Kuo Fakamolemoleʻi Moʻoni Nai Au?

ʻI he ngaahi taʻu lahi kuohilí, ne u hiki ai mo Sisitā Netulesi ki ʻAitahō, ʻo ma fakaava ai ha pisinisi foʻou. Naʻe lōloa ʻa ʻema ngāue ʻi he ʻahó mo e poʻulí ʻi he ʻōfisí. Meʻamālie, he naʻá ma nofo ofi pē ki he ngāué. Ko e uike kotoa pē, naʻe ōmai ai ʻa Sana mo ʻema fānau fefine ʻe toko tolú—kei iiki kotoa he taʻu onó—ki he ʻōfisí ke mau kai hoʻatā fakataha.

ʻI ha ʻaho pehē ʻe taha hili ʻemau kai hoaʻatā mo e fāmilí, naʻá ku fakatokangaʻi kimui ange ʻi he hoʻatā efiafi ko iá, ne tuku mai ʻe heʻema kiʻi taʻahine taʻu nima ko Miselá ha kiʻi tohi, naʻe fai ʻi ha kiʻi Laʻipepa ʻo fakapipiki ki he telefoni ʻi hoku ʻōfisí.

ʻOku pehē pē ai, “Teti, manatuʻi ke ke ʻofa ʻia au. ʻOfa atu, Misela.” Ne hoko ʻeni ko ha fakamanatu mālohi ki ha tamai kei siʻi fekauʻaki mo e ngaahi meʻa ko ia ʻoku mahuʻinga tahá.

Kāinga, ʻoku ou fakamoʻoni ko ʻetau Tamai Hēvaní ʻokú Ne manatuʻi maʻu pē kitautolu pea ʻokú Ne ʻofa haohaoa ʻiate kitautolu. Ko ʻeku fehuʻí leva ʻeni: ʻOku tau manatuʻi ʻapē Ia? Pea ʻoku tau ʻofa nai ʻiate Ia?

Naʻá ku hoko ʻi he ngaahi taʻu kuohilí ko ha taki faka-Siasi. Naʻe tuʻukimuʻa ʻa Teni, ko e taha ʻo ʻemau kau talavoú, ʻi he meʻa kotoa. Naʻá ne talangofua, angaʻofa, lelei, mo loto-ʻofa. Ka, ʻi heʻene ʻosi mei he ako māʻolungá, naʻe kamata ke ne feohi mo ha kakai ne ʻikai ʻulungaanga lelei. Naʻá ne fakaʻaongaʻi ʻa e faitoʻo kona tapú, tautautefito ki he metamifetaminí (methamphetamine), peá ne fononga hifo ai ʻi he hala fakatuʻutāmaki ʻo e maʻunimaá mo e fakaʻauhá. ʻIkai fuoloa, kuo liliu ʻaupito hono fōtungá. Naʻe faingataʻa ke fakatokangaʻi ia. Ko e liliu lahi tahá naʻe ʻi hono fofongá—ne hā mahino mai ʻi hono fofongá ʻa ʻene loto-mamahí. Naʻe tuʻo lahi ʻeku feinga ke talanoa mo ia, ka naʻe ʻikai hano ʻaonga. Naʻe ʻikai mahuʻingaʻia ia.

Ko ha meʻa faingataʻa ke te sio ki he faingataʻaʻia ʻa e talavou makehé ni mo ʻene ʻi ha moʻui naʻe kehe ʻaupito ia mei he kimuʻá! Naʻá ne malava ha meʻa lahi ange.

Pea ʻi ha ʻaho ʻe taha, ne kamata ai ʻa e mana kiate ia.

Naʻá ne kau atu ki ha houalotu sākalamēniti naʻe vahevahe ai ʻe hono kiʻi tehiná ʻene fakamoʻoní kimuʻa pea toki ʻalu ʻo ngāue fakafaifekaú. Lolotonga ʻa e houalotú, naʻe ongoʻi ʻe Teni ha meʻa ne fuoloa ʻa e ʻikai ke ne toe ongoʻi. Naʻá ne ongoʻi ʻa e ʻofa ʻa e ʻEikí. Kuo faifai peá ne maʻu ha ʻamanaki lelei.

Neongo naʻe ʻi ai haʻane holi ke liliu, ka naʻe faingataʻa kia Teni. Naʻe ʻikai ke ne meimei malava ʻo kātekina hono maʻunimaá mo e ongoʻi halaiá.

