Los ntawm Kev Koom Siab Peb Thiaj Li Txais Vajtswv lub Hwj Chim

Yakhauj 2:17 hais tias, “Xav txog nej [cov nus thiab cov viv ncaus] ib yam li nej xav txog nej tus kheej, thiab zeem kom paub txhua tus thiab cia nej tej khoom pub dawb, xwv kom lawv yuav muaj ib yam li nej.” Cia peb pauv lo lus tej khoom pauv ua kev hlub tshua—cia nej txoj kev hlub tshua pub dawb xwv kom lawv yuav muaj ib yam li nej.

Peb pheej xav tias tej khoom yog zaub mov los sis nyiaj, tiam sis tej zaum peb txhua tus yuav tsum muaj kev hlub tshua thaum peb txhawb pab lwm tus.

Kuv lub Koom Haum Niam Tsev tus thawj tswj hwm tau hais tias: “Qhov uas kuv … cog lus… yog qhov uas kuv yuav ceev koj lub npe cia. … Kuv yuav pom koj tias koj yog leej twg thaum koj ua zoo tshaj. … Kuv yeej yuav tsis hais dab tsi txog koj uas phem, uas tsis txhawb nqa koj. Kuv thov kom koj ua ib yam li ntawd rau kuv vim kuv ntshai heev, kuv ntshai kuv yuav ua rau koj poob siab.”

Joseph Smith tau qhia cov poj niam li no thaum lub Rau Hli Ntuj xyoo 1842:

“Thaum tib neeg ua ib yam dab tsi siab zoo thiab hlub kuv, qhov ntawd yeej muaj hwj chim hauv kuv lub siab. …

“… Peb yim nyob ze peb Leej Txiv Saum Ntuj Ceeb Tsheej, peb yim xav hlub cov neeg uas ploj mus—[peb xav] ris lawv nyob rau saum peb xub pwg, thiab tso lawv tej kev txhaum tseg nram qab peb. [Kuv zaj lus yuav hais rau] tag nrho lub Koom Haum no—yog nej xav kom Vajtswv hlub tshua nej, nej yuav tsum ib leeg hlub ib leeg.” ²

Nov yog tej lus qhia rau lub Koom Haum Niam Tsev. Cia peb tsis txhob txiav txim rau lwm tus los sis hais lus cem lwm tus. Cia peb ceev lwm tus tej npe cia thiab muab kev hlub tshua rau lwm tus. ³

Nyob rau xyoo 1936, ib pawg nquam lub nkoj los ntawm lub tsev kawm ntawv University of Washington tau mus rau Yelemes Teb kom sib tw hauv Olympic Games Lub sij hawm ntawd yog lub Caij Nyoog Poob Nyiaj Txiag Loj Heev. Cov tub hluas no cov neeg hauv lawv tej zos uas khawb hlau thiab txiav ntoo tau pub nyiaj dawb rau lawv kom mus tau rau lub nroog Berlin. Txhua yam hauv kev sib tw los ua rau lawv xav tias lawv yuav swb, tiam sis thaum lawv sib tw ces muaj ib qho xwm txheej tseem ceeb. Cov uas nquam lub nkoj, hais tias yog “swing.” Cia li mloog phau ntawv The Boys in the Boat piav txog qhov no:

Tej lub sij hawm muaj ib yam dab tsi uas nyuaj ua thiab nyuaj piav txog. Yog ib yam hu ua “swing.” Tsuas muaj li no thaum txhua tus nquam nkoj zoo tib yam nkaus li thiaj tsis muaj ib yam dab tsi uas tsis sib xws.

Cov nquam lub nkoj yeej yuav tsum tswj hwm lawv txoj kev xav ua li ywj siab tiam sis yuav tsum ua raws li lawv txoj kev muaj peev xwm uas lawv ib leeg muaj xwb. Yus tsis yeej tej kev sib tw yog tias yus muaj neeg zoo ib yam. Tej pawg nquam lub nkoj yeej yog cov neeg uas zoo thaum sib xyaws—ib tug yuav tsum ua tus thawj coj, ib tug uas yuav siv zog thaum kawg, ib tug uas nyiaj mus tom ntej, ib tug kom txhua tus nyob kaj siab lug. Tsis muaj ib tug kws nquam lub nkoj uas zoo dua li lwm tus, yeej saib txhua tus rau nqj, tiam sis yog tias lawv yuav nquam lub nkoj ua ke, txhua tus yuav tsum hloov me ntsis kom sib haum—tus uas txhais npab tsis ntev yuav tsum ncav me ntsis ntxiv, thiab tus uas muaj txhais npab ntev heev yuav tsum txhob ncav tas.

Tej yam uas sib txawv uas tab kaum lawv yeej pauv pab lawv. Tsuas muaj li ntawd xwb ces zoo li lub nkoj nws mus nws tus kheej. Tsuas muaj li ntawd xwb ces lawv txoj kev mob pauv los ua kev xyiv fab. Kev “swing” uas zoo yeej zoo li kev hais paj lug. ⁴

Txawm pawg nquam lub nkoj no raug tej teeb meem loj kawg nkaus, lawv muaj qhov swing zoo thiab lawv yeej. Qhov uas lawv tau Olympic lub nqi zog kub ua rau lawv zoo siab kawg, tiam sis qhov uas lawv koom siab koom ntsws ua rau txhua tus kws nquam lub nkoj nco ntsoov txog lub sij hawm dawb huv ntawd tas lawv lub neej.

