Peb Yuav Sim Lawv lub Siab
Tam sim no yog lub sij hawm npaj thiab sim peb tus kheej seb peb puas txaus siab thiab txawj ua txhua yam uas tus Tswv peb tus Vajtswv yuav txib peb ua.
Kuv thov kom tus Vaj Ntsuj Plig Dawb Huv pab peb txhua tus thaum kuv qhia txog tej kev xav uas tau los nkag hauv kuv lub siab lub ntsws thaum kuv tau npaj rau lub tuam rooj sab laj no.
Vim Li Cas tej Kev Sim Siab Tseem Ceeb
Rau nees nkaum xyoo ua ntej kuv txais kev hu ua hauj lwm puv sij hawm rau lub Koom Txoos, kuv tau ua hauj lwm ua ib tug xib hwb thiab ib tug tuav hauj lwm hauv ib lub tsev kawm ntawv qib siab. Kuv txoj kev lav ris tseem ceeb thaum kuv yog ib tug xib hwb yob peb cov tub kawm ntawv kawm paub ua li cas lawv thiaj kawm tau lawv tus kheej. Ib qho tseem ceeb ntawm kuv txoj hauj lwm yog kev tsim, kev ntsuas xyuas, thiab kev qhia cov tub ntxhais kawm ntawv txog qhov uas lawv tau xeem ntawv li cas. Tej zaum nej twb paub lawm hais tias kev xeem ntawv tsis yog ib feem ntawm txoj kev kawm ntawv uas cov tub hluas ntxhais hluas nyiam tshaj!
Tiam sis tej kev sim seb puas paub uas ua ib sij ib zaug yeej tseem ceeb rau peb txoj kev kawm ntawv. Ib txoj kev sim yeej pab peb paub seb peb paub npaum li cas txog ib yam ntsiab lus; nws kuj yog ib yam uas pab peb ntsuas seb peb tau kawm npaum li cas thiab kawm sai npaum li cas.
Ib yam li ntawd, kev sim siab hauv lub neej no yog ib qho tseem ceeb nyob hauv peb txoj kev vam meej mus ib txhis li. Tiam sis lo lus test los yog kev sim los tsis muaj nyob hauv Lus Akiv cov txhooj vaj lug kub ib zaug li. Tiam sis cov lus xws li prove, examine, thiab try los yog hais tias sim thiab ntsuas piav txog tus txheej txheem tsim nyog qhia tias peb paub thiab to taub npaum li cas txog sab ntsuj plig, thiab peb puas tso siab rau Leej Txiv Saum Ntuj Ceeb Tsheej txoj hau kev zoo siab uas nyob mus ib txhis thiab peb puas muaj peev xwm nrhiav cov koob hmoov los ntawm tus Cawm Seej txoj Kev Theej Txhoj.
Tus uas tau tsim txoj hau kev cawm seej twb piav txog vim li cas peb nyob hauv lub ntiaj teb no thaum nws siv tej lus xws li sim thiab ntsuas nyob hauv cov vaj lug kub puag thaum ub thiab niaj hnub nim no. “Thiab peb yuav sim lawv lub siab los ntawm qhov no, seb lawv puas yuav ua txhua tsav txhua yam uas tus Tswv lawv tus Vajtswv yuav txib lawv.” 1
Cia li xav txog tus Kws Sau Nkauj Daviv tej lus thov no:
“Tus Tswv, thov koj sim thiab ntsuas kuv; thov tshuaj kuv lub siab thiab kuv tej kev xav.
