Khaws cov Nyiaj Ntxiv Rov Qab Los

Cov viv ncaus, kuv nrog nej nyob ua rau kuv muaj kev xyiv fab.

Xav txog thaum mus rau hauv ib lub taj laj mus yuav ib yam khoom. Yog nws them tus khaws nyiaj tshaj tus nqi, ces tus khaws nyiaj mam li muab nyiaj rov qab los rau nws.

Vaj Ntxwv Npeyamis tau qhia rau nws cov neeg hauv teb Amelikas txog tej koob hmoov zoo heev uas peb tau txais ntawm peb tus Cawm Seej, Yexus Khetos los. Nws tau tsim ntuj ceeb tsheej thiab lus ntiaj teb thiab tag nrho txhua yam uas zoo nkauj heev. ¹ Los ntawm Nws txoj kev hlub ntawm txoj Kev Theej Txhoj, Nws npaj tau ib txoj kev rau peb los txais kev txhiv dim kev txhaum thiab kev tuag. ² Thaum peb rau rau siab ua neej raws li Nws tej lus txib ces no qhia tias peb ris Nws txiaj, ces Nws yuav foom koob hmoov rau peb, ces peb yuav tshuav nws nqi.

Nws muab ntau heev rau peb lawm, ntau tshaj qhov uas peb yuav ntxiv tau rov qab rau Nws. Yog li ntawd, peb yuav muab tau dab tsi rau Nws, uas yog tus them tus nqi ntawm peb tej kev txhaum lawm? Peb muab tau cov nyiaj ntxiv rov qab los rau Nws. Cov nyiaj ntxiv rov qab los uas peb muab tau rau Nwsyog peb txoj kev hloov. Tej zaum yuav yog kev hloov ntawm peb tej kev xav, kev hloov tej yam peb ua, los sis kev hloov txoj kev peb taug. Tus Tswv hais kom peb hloov siab rau qhov Nws tau them nqi rau peb txhua tus. Kev hloov uas Nws hais kom peb ua tsis yog kom pab Nws tiam sis yog kom pab peb. Tsis zoo li tus neeg yuav khoom uas yuav txais nws qhov nyiaj ntxiv rov qab los, tus Cawm Seej uas muaj siab hlub yuav hais kom peb cia likhaws qhov nyiaj ntxiv rov qab los xwb.

Tom qab cov neeg hnov Vaj Ntxwv Npeyamis cov lus tag, ces lawv hais tias lawv hloov siab lawm thiab hais tias, “Vim yog tus Tswv uas Muaj Hwj Chim Loj Tshaj Plaws tus Ntsuj Plig, uas ua rau peb hloov loj heev, … peb tsis txhob muaj siab xav ua phem ntxiv, tiam sis xav ua zoo tsis tu ncua mus li.” ³ Vaj lub kub yeej tsis hais tias lawv hloov tam sim ntawd es cia li rais los zoo tag nrho; tab sis, tsuas hais tias lawv muaj lub siab xav ua zoo ntxiv mus xwb. Lawv txoj kev hloob siab no txhais tau tias tsis txhob coj li tib neeg coj lawm es rau siab rais los coj li Yexus Khetos coj.

Thawj Tswj Hwm Henry B. Eyring qhia tias: “Txoj kev hloov siab tiag tiag yog thaum rau rau siab nrhiav kev ntseeg txawm hais tias yeej muaj kev siv zog thiab kev mob siab. Ces yuav yog tus Tswv thiaj muab tau … txoj kev ua kom huv thiab kev hloov tau xwb.” ⁴ Peb txoj kev rau siab nrog rau tus Cawm Seej txoj kev muaj peev xwm yuav hloov tau peb, kom peb ua tau neeg tshiab.

