Mus Lawm Tom Ntej

Kuv cov kwv tij thiab cov muam, kuv muaj kev zoo siab vim tuaj koom nej hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg lub Tuam Rooj Sab Laj thib 190 no. Kuv nyiam nrog nej sib koom ua ke hauv nej vaj tsev los sis qhov twg uas nej tab tom koom qhov no, yuav mloog cov yaj saub, cov neeg pom tau, thiab cov neeg qhia kev tshwm sim thiab lub Koom Txoos lwm cov thawj coj cov lus qhia.

Peb yeej zoo siab vim muaj tej txuj ci uas cia peb los sib sau ua ke thoob plaws ntiaj teb no los ua Yexus Khetos cov ntseeg. Lub tuam rooj sab laj lub Plaub Hlis Ntuj tas los no muaj neeg coob tshaj txhua zaus uas saib, thiab peb xav tias lub no kuj yuav muaj coob dua thiab.

Hauv ob peb hlis tas los no, tus phaum mob thoob ntiaj teb, tej qhov hluav taws, thiab lwm yam cua daj cuab dub tau ua rau lub ntiaj teb no muaj kev kub kev ntxhov. Kuv pab tu siab rau nej txhua tus uas tau xiam ib tug neeg uas nej hlub lub sij hawm no. Thiab kuv thov Vajtswv pab txhua tus uas raug txom nyem tam sim no.

Tab sis mas, tus Tswv txoj hauj lwm tseem mus lawm tom ntej. Txawm peb tau nyob sib nrug deb, looj daim npog qhov ncauj qhov ntswg, thiab sib ntsib hauv Zoom, peb twb kawm los ua tej hauj lwm sib txawv thiab nyaj ua tej yam zoo dua yav tas los lawm. Tej caij sib txawv li no coj tau nqi zog zoo los thiab.

Peb cov tub txib thiab cov thawj coj rau cov tub txib tau rau siab ntso, mob siab ua hauj lwm, thiab ua zoo kawg nkaus. Txawm cov tub txib sim nrhiav tej kev ua hauj lwm tshiab, ntau qhov chaw tshaj tawm txoj moo zoo qhia tias lawv qhia tib neeg coob tshaj yav tas los lawm.

Peb yuav tau kaw cov tuam tsev rau ib ntus, thiab tau laug sij hawm pib ua cov tsev tshiab, tiam sis tam sim no peb twb rov qab pib ua. Hauv xyoo 2020, peb tau pib ua 20 lub tuam tsev tshiab!

Tau ua tej hauj lwm nrhiav tsev neeg caj ceg ntau kawg nkaus. Tau tsim tej pawg ntseeg thiab ceg txheem ntseeg tshiab. Thiab peb zoo siab tshaj tawm hais tias lub Koom Txoos tau muab kev pab thoob ntiaj teb vim muaj tus phaum mob no rau 895 qhov kev pab hauv 150 lub teb chaws.

Tib neeg haj yam coob kawm txoj moo zoo hauv tsev thiab tau ntxiv zog rau zaj lus tim khawv thiab tej yim neeg haj yam sib raug zoo. Muaj ib leej niam sau tias: “Peb haj yam nrog peb cov me nyuam thiab cov me nyuam xeeb ntxwv sib raug zoo vim peb los sib sau ua ke hauv Zoom txhua txhua hnub Sunday. Txhua tus sib pauv los qhia lawv tej kev xav txog kev kawm vaj lug kub Los, Nrog Kuv Mus. Tej kev thov Vajtswv rau peb tsev neeg tau hloov hlo vim peb haj yam to taub tias sawv daws xav tau dab tsi.”

Kuv thov Vajtswv kom peb ib tsoom haiv neeg ntseeg no yuav siv lub sij hawm txawv txav no los loj hlob ntawm sab ntsuj plig. Peb nyob hauv ntiaj teb los raug kev sim siab, seb peb puas yuav xaiv los raws Yexus Khetos qab, ib sij hloov siab lees txim, kawm thiab loj hlob zoo. Peb tej ntsuj plig xav xav loj hlob. Thiab peb ua zoo tshaj thaum peb taug raws nraim li txoj kev sib khi lus.

Nyob hauv txhua yam no, peb Leej Txiv Saum Ntuj Ceeb Tsheej thiab Nws Tib Leeg Tub, Yexus Khetos, hlub peb sawv daws! Nkawd hmov tshua peb heev! Nkawd thiab Nkawd cov tim tswv dawb huv yeej saib xyuas peb. ¹ Kuv paub tias qhov no muaj tseeb.

Thaum peb sib sau ua ke mloog tus Tswv tej lus los ntawm Nws cov thawj coj, kuv caw nej los xav txog lo lus cog tseg uas tus Tswv cog tseg. Nws tshaj tawm hais tias “txhua tus uas xav tau yuav tuav tau Vajtswv txoj lus, uas muaj sia zees nyob thiab muaj hwj chim, uas yuav muab tag nrho tus dab phem tej kev dag ntxias thiab tej ntxiab thiab tej kev npaj ua phem faib hlo ua ob sab … thiab coj tus uas ntseeg Khetos nyob hauv txoj kev ti thiab nqaim.” ²

Kuv thov kom nej yuav xaiv los tuav raws Vajtswv txoj lus uas raug tshaj tawm hauv lub tuam rooj sab laj no. Thiab kuv thov kom nej yuav paub txog tus Tswv txoj kev hlub zoo tag nrho rau nej, ³ los ntawm Yexus Khetos lub npe dawb ceev, amees.