Zov Tos, thiab Niaj Hnub Thov Vajtswv

Kuv cov kwv tij thiab cov muam, nyob rau lub lim tiam kawg ntawm Yexus lub neej hauv ntiaj teb no, Yexus tau qhia Nws cov thwj tim kom “ceev faj thiab zov tos, [thiab] niaj hnub thov Vajtswv pab kom nej nyiaj taus txhua yam uas yuav muaj los no, thiab nej thiaj yuav mus sawv taus ntawm Neeg Leej Tub lub xub ntiag.”¹

“Txhua yam uas yuav muaj los” ua ntej Nws txoj Kev Los Zaum Ob yog “tej teb chaws uas nyob deb ua tsov ua rog[,] … kev tshaib kev nqhis thiab av yuav qeeg txhua qhov.”²

Nyob hauv phau Lus Qhuab Qhia thiab Kev Khi Lus tus Cawm Seej hais tias, “Thiab txhua yam yuav ntxhov hnyo; … vim txoj kev ntshai yuav los rau txhua tus neeg.”³

Tam sim no peb nyob hauv ib lub caij uas ntxhov hnyo. Tib neeg coob ntshai yav tom ntej, thiab muaj neeg coob uas tau muab lawv txoj kev ntseeg Vajtswv thiab Nws Leej Tub, Yexus Khetos tso tseg lawm.

Kev tshaj tawm xov xwm hais txog kev kub ntxhov. Nyob online lawv hais phem txog kev ncaj ncees. Tej chaw faus neeg, tej tsev teev ntuj, thiab tej chaw teev tiam los twb raug piam.

Ib phaum mob thoob ntiaj teb tau raug yuav luag txhua qhov chaw—tib neeg coob heev raug mob lawm, ib feem tau tuag lawm. Muaj ntau yam tseem ceeb hauv peb lub neej uas raug cuam tshuam xws li kev kawm ntawv tiav, kev teev tiam, kev sib yuav, kev ua tub txib, li ntawd. Tsis tas li ntawd, cov neeg suav tsis txheeb kho siab thiab nyob ib leeg.

Tej teeb meem ntawm nyiaj txiag ua nyuaj rau neeg coob, feem ntau yog Leej Txiv Saum Ntuj Ceeb Tsheej cov me nyuam uas pluag tshaj.

Peb tau pom tib neeg siv lawv txoj cai kom qhia tias lawv tsis txaus siab, thiab peb tau pom tej pawg neeg chim siab ua rau txhua yam puas tsuaj.

Tib lub sij hawm no, peb tseem pom tau tej kev tsis sib haum nyob thoob plaws lub ntiaj teb.

Kuv pheej xav txog nej cov uas raug txom nyem, txhawj xeeb, ntshai, los sis kho siab. Kuv qhia rau nej txhua tus tias tus Tswv paub nej, thiab Nws paub txog nej txoj kev nyuaj siab txhawj xeeb, thiab Nws hlub nej—txhua leej txhua tus tiag tiag, mus ib txhis li.

Txhua hmo thaum kuv thov Vajtswv, kuv thov tus Tswv foom koob hmoov rau nej txhua tus uas ris lub nra ntawm kev tu siab, kev mob, kev kho siab, thiab kev nyuaj siab. Kuv paub tias lwm tus thawj coj hauv lub Koom Txoos thov Vajtswv li ntawd thiab. Peb xav txog nej thiab thov Vajtswv pab nej.

Xyoo tas los kuv tau siv sij hawm hauv cheeb tsam qaum teb ntawm lub Teb Chaws Amelikas sab hnub tuaj mus xyuas Amelikas thiab lub Koom Txoos tej qhov chaw hauv zaj keeb kwm, sib ntsib nrog peb cov tub txib ntxhais txib thiab peb cov mej zeej, thiab mus xyuas cov thawj coj ua lag luam thiab tseem fwv.

