tomo ai oia i roto i te Fare Menemene, na ô atura te hoê tia‘i uputa ia’na e, « Ahani na e Joseph, o vai te aposetolo apî ? » Pahono atura oia e : « Aita vau i ite. Tera râ, e ere o oe, e, e ere o vau ! »

Na mua noa a‘e te i‘oa o taua melo apî ra o te Pŭpŭ no te Tino Ahuru Ma Piti a tai‘ohia ai, ua tae ia Joseph te faaûruraa a te Varua e, e riro paha o to’na iho i‘oa. Noa’tu râ, te na ô ra oia i muri a‘e e, i te faaararaahia to’na i‘oa, « Ua hitimahuta oia ma te taa ore eaha teie, e aita ta’na e nehenehe faahou e parau i te hoê parau ».

I muri a‘e, i taua iho mahana ra, ua ho‘i oia i te fare no te faaite i te parau apî ia Ethel, tei ore i tae i te pureraa. Ua haamata oia i te parau e : « Te mana‘o nei au e, titauhia ia tatou ia hoo i te puaatoro. Aita to’u e taime faahou no te atuatu i te reira ! »³⁵

I roto i na matahiti e 60 to’na riroraa ei melo no te Pŭpŭ no te Tino Ahuru Ma Piti Aposetolo, ua ite o Joseph Fielding Smith i te mau tauiuiraa rarahi i roto i te ao nei. Ei hi‘oraa, a piihia ai oia i roto i te aposetoloraa, e rave rahi taata o te faaohipa noa ra i te puaahorofenua e te pereoo puaahorofenua ei rave‘a utaraa no ratou. I te hopea o ta’na taviniraa i roto i te pŭpŭ, pinepine oia i te ratere na ni‘a i te manureva tutuha auahi no te haere i ta’na mau farereiraa.

Hōho’a

Group portrait of the Quorum of the Twelve Apostles in 1921. Included are: (left to right) seated: Rudger Clawson, Reed Smoot, George Albert Smith, George F. Richards, Orson F. Whitney, David O. McKay, standing: Joseph Fielding Smith, James E. Talmage, Stephen L. Richards, Richard R. Lyman, Melvin J. Ballard and John A. Widtsoe.

Ua mau o Elder Smith e rave rahi ti‘araa faufaa e te hopoi‘a a tavini ai oia ei melo no te Pŭpŭ no te Tino Ahuru Ma Piti. No na matahiti matamua e va‘u o ta’na taviniraa ei Aposetolo, ua tavini oia mai te tahi ra papa‘i parau no to’na metua tane. Ua tavini oia i roto i teie ti‘araa e tae noa’tu i te poheraa o to’na metua tane i te ava‘e novema 1918. I roto i teie ti‘araa, ua papa‘i o Joseph Fielding Smith i te mau parau ta to’na metua tane i parau mai no ni‘a i te orama no te faaoraraa o te feia pohe, o te itehia i teie nei i roto i Te Parau Haapiiraa e te Mau Parau Fafau 138.

Ua tavini o Elder Smith ei tauturu no te Tiaau aamu o te Ekalesia, ei Tiaau aamu o te Ekalesia fatata e 50 matahiti te maoro, ei tauturu i roto i te peresideniraa no te hiero no Roto Miti, ei peresideni no te hiero no Roto Miti, ei peresideni no te Sotaiete tuatapaparaa e te aamu no Utah, ei taata nene‘i matamua e ei faatere putu faufaa no te ve‘a Utah Genealogical and Historical Magazine, e ei raatira no te tomite faatere no te apooraa haapiiraa a te Ekalesia. Ua tavini atoa oia ei faatere no te tomite nene‘iraa a te Ekalesia, te hoê teie ti‘araa tei titau ia’na ia tai‘o e rave rahi tauatini api papa‘ihia hou a faaineinehia ai ei mau buka haapiiraa e te tahi atu mau nene‘iraa a te Ekalesia.

Ua faataahia oia ei peresideni mono no te Pŭpŭ no te Tino Ahuru Ma Piti i te 6 no atopa 1950, e ua tavini oia i roto i taua ti‘araa ra e tae roa’tu i te ava‘e eperera 1951, i reira to’na faataaraahia ei peresideni no te Pŭpŭ no te Tino Ahuru Ma Piti. Ua tavini oia i roto i taua ti‘araa ra mai te ava‘e eperera 1951 e tae roa’tu i te ava‘e tenuare 1970, te taime a riro mai ai oia ei Peresideni no te Ekalesia. Mai te matahiti 1965 e tae atu i te 1970, ua tavini atoa oia ei tauturu i roto i te Peresideniraa Matamua a rave noa atoa ai oia i ta’na mau hopoi‘a ei peresideni no te Pŭpŭ no te Tino Ahuru Ma Piti.

I roto i ta’na a‘oraa matamua i roto i te amuiraa rahi, ua parau afaro o Elder Joseph Fielding Smith i te taata atoa o « te faateitei i to’na reo pato‘i i mua i te mau ohipa a te mau hui mana o te peresideni nei i te Ekalesia ». Ua papa‘i oia i teie faahitiraa parau etaeta : « Te hinaaro nei au e faateitei i te hoê reo faaara i te mau taata atoa e melo i roto i te Ekalesia, ma te parau ia ratou e, e mea tano a‘e ia tatarahapa ratou e ia fariu mai i te Fatu ra, ‘oi tae mai Ta’na mau faautu‘araa i ni‘a ia ratou, ‘oi ere ratou i te faaroo, ‘oi fariu ê atu ai i te parau mau ».³⁶

I roto i te roaraa o ta’na tau taviniraa, ua tamau noa oia i te faateitei i te hoê reo faaara. Ua parau oia i te hoê taime : « Ua feruri au e, o ta’u misioni teie, ma te haaputapu-rahi-hia, ua mana‘o vau, na roto i te Varua o te Fatu i roto i to’u mau tere na roto i te mau tĭtĭ no Ziona, ia parau i te mau taata e, i teie nei e mahana teie no te tatarahaparaa… Te mana‘o nei au e, o ta’u misioni teie i te ti‘aororaa ia tatarahapa e te piiraa i te taata ia tavini i te Fatu ».³⁷

Teie reni arata‘i ohie e te afaro, ua tamărûhia ïa na roto i te mărû e te maitai. Ua ite o Elder Boyd K. Packer i te hoê taime i teie mea i roto i te hoê apooraa i te tau e faatere ai o Joseph Fielding Smith ei peresideni no te tomite misionare a te Ekalesia. « Ua hohorahia mai te hoê parau faaite no ni‘a i te ati purumu i tupu i ni‘a e piti misionare i roto i te hoê pereoo a te Ekalesia. Ua haapa‘o ore te hoê taata paari hoo maa tupu i te tapa‘o tape‘a. Ua û te pereoo misionare na te hiti e ua ino roa. Ua titau te muto‘i i te taata faahoro o te pereoo faauta tauihaa. Aita ta’na e parau paruru ati. Aua‘e aita hoê misionare i pepe ino.