ʻI ha efiafi ʻe taha, lolotonga ʻeku kosi homau ʻapí, kuo afe fakafokifā mai ʻa Teni heʻene meʻalelé. Naʻá ne ongoʻi faingataʻaʻia lahi. Naʻá ku tāmateʻi leva ʻa e mīsini kosí, peá ma tangutu ʻi he malumalu ʻo e fakafaletolo ʻi muʻá. Ko e taimi ia naʻá ne vahevahe mai ai ʻa e ngaahi ongo ʻi hono lotó. Naʻá ne loto-moʻoni ke toe foki mai. Ka, naʻe mātuʻaki faingataʻa ke ne sītuʻa mei he maʻunimaá mo ʻene tōʻonga moʻuí. ʻIkai ngata aí, naʻá ne fuʻu ongoʻi halaia, mo mā ʻi he lahi ʻo ʻene heé. Naʻá ne fehuʻi mai, “ʻE lava ʻapē ke fakamolemoleʻi moʻoni au? ʻOku ʻi ai moʻoni nai ha founga ke foki ai?”

Hili ʻene lilingi mai hono lotó ʻi he ʻū meʻa ko ʻení, ne ma lau fakataha leva ʻa e ʻAlamā 36:

“ʻIo, naʻá ku manatuʻi ʻeku ngaahi angahalá mo ʻeku ngaahi hia kotoa pē. …

“ʻIo, … naʻe hanga ʻe heʻeku fakakaukau pē ki haʻaku hū atu ki he ʻao ʻo hoku ʻOtuá ʻo tautea hoku laumālié ʻi he fuʻu ilifia ʻoku ʻikai faʻa fakamatalaʻi” (veesi 13–14).

Hili ʻa e ongo veesi ko iá, naʻe pehē mai ʻa Teni, “Ko e ongo tofu pē ʻeni ʻoku ou maʻú!”

Naʻá ma hoko atu:

“ʻI he tauteaʻi au ʻi he manatu ki heʻeku ngaahi angahala lahí, vakai, naʻá ku manatuʻi foki ʻeku fanongo ki ha kikite ʻa ʻeku tamaí ki he kakaí ʻo kau ki he hāʻele mai ha tokotaha ʻa ia ko Sīsū Kalaisi, ko ha ʻAlo ʻo e ʻOtuá, ke ne fai ha fakalelei ki he ngaahi angahala ʻa e māmaní. …

“Pea ʻoiauē, ko e fiefia, mo e maama fakaofo kuó u vakai ki aí” (veesi 17, 20).

ʻI heʻema lau ʻa e ngaahi fakamatalá ni, naʻe kamata ke ne tangi. Ko e fiefia ʻa ʻAlamaá ko e fiefia ia naʻá ne (Teni) fekumi ki aí!

Naʻá ma talanoa naʻe mātuʻaki faiangahala lahi ʻa ʻAlamā. Ka, ʻi heʻene fakatomalá, naʻe ʻikai ke ne toe sio ki mui. Naʻá ne hoko ko ha ākonga mateaki ʻa Sīsū Kalaisi. Naʻá ne hoko ko ha palōfita! Ne ‘ohovale ʻa Teni. Naʻá ne pehē mai, “Ko ha palōfita?”

Naʻá ku tali ange pē, “ʻIo, ko ha palōfita. Ka ʻoku ʻikai ʻuhinga ia ke ke faingataʻaʻia ai!”

Ne ma talanoa neongo naʻe ʻikai aʻu ʻene ngaahi angahalá ki he tuʻunga ʻo ʻAlamaá, ka ʻoku fakahoko ʻa e palōmesi tatau ʻo e fakamolemoleʻi kakato mo haohaoá ki he taha kotoa—tuʻunga pea fou ʻi he Fakalelei taʻe-fakangatangata ʻa Sīsū Kalaisí.

Naʻe mahino he taimí ni kia Teni. Naʻá ne ʻilo ʻa e meʻa naʻe fiemaʻu ke ne faí: naʻe fiemaʻu ke kamata ʻene fonongá ʻaki haʻane falala ki he ʻEikí mo fakamolemoleʻi pē ʻe ia ia!

Ko e fuʻu liliu lahi ʻa Teni ʻi he lotó ko ha mana moʻoni. Naʻe ʻalu pē taimí, kuo liliu hono fofongá, pea toe hā mai ʻa e fiefiá ʻi hono fofongá. Naʻá ne hoko ʻo moʻui taau ki he temipalé. Naʻe faifai pea foki mai!

