Lub Hwj Chim uas Kav Ib Txhis

Thaum kuv tau nyeem peb tus yaj saub, Thawj Tswj Hwm Russell M. Nelson, tej lus qhia, kuv nrhiav tau ib lo lus uas nws tau siv ntau zaus thaum nws hais lus. Lo lus ntawd yog lub hwj chim.

Nyob hauv thawj lub tuam rooj sab laj thaum nws los ua ib tug Thwj Tim, Thawj Tswj Hwm Nelson tau hais lus txog lub hwj chim.¹ Txij thaum ntawd los nws tseem qhia txog lub hwj chim. Txij thaum peb tau txhawb nqa pom zoo rau Thawj Tswj Hwm Nelson ua peb tus yaj saub los, nws tau qhia peb txog lub ntsiab cai ntawm lub hwj chim—qhov tseem ceeb yog Vajtswv lub hwj chim—thiab peb yuav tsum ua li cas kom tau qhov ntawd. Nws tau qhia peb tias peb yuav ua li cas muaj Vajtswv lub hwj chim thaum peb txhawb pab lwm tus,² vim li cas kev hloov siab lees txim ua rau peb txais tau Yexus Khetos thiab Nws txoj Kev Theej Txhoj nyob hauv peb lub neej,³ thiab vim li cas lub pov thawj hwj—uas yog Vajtswv lub hwj chim thiab txoj cai—foom koob hmoov rau txhua tus uas ua kev khi lus nrog Nws.⁴ Thawj Tswj Hwm Nelson tau ua tim khawv tias yuav pub Vajtswv lub hwj chim rau txhua tus uas txais lub vaj txiaj ntsim nyob hauv lub tuam tsev thaum lawv ua raws li lawv tej kev khi lus.⁵

Ib co lus qhia uas Thawj Tswj Hwm Nelson hais nyob hauv lub tuam rooj sab laj hauv lub Plaub Hlis Ntuj xyoo 2020 tau tshoov kuv lub siab. Nws tau qhia kom peb “kawm ntawv thiab thov Vajtswv kom kawm ntxiv txog lub hwj chim thiab kev txawj ntse uas tau txais—los sis nej yuav tau txais—thaum nej txais vaj txiaj ntsim.”⁶

Yog li ntawd, kuv tau kawm thiab thov Vajtswv txog qhov no thiab tau kawm tej yam zoo txog lub hwj chim thiab kev txawj ntse uas Vajtswv tau foom pub rau kuv—los sis tej uas Vajtswv tseem yuav pub rau kuv.

Kev to taub tias peb yuav tsum ua li cas kom txais tau Vajtswv lub hwj chim nyob hauv peb lub neej yeej tsis yooj yim, tiam sis kuv kawm tias peb ua tau yog peb xav txog qhov ntawd hauv peb lub siab thiab thov Vajtswv kom tus Vaj Ntsuj Plig Dawb Huv qhia peb.⁷ Txwj Laug Richard G. Scott tau qhia meej tias Vajtswv lub hwj chim yog dab tsi: yog “lub hwj chim kom ua tau ntau tshaj qhov uas peb ua tau peb tus kheej.”⁸

Qhov uas peb muab Vajtswv txoj lus thiab kev ntseeg Yexus Khetos nyob hauv peb lub siab lub ntsws yeej yog ib qho tseem ceeb rau kev siv Vajtswv lub hwj chim kom pab peb nyob hauv lub caij nyoog nyuaj no. Yog peb tsis muaj Vajtswv txoj lus thiab txoj kev ntseeg nyob hauv peb lub siab, ces tej zaum peb zaj lus tim khawv thiab txoj kev ntseeg yuav ploj mus, thiab ntshe peb yuav tsis muaj peev xwm siv lub hwj chim uas Vajtswv xav pub rau peb. Kev lam ntseeg yeej tsis txaus. Tsuas yog kev ntseeg thiab Vajtswv txoj lus uas puv peb lub siab xwb yuav txaus txhawb nqa peb—thiab ua rau peb muaj peev xwm siv Nws lub hwj chim.

Thaum Muam Johnson wb tu wb cov me nyuam, wb tau hais kom lawv txhua tus kawm ntaus suab nkauj. Tiam sis wb cia wb cov me nyuam kawm ntaus suab nkauj tsuas yog lawv pab ua hauj lwm thiab xyaum ua txhua hnub. Muaj ib hnub Saturday, wb tus ntxhais Jalynn zoo siab heev nws yuav mus ua si nrog nws cov phooj ywg, tiam sis nws tseem tsis tau xyaum ntaus piano. Vim nws paub tias nws yuav tsum tau xyaum ntaus li 30 feeb, nws xav hais tias tso lub teev, vim nws tsis xav xyaum dhau sij hawm nws yuav tsum ua.