« Ua parahi noa te peresideni Smith ma te maniania ore a tau‘aparau noa ai te mau melo no te tomite i taua ohipa ra. I muri iho i te tahi aparauraa, ua parau atu ratou i te ti‘a faatere rahi no te tuhaa faatere misionare ia rave i te hoê paruru e ia tuu i teie ohipa i te haavâraa.

« I reira noa te aniraahia i te peresideni Smith e, e farii anei oia i teie tereraa o te ohipa. Parau mărû noa maira oia e : ‘E, e nehenehe ta tatou e rave i te reira. E mai te mea e, e tura‘i puai tatou, e nehenehe tatou e manuïa na roto i te haru-roa-raa mai i te pereoo o teie taata vĕvĕ ; e i muri iho, nahea ïa oia i te imi i to’na ora ?’

« ‘Ua hi‘ohi‘o noa matou te tahi i te tahi, ma te haamâ rii’, te parau ïa a Elder Packer. ‘I muri iho, ua farii matou ia hoo faahou te Ekalesia i te hoê pereoo misionare, ia rave i ta’na ohipa, e ia vaiiho i teie ohipa’ ».³⁸

I te taime a piihia ai o Elder Smith i roto i te aposetoloraa, e toru ta’na tamarii : o Josephine, o Julina e te aiû matahiapo a Ethel, o Emily. Hitu ava‘e i muri mai, ua farii faahou te utuafare i te tahi tamahine. Ua topa o Ethel e o Joseph i to’na i‘oa o Naomi. No te mau fifi i tupu i te taime fanauraa, ua fifi te ora o Naomi, e ua măta‘u rii te utuafare o te ore oia e ora maoro. Tera râ, mai ta to’na metua tane i parau i muri a‘e, « ua ora oia na roto i te mana o te pure e te utuuturaa i muri a‘e i te iteraahia e, eita te mata‘i e nehenehe e ô i roto i to’na tino ».³⁹ I muri a‘e, ua fanau mai o Ethel e hitu atu tamarii : Lois, Amelia, Joseph, Lewis, Reynolds, Douglas e o Milton.

Na roto i ta’na mau ohipa i roto i to’na ti‘araa ei Aposetolo, e mea pinepine te peresideni Smith i te atea ê i to’na utuafare no te tahi mau tau maoro. Ia tae mai râ oia i te fare, e horo‘a oia i to’na mana‘o atoa i ni‘a i to’na utuafare. Te faaite ra ta’na vahine o Ethel i to’na huru mai « te hoê tane e te hoê metua tane maitai e te here, e to’na hinaaro rahi i roto i te oraraa, o te faaoaoaraa ïa i to’na utuafare, ma te haamo‘e roa ia’na iho i roto i ta’na mau tautooraa no te rave i te reira ».⁴⁰

E mea arearea roa na te mau tamarii i roto i te utuafare Smith i te mana‘o o te tahi mau taata no ni‘a i to ratou metua tane—ei taata paari e te etaeta. « I te hoê taime… i muri a‘e i te hoê a‘oraa etaeta na’na no ni‘a i te faufaa i te faatere-tano-raa i te mau tamarii, ua huru ê rii te hoê vahine, e ua haafatata maira i te tahi na tamahine e piti na’na ra, e ua faaite maira i to’na mana‘o aroha ia ratou [e ua na ô maira,] ‘Papû roa ia’u e, te ta‘iri nei to outou papa ia outou !’ » No te pahono i teie pariraa, ua ataata rii noa na tamahine. E mea ite maitai a‘e raua i to raua metua tane i teie vahine—aore oia i haapepe a‘enei ia ratou. Ia ho‘i mai oia i te fare i muri a‘e i to’na mau tere roa, « E mau taime oaoa ïa, mai te taime a farerei rû ai ratou ia’na i te tapaeraa pereoo auahi, e tae roa’tu i te taime a aroha faahou ai ratou ia’na ma te oto no te tahi tau mahana te maoro ». E ha‘uti ratou, e hamani i te faraoa pai e te pape toetoe, e haere e « picnic », e haere na ni‘a i te pereoo auahi, e e haere e mata‘ita‘i i te mau afaa e te mau roto tapiri mai i ô ratou. E mea au na ratou e faaroo i te mau aamu no ni‘a i ta’na mau ohipa no te Ekalesia na te ao atoa nei.⁴¹ Ua rave amui atoa ratou i te ohipa, ma te rave tamau noa i te mau ohipa na rapae i te fare.⁴²

Ua rave te mau tamaiti a te peresideni Smith i te ohipa tu‘aro, e e haere oia e mata‘ita‘i i ta ratou mau ha‘utiraa mai te mea e, e nehenehe ta’na.⁴³ E mea au atoa na’na e ha‘uti i te tuaro e o ratou, i te ha‘uti tiriraa popo ihoa râ. E arearea oia i piha‘i iho ia ratou, tera râ, e taata tata‘u oia. Ua haamana‘o ta’na na tamaiti o Reynolds e o Lewis i te mau taime a faaû ai raua i to raua metua tane. E vaiiho oia ia raua ia ma‘iti eaha te rima ta’na e faaohipa i roto i te ha‘utiraa. Noa’tu e, hoê rima to’na i muri i te tua, e « pau noa ihoa raua ia’na ».⁴⁴