“Kuv niaj hnub pom koj txoj kev hlub thiab koj txoj kev ncaj ncees yeej coj kuv txoj hau kev.” 2
Thiab nyob rau xyoo 1833, tus Tswv tau tshaj hais tias, “Yog li ntawd, tsis txhob ntshai nej cov yeeb ncuab, vim kuv tau txiav txim nyob hauv kuv lub siab, tus Tswv hais tias, kuv yuav ua txhua yam sim nej, saib nej puas yuav ua raws li kuv txoj kev khi lus, kom txog thaum tuag, kom tus Tswv yuav pom hais tias nej yog neeg tsim nyog.” 3
Kev Sim Siab uas Muaj Niaj Hnub No
Xyoo 2020 los twb muaj ib phaum mob thoob ntiaj teb uas tau sim peb lub siab ntau heev. Kuv thov Vajtswv tias peb cov neeg thiab tsev neeg tab tom kawm tej yam tseem ceeb uas peb kawm tau tsuas yog thaum peb raug tej yam nyuaj heev. Kuv kuj cia siab hais tias peb txhua tus yuav lees yuav “Vajtswv txoj kev koob meej” thiab qhov tseeb uas qhia tias “nws yuav fij [peb] tej kev txom nyem los ua tej yam uas pab tau [peb].” 4
Muaj ob lub ntsiab cai uas yuav coj peb thiab txhawb peb lub dag zog thaum peb raug kev sim siab nyob hauv peb lub neej, txawm yog li cas los xij: (1) lub ntsiab cai txog kev npaj, thiab (2) lub ntsiab cai txog kev txiv mus lawm tom hauv ntej nrog txoj kev ntseeg Khetos uas khov kho.
Kev Sim Siab thiab Kev Npaj
Vim peb yog tus Cawm Seej cov thwj tim, Nws txib peb kom “Npaj txhua yam uas yuav tsum muaj; thiab tsa ib lub tsev, uas twb yog ib lub tsev thov Vajtswv, ib lub tsev yoo mov, ib lub tsev muaj kev ntseeg, ib lub tsev muaj kev kawm, ib lub tsev muaj yeeb koob, ib lub tsev muaj chaw txawb chaw rau, ib lub tsev rau Vajtswv.” 5
Nws kuj cog lus rau peb tias, “yog hais tias nej npaj txhij nej yuav tsis ntshai.
“Thiab xwv kom nej yuav khiav dim cov yeeb ncuab lub hwj chim, thiab sib sau ua ib haiv neeg ncaj ncees los rau kuv, tsis muaj ceb thiab tsis muaj txim.” 6
Cov vaj lug kub no ua rau peb muaj ib tug txheej txheem xav txog thiab npaj peb lub neej thiab peb tej tsev ntawm sab cev nqaij daim tawv thiab sab ntsuj plig. Peb tej hauj lwm npaj rau lub neej hauv lub ntiaj teb no yuav tsum ua raws li tus Cawm Seej tus yam ntxwv uas “loj hlob zoo, muaj tswv yim, nws ua haum Vajtswv siab thiab haum neeg siab” 7 zuj zus tuaj—yog kev npaj siab ntawm yus txoj kev txawj ntse, sab cev nqaij daim tawv, sab ntsuj plig, thiab kev sib raug zoo.
Ob peb lub hlis tas los thaum tav su, Susan thiab kuv tau xyuas seb peb tau ceev zaub mov thiab tej khoom thaum raug xwm txheej ceev tseg cia npaum li cas. Thaum lub sij hawm ntawd, COVID-19 tab tom kis mus sai sai, thiab av qeeg tau raug wb lub tsev nyob hauv Utah. Txij thaum wb nyuam qhuav sib yuav los wb tau sim ua raws li cov yaj saub qhia kom npaj rau tej xwm txheej uas yus tsis paub yus yuav raug, yog li ntawd, kev “xyuas seb” wb tau npaj zoo npaum li cas thaum lub sij hawm raug phaum mob thiab av qeeg los wb xav tias yog ib qho tsim nyog ua. Wb tau xav paub seb wb yuav ua zoo npaum li cas thaum raug tej kev sim siab no.
Wb tau kawm ntau yam. Muaj ntau yam uas wb tau ua hauj lwm npaj zoo lawm. Tiam sis muaj lwm yam uas wb yuav tsum ua zoo dua vim wb tsis tau pom thiab npaj tej yam rau lub sij hawm zoo li no.
Wb luag ntau thiab. Piv txwv hais tias, wb nrhiav tau tej khoom nyob hauv ib lub chaw rau khoom uas yog ib feem ntawm wb kev ceev zaub mov cia tau ntev lawm. Muaj tseeb tiag, wb ntshai muab qhib thiab saib hauv tej thoob vim wb ntshai tias yuav pib muaj ib phaum mob tshiab! Tiam sis nej yuav zoo siab paub hais tias wb twb ceev faj muab tej khoom tso tseg huv tib si thiab lub ntiaj teb yuav tsis raug xwm txheej ntawd.