Hili ha ngaahi māhina lahi, ne u ʻeke ange kia Teni pe ʻe loto ke fakahū haʻane tohi kole ngāue fakafaifekau taimi kakato. Ko ʻene talí naʻe fakaʻohovale mo mālie.

Naʻá ne pehē, “Te u fiefia ke ngāue fakafaifekau, ka ʻokú ke ʻilo ʻa e tuʻunga naʻá ku ʻi aí mo ia kuó u fakahokó! Naʻá ku pehē ʻe au kuo fakataʻeʻaongaʻi au.”

Naʻá ku tali ange, “Mahalo pē ʻokú ke tonu. Ka, ʻoku ʻikai ha meʻa te ne taʻofi kitaua mei hano fai ha tohi kole. Kapau ʻe fakaʻatā koe, kehe pē ke ke ʻilo naʻá ke fakahaaʻi ha holi moʻoni ke ngāue maʻá e ʻEikí.” Naʻe fiefia ʻaupito hono fofongá. Naʻá ne fiefia ʻi he fakakaukau ko ʻení. Kiate ia ne ngali taʻemalava ʻaupito ke hoko ʻeni, ka ko ha faingamālie ia naʻá ne fie fakaʻaongaʻi.

Hili ha ngaahi uike siʻi mei ai, pea ʻi heʻene ʻohovalé, naʻe toe hoko ai ha mana. Naʻe maʻu ʻe Teni ha ui ke ngāue fakafaifekau taimi kakato.

ʻI he ʻosi ha ngaahi māhina siʻi mei he aʻu ʻa Teni ki he malaʻe ʻo e ngāue fakafaifekaú, ne u maʻu ha telefoni. Naʻe pehē mai pē heʻene palesitení, “Ko e hā ʻoku hoko ki he talavou ko ʻení? Ko e faifekau fakaofo taha ia kuó u mamata aí!” Vakai, kuo hoko ki he palesiteni ko ʻení ha ʻAlamā ko e Siʻi fakaonopooni.

ʻI he ʻosi ha taʻu ʻe ua mei ai, ne foki ʻa Teni ki ʻapi mo e lāngilangi, kuó ne ngāue maʻá e ʻEikí ʻaki hono lotó, iví, ʻatamaí, mo e mālohí kotoa.

Hili ʻene lipooti ʻene ngāue fakafaifekaú ʻi he houalotu sākalamēnití, naʻá ku foki ki ʻapi, pea naʻe fai mai ha tukituki ʻi he matapā ʻi muʻá. Naʻe tuʻu ai ʻa Teni mo e loʻimataʻia ʻi hono fofongá. Naʻá ne pehē, “ʻE lava ke ta kiʻi talanoa nounou?” Naʻá ma toe hū ki tuʻa ki he sitepu fakafaletolo tatau pē.

Naʻá ne pehē mai, “Palesiteni, ʻokú ke pehē kuo fakamolemoleʻi moʻoni au?”

ʻI he taimi ní naʻá ku kau atu mo au ʻi he tangí. Naʻe tuʻu ʻi muʻa ʻiate au ha ākonga faitōnunga ʻa Sīsū Kalaisi ʻa ia kuó ne foaki ʻene meʻa kotoa pē ke akoʻi mo fakamoʻoni kau ki he Fakamoʻuí. Naʻe hoko ia ko e fōtunga ʻo e mālohi faifakamoʻui mo fakaivia ʻo e Fakalelei ʻa e Fakamoʻuí.

Naʻá ku pehē ange, “Teni! Kuó ke sio ki he sioʻatá? Kuó ke sio ki ho fofongá? ʻOku fonu ia ʻi he māmá, pea ʻokú ke fōtunga fiefia ʻi he Laumālie ʻo e ʻEikí. Ko e moʻoni, kuo fakamolemoleʻi koe! ʻOkú ke fakaofo! Ko e meʻa ʻoku fiemaʻu ke ke fakahoko ʻi he taimi ní ke hoko atu hoʻo moʻuí. ʻOua ʻe toe sio ki mui! Sio pē ki muʻa ʻi he tui ki he ouau hono hokó.”