Thaum nws mus dhau ntawm lub qhov cub microwave mus rau tom lub piano, nws nres thiab nias ib co lej ntawm lub microwave. Tiam sis nws tsis tau tso lub teev, nws tau tso qhov rhaub zaub mov kom siav hauv microwave li 30 feeb. Tom qab li 20 feeb nws rov qab mus tom lub microwave saib seb puas tau txog lub sij hawm tiam sis nws pom tias lub microwave tab tom pib kub hnyiab.

Nws khiav mus rau pem sab qaum tsev hu kuv qw hais tias lub tsev kub hnyiab lawm. Kuv thiaj li khiav nkag mus rau hauv lub tsev, thiab pom tias lub qhov cub microwave tab tom cig kub hnyiab lawm.

Xwv kom cawm peb lub tsev kom txhob kub hnyiab, kuv thiaj li tau ncav mus rho txoj hluas hluav taws xob thiab nqa lub microwave tawm saum lub txee los. Kuv cia siab tias kuv yuav ua ib tug phab ej cawm peb lub tsev, kuv tuav txoj hluas faiv fab nqa lub microwave thiab muab fiav ua ib voj voos kom tsis txhob raug kuv lub cev, Ces thaum kuv tawm mus rau nraum qaum tsev kuv cia li muab cuam pov tseg rau cov nyom. Nyob ntawd peb thiaj li tau muab txoj hluas dej coj los tsuag lub microwave kom txhob kub hnyiab.

Nws tau yuam kev li cas? Ib lub tshuab microwave yuav tsum muaj dab tsi kom ntxaum zog, thiab thaum tsis muaj dab tsi nyob haud kom ntxaum zog, ces lub tshuab yuav tsum ntxaum, ua rau nws pib kub kub heev, ces tej zaum yuav cig plaws, es ua rau nws puas tsuaj tas.⁹ Peb lub tshuab microwave twb kub hnyiab lawm vim tsis muaj dab tsi nyob haud.

Ib yam li ntawd, cov uas muaj kev ntseeg thiab Vajtswv txoj lus nyob rau hauv lawv lub siab yuav txawj ntxaum thiab kov yeej tej xub hluav taws, uas tus yeeb ncuab yuav xa kom peb puas tsuaj.¹⁰ Yog tsis li ntawd, peb txoj kev ntseeg, kev cia siab, thiab kev rau siab yuav tsis kav ntev, thiab zoo li ib lub microwave uas tsis muaj dab tsi haud, tej zaum peb yuav raug puas tsuaj ib yam.

Kuv tau kawm tias kev muaj Vajtswv txoj lus nyob rau hauv kuv lub siab, nrog rau kev ntseeg tus Tswv Yexus Khetos thiab Nws txoj Kev Theej Txhoj ua rau kuv muaj peev xwm siv Vajtswv lub hwj chim kov yeej tus yeeb ncuab thiab txhua yam nws ua rau kuv raug. Thaum peb raug teeb meem, peb yeej tso siab rau tus Tswv cov lus cog tseg uas Povlauj qhia txog hais tias: “Vim Vajtswv tsis pub lub siab ntshai rau peb tiam sis pub lub siab muaj hwj chim thiab kev hlub thiab kev tswj yus tus kheej rau peb.”¹¹

Peb paub tias thaum tus Cawm Seej yog ib tug me nyuam Nws “loj hlob zoo, nws muaj tswv yim thiab Vajtswv foom koob hmoov rau nws.”¹² Peb paub tias thaum Nws loj hlob tuaj, “Yexus loj hlob zoo, muaj tswv yim, nws ua haum Vajtswv siab thiab haum neeg siab.”¹³ Thiab peb paub tias thaum txog lub sij hawm uas Nws txoj hauj lwm qhuab qhia pib, cov uas mloog Nws “xav tsis thoob rau tej uas Yexus qhia, rau qhov Yexus tej lus qhia muaj hwj chim heev.”¹⁴

Vim Nws tau npaj, tus Cawm Seej tau loj hlob tuaj muaj hwj chim thiab Nws txawj tiv taus tag nrho Dab Ntxwg Nyoog tej kev ntxias.¹⁵ Thaum peb coj raws li tus Cawm Seej tus yam ntxwv thiab npaj siab thaum peb kawm Vajtswv txoj lus thiab muaj kev ntseeg ntxiv, peb kuj muaj peev xwm siv Vajtswv lub hwj chim tiv taus tej kev ntxias.

