Raug Sim thiab Txhuam

Kuv cov kwv tij thiab cov muam, kuv zoo siab vim kuv muaj lub cib fim no hais lus rau nej. Kuv cia siab tias kuv yuav txhawb nqa nej thaum nej raug tej yam nyuaj thiab tsis paub meej txog yav tom ntej. Rau nej ib txhia, lub sij hawm ntawd yog tam sim no. Yog tsis li ntawd, ces yeej yuav muaj sij hawm li kuv hais.

Tsis yog kuv hais kom poob siab xwb. Kuv hais tseeb xwb—tiam sis yog kev xav zoo txog yav tom ntej—vim Vajtswv yog tus Tsim lub ntiaj teb no kom raug li ntawd. Nws lub hom phiaj yog pub cib fim rau Nws cov me nyuam kom sim lawv seb lawv puas txawj thiab txaus siab xaiv qhov yog thaum lawv raug tej yam nyuaj. Yog lawv txawj ua li ntawd ces lawv yeej yuav hloov los ua neeg zoo li Nws ntxiv. Nws paub tias lawv yuav tsum muaj kev ntseeg Nws ruaj khov kho.

Tej yam uas kuv paub feem ntau twb los ntawm kuv tsev neeg. Thaum kuv muaj yim xyoo, kuv niam nug kuv tus tij laug wb mus rub nyom nrog nws nyob hauv peb tsev neeg lub vaj. Tej zaum nej xav tias yog ib qho yooj yim, tiam sis peb nyob hauv New Jersey. Ntuj los nag ntau. Cov av yog av nplaum uas hnyav heev. Cov nyom loj hlob sai tshaj cov zaub.

Kuv nco qab kuv npau taws thaum cov nyom tu ntawm kuv txhais tes, lawv tej cag tseem nyob ruaj nrees hauv cov av nplaum. Tsis ntev ces kuv niam thiab kuv tus tij laug twb rub tau ntau dua kuv. Kuv yim siv zog ntshe kuv yim nyob tom qab.

“Ua li no los nyuaj dhau!” Kuv qw nrov.

Kuv niam tsis tau pab kuv tu siab, tiam sis nws luag nyav thiab hais tias, “Auj, Hal, yeej nyuaj tiag. Yeej ib txwm nyuaj. Lub neej no yog ib txoj kev sim siab.”

Tam sim ntawd kuv paub tias nws tej lus muaj tseeb thiab yuav muaj tseeb thaum yav tom ntej ib yam thiab.

Kuv twb kawm vim li cas kuv niam luag nyav rau kuv ntau xyoo tom qab ntawd thaum kuv tau nyeem txog Leej Txiv Saum Ntuj Ceeb Tsheej thiab Nws Leej Tub txoj kev hais txog Nkawd lub hom phiaj tsim lub ntiaj teb no thiab pub cov me nyuam ntsuj plig muaj cib fim ua neej:

“Thiab peb yuav sim lawv lub siab los ntawm qhov no, seb lawv puas yuav ua txhua tsav txhua yam uas tus Tswv lawv tus Vajtswv yuav txib lawv;

“Thiab lawv cov uas coj raws li lawv lub neej theem ib yuav tau ntxiv; thiab lawv cov uas tsis coj raws li lawv lub neej theem ib yuav tsis tau yeeb koob nyob hauv tib lub nceeg vaj nrog cov uas coj raws li lawv lub neej theem ib; thiab lawv cov uas coj raws li lawv lub neej theem ob yuav tau yeeb koob ntxiv rau saum lawv lub taub hau mus ib txhiab thiab ib txhis.”¹

Peb tau ua raws li txoj kev caw ntawd kom raug sim siab thiab qhia tias peb yuav xaiv ua raws li Vajtswv cov lus txib thaum peb tsis nrog peb Leej Txiv Saum Ntuj Ceeb Tsheej nyob ntxiv li lawm.

Txawm yog peb Leej Txiv Saum Ntuj Ceeb Tsheej yog tus uas caw peb ua li no, Luxifaws tau yaum ib feem peb ntawm cov me nyuam ntsuj plig coj raws li nws thiab xyeej Leej Txiv txoj hau kev rau peb txoj kev vam meej thiab txoj kev zoo siab mus ib txhis li. Vim Dab Ntxwg Nyoog ntxeev siab, nws thiab cov uas nrog nws twb raug ntiab tawm. Tam sim no nws sim ua rau neeg coob ntxeev siab rau Vajtswv nyob hauv lub neej no.

