Muaj Kev Ntseeg Mus rau Yav Tom Ntej
Yuav muaj yeeb koob rau cov uas tau npaj siab thiab cov uas tseem npaj los ua cov cuab yeej hauv tus Tswv txhais tes.
Hmo no yeej yog ib hmo peb yuav nco ntsoov. Kuv cov muam, kuv zoo siab tuaj nrog nej koom ua ke hmo no. Ob peb hlis tas los no kuv tau xav ntau heev txog nej. Nej yeej coob tshaj yim plhom leej neeg. Tsis yog nej muaj coob xwb tiam sis muaj hwj chim ntawm sab ntsuj plig los pab hloov lub ntiaj teb no. Kuv twb saib nej ua dab tsi thaum muaj tus phaum mob no.
Nej ib txhia nrhiav pom tias nej tsis muaj khoom txaus siv los sis tab tom nrhiav hauj lwm tshiab. Nej coob leej qhia nej cov me nyuam thiab saib xyuas cov neeg zej zog. Nej ib txhia tos nej cov tub txib ntxov tshaj li nej xav, es lwm cov tau pauv nej tej tsev uas chaw qhia cov tub txib ntxhais txib. Nej tau siv tej txuj ci zoo kom nrog nej tsev neeg thiab phooj ywg sib txuas lus, tau saib xyuas cov neeg uas kho siab, thiab los kawm vaj lug kub hu ua Los, Nrog Kuv Mus nrog lwm tus. Nej tau ua tej yam pab kom muaj kev zoo siab thaum Hnub Caiv. Nej tau xaws tej daim npog qhov ncauj qhov ntswg—ntau plhom daim diam!
Kuv muaj kev hlub tshua thiab kev khuv leej rau nej, kuv xav txog coob tug poj niam thoob plaws ntiaj teb no uas tau xiam cov neeg uas lawv hlub. Peb nrog nej quaj. Thiab peb thov Vajtswv rau nej. Peb qhuas thiab thov Vajtswv rau txhua tus uas rau siab ntso ua hauj lwm pab tiv thaiv lwm tus neeg txoj kev noj qab nyob zoo.
Cov ntxhais hluas twb ua zoo kawg nkaus thiab. Txawm hais tias social media muaj kev sib cav sib ceg ntau, nej coob leej twb nrhiav txoj kev los txhawb pab lwm tus neeg thiab faib peb tus Cawm Seej txoj kev kaj.
Cov muam es, nej twb ua zoo kawg nkaus! Kuv xav tsis thoob txog nej lub zog thiab nej txoj kev ntseeg. Nej twb qhia hais tias txawm muaj kev nyuaj siab los, nej yeej rau siab ntso. Kuv hlub nej, thiab qhia tseeb rau nej paub tias tus Tswv hlub nej thiab pom tej hauj lwm zoo uas nej niaj hnub ua. Ua nej tsaug! Ib zaug ntxiv, nej twb qhia tseeb hais tias nej yog haiv neeg Ixayees txoj kev cia siab ntag!
Nej ua raws li Thawj Tswj Hwm Hinckley txoj kev cia siab rau nej thaum uas nws muab “Tsev Neeg: Ib zaj Lus Tshaj Tawm rau lub Ntiaj Teb” rau lub Koom Haum Niam Tsev hauv kev sib ntsib 25 xyoos tas los lawm thaum lub Cuaj Hlis Ntuj xyoo 1995. 1 Tseem ceeb heev vim nws ua txoj kev tshaj tawm no rau cov muam hauv lub Koom Txoos no. Thaum ua li no, Thawj Tswj Hwm Hinckley qhia tseeb hais tias cov poj niam yog ib yam tseem ceeb heev hauv tus Tswv txoj hau kev es lwm tus yeej pauv tsis tau nej chaw.
Nim no, kuv xav paub seb nej tau kawm dab tsi thiab dab tsi xyoo no. Nej puas tau txav mus nyob ze rau tus Tswv, los sis puas yog nej xav tias nej nyob nrug deb ntawm Nws? Thiab tej xwm txheej uas pom niaj hnub no ua rau nej xav li cas txog yav tom ntej?
