Kev Hloov Ua Neeg Zoo Li Nws
Tsuas yog peb muaj tus Cawm Seej txoj kev pab peb thiaj li yuav hloov los ua neeg zoo li Nws.
Txawm yog yus ua tib zoo kawm Yexus Khetos lub neej thiab txoj hauj lwm qhuab qhia, tus Cawm Seej cov lus hais kom peb ua neeg “zoo tib yam li Nws” 1 yeej yog ib qho nyuaj thiab ua rau peb xav tias peb ua tsis taus. Tej zaum nej zoo li kuv—nej paub txog tag nrho nej tej kev txog kev txhaum, nej thiaj li xav tias yuav txaus siab ntxiv yog nej taug ib txoj kev uas tsis ntxhab hlo li thiab tsis loj hlob tuaj. Peb xav tias, “Cov lus qhia no los yeej tsis muaj kuab thiab tso dag xwb,” thaum peb xaiv txoj kev uas tsis muaj dab tsi tab kaum, peb thiaj li tsis tas siv dag zog hlo li kom hloov peb tus kheej.
Tiam sis yuav ua li cas yog tias “zoo tib yam li [Nws]” tsis yog ib zaj lus piv txwv xwb, tsis hais nyob hauv lub neej no los yog? Yuav ua li cas yog tias qhov no yog ib qho peb ua tau hauv lub neej no thiab yog ib qho uas yuav tsum ua kom nrog Nws nyob? Yuav ua li cas yog tias “zoo tib yam li Nws” yeej yog qhov uas tus Cawm Seej hais ncaj xwb? Ces yuav ua li cas? Peb kam siv zog npaum li cas kom caw Nws lub hwj chim los rau hauv peb lub neej peb thiaj li yuav hloov tau peb tej cuj pwm?
Txwj Laug Neal A. Maxwell qhia tias: “Thaum peb xav txog Yexus cov lus txib kom hloov los ua neeg zoo tib yam li Nws, peb pom tias peb tsis tshua yog neeg phem, tiam sis peb yog neeg uas lam ua raws li Nws lub hom phiaj—qhov uas yog peb lub hom phiaj thiab! Peb qhuas Nws tiam sis tsis coj raws li Nws.” 2 Ib tug xib hwb hluas, Charles M. Sheldon, tau hais ib yam li no hais tias: “Peb nyiam Kev Ntseeg Khetos uas yooj yim thiab ua rau peb txaus siab peb thiaj li tsis kam ris ib yam hnyav xws li ib tug ntoo khaub lig.” 3
Muaj tseeb tiag, Nws txib peb txhua tus hloov los ua neeg zoo li Nws, ib yam li Yexus Khetos tau hloov los ua zoo li Leej Txiv. 4 Thaum peb vam meej, peb los ua neeg zoo tag nrho uas loj hlob tas lawm. 5 Tej lus qhia no tsis yog los ntawm ib lub koom txoos cov lus qhuab qhia tiam sis yog los ntawm tus Xib Hwb Nws tus Kheej. Peb yuav tsum nco txog qhov no thaum peb ua neej, sib tham nrog lwm tus thiab sib raug zoo. Tsis muaj lwm txoj kev kom kho tau tej kev tsis sib raug zoo los sis cov zej tsoom uas tsis sib haum tsuas yog thaum peb haj yam coj raws li tus Tub Vaj Ntxwv ntawm Kev Thaj Yeeb tus yam ntxwv. 6
Cia peb xav txog yuav ua li cas kom ua tib zoo txhob txwm hloov los ua neeg zoo li Nws los ntawm kev coj raws li Yexus Khetos tej cuj pwm.
Cog Lus thiab Rau Siab
Ob peb xyoo tas los, kuv tus poj niam wb sawv ntawm txoj kev mus puag pem lub teb chaws Nyij Pooj lub roob siab tshaj, lub Roob Fuji. Thaum wb pib nce roob, wb tau ntsia lub ncov roob thiab xav seb wb puas muaj zog mus txog.
Thaum wb mus tom ntej, ua rau wb nkees, mob thooj nqaij thiab pib mob vim wb nyob siab heev. Hauv wb lub siab wb yuav tsum tsom ntsoov rau ib ruam mus tom ntej xwb. Wb tau hais tias, “Tej zaum tshuav ntev ua ntej txog lub ncov roob, tiam sis kuv yeej mus ib ruam xwb los tau tam sim no.” Thaum sij hawm dhau mus ces txoj hauj lwm nyuaj no los wb ua taus—ib ruam mus ib ruam.