E mea fifi mau no Ethel e te mau tamarii te mau tonoraa o Elder Smith i te mau vahi atea, e e mea mauiui atoa no’na iho te mau hebetoma e taa ê oia ia ratou. I te 18 no eperera 1924, te ratere ra oia na ni‘a i te pereoo auahi no te haere e peresideni i te hoê amuiraa tĭtĭ. Ua hâpu o Ethel e hitu ava‘e i taua taime ra, e te faaitoito noa ra i te haapa‘o i te mau tamarii i te fare. I roto i te hoê rata ua parau oia ia’na e, « Te mana‘ona‘o nei au ia oe e te vai nei to’u hinaaro ia parahi noa i piha‘i iho ia oe i roto i na hebetoma rii i muri nei, no te aupuru ia oe ».⁴⁵ A feruri ai oia i te utuafare, ua faaoti oia i ta’na rata na roto i te hoê pehepehe ta’na i papa‘i. E itehia te tahi mau parau o taua pehepehe ra i teie nei i roto i te mau buka himene e rave rahi a te Ekalesia i raro a‘e i te upoo parau ra « Does the Journey Seem Long [E mea atea anei te tere] ? »

Omuaraa o te matahiti 1933, ua mutumutu rii mai te oaoa i roto i te utuafare Smith no te hoê hopoi‘a « atuaturaa teimaha », ia au i te faaiteraa a Elder Smith i roto i ta’na pehepehe e iva matahiti na mua’tu. Ua haamata o Ethel i te roohia « i te hoê ma‘i ri‘ari‘a aore roa oia i maramarama i te auraa o te reira. I te tahi taime e topa oia i roto i te faaturumaraa (dépression), e i te tahi atu taime, e ume to’na feruriraa i to’na tino paruparu ia rave puai atu â i te ohipa. Mai te mea ra e, aita te here e te patururaa a to’na utuafare, te mau pure e te mau haamaitairaa, e tae roa’tu i te parahiraa i roto i te fare ma‘i, i riro ei tauturu ».⁴⁷ I muri a‘e e maha matahiti te mamae-noa-raa, ua pohe atu oia i te 26 no atete 1937. No ni‘a i to’na poheraa, ua papa‘i ta’na tane ere e, « Eita e itehia hoê vahine maitai a‘e, e aore râ, hoê vahine e hoê metua vahine parau mau a‘e ».⁴⁸ I roto i to’na oto rahi, ua farii oia i te ite mahanahana e, ua taamuhia oia e o Ethel Reynods Smith no te mau tau e a muri noa’tu na roto i te fafauraa mo‘a o te taatiraa.

I te poheraa o Ethel, te ora noa ra e pae tamarii i roto i te utuafare Smith. Eita e maoro e reva’tu e piti —o Amelia te faaineine ra e faaipoipo, e o Lewis te faaineine ra no te tavini i te hoê misioni rave tamau. E toe noa mai ïa o Reynolds 16 matahiti, o Douglas 13 matahiti e o Milton 10 matahiti. No to’na haape‘ape‘a no teie mau tamaiti aore e metua vahine, ua feruri o Joseph Fielding Smith e faaipoipo faahou.

Ma te tape‘a noa i teie mana‘o i roto i te upoo, ua haamata o Elder Smith i te faatae i to’na mana‘o i ni‘a ia Jessie Ella Evans, hoê vahine himene tu‘iroo i roto i te pŭpŭ himene a te Fare Menemene. Ua himene o Jessie i te hoê himene oia ana‘e i te hunaraa o Ethel, e ua faatae atu o Elder Smith i te hoê parau no te faaite i to’na mauruuru. Na roto i taua parau ra, ua tupu te tahi mau tau‘araa parau na roto i te niuniu. Aita o Elder Smith e o Jessie i mâtau a‘enei na mua’tu i teie tau‘araa parau, tera râ, aita i maoro, ua riro mai raua ei na hoa rahi.

Ua feruri tamau noa o Elder Smith e rave rahi mahana e ua pure noa no ni‘a i te ti‘araa ia ani ia Jessie ia faaipoipo ia’na. I te pae hopea ua papa‘i oia ia’na i te hoê rata no te faaite e, te hinaaro nei oia e faahohonu atu â i to raua auhoaraa. E maha mahana i muri mai, ua roaa te itoito ia’na no te horo‘a tino roa i te rata. Ua afa‘i oia i te rata i te oire, e i te mau piha ohiparaa, tei reira oia te raveraa i te ohipa ei papa‘i parau no te oire. I muri a‘e, ua papa‘i oia i teie mau parau i roto i ta’na buka aamu : « Ua haere au i te piha toro‘a o te papa‘i parau o te oire… Ua tau‘a parau e te papa‘i parau, mea faufaa roa, e ua horo‘a’tu ia’na i te rata ta’u i papa‘i ».⁴⁹ Hoê hebetoma i muri iho, to’na ratereraa na ni‘a i te pereoo auahi no te haere i te mau pureraa amuiraa tĭtĭ, ua ho‘i mai o Elder Smith i te fare e ua haere faahou e farerei ia Jessie.

Ia au i ta’na huru papa‘iraa afaro, ua papa‘i o Elder Smith i roto i ta’na buka aamu, « Ua farerei ia Jessie Evans vahine e ua tupu te [hoê] aparauraa faufaa roa e o’na ». Ma te mana‘o faahiahia no te tahi e te tahi, ua faaau raua i te tahi mau faanahoraa ia ti‘a ia’na ia farerei i te metua vahine o Jessie, e ia ti‘a ia Jessie ia farerei i ta’na mau tamarii. Tau ava‘e i muri iho, i te 21 no novema 1937, ua farii o Jessie i te tape‘a rima faaauraa. Ua taatihia raua i roto i te hiero no Roto Miti i te 12 no eperera 1938, e te peresideni Heber J. Grant, te hitu o te Peresideni o te Ekalesia.⁵⁰