Peb cov uas tau lees yuav txoj hau kev no los peb twb ua vim peb ntseeg Yexus Khetos, tus uas tau hais tias nws yuav ua peb tus Cawm Seej thiab tus Txhiv Dim. Nyaj peb tau ntseeg tias peb qaug zog npaum li cas hauv lub ntiaj teb no los, thiab txawm peb yuav raug tej hwj chim phem los, cov neeg zoo yuav coob tshaj.

Leej Txiv Saum Ntuj Ceeb Tsheej thiab Yexus Khetos paub thiab hlub nej. Nkawd xav kom nej rov qab los rau Nkawd thiab hloov los ua neeg zoo li Nkawd. Nej txoj kev vam meej yeej yog Nkawd txoj kev vam meej. Tus Vaj Ntsuj Plig Dawb Huv tau qhia txog txoj kev hlub ntawd thaum nej hnov los yog nyeem tej lus no: “Vim saib seb, qhov no yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab tau txoj sia nyob mus ib txhis.”²

Vajtswv muaj hwj chim kho peb txoj kev kom yooj yim dua ntxiv. Nws tau pub manas rau tsev neeg Ixayees noj thaum lawv mus rau thaj av uas tau cog lus tseg lawm. Tus Tswv tau kho cov neeg mob, tsa neeg tuag sawv, thiab ua rau cov dej tus tus. Tom qab Nws tau Sawv Rov Los, Nws tau qhib “lub tsev kaw rau cov raug muab khi cia.”³

Tiam sis tus Yaj Saub Joseph Smith, tus Tswv ib tug yaj saub zoo kawg nkaus, raug kaw hauv lub tsev rau txim thiab tau kawm ib yam uas pab peb txhua tus thaum peb txoj kev ntseeg raug kev sim siab tas li: “Thiab yog hais tias luag muab koj pov rau hauv lub qhov taub, los yog mus rau cov neeg tua neeg txhais tes, thiab raug luag txiav txim tuag rau koj; yog koj raug muab pov rau hauv dej tob; yog tej nthwv dej hiav txwv tuav hauv tawm tsam koj; yog tej cua daj cua dub hloov los ua koj tus yeeb ncuab; yog saum ntuj cia li tsaus tsaus, thiab yog txhua yam ntuj tsim koom siab los thaiv txoj kev; thiab tshaj txhua yam, yog hais tias ntuj txiag teb tsaus lub qhov ncauj kiag yuav qhib loj loj raws koj, koj yuav tsum paub, kuv tus tub, hais tias tag nrho tej yam no yuav muab kev kawm rau koj, thiab yuav zoo rau koj.”⁴

Tej zaum nej xav paub vim li cas ib tug Vajtswv uas hlub peb thiab muaj hwj chim tag nrho cia peb raug kev sim siab nyuaj npaum li no. Yog vim Nws paub peb yuav tsum loj hlob ntawm peb sab ntsuj plig kom thiaj li muaj peev xwm nrog Nws thiab peb tsev neeg nyob mus ib txhis li. Xwv kom muaj li ntawd, Leej Txiv Saum Ntuj Ceeb Tsheej tau muab ib tug Cawm Seej rau peb thiab tau muab hwj chim rau peb xaiv peb tus kheej los ntawm kev ntseeg kom ua raws li cov lus txib thiab hloov siab lees txim thiab los cuag Nws.

Leej Txiv txoj hau kev zoo siab lub hauv paus yog peb txoj kev hloov los ua neeg zoo li Nws Leej Tub uas Nws Hlub, Yexus Khetos. Tus Cawm Seej tus yam ntxwv yeej yog coj tau peb txhua lub sij hawm. Kuj yuav tsum sim Nws lub siab seb Nws yuav ua li cas. Nws tiv taus kom pab tag nrho Leej Txiv Saum Ntuj Ceeb Tsheej cov me nyuam, them tus nqi rau tag nrho peb tej kev txhaum. Nws raug kev txom nyem rau txhua tus uas tau yug los thiab cov uas tseem yuav los.

Thaum nej xav paub seb nej nyiaj tau qhov mob npaum li cas, cia li nco ntsoov txog Nws. Nws tau raug kev txom nyem uas nej raug kom Nws thiaj li paub txhawb nqa nej. Tej zaum Nws yuav tsis tshem nej lub nra, tiam sis Nws yuav muab zog, kev nplij siab thiab kev cia siab rau nej. Nws paub txoj kev mus. Nws tau haus cov dej iab. Nws tau nyiaj dhau txhua yam kev txom nyem.

