Ko Sīsū Kalaisi ʻa e Fakafiemālié

ʻI he tui ʻa e kau tauhi ʻo ha tangata mahaki tete mo ʻenau ʻamanaki lelei ki he meʻa kuo nau fanongoa fekauʻaki mo e ngaahi mana ʻa Sīsuú, naʻa nau ʻomi ʻa e tangatá kiate Ia. Naʻa nau mohu fakakaukau ʻi hono feingaʻi ia ki aí—ʻo nau fakaava ʻa e ʻató pea tukutukuhifo ʻa e tangatá, ʻi hono mohengá, ki he feituʻu naʻe akonaki ai ʻa Sīsuú. ʻI he “mamata [ʻa Sīsū] ki heʻenau tuí, naʻá Ne [folofola ki he tangata mahaki teté], kuo fakamolemole kiate koe hoʻo ngaahi angahalá.”¹ Peá Ne folofola ange, “Tuʻu hake, ʻo toʻo ho mohengá, mo ke ʻalu ki ho falé.”² Pea tuʻu hake leva ʻa e tangata mahaki teté ʻo toʻo hono mohengá ʻo ʻalu ki hono falé, “ʻo fakamālō ki he ʻOtuá.”³

Ko e hā mo ha toe meʻa ʻoku tau ʻilo fekauʻaki mo e ngaahi kaungāmeʻa ne nau tokangaʻi ʻa e tangata mahaki teté? ʻOku tau ʻilo naʻe ʻafioʻi ʻe he Fakamoʻuí ʻenau tuí. Pea ʻi heʻenau mamata mo fanongo ki he Fakamoʻuí mo ʻenau hoko ko ha fakamoʻoni ki Heʻene ngaahi maná, naʻa nau “ofo” mo “fakamālō ki he ʻOtuá.”⁴

Kuo ʻomi ʻe Sīsū Kalaisi ʻa e fakamoʻui ʻoku tau ʻamanaki ki aí—ʻa e fakafiemālie fakatuʻasino mei he mamahí mo e ngaahi nunuʻa kovi ʻo e mahaki tauhí. Kae mahuʻinga angé, naʻe toe ʻomi foki ʻe he Fakamoʻuí ha fakafiemālie fakalaumālie ʻi hono fakamaʻa ʻo e tangatá mei he angahalá.

Pea naʻe maʻu ʻe he ngaahi kaungāmeʻá—ʻi heʻenau feinga ke tokangaʻi ha taha faingataʻaʻiá ʻa e fakafiemālié; naʻa nau ʻilo ʻa Sīsū Kalaisi.

ʻOku ou fakamoʻoni ko Sīsū Kalaisi ʻa e fakafiemālié. Tuʻunga ʻi he Fakalelei ʻa Sīsū Kalaisí, ʻe lava ke toʻo atu ai meiate kitautolu ʻa e mafasia mo e ngaahi nunuʻa ʻo e angahalá pea tokoniʻi kitautolu ʻi hotau ngaahi vaivaí.

Pea koeʻuhí ʻoku tau ʻofa ʻi he ʻOtuá mo fuakava ke tauhi kiate Ia, te tau lava ʻo fengāueʻaki mo e Fakamoʻuí ke tokoni ke fai ha fakafiemālie fakatuʻasino mo fakalaumālie maʻanautolu ʻoku faingataʻaʻiá—pea ke tau maʻu foki ai ha fiemālie maʻatautolu ʻia Sīsū Kalaisi.⁵

Naʻe fakaafeʻi kitautolu ʻe hotau palōfita ʻofeina ko Palesiteni Lāsolo M. Nalesoní, ke tau ikunaʻi ʻa e māmaní pea maʻu ha fiemālie.⁶ Naʻá ne fakamatalaʻi ʻa e “fiemālie moʻoní” ko e “fakafiemālie mo e melino.” Naʻe pehē ʻe Palesiteni Nalesoni, “Koeʻuhí kuo hanga ʻe he Fakamoʻuí ʻi Heʻene Fakalelei taʻefakangatangatá ʻo huhuʻi kitautolu mei he vaivaí, fehalāakí, mo e angahalá, pea koeʻuhí naʻá Ne aʻusia ʻa e mamahí, loto-hohaʻá mo e mafasia kotoa pē kuó ke maʻú, pea ʻo ka ke fakatomala moʻoni mo kolea ʻEne tokoní, te ke lava ʻo ikuʻi e māmani fakatuʻutāmakí ni.”⁷ Ko e fiemālie ia ʻoku ʻomi ʻe Sīsū Kalaisi maʻatautolú!