Ib txhia mej zeej ntawm lub Koom Txoos xav tias kev npaj rau tej xwm txheej ceev thiab npaj khoom noj thiab haus, thiab tej pob khoom pab rau 72 teev tsis tseem ceeb ntxiv vim cov Kwv Tij tsis tshua hais ntau txog tej yam no nyob hauv lub rooj sab laj ntxiv lawm. Tiam sis cov thawj coj ntawm lub Koom Txoos pheej hais kom npaj li no tau ntau xyoo. Qhov uas cov yaj saub pheej ntuas li no yeej tsim ib zaj lus meej thiab ib txoj kev ceeb toom uas nrov tshaj qhov uas ib tug hais xwb.
Ib yam li tej xwm txheej nyuaj ua rau peb pom tej yam uas peb tsis tau npaj zoo rau ntawm sab cev nqaij daim tawv, tej xwm txheej ntawm sab ntsuj plig xws li kev tsis rau siab thiab kev tsis siv zog ua rau peb raug tej yam nyuaj tshaj thaum peb raug kev sim siab. Peb kawm tias nyob hauv zaj lus piv txwv txog kaum tus hluas nkauj tias qhov uas yus tos kom npaj ua rau peb raug tsis zoo thaum peb raug sim siab. Cia li nco txog tsib tug hluas nkauj uas tsis muaj tswv yim lawv tsis tau npaj zoo rau hnub uas tus Nraug Vauv tuaj.
“Cov uas tsis muaj tswv yim, lawv nqa teeb, tiam sis tsis npaj nroj txhab:
“Cov uas muaj tswv yim, lawv nqa teeb thiab ib leeg npaj ib hwj nroj nqa mus. …
“Thaum txog ib tag hmo txawm muaj ib lub suab hu nrov nrov hais tias, Tus nraug vauv tuaj lawm! Cia li tawm tuaj tos nws!
“Kaum tus hluas nkauj txawm sawv huv tib si, thiab nyias kho nyias lub teeb kom cig.
“Ces tsib tug uas tsis muaj tswv yim hais rau tsib tug uas muaj tswv yim hais tias, Thov muab nej cov roj faib me ntsis rau peb, rau qhov peb cov teeb roj tas lawm twb yuav tuag.
“Tsib tug uas muaj tswv yim teb hais tias, Tsis tau, nyob tsam tsis txaus rau peb thiab nej. Nej cia li mus nrhiav yuav tom khw rau nej.
“Thaum tsib tug uas tsis muaj tswv yim tab tom mus yuav roj lawm; tus nraug vauv txawm tuaj txog. Tsib tug muaj tswv yim uas twb xub npaj roj tseg lawm, txawm nrog tus nraug vauv mus noj tshoob hauv tsev, thiab kaw qhov rooj rau lawm.
“Tom qab ntawd tsib tug hluas nkauj uas tsis muaj tswv yim rov los txog. Lawv txawm hu hais tias, Tus Tswv, tus Tswv! Thov qhib qhov rooj rau peb!” 8
“Tus nraug vauv teb hais tias, [Nej tsis paub kuv].” 9
Hais txog kev sim siab no, tsib tug hluas nkauj tsis muaj tswv yim twb qhia hais tias lawv hnov xwb tiam sis lawv tsis ua raws li txoj lus. 10
Kuv muaj ib tug phooj ywg uas yog ib tug tub kawm ntawv zoo heev thaum nws kawm ua ib tug kws lij choj. Nyob hauv ib nrab caij nyoog, Sam tau siv sij hawm txhua hnub rov qab kawm, sau ntsiab lus, thiab kawm los ntawm nws cov lus cim rau txhua hoob kawm. Nws tau ua raws li tus txheej txheem no rau tag nrho nws tej hoob kawm txhua lub lim tiam thiab txhua lub hlis. Nws tus txheej txheem no tau pab nws kawm txog txoj kev cai lij choj thiab tsis txhob cim ntsoov xwb. Thiab thaum txog sij hawm xeem ntawv kawg, Sam npaj tas lawm. Muaj tseeb tiag, nws xav tias lub sij hawm xeem ntawv kawg yog ib lub sij hawm uas tsis txhawj xeeb thaum nws kawm kev cai lij choj. Qhov uas yus siv txhua lub sij hawm kom npaj zoo yeej pab yus thaum raug kev sim siab.
