Տաճարները՝ Տիրոջ տները, լցնում են Երկիրը

Տերը նախազգուշացրել է, որ վերջին օրերում ազգերի մեջ աղետներ են լինելու,⁴ «մարդիկ կլինեն եսասեր»,⁵ «բոլոր բաները կլինեն խառնաշփոթության մեջ»,⁶ խռովությունները կշատանան⁷ և «մարդկանց սրտերը կնվաղեն»։⁸ Մենք, անշուշտ, տեսել ենք, թե ինչպես են տղամարդկանց և կանանց սրտերը նվաղում. աշխարհի գայթակղությունները, գրավիչ ձայների շեղումը, հոգևոր սննդի անտեսումը, աշակերտության պահանջներից հոգնածությունը։⁹ Հավանաբար, դուք տխրել եք, երբ տեսել եք մեկին, ում սիրում եք, ով մի ժամանակ անկեղծորեն խոսել է Հիսուս Քրիստոսի հանդեպ իր հավատքի մասին, վկայել Մորմոնի Գրքի մասին և որոշել է օգնել կառուցել Աստծո արքայությունը, բայց այժմ, առնվազն ժամանակավորապես, հեռացել է իր համոզմունքներից և դարձել Եկեղեցում քիչ ակտիվ։ Իմ խորհուրդն է ձեզ՝ մի հուսահատվեք։ Լավ է ամեն բան։ Աստծու համար ոչ մի անկարելի բան չկա։¹⁰

Տերը խոստացել է, որ աշխարհի այս մարգարեացված խառնաշփոթի և անհավատության մեջ ուխտյալ ժողովուրդ կհայտնվի, ժողովուրդ, որ անհամբեր սպասում է Նրա վերադարձին. մի ժողովուրդ, որ կանգնած է սուրբ վայրերում և չի շարժվում իր տեղից։¹¹ Նա խոսել է արդար ժողովրդի մասին, որ դիմադրում է հակառակորդի խաբեությանը, զարգացնում հավատք, սելեստիալ մտածելակերպ և լիովին վստահում Փրկչին՝ Հիսուս Քրիստոսին։

Ինչո՞ւ է Տերն այժմ Իր հարյուրավոր տաճարները մեզ ավելի մոտեցնում։ Պատճառներից մեկն այն է, որ աշխարհի իրարանցման և գայթակղությունների մեջ Նա խոստացել է զորացնել և օրհնել Իր ուխտյալ Սրբերին, և Նրա խոստումները կատարվում են։

Ինչպե՞ս են այս սուրբ տները ամրացնում, մխիթարում և պաշտպանում մեզ։ Մենք պատասխանը գտնում ենք Կիրթլենդի տաճարի նվիրագործման ժամանակ Մարգարե Ջոզեֆ Սմիթի աղոթքում։ Այս տաճարում էր, որ Սրբերը երգեցին. «Երկնային զորքի հետ պիտ բարձր երգենք մենք»։¹² Փրկիչն Ինքը հայտնվեց, և հնօրյա մարգարեները վերադարձան՝ շնորհելով լրացուցիչ քահանայության բանալիներ՝ ավետարանի վերականգնման համար։¹³

Այդ սուրբ առիթով Կիրթլենդի Տաճարում մարգարեն աղոթեց, որ Տիրոջ սուրբ տանը Սրբերը զինվեն Աստծո զորությամբ, որ Հիսուս Քրիստոսի անունը լինի նրանց վրա, որ Նրա հրեշտակները պահեն նրանց, և որ նրանք աճեն Տիրոջ մեջ և ստանան Սուրբ Հոգու լիությունը։¹⁴ Այս հզոր աղերսը կատարվում է մեր կյանքում, երբ մենք հավատարմությամբ երկրպագում ենք Տիրոջ տանը։

Նրա տանը մենք բառացիորեն օժտվում ենք երկնային զորությամբ։¹⁵ Մեր հավատքն առ Հիսուս Քրիստոս և մեր սերը Նրա հանդեպ հաստատվում և ամրացվում է։ Մենք հոգևորապես համոզված ենք մեր իրական ինքնության և կյանքի նպատակների մեջ։¹⁶ Երբ հավատարիմ ենք լինում, մենք օրհնվում ենք պաշտպանված լինելու գայթակղություններից և շեղումներից։ Մենք զգում ենք մեր Փրկչի սերը, երբ Նա բարձրացնում է մեզ մեր դժվարություններից և մեր վշտերից։ Մենք զինվել ենք Աստծո զորությամբ։

