Qhov Muag uas Pom Tau Kev
Los ntawm tus Vaj Ntsuj Plig Dawb Huv, Khetos yuav ua tau rau peb pom peb tus kheej thiab pom lwm tus li Nws pom lawv.
Pom Tau Vajtswv Txhais Tes
Kuv nyiam zaj dab neeg uas hais txog ib tug tub hluas uas ua hauj lwm rau tus yaj saub Elisas. Muaj ib tag kis tus tub hluas ntawd tsim, mus nraum zoov, thiab pom tias cov tub rog twb nyob puag ncig lub zos thiab npaj yuav ua kom lawv puas tsuaj mus. Nws khiav mus rau Elisas hais tias: “Kuv tus Tswv as! peb yuav ua li cas?”
Elisas teb hais tias, “Tsis txhob ntshai: Peb tog muaj coob dua lawv tog.”
Elisas paub tias tus tub hluas xav pom dab tsi kom ua rau nws nyob tus me ntsis; nws xav ua yog toog pom. Ces “Elisas thov Vajtswv hais tias, … Tus Tswv, … thov koj qhib nws lub qhov muag kom nws pom. Tus Tswv teb Elisas tej lus thov, ces Elisas tus tub txib thiaj pom tej nees huab cua thiab tsheb nees nplaim taws nyob puv toj roob hauv pes ib ncig Elisas.” 1
Tej zaum yeej muaj tej lub sij hawm uas nej zoo li tus tub qhe no, es nej tsis pom Vajtswv txoj kev pab hauv nej lub neej—thaum ua zoo li nej raug kev nyuaj siab—uas ua rau nej txhos caug kiag. Ua siab ntev tos cia siab rau Vajtswv thiab Nws lub sij hawm, vim nej ntseeg tau Nws lub siab tag nrho nej siab. Tiam sis tseem kawm tau ib qhov ntxiv. Cov me viv ncaus thiab nus, nej thov tau Vajtswv kom tus Tswv yuav qhib nej qhov muag kom nej pom tau tej yam uas feem ntau nej tsis pom.
Pom Peb tus Kheej Ib Yam Li Vajtswv Pom Peb
Tej zaum qhov tseem ceeb tshaj plaws rau peb pom kom meej ces yog peb pom tias peb yog leej twg thiab Vajtswv yog leej twg tiag tiag—peb yog niam thiab txiv saum ntuj ceeb tsheej cov tub cov ntxhais uas muaj “yam ntxwv zoo li Vajtswv thiab txoj sia nyob mus ib txhis.” 2 Thov kom Vajtswv yuav qhia cov lus tseeb no rau nej, thiab seb Nws xav li cas txog nej. Thaum yus to taub yus yog leej twg thiab yus lub hom phiaj zoo li cas ces, tej ntawd yuav pab tau txhua yam hauv yus lub neej.
Kev Pom Lwm tus Neeg
Yog peb to taub tias Vajtswv pom peb li cas ces yuav pab peb pom lwm tus li Nws pom thiab. David Brooks ib tug kws sau ntawv hais tias: “Feem ntau neeg tej teeb meem loj tshaj plaws yog vim zoo li tib neeg xav tias tsis muaj neeg pom thiab paub lawv. … Lub ntsiab yog peb yuav tsum ntsia … lwm tus thiab lawv yuav tsum pom peb kom tob me ntsis.” 3
Yexus Khetos yeej pom neeg tob heev. Nws pom tau ib leeg dhau ib leeg, lawv tej kev xav tau, thiab lawv muaj peev xwm npaum li cas. Luag tej pom neeg nuv ntses, neeg ua txhaum, los sis neeg dog dig xwb, tiam sis Yexus pom tias lawv yog nws cov thwj tim; thaum luag pom lwm tus raug dab phem ntxias, Yexus pom dhau tej yam ntawd, paub tus neeg ntawd, thiab kho nws xwb. 4
Txawm tias peb muaj hauj lwm ntau heev, los peb yeej ua tau li Yexus tus yam ntxwv thiab pom tib neeg—lawv tej kev xav tau, kev ntseeg, kev cov nyom, thiab lawv muaj peev xwm npaum li cas. 5
Thaum kuv thov Vajtswv kom tus Tswv pab qhib kuv qhov muag kom kuv pom tej yam uas feem ntau kuv tsis pom, kuv noog kuv tus kheej thiab mloog zoo zoo seb: “Muaj dab tsi uas kuv yuav tsum tsis txhob ua ntxiv?” thiab “Muaj dab tsi uas kuv yuav tsum tau pib ua?” 6
Ntau lub hlis tas los no, thaum peb noj lub cim nco txog, kuv noog kuv tus kheej ob lo lus noog no thiab qhov ceeb toom uas kuv hnov ua rau kuv xav tsis thoob. “Tsum tsis txhob ntsia koj lub xov tooj ntawm tes thaum koj tos luj khoom tom tab laj.” Qhov uas saib kuv lub xov tooj yog ib yam uas kuv cia li ua xwb; yog ib lub sij hawm uas kuv teb email, nyeem xov xwm, los sis lam saib Facebook tej xwb.