Sam txoj kev kawm ntawv txog kev cai lij choj qhia rau peb txog tus Tswv tus txheej txheem rau peb txoj kev loj hlob thiab vam meej. “Vim saib seb, tus Tswv Vajtswv hais li no: Kuv yuav muab rau noob neej ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub; thiab lawv cov uas mloog kuv tej lus ntsiab cai, thiab cuab pob ntseg rau kuv tej lus ntuas, yuav tau koob hmoov, vim lawv yuav kawm laj lim tswv yim; rau tus uas txais kuv yuav muab ntau ntxiv.” 11
Kuv caw peb txhua tus ua tib zoo saib peb lub neej nyob li cas lawm 12 thiab “ua tib zoo xav thoob thoob saib [peb] puas yog cov uas muab siab rau ntseeg los tsis yog; [thiab sim peb tus kheej lub siab].” 13 Peb tau kawm dab tsi nyob hauv lub sij hawm uas peb yuav tsum hloov peb lub neej thiab ua raws li tej kev txwv? Peb yuav tsum ua dab tsi zoo dua hauv peb lub neej ntawm sab ntsuj plig, sab cev nqaij daim tawv, kev sib raug zoo, lub siab ntsws, thiab kev txawj ntse. Tam sim no yog lub sij hawm npaj thiab sim peb tus kheej seb peb puas txaus siab thiab txawj ua txhua yam uas tus Tswv peb tus Vajtswv yuav txib peb ua.
Kev Sim Siab thiab Kev Txiv Mus Tom Ntej
Muaj ib zaug thaum kuv mus rau ib lub ntees tuag rau ib tug tub txib uas raug tua tuag. Tus tub txib leej txiv tau hais lus thiab piav txog qhov uas nws lub siab ntais rhe vim nws ib tug me nyuam uas nws hlub nkawd sib nrug li no. Nws qhia meej tias nws tsis to taub vim li cas nws raug li no thaum lub sij hawm no. Tiam sis kuv yeej nco ntsoov tias tus txiv neej zoo kuj qhia tias Nws paub Vajtswv paub vim li cas nws tus me nyuam raug li no thaum lub sij hawm no—thiab qhov no yeej ua rau nws txaus siab lawm. Nws tau qhia pawg neeg ntawd tias txawm nws tsev neeg tu siab los, lawv yuav zoo; lawv tej zaj lus tim khawv yeej ruaj khov. Nws xaus lus li no hais tias: “Kuv xav kom nej paub tias hais txog Yexus Khetos txoj moo zoo los, peb tsev neeg yeej yuav tsis tseg. Peb yeej yuav tsis tseg.”
