Tus Tswv Txhawb Pab Ntau Heev
Qhov uas yus raug txom nyem thiab kev poob siab yeej tsis hloov qhov uas tus Tswv saib xyuas thaum Nws txhawb pab peb, foom koob hmoov rau peb.
Muaj ib hnub, thuam kuv yog ib tug tub txib uas ua hauj lwm hauv ib ceg ntseeg nyog hauv lub pov txwv me me hu ua Amami Oshima Nyij Pooj Teb, kuv tus khub thiab kuv wb zoo siab kawg thaum wb kawm tias Thawj Tswj Hwm Spencer W. Kimball yuav tuaj xyuas Exias thiab txhua tus mej zeej thiab cov tub txib nyob Nyij Pooj Teb yuav mus rau Tokyo mus mloog tus yaj saub hais lus hauv ib lub rooj sab laj. Cov mej zeej hauv peb ceg ntseeg thiab kuv tus khub peb tau pib npaj yuav mus rau lub rooj sab laj no, caij nkoj hla tus Dej East China mus rau Nyij Pooj tuam teb, tom qab ntawd yuav caij tsheb nqaj hlau ntev li 15 teev mus rau Tokyo. Tu siab uas tsis tau ua li ntawd. Wb qhov chaw tshaj tawm txoj moo zoo tus thawj tswj hwm tau hais rau wb tias vim wb nyob deb dhau ces wb mus tsis taus rau lub rooj sab laj nyob hauv Tokyo.
Thaum cov mej zeej hauv peb ceg ntseeg me me tau mus rau Tokyo, wb tseem nyob. Ob peb hnub tom qab ntawd yeej tnsiag to thiab kho siab. Wb tau ua kev sib ntsib txais lub cim nco rau wb ob leeg xwb nyob hauv lub tsev teev tiam, thaum Tsoom Haiv Neeg Ntseeg hauv Hnub Nyoog Kawg thiab cov tub txib ntawm Nyij Pooj koom lub rooj sab laj.
Kuv haj yam poob siab heev thaum cov mej zeej hauv ceg ntseeg rov qab los ntawm lub rooj sab laj thiab kuv mloog lawv hais txog qhov uas Thawj Tswj Hwm Kimball tau tshaj tawm txog ib lub tuam tsev uas yuav ua nyob hauv Tokyo. Lawv zoo siab kawg thaum lawv qhia tias qhov ntawd yog qhov lawv ua npau suav txog. Thaum lawv hnov txog lub tuam tsev, lawv tau piav tias cov mej zeej thiab cov tub txib zoo siab kawg nkaus lawv thiaj li npuaj tes ua ke.
Ntau xyoo twb dhau mus lawm, thiab kuv tseem nco txog kuv txoj kev poob siab vim kuv tsis tau mus koom kev sib ntsib tseem ceeb ntawd.
Ob peb lub hlis no kuv tau xav txog lub sij hawm no, thaum kuv pom lwm tus raug kev poob siab thiab tu siab ntau heev—ntau tshaj kuv muaj thaum kuv yog ib tug tub txib hluas—muaj vim peb raug phaum mob thoob ntiaj teb COVID-19.
Xyoo no thaum phaum mob kis sai sai ntxiv, Thawj Pawg Thawj Tswj Hwm tau cog lus tias “lub Koom Txoos thiab cov mej zeej yuav rau siab ua cov pej zeem thiab cov neeg zej zog zoo”1 thiab yuav “coj raws li tej lus ceeb toom.”2 Yog li ntawd peb twb pom lub Koom Txoos tsis pub peb sib ntsib, ib nrab ntawm lub Koom Txoos cov tub txib yuav tsum rov qab los rau lawv lub teb chaws, thiab tag nrho cov tuam tsev raug kaw nyob thoob plawb lub Koom Txoos. Muaj neeg coob uas tau npaj mus rau hauv lub tuam tsev ua kab ke rau lawv tus kheej—tsis hais kev cai sib khi hauv lub tuam tsev. Lwm tus tau ua tub txib thiab tso tawm ntxov los sis tau tso ib ntus thiab txib mus rau lwm qhov chaw.
Thaum lub sij hawm no, cov thawj coj tseem fwv thiab kev kawm ntawv tau muab tsev kawm ntawv kaw—yuam muab txhua txoj kev sib tw thiab tej yam ntxim saib ntxim ua txiav tas lawm. Nej feem coob tau npaj rau tej kev ua yeeb yam los yog kev sib tw uas tsis muaj leej twg hnov los sis pom.