Tau fakakaukau pē ʻoku tau takitaha haʻamo ha kato. Mahalo pē ko ha kato ʻoku fakapalanisi ʻi ho ʻulú pe ko ha kiʻi tangai pe kofukofu ʻoku haʻi ʻaki ha tupenu pea lī ki ho umá. Ka ʻi heʻetau fakakaukaú, tau ui ia ko ha kato.

Ko e kato ko ʻení ʻoku tau fakakaukau ki aí ko e feituʻu ia ʻoku tau faʻo ai ʻa e ngaahi kavenga fakamafasia ʻo e moʻui ʻi ha māmani hinga. ʻOku hangē ʻetau ngaahi mafasiá ha ngaahi foʻi maka ʻi he loto kató. Ko e angamahení, ʻoku ʻi ai ha faʻahinga ʻe tolu:

• Ko ha ngaahi maka mei he ngaahi angafai pē ʻatautolu koeʻuhí ko e angahalá.

• Ko ha ngaahi maka ʻi heʻetau kató koeʻuhí ko e ngaahi fili taʻefakapotopoto, faihala, mo taʻeʻofa ʻa e niʻihi kehé.

• Pea ʻoku tau fuesia ha ngaahi maka koeʻuhí ʻoku tau moʻui ʻi ha tuʻunga hinga. ʻOku kau heni ʻa e ngaahi maka ʻo e mahamahakí, mamahí, mahaki tauhí, loto-mamahí, taʻelatá, mo e nunuʻa ʻo e ngaahi fakatamaki fakaenatulá.

ʻOku ou fakahā atu ʻi he fiefia ʻoku ʻikai fiemaʻu ia ke tau ongoʻi mafasia ʻi heʻetau ngaahi kavenga fakamatelié, ʻa e ngaahi maka ko ʻeni ʻi heʻetau kató.

ʻE lava ke fakamaʻamaʻa ʻe Sīsū Kalaisi ʻetau kavengá.

ʻE lava ke toʻo ʻe Sīsū Kalaisi ʻetau ngaahi mafasiá.

ʻOku ʻomi ʻe Sīsū Kalaisi ha founga ke tau tauʻatāina ai mei he mafatukituki ʻo e angahalá.

Ko Sīsū Kalaisi hotau Fakafiemālié.

Naʻá Ne folofola:

“Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu [ʻa ia ko e fakafiemālié mo e melinó].

“Toʻo ʻeku haʻamongá kiate kimoutolu, pea mou ako ʻiate au; he ʻoku ou angavaivai mo angamalū: pea te mou ʻilo ai ʻa e fiemālié ki homou laumālié.

“He ʻoku faingofua pē ʻeku haʻamongá, pea ʻoku maʻamaʻa ʻeku kavengá.”⁸

ʻOku ʻomi ʻe he foʻi fakakaukau ʻoku faingofua pē ʻa e haʻamongá pea maʻamaʻa ʻa e kavengá he ʻoku tau fua fakataha ʻa e haʻamongá mo e Fakamoʻuí, ʻoku tau vahevahe ʻetau ngaahi mafasiá mo Ia, pea ʻoku tau tuku Ia ke Ne toʻo atu ʻetau kavengá. ʻOku ʻuhinga ia ke hū ki ha vā fetuʻutaki fuakava mo e ʻOtuá mo tauhi ʻa e fuakava ko iá, ʻo hangē ko hono fakamatalaʻi ʻe Palesiteni Nalesoní, “te ne ʻai ke faingofua ange e meʻa kotoa ʻo e moʻuí.” Naʻá ne pehē, “ʻoku ʻuhinga hoʻo ngāue fakataha mo e Fakamoʻuí ke ke maʻu faingamālie ki Hono iví mo e mālohi huhuʻí.”⁹

Ko e hā leva ʻoku tau pikitai ai ki he ngaahi maka ʻoku tau maʻú? Ko e hā ka fakafisi ai ha taha teka peisipolo kuo ongosia ke mavahe mei he faiʻanga teká kuo ʻosi mateuteu atu ha tokotaha fetongi ke ne fakakakato ʻa e vaʻingá? Ko e hā kau ka vilitaki ai ke tuʻu maʻu tokotaha ʻi hoku tuʻungá kuo ʻosi maau mai ha Fetongi ke ma ikuna fakatahá?