Thaum kuv tseem yau, kuv pom kuv tus kheej taug ib txoj kev nce toj ntseg ntseg mus rau kuv lub hoj phiaj ntawm txoj sia nyob mus ib txhis. Txhua lub sij hawm uas kuv ua txhaum, ces kuv xav hais tias kuv tsum nqis qis zuj zus, ces mam rov qab pib dua ntawm haus paus xwb. Zoo li me nyuam yaus qhov kev ua siv Chutes and Ladders uas thaum koj yuav tsum nqis ces poob ib theem ntiav zuj zus rov qab mus rau hauv lawm! Qhov no ua rau yus poob siab hlo! Tab sis thaum kuv to taub lus qhuab qhia ntawm Khetos ⁵ thiab yuav siv li cas rau hauv kuv lub neej, ces kuv muaj kev cia siab.

Yexus Khetos twb tau qhia ntau heev rau peb hais tias yuav tsum hloov li cas. Nws caw kom peb muaj siab ntseeg rau Nws, ces yuav ua rau peb hloov siab lees txim, “txoj kev ntseeg thiab kev hloov siab lees txim yuav ua rau [peb] hloov peb tej siab.” ⁶ Thaum peb hloov siab lees txim los sis tig peb lub siab mus rau Nws, ces peb yuav xav los khi lus thiab uas neej raws li kev dawb ceev. Peb nyiaj mus kom txog thaum kawg thaum peb ua raws li tej ntsiab cai no tas peb lub neej thiab caw tus Tswv los hloov peb lub siab. Nyiaj mus txog thaum kawg txhais tau hais tiasrau siab hloovmus txog thaum kawg. Tam sim no kuv to taub lawm hais tias thaum kuv ua txhaum ces tsis yog kuv yuav rov qab mus pib dua ntawm hauv paus tuaj, tab sis txhua zaus thaum kuv ua txhaum ces kuv yuav pib hloov ntawm qhov ntawd ntxus ntxiv mus xwb.

Muaj ib nqe lus hauv cov Ntxhais Hluas zaj ntsiab lus uas hais tias, “Kuv xav tau lub txiaj ntsim kev hloov siab lees txim thiab xav ua zoo ntxiv dua txhua hnub.” ⁷ Kuv thov Vajtswv kom peb xav tau lub txiaj ntsim no thiab kom peb rau rau siab nrhiav kev hloov. Qee zaum tej kev uas peb yuav tsum hloov yog kev txhaum loj heev. Tab sis feem ntau, yog peb rau siab kho peb tus kheej kom los coj tau zoo li Yexus Khetos. Tej yam uas peb xaiv txhua hnub yuav pab peb los sis yuav thaiv peb txoj kev loj hlob. Txawm hais tias yog tej yam me me xwb los yog peb rau siab ntso ua ces yuav pab peb ua zoo dua. Tsis txhob poob siab. Kev hloov yog ib qhov uas yuav tsum ua mus tas ib sim neej. Kuv zoo siab hais tias txawm tias nyuab heev rau peb hloov, los tus Tswv ua siab ntev rau peb.

Los ntawm Yexus Khetos, peb muaj dag zog los hloov tau. Thaum peb ua zoo thov Nws pab, ces Nws yuav ntxiv dag zog kom peb hloov tau.

Tsis hais tus Cawm Seej lub hwj chim ntawm txoj kev Theej Txoj xwb, tseem muaj tus Vaj Ntsuj Plig Dawb Huv uas yuav txawb nqa thiab pab coj peb kev thaum peb rau siab ua. Nws yeej yuav pab peb paub hais tias peb yuav tsum hloov li cas. Peb yeej tau kev pab los ntawm txoj koob hmoov ntawm lub pov thawm hwj, kev thov Vajtswv, kev yoo mov, thiab kev mus hauv tuam tsev.

Cov neeg uas peb ntseeg siab hauv peb tsev neeg, cov thawj coj, thiab phooj ywg yeej pab tau peb hloov thiab. Thaum kuv muaj yim xyoo, kuv nus hlob, hu ua Lee, thiab kuv nrog wb cov phooj ywg nce ib tsob ntoo ua si hauv peb lub zos. Wb nyiam ua si nrog wb cov phooj ywg ntawm qhov ntxoov ntxoo ntawm tsob ntoo no. Muaj ib hnub Lee, poob ntoo thiab ua rau nws sab caj npab lov lawm. Vim nws sab caj npab lov lawm ces nyuab heev rau nws nce ntoo. Tab sis kev ua si ntawm tsob ntoo tsis lom zem li vim tsis muaj nws nyob ntawd. Ces, peb ib txhia ntawb ib txhia rub nws sab caj npab uas tsis lov ces thaum kawg Lee rov qab nce tau rau saum tsob ntoo lawm. Txawm hais tias nws sab caj npab tseem lov thiab tsis tau zoo, los nws tau nrog peb ua si lom zem lawm.