Qhov tu siab tshaj yog tej tsev neeg uas muaj ib tug hlub uas tso lub ntiaj teb no tseg thaum lub sij hawm no; lawv feem coob ua tsis tau lub ntees tuag los yog koom ua ke zoo li lawv xav.
Los yog hais tias, nej feem coob tau raug kev poob siab, kev tu siab, thiab kev nyuaj siab tiag tiag. Yog li ntawd peb yuav ua il cas kom tau zoo thiab mus tom ntej thaum txhua yam puas lawm?
Tus yaj saub Nifais pib kos nws cov phiaj me thaum nws yog ib tug laus lawm. Thaum nws xav txog nws lub neej thiab cov lus qhuab qhia, nws tau xav txog ib yam tseem ceeb, nyob auv nqe thib ib hauv Phau Ntawv Maumoos. Nqe no qhia ib lub ntsiab cai tseem ceeb rau peb niaj hnub nim no. Nws sau hais tias, “Kuv, Nifais, vim tau yug los ntawm niam thiab txiv uas zoo … , thiab vim kuv tau pom kev txom nyem ntau nyob hauv kuv lub neej, txawm li ntawd los, vim tus Tswv tau txhawb pab kuv ntau heev nyob hauv tag nrho kuv lub neej.”3
Peb cov uas kawm Phau Ntawv Maumoos paub txog tej kev txom nyem uas Nifais hais txog. Tiam sis tom qab nws hais txog nws tej kev txom nyem, Nifais qhia txog txoj moo zoo hais tias tus Tswv tau txhawb pab nws nyob hauv tag nrho nws lub neej. Qhov uas yus raug txom nyem thiab kev poob siab yeej tsis hloov qhov uas tus Tswv saib xyuas thaum Nws txhawb pab peb, foom koob hmoov rau peb.
Tsis ntev tas los Lesa wb tau sib ntsib nrog 600 tus tub txib ntxhais txib nyob hauv Audaliyas, feem coob yuav tsum nyob hauv tsev los yog txwv tsis pub mus vim tsis xav raug COVID-19, lawv ua hauj lwm los ntawm lawv tej tsev. Peb tau hais txog cov neeg nyob hauv Phau Tshiab, Phau Ntawv Maumoos, thiab phau Lus Qhuab Qhia thiab Kev Khi Lus uas tus Tswv tau foom koob hmoov rau lawv kom ua tej yam tseem ceeb thaum lawv raug txom nyem. Peb nco ntsoov tej yam uas lawv txhua tus txawj ua nrog rau tus Tswv txoj kev pab ntau dua li peb nco txog tej yam lawv ua tsis taus thaum lawv raug kaw thiab raug txwv.
Peb nyeem txog Povlauj thiab Xilas, thaum nkawd raug kaw qhov taug, nkawd tau thov Vajtswv, hu nkauj, qhia, ua tim khawv—thiab tau muab tus kws zov ua kev cai raus dej.4
Thiab hais txog Povlauj ntxiv, nyob hauv Loos, uas raug kaw hauv tsev tau ob xyoos, thaum lub sij hawm no nws ib sij “qhia txog Vajtswv lub teb chaws,”5 thiab “qhia Tswv Yexus Khetos zaj rau txhua tus mloog.”6
Hais txog Nifais thiab Lihais, Hilamas ob tug tub, tom qab nkawd raug phem thiab raug kaw muaj hluav taws nyob ib puag ncig pov hwm nkawd thaum tus Tswv “lub suab uas meej mos muag kawg nkaus li thiab lub suab no chob txog ntua nruab siab.”7
Hais txog Amas thiab Amulej nyob hauv Amoonaihas, uas kawm tias neeg coob “ntseeg [nkawd] tej lus, thiab pib hloov siab lees txim, thiab tshawb xyuas cov vaj lug kub,”8 txawm yog lawv raug thuam thiab tsis muaj noj tsis muaj haus, los sis tsis muaj khaub ncaws hnav nkawd raug khi thiab kaw hauv qhov taub.9
Thiab hais txog Joseph Smith, uas nyuaj siab nyob hauv lub Tsev Kaw Liberty, xav tias nws raug muab tso tseg ces nws tau hnov tus Tswv tej lus: “Tej yam no … yuav zoo rau koj”10 thiab “Vajtswv yuav nrog koj nyob mus ib txhiab thiab ib txhis li.”11
Cov neeg no txhua tus tau to taub qhov uas Nifais paub: txawm lawv tau pom kev txom nyem ntau hauv lawv lub caij nyoog los, tus Tswv tau txhawb pab lawv heev.