Teie te faataaraa a Elder Francis M. Gibbons, papa‘i parau no te Peresideniraa Matamua i te tau a riro ai te peresideni Smith ei Peresideni no te Ekalesia, no ni‘a i te huru o te auraa i rotopu ia Joseph Fielding Smith e ia Jessie Evans Smith : « Noa’tu e, e piti ahuru ma ono matahiti te taa-ê-raa i rotopu ia raua, e tae noa’tu i te mau taa-ê-raa i roto i te huru, te oraraa, e te haapiiraa, e mea faahiahia ia ite i te tuatiraa i rotopu ia Joseph Fielding Smith e ia Jessie Evans Smith. E vahine au teie ia faaite ia’na, e vahine oaoa e te arearea, e te au ia hi‘ohia e te taata. Are‘a o Joseph ra, e taata hau ïa, o te vai-ite-ore-hia, te tura e te turu‘i ore i ni‘a ia vetahi ê, e te huru papû ore i mua i te taata, e o te ore roa e titau ia hi‘ohia mai oia e te taata. Te mea i faatu‘ati i teie taa-ê-raa aano i rotopu i teie na taata, o to raua ïa here rahi e te faatura i te tahi e te tahi ».⁵¹ Ua tae atoa teie here e teie faatura i roto i te metua vahine o Jessie, o Jeanette Buchanan Evans, tei piha’iho ho‘i ia’na o Jessie te oraraa e tae roa’tu i te faaipoiporaa. Ua apee atu te tuahine Evans i ta’na tamahine no te ora i roto i te utuafare Smith e no te tauturu i te haapa‘oraa i te mau tamarii.

Hōho’a

President Joseph Fielding Smith Jr. and Sister Jessie Ella Evans Smith sitting together at a piano.

E pii te mau tamarii a Elder Smith e te mau mootua i teie tuahine Smith apî o « tatie Jessie », e e mea pinepine oia i te apee i ta’na tane i roto i to’na mau tere i roto i te mau amuiraa tĭtĭ. E mea pinepine te feia faatere i te ani ia’na ia himene i roto i te mau pureraa, e i te tahi taime, e taparu oia i ta’na tane ia himene na muri iho ia’na. I te matahiti 1939, ua tono te peresideni Heber J. Grant ia Elder e te tuahine Smith ia tere na roto i te mau misioni a te Ekalesia i Europa.

Noa’tu e, aita â te Tama‘i Rahi II o te Ao nei i tupu atura a tae atu ai o Elder e te tuahine Smith i Europa, te itehia ra râ e, te maraa noa ra te aehuehu i rotopu i te mau nunaa. I te 24 no atete, tei te fenua Heremani o Smith mâ, ua faaue atura te Peresideniraa Matamua ia Elder Smith ia hi‘o e, ua hope paatoa te mau misionare i te fenua Heremani i te faarevahia i roto i te mau fenua tama‘i ore. No reira, na’na ïa i faatere i taua ohipa ra, mai Copenhague mai, i Danemaka. I roto i taua faarevaraa o te mau misionare, ua feruri o Wallace Toronto, te peresideni misioni i Tchekoslovaquie e, e mea ti‘a ia tono i ta’na vahine o Martha e ta raua mau tamarii i Copenhague no te paruru ia ratou. Ua faaea rii oia i muri no te haapapû i te faarevaraa o na misionare e maha tei tape‘ahia. Ua ma‘iri e rave rahi mahana e aita roa e parau no ni‘a ia ratou. I muri a‘e, te parau ra o Martha e :

« Ua tae maira te mahana hopea i reira te mau pereoo auahi, te mau pahi « ferry » e te mau pahi e tere ai i to ratou tere hopea mai te fenua Heremani mai, e ua pure matou e, tei ni‘a atoa o Wally [te peresideni Toronto] e ta’na na taure‘are‘a e maha i taua pahi « ferry » hopea ra o te tere ra no te ho‘i i to’na fenua taamuraa. No to’na hi‘oraa e, ua pe‘ape‘a roa vau, e te haere noa’tura te haape‘ape‘araa i te rahi a tere noa ai te minuti, ua tapiri maira te peresideni Smith i piha‘iho ia’u, ua tauahi maira ia’u e ua na ô maira, ‘E te tuahine Toronto, eita teie tama‘i e haamata hou a tae mai ai te taea‘e Toronto e ta’na na misionare i roto i teie fenua no Danemaka’. A haamata ai te mahana i te poiri atu, ua ta‘i maira te hoê niuniu… O Wally ! Ua haere mai ratou i rapae i Tchécoslovaquie na muri iho i te hoê pŭpŭ ti‘a no Peretane na ni‘a i te hoê pereoo auahi i tonohia no ratou, i muri iho, ua ta‘uma mai i ni‘a i te pahi « ferry » hopea mai Heremani mai, e i teie nei, tei tatahi ratou (i Danemaka) e te tia‘i ra i te pereoo no te uta ia ratou i Copenhague. Te hau e te oaoa i itehia i te fare misioni e i rotopu i na misionare e 350, e au ïa mai te hoê ata poiri i iriti-ê-hia no te faaite mai i te anaana mahana ».⁵²

Ua mauruuru roa o Elder Smith i te mau taata no Danemaka, tei farii ia faarevahia mai te mau misionare e rave rahi i roto i to ratou fenua. I te taime a haamata ai te tama‘i, ua tohu oia e, no to ratou aau farii, e ore roa te nunaa no te Danemaka e pohe i te po‘ia maa ore i roto i te tama‘i. Tau matahiti i muri mai, « ua ora mai te nunaa no Danemaka i te tama‘i, tera râ, ua hau a‘e paha to ratou maitai i to te nunaa o te tahi atu mau fenua no Europa. Ua hapono atoa te Feia Mo‘a no Danemaka i te mau puohu totauturu i te feia mo‘a i Horane e i Norevetia tei vai i roto i te ati. Ua maraa mai te faito o te melo, e ua tata‘i piti te faito o te tuhaa ahuru i roto i te Misioni no Danemaka… Ua feruri te feia mo‘a no Danemaka e, teie maitai to ratou, o te tupuraa ïa o te parau tohu i parauhia e Elder Joseph Fielding Smith ».⁵³

A haamata ai te tama‘i, ua faanaho o Elder Smith i te faarevaraa o na misionare marite e 697 e tavini ra i Europa. Te tahi mau misionare e mau faatere mataeinaa e e mau faatere amaa i taua taime ra, no reira, ua tuu o Elder Smith i te reira mau hopoi‘a faatere i ni‘a i te mau melo no te fenua iho. Ia oti taua mau ohipa ra i te ravehia, ua fano atu o Elder Smith e o Jessie i te mau Hau Amui no Marite. I New York ua ta‘uma raua i ni‘a i te hoê pereoo auahi e ua tae i to raua fenua e hitu ava‘e i muri a‘e i te taime a reva ai raua.