Thawj ruam ntawm txoj kev hloov los ua neeg zoo li Yexus Khetos yog kev xav ua li ntawd. Qhov uas peb to taub Nws cov lus qhia kom ua neeg ib yam li Nws yeej zoo, tiam sis peb yuav tsum xav hloov peb tus kheej, ib ruam mus ib ruam, kom tsis txhob zoo li tus neeg ntiaj teb. 7 Xwv kom muaj lub siab xav ua li ntawd, peb yuav tsum paub Yexus Khetos yog leej twg. Peb yuav tsum paub txog Nws tej cuj pwm, 8 thiab peb yuav tsum nrhiav tej no nyob hauv cov vaj lug kub, kev sib ntsib teev tiam, thiab lwm qho chaw dawb huv. Thaum peb paub ntxiv txog Nws, peb yuav pom Nws tej cuj pwm nyob hauv lwm tus. Qhov no yuav pab peb xav tau tej no peb tus kheej, vim hais tias yog lwm tus muaj Nws tej cuj pwm me ntsis, ces peb kuj muaj tau.
Yog peb hais tseeb rau peb tus kheej, Khetos txoj Kev Kaj 9 nyob hauv peb ntxhi lus tias piv rau tus Cawm Seej peb tsis muaj tej cuj pwm zoo ib yam li Nws. 10 Peb yuav tsum muaj lub siab ncaj li no yog peb yuav hloov los ua neeg zoo li Nws. Muaj tseeb tiag, lub siab ncaj yog Nws ib tug cuj pwm.
Tej zaum peb cov uas ua siab loj yuav xav nug ib tug hauv peb tsev neeg, ib tug khub, phooj ywg, los sis thawj coj seb peb xav tau Yexus Khetos tus cuj pwm twg—thiab tej zaum peb yuav tsum npaj peb lub siab thaum lawv teb! Tej lub sij hawm peb pom peb tus kheej zoo li peb rog dua los sis peb yuag dua tiam sis tsis yog li ntawd tiag tiag.
Cov phooj ywg thiab cov hauv peb tsev neeg pab tau peb pom peb tus kheej raws li qhov yog, tiam sis, txawm yog lawv hlub peb thiab xav pab los, tej lub sij hawm lawv pom tsis meej thiab. Yog li ntawd, yeej tseem ceeb uas peb thov peb Leej Txiv Saum Ntuj Ceeb Tsheej kom paub peb yuav tsum hloov dab tsi. Nws yeej pom peb meej kawg thiab yuav qhia peb txog peb tej kev qaug zog. 11 Tej zaum nej yuav kawm tias nej yuav tsum ua siab ntev, txo hwj chim, muaj kev siab hlub, kev cia siab, kev rau siab, los sis mloog lus. 12
Tsis ntev tas los, kuv raug kev sim siab thaum ib tug thawj coj ntawm lub Koom Txoos tau hais ncaj rau kuv tias kuv yuav tsum muaj ib tug cuj pwm ntxiv. Nws muaj kev hlub qhia meej rau kuv. Hmo ntawd, kuv tau hais qhov no rau kuv tus poj niam. Nws muaj siab hlub tshua kuv thaum nws pom zoo rau tus thawj coj tej lus. Tus Vaj Ntsuj Plig Dawb Huv tau qhia kuv tias nkawd cov lus ntuas yog los ntawm Leej Txiv Saum Ntuj Ceeb Tsheej uas hlub kuv.
Tej zaum yuav pab nej yog nej ua siab ncaj sau daim ntawv txog Khetos tej cuj pwm nyob hauv tshooj 6 ntawm phau Qhia Kuv txoj Moo Zoo. 13
Tom qab nej tau ua siab ncaj ntsuam xyuas nej tus kheej thiab pib nce roob mus, nej yuav tsum hloov siab lees txim. Thawj Tswj Hwm Russell M. Nelson qhia hais tias: “Thaum peb xaiv hloov siab lees txim, peb txiav txim siab tias peb yuav hloov! Peb cia tus Cawm Seej muab peb hloov los ua tus neeg zoo tshaj peb ua tau. Peb xaiv kom peb sab ntsuj plig loj tuaj thiab muaj kev xyiv fab—yog kev xyiv fab uas los ntawm Nws txoj kev txhiv dim. Thaum peb xaiv hloov siab lees txim, peb xaiv kev hloov los ua neeg zoo li Yexus Khetos ntxiv.” 14
Yog peb xav los ua neeg zoo li Yexus Khetos peb yuav tsum hloov peb lub siab lub ntsws, thiab hloov peb tus cuj pwm, ces peb ua tau li no tsuas yog los ntawm Yexus Khetos txoj kev tshav ntuj uas cawm peb xwb. 15
Kawm thiab Ua
Tom qab uas nej tau txiav txim siab tias nej yuav hloov siab lees txim thiab tau thov Vajtswv, xav tiag tiag, thiab tej zaum tau nug lwm tus, nej yuav tsum xaiv ib tug cuj pwm uas nej yuav tsom ntsoov rau. Nej yuav tsum cog lus tias nej yuav siv zog tiag. Tsis yog nej yuav tau tej cuj pwm no thaum nej lam ua, tiam sis nej yuav tau zuj zus los ntawm Nws txoj kev tshav ntuj thaum nej siv zog ua.