Tiag tiag mas, tus Tswv tau hais lus mos mos qhia txog peb lub caij nyoog. Nws ceeb toom hais tias hauv peb lub caij nyoog no “tib neeg tej siab yuav puas ntsoog” 2 thiab cov neeg uas raug xaiv cia lawm yuav raug kev ntxias thiab. 3 Nws qhia tus Yaj Saub Joseph Smith tias “kev thaj yeeb yuav raug muab tshem tawm hauv ntiaj teb no mus” 4 thiab tib neeg yuav raug kev kub ntxhov txhua yam. 5
Tiam sis tus Tswv tau qhia seb lub caij nyoog no ua zoo npaum li cas. Nws tshoov tus Yaj Saub Joseph Smith lub siab kom nws hais tias “txoj hauj lwm … hauv hnub nyoog kawg, yeej yog ib txoj hauj lwm loj kawg. … Txoj hauj lwm no lub yeeb koob los piav tsis tau, thiab tsis muaj dab tsi tseem ceeb tshaj.” 6
Nim no, tej zaum lo lus tseem ceeb tshaj tsis yog lo lus uas nej yuav hais txog ob peb hlis tas los no! Peb yuav ua li cas thiaj ntseeg tej lus tshwm sim no thiab cov lus tseem ceeb hais txog peb lub caij nyoog no? Tus Tswv qhia ncaj ncaj nplij peb siab hais tias: “Yog hais tias nej npaj txhij nej yuav tsis ntshai.” 7
Yog ib lo lus cog tseg zoo kawg nkaus! Nws yog ib lo lus uas yuav hloov seb peb xav li cas txog yav tom ntej. Tsis ntev tas los no kuv hnov txog ib tug poj niam uas lees hais tias tus phaum mob, nrog rau qhov av qeeg hauv lub nroog Salt Lake, ua rau nws nco qab hais tias nws tsis tau npaj ntau npaum li nws xav tias nws twb npaj lawm. Thaum kuv noog seb puas yog nws hais txog kev khaws zaub mov cia los sis nws zaj lus tim khawv, nws luag nyav thiab hais tias, “Yog las mas!”
Yog tias txoj kev npaj yog tus yuam sij rau lub caij nyoog no thiab rau peb txoj muaj kev ntseeg rau yav tom ntej, peb yuav ua li cas thiaj npaj tau?
Rau ntau xyoo no, tus Tswv cov yaj saub tau yaum kom peb yuav khaws zaub mov, dej, thiab nyiaj txiag cia rau peb tau siv thaum muaj teeb meem. Phaum mob no ua rau peb nco qab hais tias nov yog ib qho tswv yim zoo kawg nkaus. Kuv yaum kom nej yuav npaj tej yam rau nej sab cev nqaij daim tawv. Tiam sis kuv haj yam txhawj txog nej txoj kev npaj rau sab ntsuj plig thiab sab paj hlwb.
Hais txog qhov ntawd mas, peb kawm ntau yam los ntawm tus Thawj Tub Rog Maulaunais. Ua tus hau rog rau cov Neeg Nifais pawg tub rog, nws yuav nrog ib pawg tub rog uas coob tshaj lawv sib ntaus, thiab lawv haj yam muaj siab phem thiab. Ces, Maulaunais tau pab nws cov neeg npaj ua peb yam.
Yam thib ib, nws pab lawv tsim tej chaw uas lawv yuav muaj kev nyab xeeb, nws hu tej ntawd ua—“tej chaw ruaj khov.” 8 Yam thib ob, nws npaj “cov neeg lub siab kom rau siab ntseeg tus Tswv.” 9 Thiab yam thib peb, nws tau pab nws cov neeg npaj tsis tu tsis tseg—rau ntawm sab cev nqaij daim tawv thiab sab ntsuj plig tib si. 10 Cia peb xav txog peb txoj ntsiab cai no.
Txoj Ntsiab Cai thib Ib: Tsim tej Chaw uas Muaj Kev Nyab Xeeb
Maulaunais tau muab tej toj, phab ntsa, thiab tsev ntaus rog puav ib ncig cov neeg Nifais txhua lub nroog. 11 Thaum cov neeg Lamas tuaj tua lawv, lawv “yoob tag li, vim yog cov Neeg Nifais txoj kev txawj ntse npaj lawv tej chaw kom ruaj kho.” 12
Ib yam li ntawd, thaum muaj kev kub ntxhov ib ncig peb, ces peb yuav tsum tsim tej chaw uas peb yuav nyab xeeb, hais los txog sab cev nqaij daim tawv thiab sab ntsuj plig tib si. Thaum nej lub tsev yog ib qho chaw muaj kev ntseeg—ua ib Tsoom Haiv Neeg Ntseeg nyob—nej lub tsev thiaj uas thawj yam pab tiv thaiv.
Tib yam li ntawd, Xi-oos tej ceg txheem ntseeg ua “chaw nkaum kob cua daj cua dub” 13 vim cov neeg uas tuav cov yawm sij hauv lub pov thawj hwj coj kav cov no thiab lawv siv txoj cai ntawm lub pov thawj hwj. Thaum nej pheej ua raws li cov thawj coj uas tus Tswv xaiv cov lus qhuab ntuas, nej yuav haj yam muaj kev nyab xeeb.