Noa’tu e, ua oaoa o Elder Smith i te mea e, ua ti‘a i te mau misionare marite ia ho‘i mai i te fenua ma te pe‘ape‘a ore, ua faaite oia i to’na mana‘ona‘o i te mau nunaa hara ore tei ô i teie nei i roto i te ati rahi o te tama‘i i roto i to ratou fenua. Ua papa‘i oia e : « Ua ma‘i-roa-hia to’u aau i te mau taime atoa e faatupu ai matou i te hoê pureraa e e aroha rima ai i te taata i te hopea o te pureraa. Ua farii poupou ratou paatoa ia matou, e no’u nei, ua hau atu te faufaa o to ratou auhoaraa i ta ta ratou paha i mana‘o. Ua manii te roimata o te tahi pae ma te parau e, te tia‘i nei ratou i te ati rahi, e eita tatou e farerei faahou i roto i teie oraraa. Te pe‘ape‘a nei au no ratou i teie nei, e te pure nei au i te mau mahana atoa ia paruru mai te Fatu ia ratou i roto i teie tau ri‘ari‘a ».⁵⁴

Te tavini ra te tamaiti a Elder Smith, o Lewis, i ta’na misioni i Peretane i te taime a haamata ai te Tama‘i Rahi II o te Ao nei, e tei roto oia i te pŭpŭ hopea o te mau misionare tei ho‘i i te fenua.⁵⁵ Mai te huru e, e piti matahiti e te afa i muri mai, ua ratere faahou o Lewis na ni‘a i te Moana Ataranetita, no te tavini ïa i roto i te nuu faehau i te reira taime. Ua papa‘i o Elder Smith e, « Ua pe‘ape‘a matou paatoa no te reira ». « E ohipa haamâ i te mea e, ua faahepohia te feia mâ e te parau-ti‘a ia faaô i roto i te hoê pe‘ape‘a no te ao atoa nei, no te ino noa o te taata ».⁵⁶

I te 2 no tenuare 1945, ua farii o Elder Smith i te hoê niuniu tei faaara mai ia’na e, ua pohe ta’na tamaiti i roto i te taviniraa i to’na fenua. Ua papa‘i oia e : « Ua farii matou i teie parau ma te pe‘ape‘a rahi i te mea e, ua ti‘aturi tamau noa matou e, ua fatata oia i te ho‘i mai i te mau Hau Amui no Marite. Ua tupu te mana‘o i roto ia matou e, e paruruhia oia i te mau ati mai tei tupu e rave rahi taime na mua’tu. E mea fifi roa na matou ia ite e, e tupu mai taua huru ohipa ra… Noa’tu te teimaha o teie parau apî, te vai nei te hau e te oaoa i roto ia matou ia ite e, e mea mâ oia e te ti‘amâ i te mau viivii tei parare i roto i te ao nei e i roto i te nuu. Ua haapa‘o maite oia i to’na faaroo e ua ti‘a ia’na ia farii i te hoê ti‘a-faahou-raa hanahana, ia amui-faahou-hia matou ».⁵⁷

Ei melo no te Pŭpŭ no te Tino Ahuru Ma Piti, ua ti‘a pinepine o Joseph Fielding Smith i mua i te Feia Mo‘a i te Mau Mahana Hopea Nei no te faaite papû no ni‘a ia Iesu Mesia, no te haapii i te evanelia i faaho‘ihia mai, e no te ti‘aoro i te taata ia tatarahapa. Ua horo‘a oia hau atu i te 125 a‘oraa i roto i te amuiraa rahi, ua ti‘a i roto e rave rahi tauatini amuiraa tĭtĭ, e ua paraparau i roto i te mau rururaa mai te amuiraa tuatapaparaa e i roto i te haapurororaa ratio. Ua haapii atoa’tu oia na roto i te parau papa‘i. No te mau matahiti e rave rahi ua papa‘i oia i te hoê parau i roto i te ve‘a a te Ekalesia te Improvement Era e ua pahono i te mau uiraa i tuuhia e te mau taata tai‘o. Ua papa‘i atoa oia i te tahi atu mau parau no te mau ve‘a a te Ekalesia e i te tuhaa a te Ekalesia o te Deseret News. I to’na taviniraa ei Aposetolo, mai te matahiti 1910 e tae atu i te matahiti 1972, ua nene‘ihia ta’na mau papa‘iraa i roto e 25 buka, mai te Essentials in Church History, Doctrines of Salvation, Church History and Modern Revelation, e Answers to Gospel Questions.

Na roto i te faarooraa i ta’na mau a‘oraa e te tai‘oraa i ta’na mau parau papa‘i, ua ti‘aturi te mau melo o te Ekalesia i te peresideni Smith ei taata ite evanelia. Hau atu i te reira, ua haapii ratou ia ti‘aturi e ia pee i te Fatu. Mai ta te peresideni N. Eldon Tanner i parau, ua « haaputapu o Joseph Fielding Smith i te oraraa o te mau taata e rave rahi tauatini, a ora ai e a haapii ai oia na roto i te parau e i te papa‘i, i te mau parau tumu atoa o te evanelia. Aita oia i vaiiho i te feaa i roto i te mana‘o o te taata e, ua ite oia e, e Atua ora te Atua, e o tatou Ta’na mau tamarii varua ; e o Iesu Mesia Ta’na Tamaiti Fanau tahi i te tino nei ; e ua horo‘a oia i to’na ora no tatou ia ti‘a ia tatou ia farii i te tahuti ore ; e na roto i te fariiraa e i te oraraa i te evanelia, ia nehenehe ia tatou e farii i te ora mure ore ».⁵⁸

Ua parau o Elder Bruce R. McConkie e :

« E toru ohipa i roto i te oraraa e i te mau ohipa a te peresideni Joseph Fielding Smith :

« 1. To’na here i te Fatu e te haapa‘o aueue ore i te imiraa i te rave‘a ia faaite i te reira here na roto i te haapa‘oraa i ta’na mau faaueraa e te raveraa i te mau mea atoa e mauruuru ai te Fatu.

