Nrhiav Khetos nrog Txhua txoj Kev Xav

Nyob hauv nws zaj nkauj qhuas Vajtswv, tus Kws Sau Nkauj hais tias:

“Tus Tswv, koj tshawb saib kuv lub siab thiab lub neej, koj yeej paub zoo.

“Koj paub ib puas tsav yam uas kuv ua, txawm yog nyob deb los koj yeej paub tej uas kuv lub siab xav huv tib si.

“Koj yeej pom ntsoov kuv tsis hais thaum kuv ua hauj lwm los sis kuv so, koj paub tej uas kuv ua huv tib si.”¹

Nyob hauv zaj paj lug no txoj kev ua lub ntsiab sib dhos, tus Kws Sau Nkauj qhuas tus Tswv txoj kev paub txhua yam vim Nws paub txhua yam txog peb tus kheej.² Vim nws paub txhua yam peb yuav tsum ua hauv lub neej no, tus Cawm Seej caw peb nrhiav Nws nrog txhua txoj kev xav thiab coj raws li Nws kawg siab kawg ntsws.³ Yog li ntawd peb muaj kev cia siab tias peb yuav muaj peev xwm taug mus hauv Nws txoj kev kaj thiab Nws yuav coj peb txoj hau kev kom tsis txhob raug kev tsuas ntuj hauv peb lub neej.⁴

Yog peb yuav nrhiav Khetos nrog txhua txoj kev xav thiab coj raws li Nws kawg siab kawg ntsws ces peb yuav tsum hloov peb tej kev xav kom zoo li Nws.⁵ Cov vaj lug kub hais tias qhov no yog kev “muab siab rau ntseeg tus Tswv.”⁶ Kev ua li no qhia tias peb coj peb lub neej kom sib haum nrog Khetos txoj moo zoo thiab tsom ntsoov rau txhua yam zoo niaj hnub.⁷ Tsuas yog muaj li ntawd xwb ces peb yuav muaj “[Vajtswv txoj kev kaj siab uas] yeej tsis muaj leej twg yuav paub” thiab yuav ua rau peb “nrog Yexus Khetos koom ib txoj sia thiab tej uas nej xav huv tib si.”⁸ Tus Cawm Seej tau qhia cov txwj laug ntawm lub Koom Txoos thaum lub Ob Hlis Ntuj xyoo 1831 li no tias, “Muab tej yam no khaws zoo cia rau hauv nej lub siab, thiab cia tej yam tiag tiag ntawm kev nyob mus ib txhis nyob hauv nej lub cim xeeb.”⁹

Txawm yog peb pheej nrhiav tus Tswv, tej zaum tej kev xav tsis tsim txiaj yuav nkag los hauv peb lub siab. Thaum twg peb cia tej kev xav los thiab tseem xav txog tej ntawd, ces tej kev xav li ntawd yuav hloov peb lub siab thiab ua rau peb hloov los ua tus neeg uas yuav nyob hauv lub neej no thiab thaum kawg yuav nyob mus ib txhis.¹⁰ Txwj Laug Neal A. Maxwell tau hais txog lub ntsiab cai no hais tias, “Tej kev xav … yeej qhia tias peb yuav tau li cas thaum kawg, vim li ntawd ‘cov uas tus Tswv hu los muaj coob, tiam sis cov uas nws xaiv los muaj tsawg.’”¹¹

Cov yaj saub puag thaum ub thiab cov niaj hnub no pheej hais kom peb tiv thaiv kom txhob raug kev ntxias peb sab ntsuj plig thiaj li yuav muaj zog thiab peb yuav tsis poob siab thiab tsis yoob.

Piv txwv hais tias, qhov uas yus ywj rau kev ntxias yeej zoo li yus muab ib khoom hlau txav ze ze rau ib daim hlau nplaum. Daim hlau nplaum muaj zog rub khoom hlau thiab ua kom nyob ruaj nrees. Daim hlau nplaum tsis muaj zog tsuas yog thaum yus ua kom khoom hlau nyob deb xwb. Yog li ntawd, ib yam li ib daim hlau nplaum tswj tsis tau khoom hlau uas nyob deb, thaum peb tiv thaiv kom txhob raug ntxias, kev ntxias ploj mus thiab tsis muaj hwj chim tswj peb lub siab lub ntsws, es yog li ntawd, tsis tswj kav tej yam peb ua.