Kuo akoʻi ʻe Palesiteni Nalesoni, “ʻOku tuʻu [ʻa Sīsū Kalaisi ʻo] … mafao mai Hono toʻukupú, ʻo ʻamanaki mo fie fakamoʻui, fakamolemoleʻi, fakamaʻa, fakaivia, fakahaohaoaʻi, pea mo fakamāʻoniʻoniʻi kitautolu.”¹⁰

Ko e hā leva ʻoku tau vilitaki ai ke fuesia toko taha hotau ngaahi faingataʻaʻiá?

ʻOku fakataumuʻa ia ko ha fehuʻi fakataautaha, ke mou takitaha fakakaukau ki ai.

Kiate aú, ko e angahala motuʻa taha ia ʻo e hīkisiá. ʻOku tau pehē, “Te u lavaʻi pē ʻe au.” “ʻOua ʻe hohaʻa ki ha meʻa; Te u lavaʻi pē ʻe au.” Ko e tokotaha olopoto lahí ʻokú ne fiemaʻu au ke u toitoi mei he ʻOtuá, ke u tafoki meiate Ia, ke u fakahoko toko taha pē iá.

ʻE kāinga, he ʻikai ke u lava ʻo fakahoko toko taha ia, pea ʻoku ʻikai fiemaʻu ia ke u fakahoko toko taha, pea he ʻikai ke u fai ia. ʻI heʻeku fili ke haʻisia ki hoku Fakamoʻui ko Sīsū Kalaisí, ʻo fakafou ʻi he ngaahi fuakava kuó u fai mo e ʻOtuá, “ʻoku ou faʻa fai ʻa e ngaahi meʻa kotoa pē ʻia Kalaisi ʻokú ne fakamālohiʻi aú.”¹¹

ʻOku tāpuekina ʻa e kau tauhi fuakavá ʻaki ʻa e fakafiemālie ʻa e Fakamoʻuí.

Fakakaukau ki he sīpinga ko ʻeni ʻi he Tohi ʻa Molomoná: Naʻe fakatangaʻi ʻa e kakai ʻo ʻAlamaá ʻaki ha “ngaahi ngāue kiate kinautolu, mo fokotuʻu ha kau pule ngāue [kiate] … kinautolu.”¹² Naʻe tapui ke nau lotu ʻaki honau leʻó, “naʻa nau fakahā hake honau lotó [ki he ʻOtuá]; pea naʻá ne ʻafioʻi ʻa e ngaahi fakakaukau ʻa honau lotó.”¹³

Pea “naʻe ongo mai ʻa e leʻo ʻo e ʻEikí kiate kinautolu ʻi heʻenau ngaahi faingataʻaʻiá, ʻo folofola: Hanga hake homou ʻulú pea fiemālie, he ʻoku ou ʻiloʻi ʻa e fuakava kuo mou fai kiate aú; pea te u fuakava mo hoku kakaí pea fakahaofi ʻa kinautolu mei he nofo pōpulá.

“Pea te u fakamaʻamaʻa foki ʻa e ngaahi kavenga kuo hilifaki ki homou ngaahi umá, ke ʻoua naʻa mou ongoʻi ia ʻi homou tuʻá.”¹⁴

Pea naʻe “fakamaʻamaʻa” ʻenau ngaahi kavengá, pea naʻe “fakamālohi ʻa kinautolu ʻe he ʻEikí koeʻuhi ke nau lava ʻo fua faingofua ʻa ʻenau ngaahi kavengá, pea nau fakaongoongo ʻi he fiefia mo e faʻa kātaki ki he finangalo kotoa pē ʻo e ʻEikí.”¹⁵

Naʻe maʻu ʻe he kau tauhi fuakava ko iá ha nonga ʻi he fakafiemālie, naʻe tupulaki ʻenau faʻa kātakí mo e fiefiá, pea fakamaʻamaʻa ʻenau ngaahi kavengá koeʻuhí ke nau ongoʻi fiemālie, pea iku ʻo fakahaofi kinautolu.¹⁶

Tau foki he taimí ni ki heʻetau kató.