Նրա սուրբ տանը մենք Նրա անունը ավելի լիարժեքորեն ենք վերցնում մեզ վրա։ Երբ մենք մկրտվում ենք, արտահայտում ենք մեր հավատքը Նրա հանդեպ և Նրա պատվիրանները պահելու մեր պատրաստակամությունը։ Տաճարում մենք սրբորեն խոստանում ենք մեր ուխտերի միջոցով ընդմիշտ հետևել Նրան։

Նկար

Ներկայացնում են Հեբերի (Յուտա) տաճարը

Այս Եկեղեցու երիտասարդությունը անհավանական է։ Այս բարդ աշխարհում նրանք իրենց վրա են վերցնում Քրիստոսի անունը։ Հեբեր Սիթիում (Յուտա) տեղի ունեցավ հանրային ժողով՝ քննարկելու տաճարի շինարարության մանրամասները։ Երեք հարյուր երիտասարդներ լցվեցին հարակից այգին՝ ցույց տալու իրենց աջակցությունը հայտարարված տաճարին։ Մի երիտասարդ տղա, խոսելով կառավարության ղեկավարների հետ բաց հրապարակում, խիզախորեն բացատրեց. «Ես հույս ունեմ, որ կամուսնանամ այս տաճարում։ [Տաճարը կօգնի], որ ինքս ինձ մաքուր և անբիծ պահեմ»։ Մեկ ուրիշը տաճարը նկարագրեց որպես լույսի և հույսի խորհրդանիշ։ Եկեղեցու երիտասարդ տղամարդիկ և կանայք ամբողջ աշխարհում ընդունում են Հիսուս Քրիստոսի անունը։¹⁷

Նկար

Երիտասարդների բազմությունը հեղեղում է Հեբեր Սիթիի այգին

Կիրթլենդի Տաճարում Մարգարե Ջոզեֆն աղոթեց, որ «հրեշտակները պահպանեն [Իր Սրբերին]»։¹⁸ Կանոնավոր կերպով տաճարում մեր նախնիների համար արարողություններ կատարելը բերում է քաղցր և վստահ հաստատում, որ կյանքը շարունակվում է վարագույրից այն կողմ։

Չնայած Տիրոջ տանը մեր ունեցած փորձառություններից շատերը չափազանց սուրբ են հրապարակայնորեն կիսվելու համար, բայց մի քանիսով մենք կարող ենք կիսվել։ Քառասուն տարի առաջ, երբ ապրում էինք Ֆլորիդայում, Քեթին և ես ճամփորդեցինք դեպի Ատլանտա Ջորջիա տաճարը։ Չորեքշաբթի երեկոյան՝ 1984 թ. մայիսի 9-ին, երբ մենք ավարտեցինք տաճարի նիստը, արարողություններ կատարող աշխատողներից մեկը մոտեցավ ինձ և հարցրեց, թե արդյոք ժամանակ ունեմ կատարելու միայն մեկ նախապատրաստական արարողություն։ Իմ ներկայացրած անձի անունը անսովոր էր։ Նրա անունը Էլիզեր Սերսի էր։

Հաջորդ օրը տաճարը լի էր Սրբերով։ Երբ պատրաստվում էի կատարել օրվա մեջ իմ երկրորդ օժտումը, ինձ տրվեց այն անձի անունը, որին ես պետք է ներկայացնեի։ Զարմանալիորեն, դա նախորդ երեկոյի նույն անունն էր՝ Էլիզեր Սերսի։ Ես զգացի Տիրոջ Հոգին, երբ օժտումն ավարտվեց։ Ավելի ուշ՝ կեսօրին, մինչ տաճարում էինք, Քեթին տեսավ ընտանիքի տարեց ընկերոջը՝ Քույր Դոլլի Ֆերնանդեսին, որն այժմ ապրում էր Ատլանտայում։ Չունենալով իր ընտանիքի արական սեռի անդամներ իր հետ, նա հարցրեց, թե արդյոք ես կարող եմ օգնել իր հոր կնքմանը իր հոր ծնողների հետ։ Ինձ համար, իհարկե, պատիվ էր դա անելը։