Lub tuam tsev—tus Tswv lub tsev—yog ib qho chaw muaj kev nyab xeeb txawv lwm qhov chaw huv tib si. Nyob ntawd, cov muam nej tau lub vaj txiaj ntsim los ntawm lub pov thawj hwj lub hwj chim thaum nej ua tej kev sib khi lus hauv lub pov thawj dawb ceev. 14 Nyob ntawd, nej tsev neeg raug khi ua ke tas mus ib txhis. Xyoo no, thaum peb mus tsis tau hauv peb cov tuam tsev, nej lub vaj txiaj ntsim ntawd twb pab tau nej txais tau Vajtswv lub hwj chim thaum nej ua raws nraim li nej tej kev khi lus nrog Nws.
Hais qhov ncaj mas, ib qho chaw muaj kev nyab xeeb yog ib qho chaw twg uas nej hnov tau tus Vaj Ntsuj Plig Dawb Huv thiab txais tau Nws txoj kev coj kav. 15 Thaum tus Vaj Ntsuj Plig Dawb Huv nrog nraim nej nyob, nej qhia tau qhov tseeb, tab txawm qhov ntawd tsis haum nrog tib neeg tej tswv yim los xij. Thiab nej xav tau txog cov lus nug txog txoj moo zoo kom nej txais tau kev tshwm sim.
Kuv cov me muam, kuv caw nej los tsim ib lub tsev uas muaj kev nyab xeeb. Thiab kuv rov qab caw nej los kawm ntxiv txog lub pov thawj hwj lub hwj chim thiab lub tuam tsev tej kev khi lus thiab koob hmoov. Txoj kev muaj tej chaw uas nyab xeeb uas nej khiav nkaum rau hauv yuav pab nej muaj kev ntseeg mus rau yav tom ntej.
Txoj Ntsiab Cai thib Ob: Npaj Nej lub Paj Hlwb Los Rau Siab Ntseeg Vajtswv.
Peb tau pib ib txoj hauj lwm pab kom lub Tuam Tsev Salt Lake yuav kav tau ntev thiab txais tau neeg coob.
Ib txhia noog seb vim li cas peb thiaj yuav ua ib txoj hauj lwm loj npaum li no. Tiam sis, thaum muaj qhov av qeeg hauv lub Hav Salt Lake ua luaj li 5.7 xyoo no, lub tuam tsev no tshee hnyo ntau heev lub tshuab raj uas tus mlom Maulaunais tuav yeej poob los! 16
Ib yam li lub hauv paus rau lub Tuam Tsev hauv Salt Lake yuav tsum khov txaus kom tiv tau tej huab cua phem, peb lub hauv paus ntawm sab ntsuj plig yuav tsum ruaj khov thiab. Ces, thaum peb lub neej muaj tej qhov zoo li av qeeg, peb yuav sawv tau “ruaj khov thiab tsis txav” vim yog peb txoj kev ntseeg. 17
Tus Tswv qhia peb seb peb yuav ua li cas thiaj ntxiv zog rau peb txoj kev ntseeg thaum nrhiav “kev kawm, twb yog los ntawm kev kawm ntawv thiab los ntawm kev ntseeg.” 18 Peb ntxiv zog rau peb txoj kev ntseeg Yexus Khetos thaum peb sim ua raws li Nws cov lus txib thiab “nco ntsoov txog Nws tas mus li.” 19 Tsis tas li ntawd xwb, peb txoj kev ntseeg loj hlob tuaj txhua zaus uas peb muab siab rau ntseeg Nws. Qhov ntawd twb yog kev kawm los ntawm txoj kev ntseeg tiag.
Piv xam hais tias, txhua zaus peb muaj kev ntseeg ua raws li Vajtswv tej kev cai—tab txawm lwm tus neeg luag thuam peb—los sis txhua zaus peb tiv taus kev ua si los sis tswv yim uas ua kom peb tsis ua raws li peb tej kev sib khi lus, peb tab tom siv peb txoj kev ntseeg, uas yuav ntxiv zog rau peb txoj kev ntseeg.
Tsis tas li ntawd xwb, tsis tshua muaj tej yam dab tsi uas ntxiv zog rau peb txoj kev ntseeg ntau npaum li txoj kev ib sij kawm Phau Ntawv Maumoos. Tsis muaj lwm phau ntawv uas ua tim khawv muaj hwj chim zis thiab meej meej txog Yexus Khetos. Cov yaj saub hauv, raws li tus Tswv tej kev tshoov siab, tau pom peb lub caij nyoog no thiab tau xaiv tej lus qhuab qhia thiab lus tseeb uas yuav pab peb ntau tshaj. Phau Ntawv Maumoos yog peb tus qauv rau kev cawm seej hauv lub caij nyoog kawg no.
