Ավելի մեծ ուրախություն

Դժվար է հավատալ, որ ընդամենը 120 տարի առաջ Ուիլբուր և Օրվիլ Ռայթերն առաջին անգամ վեր բարձրացան և թռան Հյուսիսային Կարոլինայի Քիթի Հավք ափամերձ քաղաքի ավազների վրայով: Չորս կարճ թռիչքները դեկտեմբերյան այդ օրը փոխեցին աշխարհը և իրականություն դարձրին աշխարհի պատմության ամենամեծ գյուտերից մեկը:

Այդ առաջին օրերին թռչելը վտանգավոր էր: Եղբայրները դա գիտեին։ Եվ նրանց հայրը՝ Միլթոնը, նույնպես գիտեր դա։ Իրականում, նա այնքան էր սարսափում իր երկու որդիներին ինքնաթիռի վթարի արդյունքում կորցնելուց, որ եղբայրները խոստացան, որ երբեք միասին չեն թռչի:

Եվ նրանք այդպես էլ վարվեցին, բացառությամբ մեկ դեպքի: Քիթի Հավք քաղաքի այդ պատմական օրվանից յոթ տարի անց Միլթոն Ռայթը վերջապես տվեց իր համաձայնությունը և դիտեց, թե ինչպես են Ուիլբուրն ու Օրվիլն առաջին անգամ միասին թռչում: Վայրէջքից հետո Օրվիլն իր հորը համոզեց կատարել իր առաջին և միակ թռիչքը և անձամբ զգալ, թե ինչպիսին է այն:

Երբ ինքնաթիռը բարձրացավ գետնից, 82-ամյա Միլթոնն այնքան տարվեց թռիչքով, որ վախը լիովին լքեց նրան: Օրվիլը ցնծում էր, երբ հայրը ուրախությամբ բղավում էր. «Վեր, Օրվիլ, ավելի վեր»:²

Այդ մարդը ինձ նման էր։

Գուցե ավիացիայի մասին երբեմն խոսելու պատճառն այն է, որ ես գիտեմ, թե ինչ էին զգում Ռայթ եղբայրները: Ես նույնպես «երկրի անբարեհաճ կապերը բաց եմ թողել և պարել երկնքում արծաթե ծիծաղկոտ թևերով»:³

Ռայթ եղբայրների առաջին թռիչքը, որը տեղի ունեցավ իմ ծնվելուց ընդամենը 37 տարի առաջ, բացեց արկածների, հրաշքների և ջինջ ուրախության դռներն իմ կյանքում:

Սակայն, որքան էլ զարմանալի է, այդ ուրախությունից բացի գոյություն ունի ուրախության ավելի մեծ տեսակ: Այսօր, ոգևորված Միլթոն Ռայթի հիացած բացականչությամբ, որն ասում էր «Վեր Օրվիլ, ավելի վեր», ես կցանկանայի խոսել այս ավելի մեծ ուրախության մասին․ որտեղից ենք ստանում այն, ինչպես է այն մտնում մեր սրտերը և ինչպես կարող ենք ավելի մեծ չափով զգալ այն:

Աներկբա փաստ է, որ բոլոր մարդիկ ցանկանում են երջանիկ լինել։⁴ Սակայն, նաև աներկբա փաստ է, որ ոչ բոլորն են երջանիկ։ Ցավոք սրտի, շատերին թվում է, թե երջանկությունը դժվար է գտնել:⁵

Ինչո՞ւ է այդպես։ Եթե երջանկությունը այն միակ բանն է, ինչ մենք՝ մարդիկ, ամենաշատն ենք ցանկանում, ինչո՞ւ ենք մենք այդքան անհաջող այն գտնելու հարցում: Հայտնի երգի բառերը փոխելով կստանանք․ գուցե մենք ուրախություն էինք փնտրում սխալ վայրերում:⁶