Thaum Hnub Caiv, lub Kaum Hli Ntuj hnub tim 20, kuv tau hais lus rau ib pawg loj nyob ze Boston, Massachusetts. Thaum kuv hais lus, kuv txais kev tshoov siab hais tias, “Kuv thov nej txhua tus … thov Vajtswv pab lub teb chaws no, peb cov thawj coj, peb cov neeg, thiab tej tsev neeg uas nyob hauv lub teb chaws uas Vajtswv tau tsim no.”⁴

Kuv kuj hais tias Teb Chaws Amelikas thiab ntau lub teb chaws hauv lub ntiaj teb no, ib yam li thaum yav tas los, yeej nyob ntawm ib txoj kev sib tshuam thiab xav tau peb tej lus thov.⁵

Cov lus uas kuv hais no los kuv tsis tau npaj ua ntej. Kuv tau hais cov lus ntawd thaum kuv hnov tus Ntsuj Plig tshoov kuv lub siab kom caw cov nyob ntawd thov Vajtswv rau lawv lub teb chaws thiab lawv cov thawj coj.

Hnub no kuv hais kom txhua tus neeg nyob hauv txhua lub teb chaws thoob plaws lub ntiaj teb thov Vajtswv. Nej thov li cas thiab nej thov leej twg los, xav kom nej muab siab rau ntseeg—tsis hais nej ntseeg dab tsi los xij—thiab thov Vajtswv pab nej lub teb chaws thiab nej cov thawj coj. Zoo li kuv hais thaum lub Kaum Hli Ntuj nyob hauv Massachusetts, peb sawv ntawm ib txoj kev sib tshuam nyob hauv peb zaj keeb kwm, thiab tej teb chaws hauv lub ntiaj teb xav tau Vajtswv txoj kev tshoov siab thiab xav tau Nws coj peb. Tsis yog hais txog kev kab teb kav chaw los sis tej kev cai. Yog hais txog kev thaj yeeb thiab kev kho mob uas yuav los rau tib neeg ib yam li los rau tej teb chaws—tej nroog thiab tej zos—los ntawm tus Tub Vaj Ntxwv ntawm Kev Thaj Yeeb thiab lub hauv paus ntawm txhua txoj kev kho mob, tus Tswv Yexus Khetos.

Ob peb lub hlis tas los kuv tau txais kev tshoov siab los rau kuv hais tias txoj kev zoo tshaj plaws kom pab lub ntiaj teb no yog kom txhua tus neeg tso siab rau Vajtswv ntxiv thiab tig lawv lub siab mus rau Nws thaum lawv thov Vajtswv tiag tiag. Qhov uas peb txo hwj chim thiab nrhiav Vajtswv lub siab nyiam kom peb nyiaj tau los yog kov yeej tej teeb meem yog qhov uas yuav pab peb mus tom ntej nyob hauv tej lub sij hawm nyuaj siab no.

Cov vaj lug kub qhia txog tej lus uas Yexus tau thov thiab Nws tej lus qhia txog kev thov Vajtswv thaum Nws ua hauj lwm qhuab qhia. Nej nco qab ntsoov tus Tswv Zaj Lus Thov Vajtswv:

“Peb Leej Txiv tus uas nyob saum ntuj ceeb tsheej; Thov kom sawv daws hwm koj lub npe.

“Thov koj los kav neeg lub siab. Thov koj pab kom peb ua tau raws li koj lub siab nyiam yam li cov uas nyob saum ntuj.

“Thov koj pub mov rau peb muaj noj hnub no.

“Thov koj zam txim rau peb ib yam li peb twb zam txim rau cov uas ua txhaum rau peb lawm.

“Thov koj tsis txhob cia tej kev sim siab ntxias tau peb, tiam sis thov koj pab kom peb dim ntawm Dab Ntxwg Nyoog txais tes: Vim lub nceeg vaj, thiab lub hwj chim, thiab lub yeeb koob, yog koj li mus ib txhis. Amees.”⁶

Zaj lus thov Vajtswv zoo no, uas cov Ntseeg Khetos hais ntau, qhia meej tias tsim nyog uas peb thov “Peb Leej Txiv tus uas nyob saum ntuj ceeb tsheej” kom paub ua li cas txog tej yam uas ua rau peb ntxhov siab. Yog li ntawd, cia peb thov Vajtswv kom Nws coj peb txoj hau kev.

