Kev Swm Qhov Tshiab
Kuv caw nej tig nej lub siab, lub ntsws, thiab sab ntsuj plig zuj zus mus rau peb Leej Txiv Saum Ntuj Ceeb Tsheej thiab Nws Leej Tub, Yexus Khetos.
Kuv cov kwv tij thiab cov muam, ob hnub ntawm lub tuam rooj sab laj no yeej zoo kawg! Kuv pom zoo rau tej uas Txwj Laug Jeffrey R. Holland hais. Ib yam li nws tau hais, tus Tswv tau tshoov cov neeg hais lus lub siab thaum lawv hais lus, thov Vajtswv thiab hu nkauj. Kuv ua tsaug rau txhua tus uas tau koom tes pab ua dab tsi los xij.
Nyob hauv lub rooj sab laj no, kuv tau xav txog nej hauv kuv lub siab ua rau kuv thiaj pom nej mloog. Kuv tau thov tus Tswv pab kuv to taub nej xav li cas, txhawj txog dab tsi, los yog muaj teeb meem twg uas nej xav kho. Kuv tau xav seb kuv yuav hais li cas kom xaus lub rooj sab laj no uas yuav pab nej xav zoo txog yav tom ntej; kuv paub tias tus Tswv xav kom nej paub qhov no.
Peb nyob hauv ib lub caij nyoog zoo kawg, lub sij hawm uas cov yaj saub coob tau pom. Nov yog lub caij nyoog tso txoj cai thaum yuav tsis muaj ib txoj koob hmoov twg uas yuav tshem tawm ntawm cov ncaj ncees.1 Txawm yog lub ntiaj teb ntxhov hnyo,2 tus Tswv xav kom peb “tos ntsoov rau yav tom ntej nrog kev xyiv fab.”3 Thov kom peb tsis txhob pheej xav txog tag kis xwb. Peb tab tom muab Ixayees sau los ua ke. Tus Tswv Yexus Khetos coj tej xwm ntawm Nws lub Koom Txoos, thiab yeej yuav muaj raws li Nws tej hom phiaj.
Qhov nyuaj rau peb yog kom peb paub tseeb tias peb yuav ua raws li peb txoj kev txawj hloov los ua neeg zoo li Vajtswv. Niaj hnub no peb pheej hnov txog “a new normal” los yog hais tias yuav tsum swm qhov tshiab. Yog tias nej xav swm qhov tshiab, kuv caw nej tig nej lub siab, lub ntsws, thiab sab ntsuj plig zuj zus mus rau peb Leej Txiv Saum Ntuj Ceeb Tsheej thiab Nws Leej Tub, Yexus Khetos. Cia qhov ntawd ua nej qhov tshiab uas nej yuav swm.
Cia li swm qhov tshiab thaum nej hloov siab lees txim txhua hnub. Cia li hais, ua thiab xav txog tej yam dawb huv. Txhawb pab lwm tus. Cia li xam pom mus ib txhis li. Ua tej uas Vajtswv hu nej ua. Thiab txawm nej muaj teeb meem dab tsi los, kuv cov kwv tij thiab cov muam, ua neej txhua hnub kom nej npaj siab ntxiv ntsib tus uas tau Tsim nej.4
Yog vim li no peb thiaj muaj cov tuam tsev. Tus Tswv cov kab ke thiab tej kev khi lus npaj peb rau txoj sia nyob mus ib txhis, uas yog Vajtswv txoj koob hmoov zoo tshaj plaws.5 Ib yam li nej paub lawm, phaum mob COVID ua rau peb yuav tsum kaw peb cov tuam tsev. Ces peb tau ua tib zoo pib qhib zuj zus. Tam sim no muaj ntau lub tuam tsev twb txog sij hawm theem 2, txhiab txhiab khub niam txiv twb tau ua kev cai sib khi, thiab txhiab txhiab tus twb txais lawv vaj txiaj ntsim rau ob peb lub hlis no. Peb saib rau yav tom ntej txog hnub thaum txhua tus mej zeej tsim nyog hauv lub Koom Txoos yuav pab lawv poj koob yawm txwv thiab teev tiam nyob hauv ib lub tuam tsev dawb huv.
Tam sim no, kuv zoo siab tshaj tawm tias yuav ua rau lub tuam tsev tshiab rau tej qhov chaw no: Tarawa, Kiribati; Port Vila, Vanuatu; Lindon, Utah; Greater Guatemala City, Guatemala; São Paulo East, Brazil; thiab Santa Cruz, Bolivia.
Thaum peb ua thiab tu cov tuam tsev no, peb thov kom nej txhua tus yuav ua thiab tu nej tus kheej kokm nej yuav tsim nyog nkag hauv lub tuam tsev dawb huv.
Tam sim no, kuv cov kwv tij thiab cov muam, kuv foom koob hmoov rau nej kom nej muaj tus Tswv Yexus Khetos txoj kev kaj siab. Nws txoj kev kaj siab yeej zoo tshaj qhov tib neeg txawj to taub.6 Kuv foom koob hmoov rau nej kom nej yuav haj yam xav thiab muaj peev xwm ua raws li Vajtswv tej kev cai. Kuv cog lus rau nej tias thaum nej ua li no, nej yuav tau koob hmoov ntau nplua mias, ua siab loj, txais kev tshwm sim, kev sib haum hauv nej tsev, thiab kev xyiv fab, txawm yog tsis paub tseeb yav tom ntej yuav zoo li cas.
Thov kom peb yuav mus tom ntej ua raws li Vajtswv txib peb ua—npaj peb tus kheej thiab lub ntiaj teb rau tus Tswv txoj Kev Los Zaum Ob. Kuv thov li no, thiab qhia nej tias kuv hlub nej heev, los ntawm Yexus Khetos lub npe dawb ceev, amees.