Thov, Nrhiav, thiab Khob Qhov Rooj
Ib feem tseem ceeb ntawm Leej Txiv Saum Ntuj Ceeb Tsheej txoj hau kev yog lub cib fim txuas lus nrog Nws thaum twg los xij.
Plaub lub hlis tas los, thaum kuv kawm cov vaj lug kub, kuv tau nyeem txog Amas ntiag tug hauj lwm mus rau Amoonaihas es kuv nyeem txog qhov no nyob hauv Los, Nrog Kuv Mus: “Thaum koj nyeem txog cov koob hmoov ntau uas Vajtswv pub rau cov Neeg Nifais (saib Amas 9:19–23), cia li xav txog cov koob hmoov ntau uas Nws tau pub rau koj.”1 Kuv tau txiav txim siab sau ntawv txog Vajtswv cov koob hmoov uas Nws tau foom pub rau kuv nyob rau hauv phau ntawv digital no. Kuv siv ob peb feeb xwb, es kuv twb sau 16 txoj koob hmoov.
Qhov tseem ceeb tshaj uas kuv tau sau ntawv txog yog cov koob hmoov uas yog tus Cawm Seej txoj kev hlub tshua thiab txoj kev theej kuv lub txhoj. Kuv kuj tau sau ntawv txog txoj koob hmoov uas kuv tau sawv cev rau tus Cawm Seej ua ib tug tub txib nyob hauv Portugal thiab, tom qab ntawd, nrog kuv tus khub mus ib txhis, Patricia, nyob hauv Qhov Chaw Tshaj Tawm Txoj Moo Zoo Brazil Porto Alegre South, nyob ntawd wb tau nrog 522 tug tub txib thiab ntxhais txib uas muaj hwj chim thiab zoo kawg nkaus. Hais txog Patricia, cov koob hmoov uas kuv sau ntawv txog hnub no yog cov koob hmoov uas ua rau wb ob leeg xyiv fab vim wb sib yuav tau 40 xyoos—tsis hais thaum wb ua kev cai sib khi hauv lub Tuam Tsev São Paulo Brazil, wb peb tug me nyuam zoo, lawv cov khub, thiab peb 13 tug xeeb ntxwv.
Ua rau kuv xav txog kuv niam kuv txiv uas ncaj ncees, nkawd tau qhia kuv raws li tej ntsiab cai ntawm txoj moo zoo. Ua rau kuv nco txog ib lub sij hawm thaum kuv niam nrog kuv txhos caug nyob rau ntawm kuv lub txaj thaum kuv muaj kwv yees li 10 xyoo. Tej zaum nws xav tias yog kuv tej lus thov yuav mus cuag kuv Leej Txiv Saum Ntuj Ceeb Tsheej, ces kuv yuav tsum thov zoo dua. Yog li ntawd nws hais tias, “Kuv yuav thov Vajtswv ua ntej, ces tom qab kuv thov, koj yuav thov.” Nws tau ua raws li tus txheej txheem no ntau hmo, mus txog thaum nws ntseeg tias kuv tau kawm lub ntsiab cai no thiab tau xyaum hais lus rau Leej Txiv Saum Ntuj Ceeb Tsheej. Kuv yeej yuav ris nws txiaj vim nws qhia kuv thov Vajtswv, vim kuv tau kawm tias kuv Leej Txiv Saum Ntuj Ceeb Tsheej hnov kuv tej lus thov thiab teb kuv.
Muaj tseeb tiag, muaj ib txoj koob hmoov ntxiv uas kuv tau sau tseg—yog lub txiaj ntsim uas kuv txawj hnov thiab kawm tus Tswv lub siab nyiam. Ib feem tseem ceeb ntawm Leej Txiv Saum Ntuj Ceeb Tsheej txoj hau kev yog lub cib fim txuas lus nrog Nws thaum twg los xij.
Tus Tswv txoj Kev Caw
Thaum tus Cawm Seej los rau Amelikas tom qab Nws Sawv Rov Los, Nws tau hais ib txoj kev caw uas Nws twb hais rau Nws cov thwj tim nyob hauv Kalilais. Nws tias:
“Cia li thov, thiab yuav muab rau nej; cia li nrhiav, thiab nej yuav ntsib; cia li khob, thiab yuav qhib rau nej.
“Vim txhua tus uas thov, yuav tau txais; thiab tus uas nrhiav, yuav ntsib; thiab rau tus uas khob, yuav qhib rau nws” (3 Nifais 14:7–8; kuj saib Mathais 7:7–8).
Peb tus yaj saub, Thawj Tswj Hwm Russell M. Nelson tau caw peb ua ib yam li ntawd niaj hnub no. Nws hais tias: “Thov Vajtswv los ntawm Yexus Khetos lub npe txog nej tej kev txhawj xeeb, nej tej kev ntshai, nej tej kev qaug zog—tiag mas, tej kev ntshaw hauv nej nruab siab. Ces nej mam li ua tib zoo mloog lus! Sau tej kev xav uas los rau hauv nej lub paj hlwb. Sau ntawv seb nej xav li cas thiab ua raws li tej kev tshoov siab uas nej txais ntawd. Thaum nej ua li no ib hnub dhau ib hnub, ib hlis dhau ib hlis, ib xyoos dhau ib xyoos, nej thiaj yuav ‘loj hlob es txawj ua raws li tej kev tshwm sim.’”2
Thawj Tswj Hwm Nelson twb hais ntxiv tias, “Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”3
Vim li cas kev tshwm sim yeej tseem ceeb rau peb sab ntsuj plig txoj kev txawj ciaj? Yog vim lub ntiaj teb ntxhov hnyo thiab nrov heev, muaj kev dag ntxias thiab tej yam uas meem txom. Kev txuas lus nrog peb Leej Txiv Saum Ntuj Ceeb Tsheej ua rau peb paub tias tej yam twg muaj tseeb thiab tej yam twg tsis muaj tseeb, tej yam twg yog ib feem ntawm tus Tswv txoj hau kev rau peb thiab tej yam twg tsis yog. Lub ntiaj teb no yeej nyuaj heev thiab ua rau peb muaj kev mob siab. Tiam sis thaum peb qhib peb lub siab thov Vajtswv, peb yuav txais kev nplij siab uas los ntawm qhov uas peb Leej Txiv Saum Ntuj Ceeb Tsheej hlub peb thiab saib peb rau nqi.
Thov
Tus Tswv hais tias “txhua tus uas thov, yuav tau txais.” Zoo li kev thov yog ib qho yooj yim, tiam sis yog ib qho zoo heev vim kev thov Vajtswv qhia tias peb xav tau li cas thiab peb muaj kev ntseeg npaum li cas. Tiam sis, yuav tsum siv sij hawm thiab ua siab ntev kom to taub tus Tswv lub suab. Peb tsom ntsoov rau tej kev xav uas nkag los rau hauv peb lub siab lub ntsws, thiab peb sau ntawv txog tej ntawd, ib yam li peb tus yaj saub tau ntuas peb ua. Kev sau ntawv txog peb tej kev tshoov siab yog ib qho tseem ceeb uas pab peb txais tau. Kev sau ntawv yuav pab peb nco txog thiab rov qab xav txog tej yam uas tus Tswv qhia peb.
Tsis ntev tas los ib tug uas kuv hlub hais rau kuv tias, “Kuv ntseeg tias kev tshwm sim muaj tseeb. Kuv ntseeg tias tus Vaj Ntsuj Plig Dawb Huv yuav qhia kuv txhua yam kuv yuav tsum ua.4 Yeej yooj yim rau kuv ntseeg thaum kuv lub siab kub lug ua rau kuv tsis xyem xyav hlo li.5 Tiam sis kuv yuav ua li cas kom tus Vaj Ntsuj Plig Dawb Huv hais lus rau kuv li no txhua lub sij hawm?”
Rau tus uas kuv hlub no, thiab rau nej txhua tus, kuv xav hais tias kuv kuj yuav nyiam muaj tus Ntsuj Plig tej kev tshoov siab uas muaj zog li no thiab pom meej tias kuv yuav tsum taug txoj kev twg. Tiam sis tsis yog li ntawd. Txawm li ntawd los, qhov uas peb yuav hnov feem ntau yog tus Tswv lub suab yau yau uas ntxhis lus rau peb lub siab hais tias, “Kuv nyob no. Kuv hlub koj. Mus zoo; ua zoo npaum li koj ua tau. Kuv yuav txhawb nqa koj.” Peb tsis tas paub txhua yam los yog pom txhua yam.
Lub suab yau yau yeej yaum thiab nplij peb lub siab—thiab ntau lub sij hawm yog qhov uas peb xav tau tiag tiag. Tus Vaj Ntsuj Plig Dawb Huv muaj tseeb, thiab Nws tej kev tshoov siab muaj tseeb—tej loj thiab tej me ib yam.
Nrhiav
Tus Tswv tau cog lus ntxiv hais tias, “Tus uas nrhiav, yuav ntsib.” Kev nrhiav txhais hais tias yus siv yus lub zog ntawm yus lub siab thiab sab ntsuj plig—xav tob tob, sim seb zoo li cas, thiab kawm ntawv. Peb nrhiav vim peb tso siab rau tus Tswv cov lus cog tseg. “Rau qhov tus uas xav los cuag Vajtswv, tus ntawd yuav tsum ntseeg hais tias yeej muaj Vajtswv tiag, thiab Vajtswv yuav muab nqi zog rau tus uas los cuag Vajtswv” (Henplais 11:6). Thaum peb nrhiav, peb txo hwj chim lees hais tias muaj ntau yam rau peb kawm ntxiv, thiab tus Tswv yuav ua rau peb txawj to taub ntxiv, npaj peb lub siab kom txais tau ntxiv. “Vim saib seb, tus Tswv Vajtswv hais li no: Kuv yuav muab rau noob neej ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub; … [vim] rau tus uas txais kuv yuav muab ntau ntxiv” (2 Nifais 28:30).
Khob Qhov Rooj
Tus Tswv kuj hais tias, “Rau tus uas khob, yuav qhib rau nws.” Khob qhov rooj txhais tias yus ua raws li kev ntseeg. Thaum peb ua raws nraim li Nws, tus Tswv qhib txoj kev rau peb. Muaj ib zaj nkauj qhuas Vajtswv uas qhia kom peb “tsim los thiab sib zog ua ntxiv txhob ua npau suav txog nqi zog xwb. Kev ua zoo yog lub txiaj ntsim, kev xyiv fab mus ib txhis, txoj koob hmoov ntawm hauj lwm thiab hlub.”6 Txwj Laug Gerrit W. Gong los ntawm Pawg Kaum Ob tug Thwj Tim tau piav tias kev tshwm sim yuav los feem ntau thaum peb ua tej yam zoo. Nws hais tias: “Thaum peb sim pab lwm tus nyob ib puag ncig peb, kuv xav tias tus Tswv muab Nws txoj kev hlub ntau ntxiv rau peb kom pub rau lawv. Kuv xav tias peb hnov Nws lub suab—yog ib txoj kev tsis zoo li qub—thaum peb thov Vajtswv pab cov nyob ib puag ncig peb vim tias yog tej lus thov uas Nws xav teb tiag tiag.”7
Amas tus Yam Ntxwv
Cov lus nyob hauv Los, Nrog Kuv Mus kom xav txog kuv cov koob hmoov ua rau kuv xav txog tej yam ntawm sab ntsuj plig zoo zoo. Thaum kuv tau nyeem txog Amas thiab nws ntiag tug hauj lwm nyob hauv Amoonaihas ntxiv, kuv tau kawm tias Amas yog ib tug yam ntxwv zoo txog kev thov, kev nrhiav, thiab kev khob qhov rooj. Peb nyeem hais tias “Amas sib zog ua hauj lwm ntawm sab ntsuj plig, sib zog thov Vajtswv kawg siab kawg ntsws, xwv kom nws yuav pub nws tus Ntsuj Plig nplua mias rau cov neeg.” Tiam sis, Vajtswv tsis teb nws tej lus thov raws li nws xav, es Amas raug ntiab tawm ntawm lub nroog. Nws “nyuaj siab heev nrog kev tu siab,” es Amas yuav luag tso tseg, thaum ib tug tim tswv tuaj hais zaj lus no: “Koj tau koob hmoov, Amas; yog li ntawd, cia li tsa koj lub taub hau thiab cia li zoo siab, vim muaj ntau yam uas tsim nyog ua rau koj zoo siab.” Ces tus tim tswv hais kom nws rov qab mus rau Amoonaihas thiab rov qab sim dua, ces Amas tau “rov qab nrawm nroos mus.”8
Peb kawm dab tsi los ntawm Amas txog kev thov, nrhiav, thiab khob qhov rooj? Peb kawm tias kev thov Vajtswv yog kev ua hauj lwm ntawm sab ntsuj plig, thiab thaum kawg tsis yog peb tau txhua yam raws li peb xav. Tiam sis thaum peb poob siab los sis tu siab heev, tus Tswv ua ntau yam kom nplij peb lub siab thiab txhawb peb dag zog. Tej zaum nws yuav tsis teb tag nrho peb tej lus nug los yog kho peb tej teeb meem tag nrho; tiam sis, Nws yaum peb kom sim ua ntxiv. Ces yog peb npaj siab ua raws li Nws txoj hau kev sai sai, ces Nws yuav qhib kev rau peb mus, ib yam li Nws ua rau Amas.
Kuv ua tim khawv tias nov yog lub caij nyoog uas muaj txoj moo zoo txhij txhua. Peb muaj tau cov koob hmoov ntawm Yexus Khetos txoj Kev Theej Txhoj hauv peb lub neej. Peb muaj cov vaj lug kub. Cov yaj saub qhia peb txog tus Tswv lub siab nyiam hauv lub caij nyoog nyuaj niaj hnub no. Tsis tas li ntawd, peb txais tau kev tshwm sim kom tus Tswv nplij peb lub siab thiab coj peb txoj hau kev. Ib yam li tus tim tswv hais rau Amas hais tias, “tsim nyog rau peb zoo siab heev” (Amas 8:15). Los ntawm Yexus Khetos lub npe, amees.