Ib tug Cawm Seej uas hlub nej yeej ib txwm tu thiab nplij nej lub siab, tus uas paub pab nej thaum nej raug kev sim siab li cas los. Amas qhia hais tias:

“Thiab nws yuav mus, raug tej kev mob thiab tej kev txom nyem thiab tej kev ntxias txhua yam; thiab ua li no xwv kom yuav muaj raws li txoj lus uas hais tias nws yuav ris nws cov neeg tej kev mob thiab tej kev nkeeg.

“Thiab nws yuav ris txoj kev tuag, xwv kom nws yuav daws tau kev tuag tej hlua uas khi nws cov neeg; thiab nws yuav ris lawv tej kev qaug dag qaug zog, xwv kom nws lub siab thiaj li yuav muaj kev hlub tshua puv nkaus, ntawm sab cev nqaij daim tawv, xwv kom nws yuav paub pab nws cov neeg ntawm sab cev nqaij daim tawv raws li lawv tej kev qaug dag qaug zog.”⁵

Ib txoj kev uas Nws yuav pab nej yog qhov uas Nws caw nej nco ntsoov txog Nws thiab los cuag Nws. Nws tau txhawb nqa peb hais tias:

“Nej cov uas sab sab vim nej ris nra hnyav, nej cia li los cuag kuv, kuv yuav cia nej so.

“Kuv yog tus muaj lub siab dawb siab zoo, nej cia li los kwv kuv tus quab thiab kawm tej uas kuv qhia, nej thiaj yuav tau so.”⁶

Txoj kev los cuag Nws yog kom mloog ntsoov Nws tej lus, muab siab rau ntseeg los hloov siab lees txim, xaiv ua kev cai raus dej thiab ua kev cai pom zoo los ntawm Nws tus tub qhe uas Nws tso cai rau, ces ua raws li nej tej kev khi lus nrog Vajtswv. nws txib tus Vaj Ntsuj Plig Dawb Huv los ua nej tus khub, tus nplij siab, thiab tus coj nej txoj hau kev.

Thaum nej tsim nyog muaj lub txiaj ntsim Vaj Ntsuj Plig Dawb Huv, tus Tswv coj tau nej mus rau kev nyab xeeb tsis hais thaum nej tsis pom kev los yog. Rau kuv mas, feem ntau Nws qhia kuv txog ib los ob ruam mus tom ntej xwb. Nws tsis tau qhia kuv paub txog yav tom ntej ntau zaus, tiam sis thaum kuv pom tau li ntawd ua rau kuv paub xaiv ua li cas hauv kuv lub neej.

Tus Tswv piav hais tias:

“Nej pom tsis tau nej tus Vajtswv lub tswv yim nrog nej lub qhov muag ntawm sab nqaij daim tawv, thaum lub sij hawm no, ntsig txog tej yam uas yuav muaj los tom qab no mus, thiab lub yeeb koob uas yuav muaj tom qab dhau tej kev txom nyem ntau.

“Vim tom qab dhau tej kev txom nyem ntau ces tej koob hmoov yuav los.”⁷

Txoj koob hmoov zoo tshaj plaws uas los thaum peb rau siab ntseeg ua raws li peb tej kev khi lus thaum peb raug kev sim siab yog kev hloov peb tej cuj pwm. Thaum peb xaiv ua raws li peb tej kev khi lus, Yexus Khetos lub hwj chim thiab cov koob hmoov ntawm Nws txoj Kev Theej Txhoj yuav ua hauj lwm nyob hauv peb. Peb lub siab yuav mos muag kom hlub, zam txim, thiab caw lwm tus los cuag tus Cawm Seej. Peb haj yam yuav tso siab rau tus Tswv. Peb txoj kev ntshai yuav ploj mus.

Txawm yog peb yuav tau koob hmoov thaum peb nyiaj dhau kev txom nyem, peb yeej tsis nrhiav kev txom nyem. Nyob hauv lub neej no, peb yuav muaj cib fim raug kev sim siab uas nyuaj txaus kom pab peb hloov los ua neeg zoo li tus Cawm Seej thiab peb Leej Txiv Saum Ntuj Ceeb Tsheej.

Tsis tas li ntawd, peb yuav tsum pom lwm tus tej kev sim siab thiab pab lawv. Yuav nyuaj ua li ntawd thaum peb raug kev sim siab peb tus kheej. Tiam sis, thaum peb pab lwm tus ris lawv tej nra, tsis hais thaum pab me ntsis xwb, peb yuav kawm tias peb haj yam muaj zog thiab peb pom ib txoj kev kaj hauv qhov tsaus ntuj.