Մինչ կքննարկենք, թե ինչպես գտնել ուրախություն, թույլ տվեք ինձ ընդունել, որ դեպրեսիան և այլ դժվարին մտավոր և հուզական մարտահրավերները իրական են, և ես չեմ փորձում պարզապես կոչ անել, որ «փորձեք ավելի երջանիկ լինել»։ Այսօր իմ նպատակը հոգեկան առողջության խնդիրները նվազագույնի հասցնելը կամ այն պարզեցնելը չէ: Եթե դուք բախվում եք նման մարտահրավերների, ես ցավում եմ ձեզ համար և կանգնած եմ ձեր կողքին: Որոշ մարդկանց համար ուրախություն գտնելը կարող է ներառել օգնություն փնտրել հոգեկան առողջության վերապատրաստված մասնագետներից, ովքեր իրենց կյանքը նվիրել են այդ շատ կարևոր արվեստը կիրառելուն: Մենք պետք է շնորհակալ լինենք նման օգնության համար։

Կյանքում միշտ չէ, որ ապրում ենք զգացմունքային բարձր պահեր: «Քանզի, անպայման պետք է, որ հակադրություն լինի բոլոր բաներում»:⁷ Եվ եթե Աստված նույնպես լալիս է, ինչպես հաստատում են սուրբ գրությունները,⁸ ապա, իհարկե, ես և դուք նույնպես լաց կլինենք: Տխուր լինելը ձախողման նշան չէ։ Գոնե այս կյանքում, ուրախությունն ու վիշտն անբաժան ուղեկիցներ են։⁹ Ինչպես բոլորդ, ես նույնպես ունեցել եմ հիասթափության, վշտի, տխրության ու զղջման իմ բաժինը։

Սակայն, ես նույնպես տեսել եմ այն փառահեղ արշալույսը, որն այնքան շատ է ուրախությամբ լցնում հոգին, երբ դժվար է այլևս պահել այն ներսում: Ես հասկացել եմ, որ այս խաղաղ վստահությունը գալիս է Փրկչին հետևելուց և Նրա ճանապարհով քայլելուց:

Խաղաղությունը, որը Նա տալիս է մեզ, նման չէ նրան, ինչ տալիս է աշխարհը:¹⁰ Այն ավելի լավն է։ Այն ավելի բարձր է և ավելի սուրբ: Հիսուսն ասել է․ «Ես եկա, որ [նրանք] կյանք ունենան և առատ կյանք»։¹¹

Հիսուս Քրիստոսի ավետարանը իսկապես «մեծ ուրախության ավետիքն է»:¹² Դա անզուգական հույսի ուղերձ է: Լուծը կրելու և բեռը բարձրացնելու ուղերձ է։¹³ Աստվածային լույսը շատացնելու ուղերձ է։ Երկնային բարեհաճության, բարձր հասկացողության, ավելի մեծ ուխտերի, հավերժական ապահովության և հավիտենական փառքի ուղերձ է:

Ուրախությունը Իր զավակների համար Աստծո ծրագրի բուն նպատակն է: Դա այն է, ինչի համար մենք ստեղծվել ենք՝ «որ [մենք] ուրախություն ունենաք»:¹⁴ Դուք ստեղծվել եք դրա համար:

Մեր Երկնային Հայրը չի թաքցրել երջանկության ճանապարհը: Դա գաղտնիք չէ։ Այն հասանելի է բոլորին:¹⁵

Այն խոստացված է նրանց, ովքեր քայլում են աշակերտի կոչման ճանապարհով, հետևում են Փրկչի ուսմունքներին և օրինակին, պահում են Նրա պատվիրանները և հարգում են ուխտերը, որոնք կապում են Աստծո հետ: Ինչպիսի հրաշալի խոստում է:

Մենք բոլորս ճանաչում ենք մարդկանց, ովքեր ասում են, որ երջանիկ լինելու համար իրենց Աստված պետք չէ, որ իրենք բավականաչափ երջանիկ են առանց կրոնի:

Ես ընդունում եմ ու հարգում այդ զգացմունքները: Մեր սիրելի Երկնային Հայրը ցանկանում է, որ Իր բոլոր զավակները հնարավորինս շատ երջանկություն ստանան, ուստի Նա այս աշխարհը լցրել է գեղեցիկ, առողջարար, հաճելի ու բերկրալի բաներով «թե աչքը շոյելու և թե սիրտն ուրախացնելու համար»:¹⁶ Թռիչքը ինձ մեծ երջանկություն պարգևեց։ Մյուսները դա գտնում են երաժշտության, արվեստի, հոբբիների կամ բնության մեջ:

Հրավիրելով բոլորին և Փրկչի մեծ ուրախության ավետիքով կիսվելիս մենք չենք անտեսում ուրախության այս աղբյուրներից որևէ մեկը: Մենք պարզապես ասում ենք, որ Աստված ավելին կարող է պարգևել: Ավելի մեծ և խոր ուրախություն․ Աստված ավելի շատ բան ունի առաջարկելու. ուրախություն, որը գերազանցում է այն ամենը, ինչ առաջարկում է այս աշխարհը: Դա մի ուրախություն է, որ հաղթահարում է կսկիծը, կլանում է վիշտը և նվազեցնում միայնության զգացումը:

Ի տարբերություն դրա, աշխարհիկ ուրախությունը երկար չի տևում։ Այն չի կարող երկար տևել։ Երկրի վրա գտնվող բոլոր իրերը բնույթով ծերանում են, քայքայվում, մաշվում կամ հնանում: Բայց աստվածային ուրախությունը հավերժ է, քանի որ Աստված հավերժ է: Հիսուս Քրիստոսը եկավ մեզ վեր բարձրացնելու աշխարհիկից և ապականությունը փոխարինելու անապականությամբ: Միայն Նա ունի այդ զորությունը, և միայն Նրա ուրախությունն է հարատև:

Եթե զգում եք, որ ձեր կյանքում նման ուրախությունն ավելի շատ է, ես հրավիրում եմ ձեզ հետևել Հիսուս Քրիստոսին և ոտք դնել Նրա ուղու վրա: Այդ ճամփորդությունը ձգվում է ողջ կյանքի ընթացքում և դրանից հետո։ Խնդրում եմ, թույլ տվեք առաջարկել մի քանի սկզբնական քայլեր՝ անկեղծ ուրախությունը բացահայտելու այս արժանի ճամփորդության համար:

Հիշու՞մ եք Նոր Կտակարանի այն կնոջը, որը 12 տարի դիմացավ արյունահոսող հիվանդությանը:¹⁸ Նա իր ունեցածը ծախսել էր բժիշկների վրա, բայց ամեն ինչ միայն դեպի վատն էր գնացել: Նա լսել էր Հիսուսի մասին. Նրա բժշկելու զորությունը հայտնի էր: Բայց կարո՞ղ էր Նա բուժել իրեն: Բացի այդ, ինչպե՞ս կարող էր նա մոտենալ Հիսուսին: Նրա հիվանդությունը նրան «անմաքուր» դարձրեց Մովսեսի օրենքի համաձայն, և, հետևաբար, նրանից պահանջվեց հեռու մնալ ուրիշներից:¹⁹

Անթաքույց մոտենալ ու բժշկություն խնդրելը կարծես ահնար էր թվում։

Սակայն այդ կինը մտածեց․ «Եթե միայն նրա հագուստին դիպչեմ, կբժշկվեմ»։²⁰

Ի վերջո, նրա հավատքը հաղթեց վախին: Նա համարձակորեն առերեսվեց ուրիշների քննադատությանը և առաջ մղվեց դեպի Փրկիչը:

Ի վերջո, նա մոտեցավ Նրան։ Նա մեկնեց ձեռքը։

Եվ բժշկվեց:

Մի՞թե մենք բոլորս ինչ-որ իմաստով նման չենք այս կնոջը:

Կարող են լինել բազմաթիվ պատճառներ, թե ինչու ենք վարանում մոտենալ Փրկչին: Մենք կարող ենք ուրիշների կողմից ծաղրի կամ դատապարտման ենթարկվել։ Հպարտությունից ելնելով՝ կարող ենք մերժել այն փաստը, որ այդքան հասարակ արարքը կարող է այդքան արժեքավոր լինել։ Գուցե մտածենք, որ մեր հանգամանքները թույլ չեն տալիս, որ մենք ստանանք Նրա բժշկումը, որ հեռավորությունը չափազանց մեծ է, կամ մեր մեղքերը շատ են:

Այս կնոջ նման ես նույնպես սովորել եմ, որ եթե մոտենանք Աստծուն և ձեռք մեկնենք Նրան դիպչելու համար, մենք իսկապես կարող ենք բժշկություն, խաղաղություն և ուրախություն գտնել:

Հիսուսն ուսուցանել է. «Փնտրեք և կգտնեք»:²¹

Ես հավատում եմ, որ այս պարզ արտահայտությունը միայն հոգևոր խոստում չէ. դա փաստ է:

Եթե մենք պատճառներ փնտրենք զայրանալու, կասկածելու, դառնանալու կամ միայնակ լինելու համար, մենք դրանք կգտնենք:

Միևնույն ժամանակ, եթե մենք ուրախություն ենք փնտրում, եթե ուրախանալու և Փրկչին ուրախությամբ հետևելու պատճառներ ենք փնտրում, մենք կգտնենք դրանք:

Մենք հազվադեպ ենք գտնում մի բան, որը չենք փնտրում:

Դուք ուրախությո՞ւն եք փնտրում:

Որոնեցեք և կգտնեք:

Հիսուսն ուսուցանել է․ «Ավելի երանելի է տալը, քան առնելը»։²³

Կարո՞ղ է այնպես լինել, որ ուրախության մեր փնտրտուքի մեջ այն գտնելու լավագույն միջոցը ուրիշներին ուրախություն պատճառելն է:

Եղբայրներ և քույրեր, ես և դուք գիտենք, որ դա այդպես է։ Ուրախությունը նման է մի սափոր ալյուրի կամ մի կճուճ ձեթի, որը երբեք չի վերջանա:²⁴ Ճշմարիտ ուրախությունը բազմապատկվում է, երբ նրանով կիսվում ենք:

Դրա համար մեծ կամ որևէ բարդ բան չի պահանջվում:

Մենք կարող ենք պարզ բաներ անել։

Օրինակ՝ որևէ մեկի համար անկեղծ սրտով աղոթել։

Անկեղծ հաճոյախոսություն անել:

Օգնել ինչ-որ մեկին իրեն ընդունված, հարգված, գնահատված և սիրված զգալ:

Կիսվել սիրելի հատվածով և մտքերով, թե ինչ է դա մեզ համար նշանակում:

Կամ նույնիսկ պարզապես լսել:

«Երբ դուք ձեր մերձավորների ծառայության մեջ եք, դուք սոսկ ձեր Աստծո ծառայության մեջ եք»,²⁵ և Աստված առատաձեռնորեն կհատուցի ձեր բարությունը:²⁶ Ուրախությունը, որը դուք տալիս եք ուրիշներին, կվերադառնա ձեզ «կլցվի լավ չափով՝ լեփ-լեցուն, առատ»։²⁷

Առաջիկա օրերի, շաբաթների և ամիսների ընթացքում թույլ տվեք ձեզ հրավիրել՝

• Ժամանակ տրամադրեք՝ անկեղծ և սրտանց ջանքերով Աստծուն մոտենալու համար:

• Ջանասիրաբար փնտրեք հույսի, խաղաղության և ուրախության ամենօրյա պահերը:

• Ուրախություն պարգևեք ձեր շրջապատի մարդկանց:

Իմ սիրելի եղբայրներ և քույրեր, սիրելի ընկերներ, եթե փնտրեք Աստծո խոսքը, որպեսզի ավելի լավ հասկանաք Աստծո հավերժական ծրագիրը, ընդունեք այս հրավերները և ձգտեք քայլել Նրա ուղիով, ապա դուք կզգաք «Աստծո խաղաղությունը, որը ամեն հասկացողությունից վեր է»,²⁹ նույնիսկ, երբ վշտահար լինեք։ Դուք կզգաք, որ Աստծո անգերազանցելի սերն ավելի է աճում ձեր սրտում: Երկնային լույսի արշալույսը լույս կսփռի ձեր փորձությունների ստվերների վրա, և դուք կսկսեք ճաշակել երկնքի անտեսանելի, կատարյալ և անասելի փառքներն ու հրաշքները: Դուք կզգաք, թե ինչպես է ձեր հոգին բարձրանում այս աշխարհի ձգողականությունից վեր:

Եվ բարի Միլթոն Ռայթի նման, միգուցե դուք բարձրացնեք ձեր ձայնը և ուրախությունից բղավեք. «Վեր Հայր, ավելի վեր»։

Թող որ մենք բոլորս փնտրենք և գտնենք այդ ավելի մեծ ուրախությունը, որը կստանանք, երբ մեր կյանքը նվիրաբերենք մեր Երկնային Հորը և Նրա Սիրելի Որդուն: Սա իմ անկեղծ աղոթքն ու օրհնությունն է, Հիսուս Քրիստոսի անունով, ամեն: