Muaj cov Mov Mog

Ua ntej muaj tej ciaj ciam hais txog kev yos teb chaws vim muaj tus phaum mob no, kuv tab tom los tsev los ntawm txawv teb chaws, vim muaj teeb meem teem caij, kuv tau nyob hnub Sunday hauv ib qho chaw txawv. Kuv muaj sij hawm ua ntej yuav ya dav hlau ces tau mus koom kev sib ntsib noj lub cim nco txog hauv lub zos ntawd, es thiaj tau qhia ib zaj lus luv luv. Tom qab sib ntsib tas, ib tug dikas los hais kuv thiab nug seb kuv puas paub Thawj Tswj Hwm Nelson thiab seb kuv puas tau muaj cib fim tuav nws tes dua. Kuv teb hais tias kuv yeej paub nws, thiab tias kuv twb tuav nws tes, es vim kuv yog ib tug hauv Thawj Pawg Npisov kuv muaj cib fim ntsib Thawj Tswj Hwm Nelson thiab nws ob tug pab cuam ob peb zaug txhua lim piam.

Tus dikas hluas ntawd zaum hauv ib lub rooj zaum, tsa nws ob txhais tes, thiab qw hais tias, “Nov yog hnub zoo tshaj plaws hauv tag nrho kuv lub neej!” Cov kwv tij thiab muam, tej zaum kuv tsis tsa tes thiab qw, tiam sis kuv yeej zoo siab ua Vajtswv tsaug vim peb muaj ib tug yaj saub uas muaj sia nyob thiab vim muaj cov yaj saub, cov neeg pom tau, thiab cov qhia kev tshwm sim uas coj peb kev hauv lub caij muaj kev kub kev ntxhov no.

Txij thaum chiv keeb los, tus Tswv tau coj qhia Nws cov neeg kom lawv yuav npaj siab, ntawm sab ntsuj plig thiab sab cev nqaij tawv tib si xwv kom lawv yuav kov yeej tau tej kev kub ntxhov thiab kev sim siab uas Nws paub tias lawv yuav raug hauv lub neej no. Tej kev kub ntxhov no los tau rau ib tug neeg los sis rau sawv daws tib lub sij hawm los tau, tiam sis tus Tswv txoj kev coj qhia yuav pab pov hwm thiab txhawb nqa peb thaum uas peb mloog thiab ua raws li Nws cov lus qhuab ntuas no. Ib qho piv txwv zoo txog qhov no nyob hauv phau Chiv Keeb, uas peb kawm txog Yauxej hauv Iyiv teb chaws thiab nws txoj kev txhais lus rau Falaus zaj npau suav.

“Yauxej hais rau Falaus hais tias, … yog Vajtswv qhia rau koj paub txog tej xwm txheej uas yuav muaj los yav tom ntej no. …

“Saib seb, xya xyoo saum no yuav muaj qoob loo ntau nplua mias thoob plaws teb chaws Iyiv:

“Yuav muaj kev tshaib nqhis heev xya lub xyoo; thiab sawv daws yuav tsis nco txog xya lub xyoo uas muaj qoob loo lawm hauv Iyiv teb.” ¹

Falaus mloog Yauxej lus, tau ua raws li Vajtswv tshwm sim rau nws pom hauv nws zaj npau suav thiab tau pib tas sim ntawd npaj rau yav tom ntej. Cov vaj lug kub hais tias:

“Xya lub xyoo uas qoob loo zoo thiab ntsu heev ntawd, cov neeg hauv teb chaws Iyiv ua tau qoob loo ntau kawg nkaus li.

“Tau tag nrho tej qoob loo uas cov neeg ua tau ntawm xya lub xyoo. …

“Yauxej sau tau tej qoob los khaws cia ntau cuag li tej suab zeb nram ntug hiav txwv, … sau tau ntau heev nws thiaj tsis suav hais tias muaj pes tsawg tawv thiab pes tsawg tas.” ²

Thaum xya xyoo muaj puv npo ntawd dhau los mus, peb kawm hais tias “xya lub xyoo uas muaj kev tshaib nqhis txawm pib muaj tuaj, raws li Yauxej hais tseg lawm tiag: txhua lub teb chaws puav leej muaj kev tshaib nqhis, tiam sis tshuav lub teb chaws Iyiv thiaj tseem muaj mov noj xwb.” ³

Niaj hnub no, peb tau koob hmoov vim muaj cov yaj saub uas coj peb kev kom peb yuav npaj rau kev kub ntxhov “uas yeej yuav los” ⁴ thiab kuj lees hais tias muaj tej ciaj ciam los sis kev tiv thaiv peb txoj kev sim ua raws li cov lus qhuab ntuas no.

Peb yeej to taub hais tias tus phaum mob COVID-19 ua li cas, thiab kuj muaj tej kev cua daj cua dub, es tej no yeej tsis xaiv tib neeg ntsej muag hlo li, txhua haiv neeg, hom neeg, thiab kev teev ntuj yeej raug tej kev txom nyem no thoob ntiaj teb no. Tib neeg tau poob hauj lwm thiab nyiaj txiag ntau vim tej tsev hauj lwm tau tshem tib neeg tawm thiab neeg ua tsis tau hauj lwm vim muaj tej kev mob thiab teeb meem ntawm txoj kab lig kev cai.

Rau txhua tus uas raug xwm txheej, peb xav qhia rau nej paub hais tias peb xav txog nej thiab txhawj nej heev, es qhia tias yav tom ntej yuav nyob zoo dua. Nej muaj hmoov vim nej muaj ib tug npisov thiab ceg ntseeg tus thawj tswj hwm uas nrhiav cov mej zeej hauv lawv pawg ntseeg uas xav tau kev pab tu lawv sab cev nqaij daim tawv thiab nrhiav tej qhov cuab yeej thiab kev pab uas yuav pab nej rov qab txhim tsa nej lub neej thiab pab nej txawj vam nej tus kheej thaum nej ua tib zoo npaj siab.

Niaj hnub nim no, vim tus phaum mob no ua rau txoj kev khwv nyiaj txiag poob qab thiab tib neeg raug kev puas tsuaj, peb yuav tsum ua ib yam li tus Cawm Seej yuav ua vim Nws paub tias muaj neeg coob uas raug kev nyuaj siab thiab yuav thov lawv pib khaws zaub mov thiab nyiaj cia rau yav tom ntej. Tiam sis, qhov ntawd tsis txhais hais tias peb yuav tsum tsis txhob ua tib zoo npaj—peb yuav tsum ua tib zoo coj raws li tej ntsiab cai no “raws li laj lim tswv yim thiab kev muaj txheej txheem” ⁵ xwv kom peb hais tau ib yam li Yauxej hauv Iyiv tias, “yeej muaj cov mov mog.” ⁶

Tus Tswv tsis xav kom peb ua ntau tshaj peb lub peev xwm, tiam sis Nws xav kom peb yuav ua tej peb muaj peev xwm ua, thaum peb muaj cuab kav ua. Thawj Tswj Hwm Nelson qhia peb hauv lub rooj sab laj tas los no hais tias, “Tus Tswv nyiam thaum peb rau siab ntso.” ⁷

Lub Koom Txoos cov thawj coj ib txwm ntuas ib Tsoom Haiv Neeg Ntseeg hauv Hnub Nyoog Kawg “kom npaj rau kev txom nyem hauv lub neej no thaum npaj zaub mov thiab dej thiab nyiaj txiag cia.” ⁸ Tib lub sij hawm no, lawv yaum peb kom “ua neeg txawj ntse” thiab “txhob ua ntau dhau” ⁹ thaum peb sim npaj zaub mov thiab nyiaj txiag rau peb tsev neeg. Muaj ib phau ntawv hu ua Kev Saib Xyuas Nyiaj kom Yus Vam tau Yus tus Kheej, uas luam tawm thaum xyoo 2017 thiab nyob rau hauv lub Koom Txoos chaw website ua 36 yam lus, muaj ib zaj xov los ntawm Thawj Pawg Thawj Tswj Hwm, uas hais tias:

“Tus Tswv tau tshaj tawm hais tias, ‘Kuv lub ntsiab twb yog kom saib xyuas kuv ib tsoom haiv neeg ntseeg’ [Lus Qhuab Qhia thiab Kev Khi Lus 104:15]. Txoj kev tshwm sim no yog tus Tswv ib lo lus cog tseg hais tias Nws yuav foom koob hmoov ntawm sab cev nqaij tawv thiab qhib kev rau yus vam tau yus tus kheej. …

“… Kev txais yuav thiab ua raws li tej ntsiab cai no yuav pab nej txais tau cov koob hmoov ntawm sab cev nqaij daim tawv uas tus Tswv cog lus tseg lawm.

“Peb caw nej los rau siab kawm txog ces muab tej ntsiab cai no nruab rau hauv nej lub neej thiab qhia tej no rau nej tsev neeg. Thaum nej ua li no, nej yuav muaj hmoov … [vim] nej yog Leej Txiv Saum Ntuj Ceeb Tsheej ib tug me nyuam. Nws hlub nej thiab yuav tsis tso nej tseg. Nws paub nej thiab npaj siab muab tej koob hmoov ntawm sab ntsuj plig thiab sab cev nqaij daim tawv rau nej kom nej vam tau nej tus kheej.” ¹⁰

Phau no muaj tej tshooj uas qhia txog txoj kev tsim thiab ua raws li txoj kev teem seb yuav siv nyiaj li cas, tiv thaiv koj tsev neeg ntawm kev txom nyem, tswj txoj kev muaj teeb meem ntawm nyiaj txiag, thiab tso peev rau yav tom ntej, thiab leej twg los tau saib tau hauv lub Koom Txoos chaw website los sis dhau ntawm koj cov thawj coj hauv zos.

Thaum xav txog tej ntsiab cai rau kev npaj siab, peb mam li rov qab saib Yauxej hauv Iyiv teb chaws ua li cas. Paub hais tias yuav muaj xwm dab tsi yuav tsis pab lawv mus dhau plaws tej xyoo uas muaj “kev tshaib” yog tias lawv tsis tau ua tib zoo txi tej yam zoo thaum tej xyoo uas muaj nplua mias. Lawv tsis tau siv txhua yam qoob loo uas Falaus cov tub qhev yug tau, lawv tau tsa tej ciaj ciam, tau ua raws li tej ntawd, lawv thiaj muaj txaus noj txaus haus tas sim ntawd, thiab tau npaj rau yav tom ntej tib si. Tsis tau txaus vim lawv paub tias yav tom ntej yuav muaj kev cov nyom ntau. Lawv yuav tsum ua ib yam dab tsi thiab vim lawv rau siab ntso lawv thiaj, “muaj cov mov mog.” ¹¹

Nov ua rau peb muaj ib lo lus nug tseem ceeb hais tias: “Yog li ntawd, yuav ua dab tsi?” Ib qho zoo yog thaum peb pib to taub hais tias rau ntawm tus Tswv ces txhua yam yeej nyob ntawm sab ntsuj plig, “thiab tsis muaj ib lub sij hawm twg” uas Nws tsis tau muab “ib txoj kev cai uas hais txog sab cev nqaij daim tawv xwb.” ¹² Txhua yam, yeej taw mus rau Yexus Khetos uas ua lub hauv paus uas peb txhim tsa rau saum, nov kuj hais txog peb txoj kev npaj rau sab cev nqaij daim tawv thiab.