« 2. To’na faatura i te peropheta Iosepha Semita e i te mau parau mau mure ore tei faaho‘ihia mai na roto ia’na ; i to’na papa ruau, te patereareha Hairamu Semita… [tei] farii i te pohe maratiri ; e i to’na metua tane, te peresideni Joseph F. Smith, tei papa‘ihia te i‘oa i roto i te oire tiretia ra ei taata tei haa tamau noa ma te itoito no te taata tei haamaniihia te toto ia ti‘a ia tatou ia ora.

« 3. To’na iho ite i te evanelia e to’na huru varua ; to’na iho itoito faito ore i te pororaa i te parau-ti‘a ; e to’na haerea no te faaamu i tei po‘ia, faaahu i tei vai tahaa noa, hahaere i te ivi e te otare, e no te faaite i te haapa‘oraa mau na roto i te haapiiraa e i te hi‘oraa ».⁵⁹

Ua hi‘o te mau taea‘e o te peresideni Smith i roto i te Pŭpŭ no te Tino Ahuru Ma Piti Aposetolo ia’na mai te hoê taata faatere feruriraa paari e te aroha. No te faahanahana i to’na 80raa o te mahana fanauraa, ua nene‘i te tahi atu mau melo o te Pŭpŭ no te Tino Ahuru Ma Piti Aposetolo i te hoê parau faateniteniraa ia’na. I roto i taua parau faateniteniraa ra, te parau ra ratou e :

« Matou o te rave nei i te ohipa i roto i te Apooraa a te Tino Ahuru Ma Piti i raro a‘e i ta’na faatereraa, ua ti‘a ia matou ia ite i te teitei mau o to’na huru taata. I te mau mahana atoa te ite tamau noa nei matou i te mau faaiteraa o to’na huru haro‘aro‘a e to’na hi‘oraa maitai i to’na mau hoa ohipa a rave ai matou i ta matou ohipa e a faaau ai oia i ta matou mau tautooraa i te pae hopea e ia ti‘a i te ohipa a te Fatu ia haere i mua. To matou hinaaro hoê roa, maori râ, ia ite te Ekalesia taatoa i te mărû o to’na varua e to’na mana‘ona‘o rahi i te maitai o te feia fana‘o ore e o ratou i roto i te ati. Ua here oia i te feia mo‘a atoa e aita oia e faaea i te pure no te taata hara.

« Ma te haro‘aro‘a rahi, mai te huru ra e, e piti faito ta’na no te tapae i ni‘a i te mau faaotiraa hopea. Eaha te mau hinaaro o te Peresideniraa Matamua ? Eaha te mea maitai roa a‘e no te basileia o te Atua ? »⁶⁰

I te hoê po‘ipo‘i Sabati, 18 no tenuare 1970, ua hope te oraraa tahuti o te peresideni David O. McKay. I teie nei, tei ni‘a i te Pŭpŭ no te Tino Ahuru Ma Piti Aposetolo te hopoi‘a no te faatereraa i te Ekalesia, e o Joseph Fielding Smith, 93 matahiti to ratou peresideni.

I te 23 no tenuare 1970, ua putuputu te Pŭpŭ no te Tino Ahuru Ma Piti e ua paturu i te peresideni Smith i roto i to’na piiraa ei Peresideni no te Ekalesia a Iesu Mesia i te Feia Mo‘a i te Mau Mahana Hopea Nei. Ua ma‘iti te peresideni Smith ia Harold B. Lee ei tauturu matamua e ia N. Eldon Tanner ei tauturu piti. I muri iho, ua faataahia na taata e toru no te rave i ta ratou mau hopoi‘a apî.

Hōho’a

Joseph Fielding Smith standing between his two counselors in the First Presidency, Harold B. Lee and N. Eldon Tanner.

Te faahaamana‘o ra o Elder Ezra Taft Benson, tei tae atoa mai i taua apooraa ra : « Ua parahi te hoê varua tahoê nehenehe i roto i ta matou apooraa e te faaiteraa rahi no te here a haati ai te mau taea‘e i to ratou rima i te tahi e te tahi a oti ai te feia faatere apî i te ma‘itihia e i te faataahia ».⁶¹

Ua faaite mai o Elder Boyd K. Packer i to’na iho iteraa papû no ni‘a i te piiraa o te peresideni Smith :

« Ua faaru‘e au i te piha toro‘a i te hoê mahana pae avatea ma te feruri i ta’u ohipa no te amuiraa no taua hopea hebetoma ra. Ua tia‘i au ia tae mai te afata ta’uma uira mai te tahua pae mai.

« A matara mărû noa ai te uputa o te afata ta’uma uira, te ti‘a noa mai nei te peresideni Joseph Fielding Smith. Ua maere rii au maa taime iti i te iteraa’tu ia’na, i te mea e, tei te tahua i raro atu to’na piha toro‘a.

« I to’u iteraa ia’na i ropu mau i te uputa, ua tupu a‘era i roto ia’u te hoê faaiteraa puai e, —e peropheta no te Atua teie e ti‘a nei. Mai te maramarama e te ite viivii ore ra, ua faaite papû maira taua reo iti ha‘iha‘i ra o te Varua ia’u e, teie te peropheta o te Atua ».⁶²

I raro a‘e i te faatereraa a te peresideni Smith, ua tamau noa te Ekalesia i te tupu i te rahi. Ei hi‘oraa, ua faati‘ahia 81 tĭtĭ, ma te tai‘o atoa i te mau tĭtĭ matamua i Asia e i Afirita, e ua tae‘ahia te rahiraa melo i te faito e 3 mirioni. E piti hiero tei haamo‘ahia —i Ogden, Utah, e i Provo, Utah.