Kuv caw nej thov Vajtswv tsis tu tsis tseg.⁷ Thov Vajtswv pab nej tsev neeg. Thov kom pab cov thawj coj hauv tej teb chaws. Thov Vajtswv pab cov neeg uas ua siab loj tawm tsam tej xwm txheej hauv zej tsoom, hauv toj roob hauv pes, hauv tseem fwv, thiab tej kab mob uas raug txhua tus neeg nyob thoob plaws lub ntiaj teb, tsis hais cov muaj thiab cov tsis muaj, cov hluas thiab cov laus los yog.

Tus Cawm Seej tau qhia peb tsis txhob tseg leej twg thaum peb thov. Nws hais tias, “Hlub nej cov yeeb ncuab, foom koob hmoov rau cov uas foom tsis zoo rau nej, ua zoo rau cov uas ntxub nej, thiab thov Vajtswv rau cov uas txhob txwm siv nej thiab tsim txom nej.”⁸

Nyob saum ntoo khaub lig ntawm Khaulakhauthas, Yexus tuag theej peb tej kev txhaum, es Nws tau ua raws li Nws qhia thaum Nws thov Vajtswv tias, “Txiv, thov koj zam txim rau lawv; rau qhov lawv tsis paub hais tias lawv ua dab tsi.”⁹

Qhov uas peb thov tiag tiag rau cov uas peb xav tias yog peb cov yeeb ncuab qhia tias peb ntseeg Vajtswv muaj peev xwm hloov peb lub siab thiab lwm tus lub siab. Tej lus thov Vajtswv li no yuav ua rau peb haj yam mob siab hloov tej yam tseem ceeb hauv peb lub neej, tsev neeg, thiab zej zog.

Nej nyob qhov twg, nej hais yam lus twg, los sis nej raug teeb meem dab tsi los xij, Vajtswv hnov thiab teb nej tej lus thov raws li Nws txoj kev thiab raws li Nws lub sij hawm. Vim peb yog Nws cov me nyuam, peb thov tau Nws kom pab, txais kev nplij siab, thiab muaj lub siab xav ua tej yam zoo hauv lub ntiaj teb no.

Kev thov kom muaj kev txim lij, kev thaj yeeb, thov pab cov pluag thiab cov neeg mob los yeej tsis txaus. Tom qab peb txhos caug thov Vajtswv, peb yuav tsum sawv thiab ua tej yam peb ua tau kom pab—pab peb tus kheej thiab lwm tus.¹⁰

Cov vaj lug kub muaj ntau zaj uas qhia txog cov neeg ntseeg uas thov Vajtswv thiab mus ua tej yam kom pab lawv lub neej thiab lwm tus lub neej. Ua piv txwv, nyob hauv Phau Ntawv Maumoos, peb nyeem txog Enos. Ib tug neeg tau pom tias “kwv yees li ob feem peb ntawm nws phau ntawv piav txog ib zaj lus thov los sis ob peb zag lus thov, thiab ib feem peb qhia tias nws tau ua li cas kom muaj raws li tej lus uas Vajtswv teb rau nws.”¹¹

Muaj neeg coob uas ua yam ntxwv txog kev thov Vajtswv nyob hauv peb lub Koom Txoos zaj keeb kwm, xws li thawj zaug uas Joseph Smith tau thov Vajtswv nrov nyob hauv ib koog ntoo ze nws niam nws txiv lub tsev thaum lub caij nplooj ntoo hlav xyoo 1820. Joseph tau thov kom txais kev zam txim thiab xav paub ua li cas, es Nws cov lus thov ua rau rooj ntug qhib plho. Hnub no peb tau koob hmoov los ntawm Joseph tus Yaj Saub thiab lwm tus Neeg Ntseeg hauv Hnub Nyoog Kawg uas tau thov thiab ua tej yam kom txhim tsa Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Kuv xav txog tej lus thov Vajtswv los ntawm cov poj niam rau siab ntseeg xws li Mary Fielding Smith, uas nrog Vajtswv txoj kev pab, tau coj nws tsev neeg dim kev tsim txom nyob hauv Illinois mus rau lub hav no, nyob no nws tsev neeg tau vam meej ntawm sab ntsuj plig thiab sab cev nqaij daim tawv huv tib si. Tom qab nws txhos caug rau siab thov Vajtswv, ces nws khwv ua hauj lwm kom kov yeej nws tej teeb meem thiab ua rau nws tsev neeg tau koob hmoov.