Peb cov mej zeej thiab lub koom txoos kuj kawm tau tej yam los ntawm tus Tswv txoj kev txhawb pab peb ntau heev nyob hauv tej lub sij hawm nyuaj heev uas peb raug ob peb lub hlis tas los no. Thaum kuv hais txog cov yam ntxwv no, thov kom lawv yuav txhawb nej zaj lus tim khawv txog qhov uas tus yaj saub yog ib tug pom tau, uas tau npaj peb hloov ua ntej tau paub tias yuav muaj ib phaum mob, pab peb nyiaj tau tej teeb meem uas tau los.
Qhov thib ib ua hauv tsev thiab lub Koom Txoos txhawb nqa.
Ob xyoo tas los no, Thawj Tswj Hwm Russell M. Nelson hais tias: “Peb twb tau xav tias ‘lub koom txoos’ yog muaj nyob hauv peb tej tsev sib ntsib, es tej yam uas ua hauv tsev txhawb nqa tej ntawd xwb. Peb yuav tsum kho peb tej kev xav li no. … Ib lub Koom Txoos uas ua hauv tsev, thiab tej yam uas peb ua hauv peb … pawg ntseeg yuav txhawb nqa xwb.”12 Yeej yog ib txoj kev hloov loj heev! Peb tau kawm txoj moo zoo hauv tsev ntau vim tau muab tej tsev sib ntsib kaw lawm. Thaum lub ntiaj teb tab tom rov qab zoo li qub thiab peb rov mus rau hauv tej tsev teev ntuj, peb tseem yuav xav kawm txog txoj moo zoo hauv tsev uas peb ua thaum muaj phaum mob no.
Qhov thib ob uas qhia tias tus Tswv txhawb pab peb ntau heev yog kev txhawb pab lwm tus raws li ib txoj kev siab thiab dawb huv dua li qub.
Nyob rau xyoo 2018, Thawj Tswj Hwm Nelson tau qhia tias peb yuav ua kev txhawb pab kom hloov peb txoj kev uas “ib leeg saib xyuas ib leeg.”13 Phaum mob no twb tau tsim ntau lub cib fim rau peb kawm kev txhawb pab. Cov kwv tij thiab cov muam uas txhawb pab, cov tub hluas ntxhais hluas, thiab lwm tus tau mus pab lwm tus kom tu cov nyom, pub mov, xa xov xwm, thiab muab lub cim nco txog rau cov uas xav tau. Lub Koom txoos tau pab lwm tus nyob hauv phaum mob no thaum lawv muab khoom ntau heev faib rau tej qhov chaw ceev zaub mov cia, tej tsev rau cov neeg tsis muaj chaw nyob, thiab tej qhov chaw txhawb cov neeg poob teb chaws thiab ua tej txheej xwm kom pab lub ntiaj teb tej teeb meem loj tshaj plaws hais txog kev tshaib nqhis. Lub Koom Haum Niam Tsev cov poj niam thiab lawv tsev neeg tau tsim tej daim npog ntsej muag ntau tsis ntau rau cov neeg pab kho mob.
Zaj kawg uas qhia txog qhov uas tus Tswv txhawb pab peb ntau heev thaum peb raug txom nyem yog kev nrhiav tau kev xyiv fab thaum peb rov qab ua cov kab ke hauv lub tuam tsev.
Ib zaj dab neeg yuav pab piav txog qhov no. Thaum Muam Kaitlyn Palmer tau txais kev hu mus ua ntxhais txib thaum lub Plaub Hlis Ntuj tas los, nws zoo siab heev tiam sis nws kuj xav tias yog ib qho tseem ceeb thiab tshwj xeeb heev uas nws yuav mus rau lub tuam tsev txais nws lub vaj txiaj ntsim thiab ua kev khi lus rau Vajtswv. Tsis ntev tom qab nws tau teem sji hawm txais nws lub vaj txiaj ntsim, ces twb tau tshaj tawm tias tag nrho cov tuam tsev yuav kaw vim muaj phaum mob thoob ntiaj teb. Tom qab nws hnov xov txog qhov no, nws kawm tias nws yuav kawm hauv qhov chaw cob qhia cov tub txib ntxhais txib nyob hauv tsev xwb. Txawm yog muaj kev poob siab li no, Kaitlyn muaj kev cia siab ntau heev.
Ob peb lub hlis tom qab ntawd, Muam Palmer yeej tau xav tias nws tseem yuav muaj cib fim mus rau hauv lub tuam tsev. Nws tsev neeg tau yoo mov thiab thov Vajtswv tias cov tuam tsev yuav qhib ua ntej nws yuav mus. Txhua tag kis thaum kawm MTC hauv tsev nws yuav hais tias, “Hnub no puas yog hnub uas peb txais ib qho txuj ci tseem ceeb thiab cov tuam yuav rov qab qhib?”