Noa’tu e te tupu noa ra te Ekalesia i te rahi i te ao nei, ua haapuai te peresideni Smith i te parau no te faufaa o te nohoraa e o te utuafare o te taata hoê. Ua faahaamana‘o oia i te Feia Mo‘a i te Mau Mahana Hopea Nei e, « Te vai nei te faanahoraa a te Ekalesia no te tauturu i te utuafare e to’na mau melo ia tae i te faateiteiraa ».⁶³ Ua haapii oia e : « O te utuafare te faanahoraa faufaa roa a‘e i teie tau e a muri noa’tu… O te hinaaro teie o te Fatu, ia haapaari e ia paruru i te taatiraa utuafare ».⁶⁴ I roto i te tautooraa no te haapaari i te mau utuafare e i te mau taata, ua tuu te Ekalesia i te faaitoitoraa rahi i ni‘a i te pureraa pô utuafare, te hoê faanahoraa tei faaitoitohia mai te matahiti 1909 mai â, i te taime a ti‘a ai te metua tane o te peresideni Smith ei Peresideni no te Ekalesia. I raro a‘e i te faatereraa a te peresideni Joseph Fielding Smith, ua faataa-mana-hia te mau monire ei mahana no te pureraa pô utuafare. I taua mau pô ra, aita te mau apooraa a te Ekalesia e faatupuhia, e ua opanihia te mau fare a te Ekalesia.

Noa’tu to’na matahiti paari, ua rave te peresideni Smith i to’na piiraa mai te au i te haehaa o te tamarii e te puai o te taure‘are‘a. I roto i na matahiti e piti e e pae ava‘e no to’na taviniraa ei peropheta, ei hi‘o, e ei heheu parau no te Ekalesia, ua faaûruhia te Feia Mo‘a i te Mau Mahana Hopea Nei ati a‘e teie nei ao na roto i ta’na mau parau poro‘i.

Ua parau oia e « e mau tamarii varua tatou na te Atua to tatou Metua i te Ao ra »⁶⁵ e « e ti‘a ia tatou ia ti‘aturi i te Mesia e ia faaau i to tatou oraraa i ni‘a to’na ».⁶⁶ Ua faaite papû oia e, « ua ite e ua ti‘a o Iosepha Semita i mua i te aro o te Atua te Metua e ta’na Tamaiti o Iesu Mesia »⁶⁷ e ua riro mai « ei heheu parau no te ite no te Mesia e no te faaoraraa, i to te ao nei no teie anotau e te u‘i ».⁶⁸

Ua faaitoito oia i te Feia Mo‘a « ia faaru‘e i te mau haerea rau o te ao nei »⁶⁹ ia here râ i te mau taata atoa i te ao nei—« ia hi‘o i te maitai i roto i te taata noa’tu e, te tauturu nei tatou ia ratou ia faaore hoê e aore râ, e piti peu iino ».⁷⁰ Ua faahaamana‘o Oia ia ratou e, hoê rave‘a no te faaite i teie « varua o te here e o te autaea‘eraa » o te faaiteraa ïa i te evanelia—« ia ani i te mau taata atoa i te mau vahi atoa ia faaroo i te mau parau o te ora mure ore tei heheuhia mai i teie mahana ».⁷¹

Ua haere oia i rotopu i te feia apî o te Ekalesia, e ua putuputu i roto i te mau amuiraa rarahi na te taure‘are‘a Feia Mo‘a e ua faaitoito ia ratou « ia ti‘a ma te papû i roto i te faaroo noa’tu te pato‘iraa ».⁷²

Ua paraparau pinepine oia i te feia tei mau i te autahu‘araa, ma te faahaamana‘o ia ratou e, « ua piihia ratou ei ti‘a no te Fatu e te mau nei i to’na mana » e ma te a‘o ia ratou « ia haamana‘o e, o vai [ratou] e ia rave atu i te ohipa ia au i te reira ».⁷³

Ua faaitoito oia i te Feia Mo‘a atoa i te Mau Mahana Hopea nei ia farii i te mau haamaitairaa o te hiero, ia haapa‘o noa i te mau fafauraa o te hiero, e ia ho‘i faahou i te hiero no te farii i te mau oro‘a mo‘a no to ratou mau tupuna. Hou a haamo‘a ai oia i te hiero no Ogden, Utah, ua parau oia e, « Te hinaaro nei au e faahaamana‘o ia outou e, ia haamo‘a ana‘e tatou i te hoê fare i te Fatu, te ohipa mau ta tatou e rave nei maori râ ïa, te haamo‘a nei tatou ia tatou iho i te ohipa a te Fatu, ma te fafau atu e, e faaohipa tatou i te fare mai te au i Ta’na i feruri ra ».⁷⁴

Ua a‘o oia e, « A haapa‘o i te mau faaueraa ». « A haere na roto i te maramarama. A tape‘a maite e tae roa’tu i te hopea. A haapa‘o i te mau fafauraa e i te mau titauraa atoa, ei reira te Fatu e haamaitai mai ai ia outou hau atu i ta outou i moemoea na ».⁷⁵

Ma te faahiti ia peresideni Brigham Young, ua tatara mai te peresideni Harold B. Lee i te faaûruraa e i te faatereraa a te peresideni Smith : « Teie ta te peresideni Young i parau : ‘Mai te mea e, e ora tatou i ta tatou haapa‘oraa mo‘a e e vaiiho i te Varua ia parahi mai, eita te reira e riro i te ohipa fiu e te peu maamaa, e a haafatata noa mai ai te tino i te purararaa, e haru papû a‘e mai te Varua i taua mea mure ore ra i muri mai i te paruru, ma te ume mai mai roto mai i te hohonu o te pihaaraa mure ore ra o te mau ofa‘i anaana no te ite, oia o te faaati nei i teie ti‘ahapa paruparu e te ueue e te anaana no te paari tahuti ore’.