Txoj kev npaj rau sab cev nqaij daim tawv thiab vam tau yus tus kheej txhais tau hais tias “ntseeg hais tias los ntawm kev tshav ntuj, los sis ntawm Yexus Khetos lub hwj chim thiab peb tej hauj lwm, peb thiaj muaj cuab kav txais txhua yam ntawm sab ntsuj plig thiab sab cev nqaij daim tawv uas peb xav tau rau peb tus kheej thiab peb tsev neeg.” ¹³

Tej yam ntxiv uas pab yus sab ntsuj plig lub hauv paus rau kev npaj ntawm sab cev nqaij daim tawv muaj qhov uas hais tias “muaj tswv yim ua raws qab raws kev,” ¹⁴ uas txhais tau hais tias maj mam khaws zaub mov thiab nyiaj txiag cia, thiab qhov thib ob, sim ua “tej yam me thiab yooj yim ua”, ¹⁵ uas pab qhia yus txoj kev ntseeg hais tias tus Tswv yuav ntxiv zog rau peb tej hauj lwm thaum peb rau siab ntso ua.

Thaum muaj lub hauv paus ntawm sab ntsuj plig zoo li no, peb thiaj ua tau ob lub ntsiab lus tseem ceeb ntawm sab cev nqaij daim tawv uas yog—saib xyuas nyiaj txiag thiab khaws zaub mov cia.

Tej ntsiab cai tseem ceeb hais txog nyiaj txiag yog ua tib zoo them cov nyiaj feem kaum thiab cov nyiaj pub, tshem tej kev tiv nqi thiab txhob tiv nqi ntxiv thaum twg yus ua tau, npaj thiab ua raws li txoj kev teem siv yus cov nyiaj, thiab khaws nyiaj cia rau yav tom ntej.

Tej ntsiab cai rau kev khaws zaub mov tom tsev muaj kev khaws zaub mov cia, ceev dej twj ywm thaum ua tau, thiab khaws lwm yam khoom uas koj thiab koj tsev neeg xav tau, vim hais tias “lub tsev khaws khoom zoo tshaj” ¹⁶ yog yus lub tsev ntag, uas yog qhov chaw uas “yus siv tau thaum twg yus xav tau.” ¹⁷

Thaum peb ua raws li tej ntsiab cai ntawm sab ntsuj plig thiab thov tus Tswv txoj kev tshoov siab seb peb yuav tau tus Tswv txoj kev coj qhia seb peb yuav tsum ua li cas, thiab peb yuav paub npaj li cas rau sab cev nqaij daim tawv rau peb tus kheej thiab tsev neeg. Yam tseem ceeb tshaj yog kom pib ua xwb.

Txwj Laug David A. Bednar qhia txoj ntsiab cai no thaum nws hais tias: “Txoj kev pib ua yog txoj kev siv yus kev ntseeg. … Kev ntseeg tiag tiag yog thaum tsom ntsoov rau tus Tswv Yexus Khetos thiab yeej ua rau yus pib ua ib yam dab tsi.” ¹⁸

Cov kwv tij thiab cov muam, hauv ib lub ntiaj teb uas ib sij hloov, peb yuav tsum npaj rau tej yam uas peb tsis paub txog. Txawm yuav muaj tej hnub zoo dua yav tom ntej los, peb paub tias lub neej no tseem yuav muaj tej kev txom nyem ntawm sab cev nqaij daim tawv dua. Thaum peb sim npaj ntawm sab cev nqaij daim tawv, peb yuav muaj cuab kav kov yeej tej teeb meem hauv lub neej no, yuav ua siab loj, muaj kev thaj yeeb nyab xeeb, thiab zoo li Yauxej hauv Iyiv teb, peb yuav muaj cuab kav hais txawm peb nyuaj siab hais tias, “Yeej muaj mov mog.” ¹⁹ Los ntawm Yexus Khetos lub npe, amees.