Hnub tom qab ntawd, kuv tab tom tos yuav khoom. Kuv thau kuv lub xov tooj tawm tab sis kuv nco qab qhov ceeb toom uas kuv hnov. Kuv muab kuv lub xov tooj cia thiab saib ntawm kuv ib ncig. Kuv pom ib tug yawg laus ua kuv ntej. Nws muaj ob peb lub kos poom mov rau miv noj. Kuv tsis paub yuav hais dab tsi, ces kuv cia li hais tias, “Kuv pom hais tias koj muaj ib tug miv.” Nws hais tias huab cua yuav tsis zoo, es nws npaj kom txaus tus miv. Wb sib tham me ntsis ces nws tig los hais rau kuv hais tias, “Koj paub, kuv tsis tau qhia leej twg li, tiam sis hnub no yog kuv hnub yug.” Ua rau kuv hauv siab sov so. Kuv hais zoo siab hnub yug rau nws thiab ua twj ywm thov Vajtswv ua nws tsaug vim yog kuv tseem saib kuv lub xov tooj ces kuv yuav tsis pom lub cib fim uas tau sib tham nrog tus neeg uas xav tau qhov ntawd tshaj plaws.
Hauv kuv lub siab mas kuv yeej tsis xav ua li tus neeg Livais los sis lub pov thawj uas taug kev mus rau lub zos Yelikaus—es cia li ntsia tiam sis mus dhau plaws lawm. 7 Tiam sis feem ntau kuv yeej tau ua li ntawd.
Pom Txoj Hauj Lwm uas Vajtswv Txib Kuv Ua
Tsis ntev tas los no kuv kawm ib qho tseem ceeb txog saib kev pom lwm tus kom tob me ntsis los ntawm ib tug ntxhais hluas hu ua Rozlyn.
Kuv ib tug phooj ywg tau qhia rau kuv hais tias, thaum nws tus txiv uas nws twb yuav tau 20 xyoo nrauj nws. Nkawd tau faib sij hawm nrog cov me nyuam, ces ua rau nws tsis xav mus lub koom txoos nws ib leeg xwb. Nws hais tias:
“Hauv ib lub koom txoos uas ib tse neeg yog ib yam tseem ceeb, yus txaj muag zaum yus ib leeg xwb. Thawj hnub Sunday kuv mus, kuv tau thov Vajtswv kom tsis txhob muaj ib tug neeg hais lus rau kuv li. Kuv kua muag nyob ntiav heev. Kuv mus zaum tib qhov chaw uas peb ib txwm zaum, cia siab hais tias yuav tsis muaj leej twg pom hais tias tshuav muaj kuv ib leeg zaum ntawd xwb.
“Ib tug ntxhais hluas hauv peb pawg ntseeg tig los ntsia kuv. Kuv sim luag nyav rau nws. Nws kuj luag nyav rau kuv thiab. Kuv pom tias nws lub ntsej muag txhawj me ntsis. Kuv thov twj ywm kom nws tsis txhob los nrog kuv tham—kuv tsis muaj ib qho lus zoo hais thiab kuv paub tias kuv yuav quaj. Kuv rov qab ntsia rau ntawm kuv sab ncej puab kom tsis txhob pom leej twg.