Khetos tej cuj pwm yog tej lub txiaj ntsim los ntawm Leej Txiv Saum Ntuj Ceeb Tsheej kom foom koob hmoov rau peb thiab cov nyob ib puag ncig peb. Yog li ntawd, yog peb xav siv zog tau tej cuj pwm no ces peb yuav tsum thov Nws pab peb. Yog peb nrhiav tej txiaj ntsim no kom pab tau lwm tus, Nws yuav foom koob hmoov rau peb. Qhov uas peb xav tau ib lub txiaj ntsim los ntawm Vajtswv kom pab peb tus kheej xwb yeej yuav ua rau peb poob siab.
Yog nej tsom ntsoov rau ib tug cuj pwm xwb, thaum nej tau tus cuj pwm ntawd ces nej yuav pom tias nej tau lwm tus cuj pwm thiab. Ib tug uas tsom ntsoov rau kev siab hlub tsis muaj peev xwm txo hwj chim ntxiv los? Ib tug uas tsom ntsoov rau kev mloog lus tsis muaj peev xwm txais tau kev rau siab thiab kev cia siab los? Qhov uas nej siv zog tau ib tug cuj pwm yuav zoo li cov dej uas ua rau txhua lub nkoj nce siab ntxiv.
Sau Ntawv thiab Mus Ntxiv
Thaum kuv sib zog hloov los ua neeg zoo li Nws kuv yuav tsum sau ntawv txog tej yam uas kuv kawm. Thaum kuv kawm thiab xav txog Nws ib tug cuj pwm, kuv nyeem cov vaj lug kub zoo li yog ib yam tshiab thaum kuv pom tus cuj pwm no nyob hauv Nws tej lus qhia, Nws txoj hauj lwm qhuab qhia, thiab Nws cov thwj tim. Kuv kuj tsom ntsoov ntxiv ua rau kuv txawj pom tus cuj pwm no nyob hauv lwm tus. Kuv tau pom tib neeg zoo uas muaj tej cuj pwm zoo li tus Khetos tsis hais cov uas koom lub Koom Txoos los yog thiab cov uas tsis koom lub Koom Txoos los yog. Cov neeg no coj yam ntxwv zoo kom pom tias tib neeg hauv lub ntiaj teb no muaj tej cuj pwm no los ntawm Yexus txoj kev tshav ntuj.
Yog nej xav vam meej tiag tiag, nej yuav tsum siv zog tsis tu tsis tseg. Ib yam li yus yuav tsum npaj ua ntej yus nce roob, thiab yuav tsum txawj tiv tau thiab mob siab mus ntxiv thaum yus nce, ces nej yuav tsum siv zog thiab ua kev txi nyob hauv lub neej no thiab. Peb yeej ib txwm yuav tsum ua zoo npaum li peb ua tau, thaum peb ntseeg Khetos tiag tiag, thaum peb siv zog hloov los ua neeg zoo li peb tus Xib Hwb. 16
Nim no kuv yuav hais lus ceeb toom me ntsis. Txoj lus txib kom ua neeg zoo li Nws tsis yog hais kom nej xav tias nej muaj txim, nej tsis tsim nyog, los sis tsis muaj leej twg hlub nej. Peb lub neej hauv lub ntiaj teb no lub hom phiaj yog kev vam meej, kev sim, kev poob, thiab kev ua zoo. Txawm yog kuv tus poj niam wb xav qi muag thiab tshwm sim kiag puag saum lub ncov roob, peb lub neej yeej tsis zoo li ntawd.
Nej yeej zoo txaus, muaj neeg hlub nej, tiam sis qhov ntawd tsis txhais hais tias nej yog neeg zoo tag nrho. Muaj hauj lwm uas yuav tsum ua hauv lub neej no thiab lub neej tom ntej. Tsuas yog peb muaj tus Tswv txoj kev pab peb thiaj li yuav hloov los ua neeg zoo li Nws.
Nyob hauv tej lub sij hawm thaum, “peb pom txhua yam ntxhov hnyo; thiab … [zoo li] txhua tus neeg ntshai tas,” 17 tib qho uas kho tau, yog kev siv zog hloov los ua neeg zoo li tus Cawm Seej, 18 tus Txhiv Dim 19 noob neej tag nrho, Txoj Kev Kaj ntawm lub Ntiaj Teb, 20 thiab nrhiav tus uas hais tias, “Kuv yog txoj kev.” 21
Kuv paub tias kev hloov los ua neeg zoo li Nws los ntawm Nws txoj kev pab thiab lub dag zog yeej yog ib yam peb ua tau yog peb mus ib ruam dhau ib ruam. Yog tsis li ntawd, ces Nws yeej yuav tsis txib peb ua li no. 22 Kuv paub li no—vim kuv pom Nws tej cuj pwm nyob hauv nej feem coob. Kuv ua tim khawv txog tej yam no los ntawm Yexus Khetos lub npe, amees.