Zaj piv txwv no ua rau kuv nco txog ib tug mej zeej rau siab ntseeg ntawm lub Koom Txoos uas qhia ib zaj lus rau kuv ntev tas los lawm. Tus mej zeej no qhia kuv tias muaj ib hnub thaum sawv ntxov nws tsim log es ib txoj kev xav tsis tsim txiaj uas tsis tau xav dua tau nkag los rau hauv nws lub siab. Ua rau nws xav tsis thoob, tiam sis ib me pliag xwb, nws hais rau nws tus kheej thiab hais rau txoj kev xav ntawd hais tias, “Tsis kam!” thiab muab ib yam zoo los pauv kom nws tsis txhob xav txog qhov uas nws tsis xav muaj. Nws tau qhia kuv tias thaum nws siv nws txoj kev ywj siab xaiv kev ncaj ncees, ces qhov uas nws tau xav twb ploj mus huv tib si.

Thaum Maulaunais tau hais kom cov neeg ntseeg Khetos thiab hloov siab lees txim, nws tau thov kom lawv los cuag tus Cawm Seej kawg siab kawg ntsws, muab tej uas tsis huv tshem tawm ntawm lawv tus kheej mus. Tsis tas li ntawd, Maulaunais tau caw lawv thov Vajtswv, nrog txoj kev ruaj nrees khov kho, kom lawv yuav tsis txhob raug kev ntxias.¹² Yog peb yuav ua raws li tej ntsiab cai no nyob hauv peb lub neej, ces peb yuav tsum tsis txhob ntseeg tej no xwb; tiam sis peb kuj yuav tsum hloov peb lub siab lub ntsws kom xav ua raws li tej ntsiab cai no. Yog peb xav hloov li no ces peb yuav tsum sib zog txhua hnub tsis tu tsis tseg, thiab tso siab rau tus Cawm Seej, vim peb tej kev xav txog sab cev nqaij daim tawv yuav tsis ploj mus yog tsis muaj Nws txoj kev pab. Kev tawm tsam kev ntxias los yuav tsum rau siab ntseeg mus tas yus lub neej. Tiam sis thov kom nej paub tias tus tswv npaj siab pab peb thiab Nws cog lus tias peb yuav tau koob hmoov zoo kawg yog tias peb nyiaj mus kom txog thaum kawg.

Thaum ib lub sij hawm nyuaj heev thaum Joseph Smith thiab cov uas nrog nws nyob hauv lub Tsev Kaw Liberty lawv tsis tau muaj kev ywj siab li tsuas yog lawv tej kev xav xwb, es tus Tswv tau pab qhia lawv thiab cog lus rau lawv ib yam li Nws cog lus rau peb hais tias:

“Cia koj lub siab muaj txoj kev siab hlub puv nkaus rau txhua tus neeg, thiab rau tsev neeg uas muaj kev ntseeg, thiab cia kev tsim txiaj txhawb koj tej kev xav kom tsis tu ncua; thaum ntawd koj txoj kev tso siab yuav muaj zog tuaj nyob ntawm Vajtswv xub ntiag; …

“Tus Vaj Ntsuj Plig Dawb Huv yuav ua koj tus khub tsis tu tsis tseg, thiab koj tus cwj vaj yog tus cwj vaj ntawm kev ncaj ncees thiab kev tseeb uas tsis hloov li.”¹³

Yog peb ua li no, peb yuav xav tej yam dawb huv tsis tu tsis tseg thiab tej kev xav zoo yuav ua rau peb ua ncaj ncees.

Maulaunais kuj hais kom nws cov neeg tsis txhob ua raws li lawv lub siab ntshaw.¹⁴ Lo lus ntshaw hais txog ib txoj kev xav tau heev uas tsis tsim nyog.¹⁵ Lo lus ntawd hais txog tej kev xav phem uas ua rau ib tug neeg tsom ntsoov rau nws tus kheej los sis tej yam hauv lub ntiaj teb no thiab tsis ua zoo, tsis muaj lub siab dawb, thiab tsis ua raws li Vajtswv cov lus txib, thiab li ntawd. Feem ntau kev ntshaw nyob hauv yus tej kev xav ua plees ua yi. Tus Thwj Tim Povlauj tau hais txog tej kev xav li no thaum nws siv tej lus xws li kev phem kev qias, ua dog ua dig, … ntxub, … sib khib, sib ceg sib ntaus, … thiab li ntawd.¹⁶ Ntxiv rau tej yam phem txog kev ntshaw, peb yuav tsum nco ntsoov tias tus yeeb ncuab siv kev ntshaw ua ib yam ntsiag to kom dag ntxias peb ua txhaum.

