Ko Sīsū Kalaisi Maʻu Pē ʻa e Talí

Siʻoku kāinga ʻofeina, kuo fafangaʻi fakalaumālie kitautolu lolotonga ʻa e ongo ʻaho ko ʻení. Naʻe fakaʻofoʻofa e hiva ʻa e kuaeá. Kuo hoko ʻa kinautolu naʻe leá ko e ngaahi meʻangāue ʻa e ʻEikí. ʻOku ou lotua te mou fekumi ki he Laumālie Māʻoniʻoní ke tataki kimoutolu ʻi hoʻomou akó ʻi hoʻomou fakakaukauloto ki he ngaahi moʻoni naʻe akoʻi atu mei he tuʻunga malangá ni. Kuo ueʻi fakalangi moʻoni pē kinautolu.

Ko e Sāpate Toetuʻú ʻi ha uike ʻe taha mei heni. ʻOku hoko ia ko e ouau fakalotu mahuʻinga taha ki he kau muimui ʻo Sīsū Kalaisí. Ko e tefitoʻi ʻuhinga ʻoku tau fakamanatua ai ʻa e Kilisimasí koeʻuhí ko e Toetuʻú. ʻE ueʻi koe ʻe he lēsoni Haʻu, ʻo Muimui ʻIate Au ʻi he uike ní ke ke ako a e hū lāngilangiʻia ʻa e Fakamoʻuí ki Selusalemá, ko ʻEne fakamaʻa ʻa e temipalé, ko ʻEne mamahi ʻi he Ngoue ko Ketisemaní, ko Hono Tutukí, ko ʻEne Toetuʻu nāunauʻiá, mo ʻEne hā kimui ange ki Hono kau muimuí.¹

Mataʻikoloa ʻaki ʻa e ngaahi veesi toputapú ni pea kumi ʻa e founga kotoa te ke lava ʻo fakamālō ai ki heʻetau Tamai Hēvaní ʻi hono tuku mai Hono ʻAlo Pē Taha Naʻe Fakatupú.² ʻOku tau lava ʻo fakatomala pea fakamolemoleʻi kitautolu mei heʻetau ngaahi angahalá koeʻuhí ko Sīsū Kalaisi. Te tau toetuʻu kotoa pē koeʻuhí ko Ia.

ʻOku ou fakaafeʻi foki kimoutolu ke toe ako ʻa e fakamatala ʻo e hā ʻa e Fakamoʻuí ki he kakai Nīfaí ʻi he ongo ʻAmeliká, ʻo hangē ko ia ʻoku lekooti ʻi he 3 Nīfaí. ʻI ha taimi nounou kimuʻa ʻi Heʻene hā ko iá, naʻe ongona Hono leʻó ʻi he lotolotonga ʻo e kakaí, kau ai ʻa e ngaahi lea tautapa ko ʻení:

“He ʻikai koā te mou tafoki mai ʻeni kiate au, pea fakatomala mei hoʻomou ngaahi angahalá, ʻo liliu, koeʻuhí ke u fakamoʻui ʻa kimoutolu?

“… Vakai, ʻoku mafao atu hoku nima ʻo e ʻaloʻofá kiate kimoutolu, pea ko ia ia ʻe haʻú, te u maʻu ia.”³

ʻE kāinga, ʻoku fakahoko mai ʻe Sīsū Kalaisi ʻa e fakaafe tatau kiate kimoutolu ʻi he ʻahó ni. ʻOku ou kōlenga atu ke mou haʻu kiate Ia ke Ne lava ʻo fakamoʻui ʻa kimoutolu! Te Ne fakamoʻui ʻa kimoutolu mei he angahalá ʻi hoʻomou fakatomalá. Te Ne fakamoʻui ʻa kimoutolu mei he loto-mamahí mo e ilifiá. Te Ne fakamoʻui ʻa kimoutolu mei he ngaahi kafo ʻo e māmani ko ʻení.

Ko e hā pē haʻamou ngaahi fehuʻi pe palopalema, ʻoku maʻu maʻu pē ʻa e talí ʻi he moʻui mo e ngaahi akonaki ʻa Sīsū Kalaisí. Ako lahi ange fekauʻaki mo ʻEne Fakaleleí, ʻEne ʻofá, ʻEne ʻaloʻofá, ʻEne tokāteliné, mo ʻEne ongoongolelei ʻo e faifakamoʻuí mo e fakalakalaká kuo fakafoki maí. Tafoki kiate Ia! Muimui ʻiate Ia!

Ko Sīsū Kalaisi ʻa e ʻuhinga ʻoku tau langa ai ʻa e ngaahi temipalé. Ko Hono fale māʻoniʻoní ia. ʻI hono fakahoko ʻo e ngaahi fuakavá mo maʻu ʻa e ngaahi ouau mahuʻinga ʻi he temipalé, pehē ki he fekumi ke ofi ange kiate Ia ʻi aí, ʻe tāpuekina hoʻomou moʻuí ʻi ha ngaahi founga he ʻikai lava ʻi ha toe sīpinga moihū kehe. ʻI he ʻuhingá ni, ʻoku tau fakahoko ai ʻa e meʻa kotoa ʻoku tau lavá ke fakaʻatā ange ʻa e ngaahi tāpuaki ʻo e temipalé ki hotau kau mēmipa ʻi he funga ʻo e māmaní. ʻOku ou houngaʻia ʻi he ʻahó ni ke fakahoko atu ʻetau palani ke langa ha temipale foʻou ʻi he ngaahi feituʻu ko ʻení:

• Retalhuleu, Guatemala

• Iquitos, Peru

• Teresina, Brazil

• Natal, Brazil

• Tuguegarao City, Philippines

• Iloilo, Philippines

• Jakarta, Indonesia

• Hamburg, Germany

• Lethbridge, Alberta, Canada

• San Jose, California

• Bakersfield, California

• Springfield, Missouri

• Charlotte, North Carolina

• Winchester, Virginia

• Harrisburg, Pennsylvania

Siʻoku kāinga ʻofeina, ʻoku ou fakamoʻoni ʻoku tataki ʻe Sīsū Kalaisi ʻa e ngaahi meʻa ʻo Hono Siasí. ʻOku ou fakamoʻoni ko e muimui kiate Iá ko e hala pē ia ki he fiefia ʻoku tuʻuloá. ʻOku ou ʻilo ʻoku taumalingi mai Hono mālohí ki Hono kakai tauhi fuakavá, kuo “fakamahafu ʻa kinautolu ʻaki ʻa e māʻoniʻoní pea mo e mālohi ʻo e ʻOtuá ʻi he fuʻu nāunau lahi.”⁴ Ko ʻeku fakamoʻoní ia, fakataha mo ʻeku ʻofá mo e tāpuakí kiate kimoutolu takitaha, ʻi he huafa toputapu ʻo Sīsū Kalaisí, ʻēmeni.