Tus Tswv yog tus uas coj Yam Ntxwv rau peb. Nyob saum ntoo khaub lig ntawm Khalakhauthas, tom qab twb raug txom nyem loj kawg Nws thiaj li yuav tuag yog Nws tsis yog Vajtswv Tib Leeg Tub, nws twb saib cov uas muab Nws tua thiab hais rau Nws Leej Txiv, “Txiv, thov koj zam txim rau lawv; rau qhov lawv tsis paub hais tias lawv ua dab tsi.”⁸ Thaum nws raug txom nyem rau txhua tus uas yuav ua neej nyob, Nws nyob saum ntoo khaub lig saib Yauhas thiab Nws niam uas tu siab heev thiab Nws txhawb pab Nws niam:

“Yexus pom nws niam thiab tus thwj tim uas nws hlub heev sawv ua ke ntawd, Yexus hais rau nws niam hais tias, Niam, tus uas nrog koj sawv ntawm ko yog koj tus tub.

“Yexus hais rau tus thwj tim ntawd hais tias, Tus uas nrog koj sawv ntawd ko yog koj niam. Txij thaum ntawd los tus thwj tim ntawd txawm coj Yexus niam mus nrog nws nyob lawm.”⁹

Los ntawm tej yam Nws tau ua hnub ntawd, Nws tau txo Nws txoj sia pub rau peb txhua tus, Nws thiaj li pab tau peb hauv lub neej no thiab lub neej nyob mus ib txhis.

Kuv twb tau pom neeg coob mus rau qhov siab thaum lawv rau siab ntseeg nyiaj dhau tej kev sim siab phem heev. Muaj neeg uas coj yam ntxwv li no nyob thoob plaws lub Koom Txoos no. Muaj neeg uas kev txom nyem ua rau lawv txhos caug. Thaum lawv rau siab ntseeg tiv kom dhau, ces lawv hloov los ua neeg zoo li tus Cawm Seej thiab peb Leej Txiv Saum Ntuj Ceeb Tsheej.

Kuv tau kawm ib zaj lus ntxiv los ntawm kuv niam. Thaum nws yog ib tug ntxhais hluas nws raug mob txhaws caj pas thiab yuav luag tuag. Tom qab ntawd nws tau rau mob hlwb txha nrab qaum. Nws txiv tuag thaum nws tseem hluas, kuv niam thiab nws cov nus thiaj li tau pab txhawb nqa lawv niam.

Tas nws lub neej, nws twb raug tej xwm txheej los ntawm kev mob nkeeg. Nyob rau hauv 10 xyoo kawg ntawm nws lub neej, nws rau phais mob ntau zaus. Tiam sis dhau txhua yam, nws rau siab ntseeg tus Tswv, tsis hais thaum nws yuav tsum pw hauv txaj xwb. Tib daim duab hauv nws chav txaj yog tus Cawm Seej xwb. Nws tej lus kawg uas nws hais rau kuv ua ntej nws tuag yog li no: “Hal, zoo li koj mob khaub tuas. Koj yuav tsum saib xyuas pab koj tus kheej.”

Nyob hauv nws lub ntees tuag tus hais lus kawg yog Txwj Laug Spencer W. Kimball. Tom qab nws hais me ntsis txog nws tej kev sim siab thiab nws txoj kev rau siab ntseeg, nws hais zoo li no tias: “Nej ib txhia yuav xav paub seb vim li cas Mildred yuav tsum raug txom nyem ntev npaum li no. Kuv mam li qhia nej vim li cas. Yog vim tus Tswv xav muab nws txhuam me ntsis ntxiv.”

Kuv ua nej tsaug nej cov mej zeej rau siab ntseeg ntawm Yexus Khetos lub Koom Txoos uas ris tej nra nrog kev ntseeg ruaj khov thiab cov uas pab lwm tus ris lawv tej nra thaum tus Tswv xav muab lawv txhuam me ntsis ntxiv. Kuv kuj hais qhuas cov uas saib xyuas thiab cov thawj coj nyob thoob plaws lub ntiaj teb uas pab lwm tus thaum lawv thiab lawv tsev neeg tiv tau kev txhuam li no.

Kuv ua tim khawv tias peb yog Leej Txiv Saum Ntuj Ceeb Tsheej cov me nyuam, uas hlub peb. Kuv paub tias Thawj Tswj Hwm Russell M. Nelson hlub peb txhua tus. Nws yog tus Tswv tus yaj saub hauv lub ntiaj teb hnub no. Kuv ua tim khawv li no los ntawm Yexus Khetos lub npe dawb ceev, amees.