Kuv cov kwv tij thiab cov muam, kuv ua tim khawv tias thaum peb tso siab rau lub pob zeb ntawm peb txoj kev cawm seej, tus uas cawm peb, thiab ua raws li Maulaunais qhia, peb txoj kev txawj tswj kav peb tej kev xav yuav muaj zog ntxiv. Kuv cog lus rau nej tias peb sab ntsuj plig yuav loj hlob tuaj sai dua ntxiv, ua rau peb lub siab hloov, thiab ua rau peb zoo li Yexus Khetos ntxiv. Tsis tas li ntawd, tus Vaj Ntsuj Plig Dawb Huv lub hwj huam los yuav muaj ntxiv tsis tu tsis tseg hauv peb lub neej. Ces tus yeeb ncuab tej kev ntxias yuav tsis muaj hwj chim zuj zus, peb thiaj li yuav zoo siab ntxiv thiab yuav ua neej dawb huv thiab rau siab.

Kuv hais rau nej cov uas twb poob rau kev ntxias thiab xav txog tej yam tsis ncaj ncees, kuv xav cog lus rau nej tias yeej muaj ib txoj kev rov qab los, muaj kev cia siab los ntawm Khetos. Ob peb xyoos tas los kuv tau muaj cib fim nrog ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg uas tau muaj kev nyuaj siab txhawj xeeb tom qab nws ua txhaum loj heev. Thaum kuv ntsib nws, kuv pom ib txoj kev tu siab hauv nws qhov muag, tiam sis muaj kev cia siab uas ci ci hauv nws lub ntsej muag. Kuv saib nws zoo li nws twb txo hwj chim thiab hloov siab lawm. Yav dhau los nws yog ib tug Neeg Ntseeg Khetos thiab tus Tswv tau foom koob hmoov rau nws. Tiam sis, nws tau cia ib txoj kev xav tsis txim txiaj nkag los hauv nws lub siab, ces nws txawm xav ntxiv. Nws cia tej kev xav li no pheej nkag los hauv nws lub siab, ces tsis ntev tej kev xav no twb tuaj cag thiab loj tuaj hauv nws lub siab. Thaum kawg nws tau ua raws li tej kev xav tsis txim nyog no, nws thiaj li tau txiav txim ua tej yam uas twb txhaum tag nrho uas muaj nqis rau nws hauv nws lub neej. Nws tau qhia kuv tias yog nws tsis tau cia thawj txoj kev xav ntawd nkag hauv nws lub siab, ces nws yuav tsis muaj siab xav ywj tus yeeb ncuab tej kev ntxias—tej kev ntxias uas ua rau nws tu siab kawg nkaus li tau ib ntus.

Zoo siab uas zoo li tus tub ua txhaum nyob hauv zaj lus piv txwv haus phau Lukas, nws tau nco dheev thiab tsim los ntawm kev ua npau suav phem.¹⁷ Nws rov qab tso siab rau tus Tswv thiab tau tu siab txog nws tej kev txhaum thiab xav rov qab los rau hauv tus Tswv pab yaj. Hnub ntawd los wb ob leeg tau paub txog tus Cawm Seej txoj kev hlub txhiv dim rau peb. Thaum wb sib ntsib tag, wb ob leeg los kua muag, thiab kuv yeej nco ntsoov tias nws lub ntsej muag xyiv fab npaum li cas thaum nws tawm kuv lub hoob kas mus.