« Ua ite matou i te reira e rave rahi taime, a faaô ai matou i roto i te tauaraa parau no ni‘a i te mau ohipa fifi—e mau faaotiraa teie e na te Peresideni o te Ekalesia ana‘e e nehenehe e rave. Ei reira to matou iteraa i teie paari i te teatearaa a faati‘a papû roa ai oia [te peresideni Smith], na ni‘a’tu i to’na maramarama, i te mau mea ta’na i pii na mai roto mai i te hohonu o to’na varua ».⁷⁶

I te 3 no atete 1971, ua pohe o Jessie Evans Smith, ma te vaiiho mai i te peresideni Joseph Fielding Smith ei ivi no te toru o te taime. Na roto i te reira, ua haere te peresideni Smith e ora i piha‘iho i ta’na tamahine o Amelia McConkie e ta’na tane o Bruce. E haere tamau mai te tahi atu mau tamarii ta’na e mono te tahi i te tahi no te farerei ia’na e e afa‘i e faaorihaere ia’na. Ua tamau noa oia i te haere i to’na piha toro‘a i te mau mahana atoa o te hebetoma, i te haere i te mau putuputuraa, e i te ratere haere no te ohipa a te Ekalesia.

I te 30 no tiunu 1972, ua faaru‘e te peresideni Smith i to’na piha toro‘a i te tahua matamua o te fare Faatereraa a te Ekalesia i te hopea o te reira mahana. Mai te apeehia e to’na papa‘i parau, D. Arthur Haycock, ua haere oia i te piha papa‘iraa aamu o te Ekalesia, i reira ho‘i oia i te raveraa i te ohipa hou a riro mai ai ei Peresideni no te Ekalesia. Ua hinaaro oia e haamauruuru i te mau taata atoa e rave ra i te ohipa i reira. I muri a‘e i te aroha-rima-raa ia ratou, ua haere atu oia i te tahua i raro i te fenua o te fare no te aroha rima i te mau taata haapa‘o niuniu e ia vetahi ê e rave ra i te ohipa i reira, no te faaite i to’na mauruuru. Teie ïa to’na mahana hopea i te piha toro‘a.

I te mahana maa 2 no tiurai 1972, 17 noa mahana na mua a‘e i te 96raa o to’na mahana fanauraa, ua haere oia i te pureraa oro‘a i roto i ta’na iho paroisa. I te avatea i taua mahana ra, ua haere oia e farerei i ta’na matahiapo, o Josephine, e ta’na tamaiti o Reynolds. I te reira pô, a parahi ai oia i roto i to’na parahiraa au roa i roto i te fare o McConkie ma, ua faaru‘e mai oia ma te hau. Mai ta ta’na hunoa i parau i muri a‘e, « ua piihia te peresideni Smith e te Fatu o ta’na i here roa e ta’na i tavini maitai roa i roto i te tahi atu mau ohipa rahi a‘e i roto i ta’na ovine mure ore ».⁷⁷

Ua haere atu te peresideni Harold B. Lee, te Aposetolo matahiapo i teie nei i ni‘a i te fenua nei, e farerei i te utuafare McConkie i to’na faarooraa e, ua pohe te peresideni Smith. Ua « haere oia ma te maniania ore i te roi, e, ma te tuturi i raro, ua tape‘a maira i te hoê rima o te peropheta i roto i to’na. Ua faaea noa oia i roto i te reira ti‘araa no te tahi tau taime te maoro, ma te paraparau ore, i roto i te pure e i te feruriraa hohonu. I muri iho ua ti‘a maira i ni‘a no te faaite i to’na tapa‘o aroha i te utuafare, to’na faahiahia i to ratou metua tane, e ta’na a‘oraa ia ratou, ia faatura i te peresideni Smith na roto i te oraraa ma te ti‘amâ ».⁷⁸

I te hunaraa o te peresideni Smith, ua faahiti te peresideni N. Eldon Tanner i to’na parau ei « taata itoito no te Atua, e taata tei tavini hanahana i te Atua e i to’na mau taata tupu, e o tei arata‘i i to’na utuafare e i te mau taata atoa na roto i te hi‘oraa maitai ; e taata o te nehenehe e parau e, e taata haavare ore e te te‘ote‘o ore ». Te parau ra te peresideni Tanner e, « eita roa e nehenehe e parau no ni‘a ia’na e, e mea au a‘e na’na te haapoupou a te taata hau atu i te haapoupou a te Atua’[Ioane 12:43] ».⁷⁹

Ua parau te peresideni Harold B. Lee e : « Ua here te taea‘e Tanner e o vau nei i teie taata i teie na matahiti e piti e te afa i ma‘iri. E ere te mea haavarevare. Ua faatupu oia i te here, no te mea, ua here oia ia matou, e ua ti‘a matou i piha’iho ia’na mai ia’na i ti‘a i piha‘iho ia matou e i ti‘aturi ia matou ».⁸⁰

Ua faaino tamau noa hoê ve‘a i te peresideni Smith, ma te pato‘ito‘i i to’na piiraa i roto i te Tino Ahuru ma Piti hau atu e 60 matahiti na mua’tu, are‘a i teie nei, teie ta’na faateniteniraa e nene‘i nei : « Joseph Fielding Smith, e taata etaeta i roto i te haapa‘o i ta’na ti‘aturiraa, are‘a râ, e taata mărû no ni‘a i te mau mea e hinaarohia no te taata i te mau vahi atoa, ua horo‘a i te mau mana‘o tauturu paari i to’na mau hoa, ua aupuru ma te here i to’na utuafare, e taata faatere haapa‘o i ta’na mau hopoi‘a no te Ekalesia. E mihihia oia, tera râ, e haamana‘o taa-ê-hia oia ».⁸¹

Te faateniteniraa rahi roa‘e, o te faaiteraa ïa a te hoê melo o te utuafare, te hunoa a te peresideni Smith, o Bruce R. McConkie, tei faaite no ni‘a ia’na « ei tamaiti na te Atua ; e aposetolo na te Fatu o Iesu Mesia ; e peropheta no tei TeiTei Roa ; e i ni‘a roa‘e, e metua no Iseraela ! » Ua tohu o Elder McConkie e, « I roto i te mau matahiti e haere mai nei, e paraparau mai to’na reo mai raro mai i te repo, a haapii ai te mau u‘i no ananahi i te mau haapiiraa tumu o te evanelia na roto i ta’na mau papa‘iraa ».⁸²

Ia tuatapapa ana‘e outou i teie buka, e tauturu te mau haapiiraa a te peresideni Joseph Fielding Smith i te faatupuraa i taua faahitiraa parau ra. E paraparau mai to’na « reo mai raro mai i te repo » ia outou a « haapii ai [outou] i te mau haapiiraa tumu o te evanelia ».