Thaum lub Yim Hli Ntuj hnub tim 10, Thawj Pawg Thawj Tswj Hwm tshaj tawm tias Kaitlyn lub tuam tsev yuav rov qab qhib ua kab ke rau cov neeg ciaj txog hub uas nws yuav caij nyab hoom thaum sawv ntxov mus rau nws qhov chaw tshaj tawm txoj moo zoo. Nws mus tsis taus rau lub tuam tsev thiab caij nyab hoom ntawd. Nws tsev neeg tsis muaj kev cia siab ntau, tiam sis lawv hais rau lub tuam tsev tus thawj tswj hwm Michael Vellings saib puas muaj ib txoj kev teb lawv tej lus thov kom ua ib qho txuj ci tseem ceeb. Vajtswv twb teb lawv tej kev yoo mov thiab tej lus thov!
Thaum 2:00 sawv ntxov, ua ntej nws nyab hoom mam li ya, Muam Palmer thiab nws tsev neeg, nyob rau ntawm lub tuam tsev lub qhov rooj, lawv tau ntsib lub tuam tsev tus thawj tswj hwm uas hais rau lawv tias, “Nyob zoo tsev neeg Palmer. Zoo siab tos txais nej rau lub tuam tsev!” Thaum nws ua nws vaj txiaj ntsim tas, yuav tsum mus sai sai cia ib yig ntxiv uas tos nyob rau ntawm lub qhov rooj. Lawv tau tsav tsheb ncaj qha mus rau tshav nyab hoom txog sij hawm rau nws mus rau nws qhov chaw tshaj tawm txoj moo zoo.
Cov kab ke hauv lub tuam tsev uas peb nco heev yeej yuav ua rau peb zoo siab tshaj thaum cov tuam tsev nyob thoob plaws lub ntiaj teb rov qab qhib.
Thaum kuv xaus lus, thov mloog tus Yaj Saub Joseph Smith tej lus uas txhawb nqa thiab pab peb cia siab. Yus yeej yuav tsis xav tias nws tau sau tej lus no thaum nws raug txom nyem thiab nyob nws ib leeg, raug txwv tsis pub tawm hauv Nauvoo mus, vim nws zais kom cov neeg phem tsis txhom nws:
“Nim no, peb hnov dab tsi nyob hauv txoj moo zoo uas peb tau txais? Ib lub suab ntawm kev zoo siab! Ib lub suab ntawm kev hlub tshua los saum ntuj ceeb tsheej los; thiab ib lub suab ntawm kev tseeb tawm hauv av los; tej moo zoo siab rau cov tuag; ib lub suab ntawm kev zoo siab rau cov ciaj thiab cov tuag; tej moo zoo siab ntawm kev xyiv fab heev. …
“… Peb yuav tsis mus lawm yav tom ntej nrog txoj hauj lwm tseem ceeb ua luaj no los? Cia li mus lawm yav tom ntej thiab txhob mus thaub qab. Ua siab loj, … thiab cia li mus, mus tsis tu ncua kom txog thaum yeej! Nej lub siab cia li xyiv fab, thiab cia li zoo siab heev. Cia lub ntiaj teb pib hlo hu nkauj.”14
Cov kwv tij thiab cov muam, kuv ntseeg tias yuav muaj ib hnub, nej txhua tus yuav nco txog tej xwm uas tau tso tseg thiab kev tu siab, kev poob siab, thiab kev kho siab uas los ntawm phau mob no thiab yuav pom tias nej twb tau koob hmoov ntau thiab muaj kev ntseeg thiab tej zaj lus tim khawv ntxiv. Kuv ntseeg tias nyob hauv lub neej no, thiab hauv lub neej tom ntej, nej tej kev txom nyem, xws li muaj hauv Amoonaihas thiab lub Tsev Kaw Liberty, Vajtswv yuav muab fij los ua tej yam uas pab tau nej.15 Xws li Nifais, thaum peb raug txom nyem kuv thov kom peb yuav pom tias tus Tswv txhawb pab peb.
Kuv xaus lus ua tim khawv txog Yexus Khetos, tus uas kuj raug txom nyem ntau thiab thaum Nws theej peb lub txhoj nws nqis dhau txhua yam.16 Nws to taub peb txoj kev tu siab, txoj kev mob, thiab kev poob siab. Nws yog peb tus Cawm Seej, peb tus Txhiv Dim, peb txoj kev cia siab, kev nplij siab, thiab tus uas tso peb dim. Kuv ua tim khawv txog qhov no los ntawm Yexus Khetos lub npe dawb ceev, amees.