Muaj tseeb tiag, peb txoj kev nyab xeeb los thaum peb ua raws nraim li peb Leej Txiv Saum Ntuj Ceeb Tsheej thiab Yexus Khetos! Ib lub neej thaum tsis muaj Vajtswv yog ib lub neej uas muaj kev ntshai puv npo. Ib lub neej thaum muaj Vajtswv yog ib lub neej uas muaj kev kaj siab puv npo. Nov yog vim cov neeg uas ntseeg yuav tau koob hmoov ntawm sab ntsuj plig. Txoj kev txais kev tshwm sim rau yus tus kheej yog ib txoj koob hmoov ntawd.
Tus Tswv tau cog lus hais tias yog peb yuav thov, peb yuav txaas “kev tshwm sim ntxiv rau kev tshwm sim.” 20 Kuv cog lus hais tias thaum nej haj yam txawj txais kev tshwm sim, tus Tswv yuav foom koob hmoov rau nej es coj kav nej lub neej thiab yuav txais ntau yam khoom plig los ntawm tus Ntsuj Plig.
Txoj Ntsiab Cai thib Peb: Yuav Tsum Npaj Tsis Tu Tsis Tseg
Txawm muaj tej lub sij hawm uas txhua yam mus zoo, tus Hau Rog Maulaunais tseem ua tib zoo npaj nws cov neeg. Nws yeej tsis tau tso tseg hlo li. Nws tsis tau tso tseg ib zaug.
Tus dab phem yeej tsis tsum los tawm tsam peb. Ces, peb thiaj yuav tsum tsis txhob tsum es tsis ua tib zoo npaj lawm! Thaum peb yim vam tau peb tus kheej—ntawm sab cev nqaij daim tawv, sab paj hlwb, thiab sab ntsuj plig—peb yim ua tib zoo npaj los kov yeej Dab Ntxwg Nyoog tej kev tawm tsam peb.
Kuv cov muam es, nej yeej txawj tsim tej chaw nyab xeeb rau nej tus kheej thiab cov uas nej hlub. Tsis tas li ntawd, nej muaj hwj chim los saum ntuj los uas pab nej ntxiv kev ntseeg rau lwm tus neeg. 21 Thiab nej tsis tso tseg ib zaug li. Nej twb qhia li ntawd ib zaug ntxiv xyoo no.
Thov kom nej ua mus tom ntej! Nej txoj kev rau siab tiv thaiv nej vaj nej tsev thiab ntxiv kev tnseeg rau cov neeg uas nej hlub yuav coj koob hmoov los rau ntau tiam neeg tom ntej.
Kuv cov me muam es, peb muaj ntau yam uas ua rau peb cia siab rau yav tom ntej! Tus Tswv tau tso nej ntawm no tas sim no vim Nws paub hais tias nej muaj cuab kav mus dhau plaws tej kev kub ntxhov hauv lub caij nyoog kawg no. Nws paub hais tias nej yuav to taub hais tias Nws txoj hauj lwm loj thiab tseem ceeb npaum li cas thiab nej yuav muaj lub siab xav txhawb nqa txoj no.
Kuv tsis yog hais tias tej hnub tom ntej yuav yooj yim, tiam sis kuv cog lus rau nej hais tias yuav muaj yeeb koob rau cov uas tau npaj siab thiab cov uas tseem npaj los ua cov cuab yeej hauv tus Tswv txhais tes.
Kuv cov muam, tsis txhob cia peb nyiaj mus dhau lub caij no xwb. Cia peb muaj kev ntseeg mus lawm tom ntej! Tej kev kub ntxhov uas tau rau peb sab ntsuj plig loj hlob tuaj. Yog tej lub sij hawm uas peb tshoov tau lwm tus neeg lub siab ntau tshaj tej lub sij hawm uas nyob tu tu.
Kuv cog lus hais tias thaum peb tsim tej chaw uas muaj kev nyab xeeb, npaj peb lub siab los ntseeg Vajtswv, thiab tsis txhob tso kev npaj tseg ib zaug, Vajtswv yuav foom koob hmoov rau peb. Nws yuav “cawm peb; muaj tseeb tiag, nws [yuav] hais txoj kev kaj siab lug rau peb lub siab, thiab [yuav] pub txoj kev ntseeg uas muaj zog rau peb, thiab ua rau peb kom peb cia siab tias nws yuav tso peb dim.” 22
Thaum nej npaj siab muaj kev ntseeg mus tom ntej, tej kev cog lus no yuavl yog nej li! Kuv hais lus tim khawv li no, es qhia kuv txoj kev hlub rau nej thiab tias kuv yeej tso siab rau nej, los ntawm Yexus Khetos lub npe dawb huv, amees.