ʻOku kei hokohoko atu ʻi he ʻahó ni ʻa e mana ʻa Tení. Naʻá ne mali ʻi he temipalé mo foki ki he akó, ʻo maʻu hono mataʻitohi MA. ʻOkú ne kei hoko atu ke tauhi ki he ʻEikí ʻi he ngeia mo e lāngilangi ʻi hono ngaahi uiuiʻí. Kae mahuʻinga angé, kuó ne hoko ko ha husepāniti fakaofo mo ha tamai faivelenga. Ko ha ākonga mateaki ia ʻa Sīsū Kalaisi.

Naʻe akonaki ʻa Palesiteni Lāsolo M. Nalesoni, “Ka ne taʻeʻoua ʻa e Fakalelei taʻefakangatangata [ʻa e Fakamoʻuí], ʻe mole kotoa ʻa e faʻahinga ʻo e tangatá ʻo ʻikai toe lava ke fakahaofi.”¹ Naʻe ʻikai mole ʻa Teni, pea ʻoku pehē mo kitautolu ki he ʻEikí. ʻOkú Ne tuʻu ʻi he matapaá ke hiki hake, ke fakaivia, pea mo fakamolemoleʻi kitautolu. ʻOkú Ne manatuʻi maʻu pē ke ʻofaʻi kitautolu!

Ko hono fakahaaʻi kāfakafa ʻo e ʻofa ʻa e Fakamoʻuí ki he fānau ʻa e ʻOtuá ʻoku lekooti ia ʻi he Tohi ʻa Molomoná: “ʻI he hili ʻa e folofola pehē ʻe Sīsuú, naʻe toe ʻafio holo hono fofongá ki he kakaí, ʻo ne ʻafioʻi ʻoku nau tangi, mo nau sio fakamamaʻu kiate ia ʻo hangē ʻoku nau fie kole kiate ia ke ne nofo ʻo kiʻi fuofuoloa ange mo kinautolú” (3 Nīfai 17:5).

Kuo ʻosi fakamoleki ʻe he Fakamoʻuí ha ʻaho kakato ke tokoni ki he kakaí. Ka ko hono moʻoní, naʻe lahi ange ʻa e meʻa ke Ne faí—ke ʻaʻahi ki Heʻene fanga sipi kehé; naʻe pau ke Ne hāʻele ki Heʻene Tamaí.

Neongo ʻa e ngaahi tufakangá ni, ka naʻá Ne ʻafioʻi naʻe fiemaʻu ʻe he kakaí ke Ne nofo ʻo kiʻi fuofuoloa ange. Pea, ʻi he fonu ʻa e loto ʻo e Fakamoʻuí ʻi he manavaʻofá, naʻe hoko ai ha taha ʻo e ngaahi mana maʻongoʻonga taha ʻi he hisitōlia ʻo māmaní.

Naʻá Ne nofo.

Naʻá Ne tāpuakiʻi kinautolu.

Naʻá Ne tokoni fakataautaha ki heʻenau fānaú.

Naʻá Ne hūfia kinautolu; naʻá Ne tangi mo kinautolu.

Pea naʻá Ne fakamoʻui kinautolu. (Vakai, 3 Nīfai 17.)

Ko ʻEne palōmesí ʻoku taʻengata: Te Ne fakamoʻui kitautolu.

Kiate kinautolu kuo hē mei he hala ʻo e fuakavá, kātaki ʻo ʻiloʻi ʻoku ʻi ai maʻu pē ha ʻamanaki lelei, ʻoku ʻi ai maʻu pē ha fakamoʻui, pea ʻoku ʻi ai maʻu pē ha hala foki.

Ko ʻEne pōpoaki taʻengata ʻo e ʻamanaki leleí ko e lolo fakamoʻui ia ki he taha kotoa ʻoku moʻui ʻi ha māmani faingataʻá. Naʻe folofola ʻa e Fakamoʻuí, “Ko au ko e hala, mo e moʻoni, pea mo e moʻui” (Sione 14:6).

Kāinga, tau manatuʻi muʻa ke kumi kiate Ia, ke ʻofa ʻiate Ia, pea mo manatuʻi maʻu pē Ia.

ʻOku ou fakamoʻoni ʻoku moʻui ʻa e ʻOtuá pea ʻokú Ne ʻofa ʻiate kitautolu. ʻOku ou toe fakamoʻoni ko Sīsū Kalaisi ʻa e Fakamoʻui mo e Huhuʻi ʻo māmaní. Ko e faifakamoʻui māfimafí Ia. ʻOku ou ʻilo ʻoku moʻui hoku Huhuʻí! ʻI he huafa ʻo Sīsū Kalaisí, ʻēmeni.