Երբ ես ծնկի իջա զոհասեղանի վերջում այս սուրբ արարողության համար, ես մեկ անգամ ևս լսեցի այն անունը, որն այժմ գրված էր իմ մտքում՝ նրա հայրը Էլիզեր Սերսին էր։ Ես լիովին հավատում եմ, որ այս կյանքից հետո ես կհանդիպեմ և կգրկեմ մի մարդու, որը հայտնի է եղել իր մահկանացու կյանքում որպես Էլիզեր Սերսի։

Տիրոջ տանը ունեցած մեր փորձառությունների մեծ մասը ավելի շատ բերում է ուրախություն, խաղաղություն և հայտնություն, քան դրամատիկ միջամտություն։ Բայց վստահ եղեք. հրեշտակներն իսկապես պահպանում են մեզ։

Սուրբ Հոգու պարգևը տրվում է մեզ, երբ մենք հաստատվում ենք որպես Եկեղեցու անդամ։ Ամեն շաբաթ, երբ մենք արժանիորեն ճաշակում ենք հացից և ջրից՝ ի հիշատակ մեր Փրկչի, մեզ խոստացվում է, որ Նրա Հոգին միշտ մեզ հետ կլինի։¹⁹ Երբ մենք պատրաստակամ սրտերով գալիս ենք Տիրոջ տուն՝ երկրի վրա ամենասուրբ վայրը, մենք աճում ենք Տիրոջ մեջ և «ստանում Սուրբ Հոգու լիությունը»։²⁰ Սուրբ Հոգու զորությամբ մենք լցվում ենք խաղաղությամբ և ուրախությամբ և անասելի հույսով։²¹ Մենք ուժ ենք ստանում՝ մնալու Նրա աշակերտները, նույնիսկ երբ հայտնվում ենք սուրբ վայրերից դուրս։

Նախագահ Ռասսել Մ. Նելսոնը հայտարարել է. «Մեր Փրկիչը և Քավիչը՝ Հիսուս Քրիստոսը, Իր հզորագույն գործերից մի քանիսը կկատարի ներկայիս և Իր երկրորդ գալուստի միջև ընկած ժամանակահատվածում։ Մենք կտեսնենք հրաշագործ նշաններ, որ Հայր Աստված և … Հիսուս Քրիստոսը նախագահում են այս Եկեղեցու վրա վեհությամբ և փառքով»։²² Երկիրը Տիրոջ տներով լցնելը հզոր աշխատանք է և հրաշալի նշան։²³

Իմ սիրելի ընկերներ, եթե մենք ի վիճակի ենք և դեռ չենք ավելացրել մեր այցելությունները տաճար, եկեք կանոնավորապես ավելի շատ ժամանակ գտնենք Տիրոջ տանը երկրպագելու համար։ Եկեք աղոթենք տաճարների համար, որոնք հայտարարվել են, որ տարածքները հնարավոր լինի գնել, որ կառավարությունները հաստատեն ծրագրերը, որ տաղանդավոր աշխատողները տեսնեն իրենց պարգևների մեծացումը, և որ սուրբ նվիրագործումները բերեն երկնային հավանությունը և հրեշտակների այցելությունը։

Տաճարը բառացիորեն Տիրոջ տունն է։ Ես խոստանում եմ ձեզ, երբ արժանիորեն և աղոթքով գաք Նրա սուրբ տունը, կզինվեք Նրա զորությամբ, Նրա անունը կլինի ձեր վրա, Նրա հրեշտակները կպահպանեն ձեզ, և դուք կաճեք Սուրբ Հոգու օրհնությամբ։

Տերը խոստացել է․ «Ամեն հոգի, որ թողնում է իր մեղքերը և գալիս է ինձ մոտ, և կանչում է իմ անունը, և հնազանդվում է իմ ձայնին, և պահում է իմ պատվիրանները, պիտի տեսնի իմ երեսը և իմանա, որ ես եմ»։²⁴ Քրիստոսի երեսը տեսնելու շատ տարբեր եղանակներ կան, և չկա ավելի լավ տեղ, քան Նրա սուրբ տանը։²⁵

Այս շփոթության և իրարանցման ժամանակներում ես վկայում եմ, որ տաճարը Նրա սուրբ տունն է և կօգնի պահպանել, պաշտպանել և պատրաստել մեզ այն փառավոր օրվան, երբ մեր Փրկիչը Իր բոլոր սուրբ հրեշտակների հետ կվերադառնա վեհությամբ, զորությամբ և մեծ փառքով։ Հիսուս Քրիստոսի անունով, ամեն։