Txawm yog qhov uas ib tug lawv hlub xiam yog ib qho nyuaj thiab tu siab los, tsev neeg rau siab no tau npaj siab lawm qhia tias lawv txawj kawm tej yam tsem ceeb mus ib txhis los ntawm lawv tej kev txom nyem. 14
Kev rau siab ntseeg yeej tsis yog kev ruam los yog kev vwm. Kev rau siab ntseeg yog kev tso siab rau Yexus Khetos peb tus Cawm Seej, thiab Nws lub npe, thiab Nws tej lus cog tseg. Thaum peb “txiv mus lawm tom hauv ntej nrog txoj kev ntseeg Khetos uas khov kho, muaj ib txoj kev cia siab uas ci kawg nkaus, thiab muaj ib txoj kev hlub rau Vajtswv thiab rau tib neeg txhua tus,” 15 peb tau koob hmoov xam pom mus ib txhis thiab muaj ib lub zeem muag uas kav ntev tshaj qhov peb txawj to taub hauv lub neej no. Peb yuav muaj peev xwm “sib sau los ua ke, thiab sawv hauv tej chaw dawb huv” 16 thiab “tsis txhob txav mus, kom txog hnub tus Tswv los; vim saib seb, hnub ntawd los sai sai.” 17
Thaum kuv yog tus thawj tswj hwm ntawm lub tsev kawm ntawv qib siab Brigham Young University–Idaho, Txwj Laug Jeffrey R. Holland tau los rau lub tsev kawm ntawv thaum lub Kaum Ob Hlis Ntuj xyoo 1998 hais lus rau peb hauv ib txoj kev sib ntsib hawm Vajtswv uas muaj txhua lub lim tiam. Susan thiab kuv wb tau caw ib pawg tub hluas ntxhais hluas los ntsib thiab nrog Txwj Laug Holland tham ua ntej nws hais nws zaj lus. Thaum lub sij hawm tab tom yuav tas, kuv nug Txwj Laug Holland, “Yog koj qhia tau cov tub ntxhais kawm ntawv no ib yam xwb, ces koj yuav qhia dab tsi rau lawv?”
Nws tau teb tias:
“Peb pom tib neeg haj yam tawg ua ob pawg. Peb Tsoom Haiv Neeg Ntseeg hauv Hnub Nyoog Kawg yeej yuav tsis muaj ib qho chaw nyob rau hauv qhov nruab nrab ntxiv lawm. Qhov nruab nrab yuav raug tshem mus.
“Yog nej ua luam dej hauv cov dej tsaws ntxhee, ces nej yuav mus qhov twg. Nej yeej yuav mus qhov twg cov dej ntws mus. Qhov uas yus raws cov dej ntws xwb, seb cov dej tshoob yus mus qhov twg, ntshe yuav tsis zoo.
“Nej yuav tsum xaiv. Qhov uas yus tsis xaiv dab tsi yog ib qho kev xaiv. Cia li kawm xaiv tam sim no.”
Txwj Laug Holland cov lus txog qhov uas tib neeg txoj kev tawg ua ob pawg zuj zus tuaj los nws twb hais tseeb thaum yus pom tej xwm txheej hauv peb lub sawm fem txij thaum 22 xyoos tas los thaum nws teb kuv cov lus nug. Nws twb hais txog qhov uas tus Tswv tej kev thiab neeg ntiaj teb tej kev sib nrug heev, es Txwj Laug Holland ceeb toom tias tsis ntev ces yus yeej yuav tso tsis tau ib txhais ko taw hauv lub Koom Txoos thiab ib txhais ko taw hauv lub ntiaj teb ntxiv li lawm. Tus Tswv tus tub qhe no xav yaum cov tub hluas ntxhais hluas xaiv, npaj thiab los ua tus Cawm Seej cov thwj tim uas rau siab. Nws pab lawv npaj siab thiab txiv mus lawm tom hauv ntej kom dhau tej kev sim siab nyob hauv lawv lub neej.
Kev Cog Lus thiab Zaj Lus Tim Khawv
Tus txheej txheem sim peb lub siab yeej yog ib feem tseem ceeb ntawm Leej Txiv Saum Ntuj Ceeb Tsheej txoj hau kev zoo siab. Kuv cog lus tias thaum peb npaj siab thiab txiv mus tom ntej nrog kev ntseeg tus Cawm Seej, ces peb yuav txais zoo ib yam los ntawm kev sim siab hauv lub neej no: “Zoo heev, koj yog tus tub txib uas zoo thiab ncaj ncees! Tej yam me me uas koj saib, koj ua ncaj, kuv yuav tsa koj ua tus saib yam uas loj. Koj cia li los nrog kuv nyob kaj siab lug!” 18
Kuv ua tim khawv tias Vajtswv Leej Txiv uas Nyob Mus Ib Txhis yog peb Leej Txiv. Yexus Khetos yog Nws Tib Leeg Tub, peb tus Cawm Seej thiab tus Txhiv Dim. Kuv ua tim khawv txog tej yam tseeb no los ntawm Yexus Khetos lub npe dawb ceev, amees.