Kuv tau xav txog txoj kev ua si ntawm tsob ntoo no muab piv tias yog peb txoj kev ua hauj lwm hauv Yexus Khetos txoj moo zoo. Nyob hauv qhov ntxoov ntxoo ntawm txoj moo zoo, peb tau koob hmoov plua pias los ntawm peb tej kev khi lus. Tej zaum ib txhia poob ntawm lawv tej kev khi lus mus lawm ces xav tau kev pab nce rov qab los rau txoj kev kaj siab ntawm txoj moo zoo. Tej zaum yuav nyuab heev rau lawv rov qab los. Peb puas kam ua phooj ywg rau lawv es pab ntawb me ntsis no nrub me ntsis tod kom lawv thiaj li rov qab los tau?

Yog hais tias nej raug mob vim nej tau poob lawm, thov cia lwm tus pab nej rov qab los rau ntawm nej tej khi lus thiab tej koob hmoov. Tus Cawm Seej pab tau nej yuav zoo taus thiab hloov thaum muaj cov neeg uas hlub nej nyob ntawm nej ncig.

Tej lub sij hawm kuv mus ntsib ib phooj ywg uas kuv tsis tau pom tau ntau xyoo los lawm. Qee zaum lawv tias, “Koj yeej tsis txawv li!” Txhua lub sij hawm uas kuv hnov li ntawd, ua rau kuv txawj me ntsis, vim kuv vam hais tias tau ntau xyoo los lawm kuv twb hloov me ntsis lawm. Kuv vam hais tias kuv txawv me ntsis txij nag hmo lawm! Kuv vam hais tias kuv ua siab zoo dua, tsis txhob xav phem txog lwm tus, thiab muaj kev hlub tshua ntau dua. Kuv vam hais tias kuv yuav maj nrawm nroos mus pab lwm tus, thiab kuv vam hais tias kuv yuav ua siab ntev me ntsis.

Kuv nyiam mus nce cov roob uas nyob ze kuv lub tsev. Feem ntau, thaum kuv mus taug kev muaj tej lub me nyuam pob zeb poob rau hauv kuv khawm khau. Ces thaum kawg, kuv yuav nres thiab hle khau es muaj nchos tawm. Tab sis kuv xav tsis thoob li hais tias ua cas kuv yuav tos ntev ua luaj es cia mob heev heev lawm ces kuv mam li nres thiab muab tshem tawm.

Thaum peb taug txoj kev ntawm kev khi lus, qee zaum yuav muaj pob zeb hauv peb khawm khau uas yog tej yam tsis zoo, muaj kev txhaum thiab coj tsis zoo. Yog peb muab tej no nchos tawm hauv peb lub neej mus, ces peb yuav muaj kev xyiv fab pov npo hauv lub neej no.

Qhov uas pheej yuav tsum hloov yuav tsum yog rau rau siab ua thiaj tau. Kuv xav tsis thoob li hais tias yog vim li cas kuv thiaj li yuav nres thiab nchos tej me nyuam pob zeb no tawm ces rov qab muab khaws muab tso rau hauv dua. Kuv yeej tsis xav ua li ntawd hlo li ib yam li tus npauj npaim zoo nkauj heev yeej yuav tsis xav rov qab mus nyob hauv nws lws.

Kuv ua tim khawv hais tias vim muaj Yexus Khetos, ces pebyeej yuavhloov tau. Peb yeej kho tau peb tej kev coj, hloov tau peb tej kev xav, thiab kho tau peb tej cuj pwm kom rais los coj zoo li Nws. Vim muaj Nws txoj kev pab, ces peb yuav khaws tau txoj kev hloov ntawd mus li. Los ntawm Yexus Khetos lub npe, amees.