Ko e fakatomala ʻo fakafou ʻi he Fakalelei ʻa Sīsū Kalaisí ʻokú ne fakafiemālieʻi kitautolu mei he mafatukituki ʻo e ngaahi maka ʻo e angahalá. Pea ʻi he meʻa-foaki fungani ko ʻeni ʻo e ʻaloʻofa ʻa e ʻOtuá, ʻokú ne fakafiemālieʻi kitautolu mei he mamafa mo e ngaahi fiemaʻu mātuʻaki faingataʻa ʻo e fakamaau totonú.¹⁷

ʻOku ʻai foki ʻe he Fakalelei ʻa Sīsū Kalaisí ke tau lava ʻo maʻu ʻa e mālohi ke fakamolemolé, ʻa ia ʻokú ne fakaʻatā kitautolu ke vete atu ʻa e mafasia ʻoku tau fuesia koeʻuhí ko e ngaohikovia mei he niʻihi kehé.¹⁸

ʻOku fakafiemālieʻi fēfē nai kitautolu ʻe he Fakamoʻuí mei he ngaahi kavenga fakamafasia ʻo e moʻui ʻi ha māmani hinga mo ha sino fakamatelie ʻoku moʻulaloa ki he mamahí mo e faingataʻá?

ʻOkú Ne faʻa fakahoko ʻa e faʻahinga fakafiemālie ko iá ʻo fakafou ʻiate kitautolu! ʻI heʻetau hoko ko e kāingalotu fuakava ʻo Hono Siasí, ʻoku tau palōmesi ai “ke tangi fakataha mo kinautolu ʻoku tangí” pea “fakafiemālieʻi ʻa kinautolu ʻoku ʻaonga ki ai ʻa e fakafiemālié.”¹⁹ Koeʻuhí kuo tau “hū ki he lotoʻā sipi ʻo e ʻOtuá” pea “ui ʻa kitautolu ko hono kakai” ʻoku tau “loto ke fefuaʻaki ʻa [ʻetau] ngaahi kavengá, koeʻuhí ke nau maʻamaʻa.”²⁰

Ko hotau tāpuaki fakafuakavá ke ngāue fakataha mo Sīsū Kalaisi ʻi hono fai ha fakafiemālie, fakatuʻasino mo fakalaumālie fakatouʻosi, ki he fānau kotoa ʻa e ʻOtuá. ʻOku tau hoko ko ha founga ʻokú Ne ʻomi ai ʻa e fakafiemālié.²¹

Pea hangē ko e ngaahi kaungāmeʻa ʻo e tangata mahaki teté, ʻoku tau “tokoniʻi ʻa e vaivaí, hiki hake ʻa e ngaahi nima ʻoku tautau ki laló, pea fakamālohi ʻa e ngaahi tui ʻoku vaivaí.”²² ʻOku tau “fefuaʻaki [ʻetau] kavengá pea fakamoʻoni ai ki he fono ʻa Kalaisí.”²³ ʻI heʻetau fai iá, ʻoku tau ʻiloʻi ai Ia, hoko ʻo hangē ko Iá, pea maʻu ʻEne fakafiemālié.²⁴

Ko e hā ʻa e fakafiemālie?

Ko hano toʻo pe fakamaʻamaʻa ia ʻo ha meʻa ʻoku fakamamahi, faingataʻa, pe fakamafasia, pe ko e mālohi ke kātekina iá. ʻOku ʻuhinga ia ki ha taha ʻokú ne fetongi ha taha kehe. Ko e fakatonutonu fakalao ia ʻo ha fehalaaki.²⁵ Ko e haʻu ʻa e foʻi lea faka-Falaniseé mei he lea faka-Falanisē motuʻá, ko e foʻi lea relever, pe “ke hiki haké,” pea mei he faka-Latina ko e relevare, pe “toe fokotuʻu haké.”²⁶

Kāinga, ko Sīsū Kalaisi ʻa e fakafiemālié. ʻOku ou fakamoʻoni naʻá Ne toe tuʻu ʻi he ʻaho hono tolú, pea ʻi Heʻene fakakakato ʻa e Fakalelei ʻofa mo taʻefakangatangatá, ʻoku tuʻu mafao mai Hono toʻukupú, ʻo foaki mai ʻa e faingamālie ke tau toe tuʻu hake, ʻo fakamoʻui mo hakeakiʻi kitautolu pea hoko ʻo hangē ko Iá. ʻOku taʻengata ʻa e fiemālie ʻokú Ne foaki maʻatautolú.

Hangē ko e kau fafine naʻe ʻaʻahi kiate kinautolu ʻa e ʻāngeló ʻi he fuofua pongipongi Toetuʻu ko iá, ʻoku ou fakaʻamu ke tau “ō ke vave” pea ʻi he “fiefia lahi” ke talaki ʻa e ongoongo kuó Ne toe tuʻú.²⁷ ʻI he huafa ʻo hotau Fakamoʻui ko Sīsū Kalaisí, ʻēmeni.