Nyob hauv zaj lus piv txwv nyob hauv Yakhauj 5, tus Tswv ntawm lub vaj txiv roj tau cog ib tsob ntoo zoo hauv cov av zoo, tiam sis sij hawm dhau mus ces tsob ntoo lwj thiab txi cov txiv qus. Tus Tswv ntawm lub vaj txiv roj hais yim zaus: “Ua rau kuv nyuaj siab uas kuv yuav xiam tsob ntoo no mus.”

Tus tub qhe hais rau tus Tswv ntawm lub vaj txiv roj: “Cia [tsob ntoo] nyob ib nyuag ntev me ntsis tso.” Thiab tus Tswv tau hais tias: Muaj tseeb tiag, kuv yuav cia kuv lub vaj nyob ib nyuag ntev me ntsis tso.” ⁵

Ces muaj lus qhia uas peb txhua tus uas dig av thiab nrhiav txiv zoo hauv peb lub vaj txiv roj ua tau hais tias: “Nej yuav tsum muab cov phem tshem mus raws li cov zoo yuav loj tuaj.” ⁶

Kev koom siab tsis yog ib yam uas lam tshwm sim; yuav tsum ua hauj lwm. Yog ib yam tsis yooj yim, tej lub sij hawm yus tsis txaus siab, thiab muaj thaum peb muab cov phem tshem mus sai npaum li cov zoo yuav loj tuaj.

Peb yeej tsis nyob peb ib leeg thaum peb xav tsim kev koom siab. Yakhauj 5 qhia ntxiv, “Cov tub qhe tau mus thiab ua hauj lwm nrog lawv lub dag lub zog; thiab tus Tswv ntawm lub vaj txiv hmab los kuj nrog lawv ua hauj lwm thiab.” ⁷

Peb txhua tus yeej muaj tej xwm txheej phem uas raug peb lub siab, tej yam uas tsis tsim nyog muaj li ntawd. Tej lub sij hawm peb txhua tus yuav cia kev muab hlob thiab kev khav theeb ua rau peb cov txiv lwj tas. Tiam sis Yexus Khetos yog peb tus Cawm Seej uas cawm txhua tus. Nws lub hwj chim yeej ncav ncuag puag hauv qab thiab yeej nrog nraim peb thaum peb hu Nws. Peb txhua tus thov kom Nws zam txim rau peb tej kev txhaum. Nws ua siab dawb zam txim pub rau peb. Thiab Nws thov kom peb muaj kev hlub tshua thiab to taub lwm tus ib yam li ntawd.

Yexus tau hais meej heev: “Cia li ua ib lub siab; thiab yog nej tsis ua ib lub siab ces nej tsis yog kuv li.” ⁸ Tiam sis yog peb ua ib lub siab—yog tias peb muab peb lub ncuav rau lwm tus los sis siv peb tej txuj ci kom lub nkoj yuav muaj swing nrog kev koom siab koom ntsws—ces peb yog Nws li. Thiab Nws yuav muab qhov phem tshem mus sai npaum li qhov zoo yuav loj tuaj.

Tej zaum peb tsis yog cov neeg li peb xav tam sim no, thiab tam sim no peb tsis zoo li cov neeg uas peb yuav ua thaum yav tom ntej. Kuv xav tias qhov uas peb xav hloov ntawm peb tus kheej thiab peb tej pawg yuav tsis los ntawm kev tawm tsam tiam sis yuav los ntawm qhov uas txhua hnub peb ib leeg siv zog sim to taub ib leeg. Vim li cas? Vim peb txhim tsa Xi-oos—ib co neeg uas “koom ib siab thiab ib ntsws.” ⁹

Vim peb yog cov poj niam khi lus, peb muaj hwj huam ntau heev. Lub hwj huam ntawd los peb siv thaum peb kawm nrog ib tug phooj ywg, tso cov me nyuam pw hauv txaj, nrog ib tug tham thaum caij npav, los sis npaj kev nthuav tswv yim nrog ib tug uas ua hauj lwm nrog peb. Peb muaj hwj chim tshem kev ntxub ntxaug thiab txhim tsa kev koom siab.

Lub Koom Haum Niam Tsev thiab Koom Haum Ntxhais Hluas tsis yog tej hoob kawm xwb. Ob lub koom haum no yog tej qhov chaw uas cov poj niam sib txawv txhua tus zaum hauv tib lub nkoj thiab nquam dej mus txog thaum peb tau peb qhov swing. Kuv caw nej li no: cia li koom nrog pawg uas yuav hloov lub ntiaj teb kom zoo. Peb txoj hauj lwm khi lus yog kev txhawb pab, kev tsa tej tes uas qaug dai ncuv, ev cov neeg txom nyem los sis puag lawv hauv peb lub xub ntiag. Yeej tsis nyuaj rau peb paub tias peb yuav tsum ua li cas, tiam sis feem ntau peb yuav tsum kov yeej peb txoj kev xav txog peb tus kheej thiab peb yuav tsum sim ua. Cov poj niam hauv lub Koom Txoos muaj hwj chim hloov peb lub sawm fem. Kuv paub hais tias thaum peb nrhiav kom muaj kev koom siab, peb yuav muaj Vajtswv lub hwj chim pab peb.

Thaum lub Koom Txoos tau ua koob tsheej nco txog kev tshwm sim txog lub pov thawj hwj nyob rau xyoo 1978, Thawj Tswj Hwm Russell M. Nelson tau foom ib txoj koob hmoov zoo kawg hais tias: “Kuv thov Vajtswv thiab foom koob hmoov rau txhua tus uas mloog kuv lub suab tam sim no kom peb yuav kov yeej tej lub nra ntawm kev sib ntxub thiab taug kev ncaj rau Vajtswv pom—ib leeg nrog ib leeg ua ke—raws li kev kaj siab lug thiab kev sib haum xeeb.” ¹⁰