Kev thov Vajtswv yuav txhawb nqa peb thiab pab peb koom ua ke hauv peb tsev neeg, lub koom txoos, thiab lub ntiaj teb. Kev thov Vajtswv yuav pab cov kws tshawb fawb thiab pab lawv nrhiav tau cov tshuaj tiv thaiv mob nkeeg uas yuav ua rau phaum mob tiav lawm. Kev thov Vajtswv yuav nplij cov neeg lub siab thaum ib tug uas lawv hlub xiam. Kev thov Vajtswv yuav coj peb txoj hau kev kom peb paub ua li cas pov hwm peb tus kheej.

Cov kwv tij thiab cov muam, kuv thov kom nej rau siab thov Vajtswv. Kuv thov nej kom thov Vajtswv hauv nej chaw hloov khaub ncaws, thaum nej taug kev txhua hnub, nyob hauv tsev, hauv nej pawg ntseeg, thiab txhua lub sij hawm nyob hauv nej lub siab.¹²

Kuv sawv cev rau tag nrho cov thawj coj hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, kuv ua nej tsaug vim nej thov Vajtswv pab peb. Kuv xav kom nej thov Vajtswv ntxiv kom peb yuav txais tau kev tshwm sim kom paub coj lub Koom Txoos hauv lub caij nyoog nyuaj no.

Kev thov Vajtswv hloov tau peb lub neej. Thaum peb thov Vajtswv tiag, peb yuav ua zoo dua thiab pab lwm tus ua ib yam.

Kuv paub txog lub hwj chim ntawm kev thov Vajtswv nyob hauv kuv lub neej. Tsis ntev tas los kuv nyob kuv ib leeg hauv kuv hoob kas. Kuv nyuam qhuav ua kev kho mob rau kuv txhais tes. Kuv txhais tes xiav thiab dub, o o, thiab nws mob heev. Thaum kuv zaum ntawm kuv lub rooj sau ntawv, kuv tsis muaj peev xwm tsom ntsoov rau tej yam tseem ceeb vim kuv xav txog qhov mob xwb.

Kuv tau txhos caug thov tus Tswv pab kuv tsom ntsoov kuv thiaj ua tau kuv txoj hauj lwm. Kuv tau sawv thiab rov qab ua cov ntawv saum kuv lub rooj sau ntawv. Tam sim ntawd, kuv muaj peev xwm xav meej, kuv thiaj li ua taus tej xwm tseem ceeb uas kuv yuav tau ua.

Qhov uas lub ntiaj teb ntxhov hnyo tej zaum ua rau peb nyuaj siab heev thaum peb xav txog tej teeb meem ntau ua luaj. Tiam sis kuv ua tim khawv tias yog peb yuav thov Leej Txiv Saum Ntuj Ceeb Tsheej kom tau koob hmoov thiab Nws txoj kev coj, peb yuav paub ua li cas kom foom koob hmoov rau peb tsev neeg, cov neeg zej zog, thiab tej teb chaws uas peb nyob.

Tus Cawm Seej tau thov Vajtswv ces Nws “mus thoob plaws qhov txhia chaw ua tej hauj lwm zoo”¹³ thaum Nws pub mov rau cov pluag, pab txhawb nqa cov uas xav tau, thiab ncav tes hlub, zam txim, muab kev kaj siab, thiab kev so rau txhua tus uas yuav los cuag Nws. Nws tseem ncav tes xav pab peb.

Kuv caw txhua tus mej zeej hauv lub Koom Txoos, tsis hais peb cov neeg zej zog thiab phooj ywg uas ntseeg hauv lwm pawg, kom ua raws li tus Cawm Seej qhia Nws cov thwj tim: “Cia li zov tos, thiab niaj hnub thov Vajtswv,”¹⁴ kom muaj kev thaj yeeb, kev nplij siab, kev pov hwm, thiab cib fim sib pab.

Lub hwj chim los ntawm kev thov Vajtswv yeej zoo kawg nkaus thiab nyob hauv lub ntiaj teb niaj hnub nim no peb yuav tsum thov nrog kev ntseeg Vajtswv thiab Nws Leej Tub! Thov kom peb nco ntsoov thiab saib lub hwj chim thov Vajtswv rau nqi. Los ntawm Yexus Khetos lub npe, amees.