Kuv cov phooj ywg zoo, thaum peb tiv taus tej kev ntxias me me, uas feem ntau nkag los rau hauv peb lub neej thaum peb tsis xav, ces peb haj yam dim tau tej kev txhaum loj heev. Ib yam li Thawj Tswj Hwm Spencer W. Kimball hais tias: “Ib tug neeg yeej tsis ua txhaum loj heev ua ntej nws ywj rau tej kev ntxias me me ua ntej, uas qhib qhov rooj rau nws ua tej kev txhaum loj dua. … ‘Ib daim liaj teb du du [tsis] tuaj nyom sai sai.’”¹⁸

Thaum Nws npaj ua Nws ntiag tug hauj lwm hauv lub ntiaj teb no, tus Cawm Seej Yexus Khetos tau coj yam ntxwv rau peb txog qhov uas yus yuav tsum tiv thaiv kom txhob raug txhua yam uas ntxias kom peb tsis ua raws li peb lub hom phiaj mus ib txhis li. Tom qab tus yeeb ncuab tawm tsam ob peb zaug, tus uas xav kom tus Cawm Seej ntxeev siab rau Nws ntiag tug hauj lwm, Yexus cia li ntiab tus dab phem tawm mus hais tias: “Ntxwg Nyoog, koj cia li khiav mus! … Ces Dab Ntxwg Nyoog txawm ncaim Yexus mus lawm. Tom qab ntawd muaj ib cov tim tswv ceeb tsheej los tu Yexus.”¹⁹

Kuv cov kwv tij thiab cov muam, nej puas txawj xav tias yuav zoo li cas yog tias peb txais dag zog los ntawm tus Cawm Seej thiab hais tias “Tsis kam” thiab “Koj cia li khiav mus” rau tej kev xav tsis tsim txiaj thaum lub sij hawm tej kev xav ntawd pib nkag los rau hauv peb lub siab? Tej yam uas peb lub siab xav tau yuav hloov li cas? Tej yam uas peb mam li ua yuav ua li cas pab peb nyob ze tus Cawm Seej thiab ua rau peb muaj tus Vaj Ntsuj Plig Dawb Huv lub hwj huam hauv peb lub neej? Kuv paub yog peb coj raws li Yexus tus yam ntxwv, peb yuav dim tej yam tu siab thiab tej yam tsis tsim nyog uas yuav ua rau peb tsev neeg muaj teeb meem thiab sib cav, tej kev xav tsis zoo, tej kev ua tsis ncaj thiab ua phem, kev muaj yees, thiab txhua yam ntxiv uas tsis yog raws li tus Tswv cov lus txib.

Nyob hauv ib zaj lus los ntawm lub Plaub Hlis Ntuj xyoo no, peb tus yaj saub, Thawj Tswj Hwm Russell M. Nelson tau cog lus tias cov uas txaus siab “mloog Nws hais”—mloog Yexus Khetos hais—thiab ua raws li Yexus cov lus txib “yuav txais hwj chim ntxiv kom paub ua li cas thaum raug ntxias, raug teeb meem, thiab muaj kev qaug zog” thiab peb yuav haj yam muaj kev xyiv fab ntxiv, tsis hais thaum muaj kev kub ntxhov zuj zus tuaj.²⁰

Kuv ua tim khawv rau nej tias peb tus yaj saub tej lus cog tseg yeej yog tej yam uas tus Cawm Seej tau cog lus rau peb. Kuv caw peb txhua tus kom “mloog Nws hais” nrog txhua txoj kev xav thiab coj raws li Nws kawg siab kawg ntsws thiaj li yuav muaj dag zog hais “Tsis kam” thiab “Cia li khiav mus” rau txhua yam uas yuav ua rau peb tsis zoo siab hauv lub neej no. Yog peb ua li no, kuv cog lus tias tus Tswv yuav xa Nws tus Ntsuj Plig Dawb Huv ntxiv kom txhawb peb lub zog thiab nplij peb lub siab, thiab peb yuav haum tus Tswv lub siab.²¹

Kuv ua tim khawv tias Yexus Khetos muaj txoj sia nyob thiab dhau los ntawm Nws, peb yuav kov yeej tsu yeeb ncuab tej kev ntxias phem thiab los ua neeg tsim nyog nrog tus Tswv nyob mus ib txhis nrog peb Leej Txiv Saum Ntuj Ceeb Tsheej. Kuv ua tim khawv txog tej yam tseeb no thiab qhia tias kuv hlub nej thiab peb tus Cawm Seej, tus uas kuv qhuas thiab hwm tas mus li. Kuv hais tej lus no los ntawm Yexus Khetos lub npe dawb ceev, amees.