“Kuv pom nws ib sij tig los ntsia kuv ib zaug. Thaum rooj sab laj ntawd tag, nws ncaj qha los rau kuv. Kuv hais tias, ‘Nyob zoo Rozlyn.’ Nws khawm nkaus kuv thiab nws hais tias, ‘Viv ncaus Smith, kuv pom hais tias hnub no yog ib hnub tsis zoo rau koj. Thov txim. Kuv hlub koj.’ Ua nkaus li kuv xav ntag, kuv kua muag poob dawb vog, nws khawm kuv ib zaug ntxiv. Tiam sis thaum kuv pib mus kev, kuv xav tau tias, ‘Tej zaum kuv nyiaj tau qhov no.’
“Tus me ntxhais hluas uas muaj 16 xyoo no, nrhiav tau kuv txhua hnub Sunday thaum noj lub cim nco txog es khawm kuv txhua zaus thiab noog hais tias, ‘Koj nyob li cas?’ Qhov no ua rau kuv xav tuaj rau lub koom txoos. Qhov tseeb mas kuv tos ntsoov tej sij hawm uas nws khawm kuv ntawd. Muaj neeg pom kuv. Lawv paub tias kuv nyob ntawd. Muaj neeg hlub kuv.”
Leej Txiv zoo siab hlo foom koob hmoov rau peb, yuav kom peb pom tau lwm tus tob me ntsis ces peb yuav tsum thov nws—thiab ces ua li nws hais. Thov kom peb pom lwm tus raws li Nws pom—Nws cov tub thiab ntxhais uas muaj yeeb koob. Ces cia li hlub, pab, thiab ua kom lawv paub tias lawv muaj nqi thiab muaj cuab kav. Yog peb ua raws tus txheej txheem no, peb yuav pom tias peb yog cov uas “coj raws li Yexus Khetos tiag tiag.” 8 Lwm tus yuav ntseeg tau peb siab nrog lawv li. Thiab yuav ua rau peb paub peb tus kheej thiab peb lub hom phiaj yog dab tsi.
Kuv tus phooj ywg kawm tau ib qho ntxiv thaum nws zaum nws ib leeg ntawm rooj zaum ntawd nws ib leeg xwb, nws xav tias 20 xyoo uas rau siab ua lub neej raws li txoj moo zoo qhia hauv nws lub tsev puas lam xiam dawb do xwb lawm. Nws xav paub ib qho kom nws siab nyob tus; nws xav pom kev meej. Nws hnov ib lo lus noog hauv nws nruab siab hais tias: “Yog vim li cas koj ho ua tej ntawd mas? Puas yog koj ua kom tau nqi zog los, kom luag qhuas koj los, los yog koj ua kom txhua yam raws li koj siab nyiam?” Nws xav twj ywm ib pliag, ces nws txawm teb hais tias, “Kuv ua tej ntawd vim kuv hlub tus Cawm Seej. Thiab kuv nyiam Nws txoj moo zoo heev.” Tus Tswv qhib nws qhov muag kom nws pom kev. Qhov me me no ua rau nws ua neej mus yav tom ntej nrog kev ntseeg rau Khetos, txawm tias nws raug kev nyuaj siab los xij.
Kuv ua tim khawv hais tias Yexus Khetos hlub peb thiab yeej muab tau qhov muag rau peb pom—txawm nyuaj rau peb, txawm peb nkees, txawm peb nyob peb ib leeg, thiab txawm tsis muaj raws li peb cia siab. Los ntawm Nws txoj kev tshav ntuj, Nws yuav foom koob hmoov thiab ua kom peb loj hlob ntxiv. Los ntawm tus Vaj Ntsuj Plig Dawb Huv, Khetos yuav ua tau rau peb pom peb tus kheej thiab pom lwm tus li Nws pom lawv. Nws yuav pab kom peb paub qhov twg tseem ceeb. Peb yuav pom tus Tswv txhais tes hauv peb lub neej tau kev pab me ntsis—peb yuav pom qhov tob tob.
Ces thaum txog hnub uas nws yuav “tshwm los peb yuav zoo li nws, vim peb yuav pom nws tseeb tias nws zoo li cas tiag; xwv kom peb yuav muaj txoj kev cia siab li no” 9 kuv thov los ntawm Yexus Khetos lub npe, amees.