Nyob hauv lub sij hawm thaum peb tsis koom ua ke no thiab peb mus tsis tau rau lub tuam tsev, kuv tau ua tib zoo kawm ntxiv txog Vajtswv lub hwj chim uas los rau peb thaum peb ua raws li peb tej kev khi lus uas peb tau khi hauv lub tuam tsev. Raws li tau cog lus nyob hauv zaj lus thov Vajtswv thaum muab lub Tuam Tsev Kirtland fij tseg, peb muaj Vajtswv lub hwj chim tom qab peb mus rau lub tuam tsev.¹⁶ Tsis muaj ib hnub uas yuav tshem lub hwj chim uas Vajtswv pub rau cov uas ua kev khi lus hauv lub tuam tsev thiab tsis muaj dab tsi txwv peb siv lub hwj chim ntawd thaum peb raug phaum mob no. Tsuas yog peb tsis ua raws li peb tej kev khi lus thiab tsis ua neej kom peb tsis tsim nyog txais Nws lub hwj chim xwb peb thiaj li yuav tsis muaj Nws lub hwj chim.

Thaum kuv thiab kuv tus poj niam wb ua thawj coj rau ib qho chaw tshaj tawm txoj moo zoo nyob hauv Thaib Teb, Lostsuas Teb thiab Phab Mab, wb tau pom Vajtswv lub hwj chim uas los rau cov uas ua kev khi lus hauv lub tuam tsev. Pob Nyiaj Pab Neeg Mus rau lub Tuam Tsev twb pab cov Neeg Ntseeg coob nyob hauv peb lub teb chaws ntawd mus rau lub tuam tsev tom qab lawv ua txhua yam lawv ua tau kom npaj mus. Kuv nco qab thaum kuv ntsib 20 tus Neeg Ntseeg los ntawm Lostsuas Teb nyob hauv tshav nyab hoom hauv Bangkok, Thaib Teb, kom pab thauj lawv mus rau lwm tshav nyab hoom hauv Bangkok kom caij nyab hoom mus rau Hong Kong. Cov mej zeej no yeej zoo siab kawg vim lawv yuav mus rau tus Tswv lub tsev.

Daim Duab

Cov mej zeej hauv Lostsuas Teb

Thaum Haiv Neeg Ntseeg no rov qab los, peb yeej tau pom lawv txoj kev to taub txog txoj moo zoo thiab lub hwj chim uas lawv txais tau los ntawm lawv lub vaj txiaj ntsim hauv lub tuam tsev thiab lawv txoj kev ua kev khi lus nrog Vajtswv. Cov Neeg Ntseeg no yeej tau “muaj [Nws] lub hwj chim ua ntaj riam thaiv lawv” tom qab lawv mus rau lub tuam tsev.¹⁷ Lub hwj chim kom ua tau ntau tshaj lawv ua tau lawv tus kheej pab lawv muaj zog txaus nyiaj dhau tej teeb meem uas los ntawm kev ua mej zeej hauv lawv lub teb chaws thiab mus “coj txoj moo tseem ceeb thiab zoo kawg, ntawm txoj kev tseeb,”¹⁸ thaum lawv tseem txhim tsa tus Tswv lub nceeg vaj hauv Lostsuas Teb.

Thaum lub sij hawm uas peb mus tsis taus rau lub tuam tsev, peb puas tau cia siab rau tej kev khi lus uas peb ua hauv lub tuam tsev kom pab peb paub meej tias yuav taug txoj kev twg hauv peb lub neej? Qhov uas peb ua raws li tej kev khi lus no ua rau peb muaj lub zeem muag pom yav tom ntej thiab peb yuav rau siab xav ua neeg tsim nyog txais tag nrho txhua yam uas tus Tswv tau cog lus tias peb yuav txais los ntawm peb txoj kev rau siab ntseeg.

Kuv caw nej nrhiav lub hwj chim uas Vajtswv xav pub rau nej. Kuv ua tim khawv tias thaum peb nrhiav lub hwj chim no, peb yuav tau koob hmoov kom peb to taub Leej Txiv Saum Ntuj Ceeb Tsheej txoj kev hlub rau peb.

Kuv ua tim khawv tias vim Leej Txiv Saum Ntuj Ceeb Tsheej hlub peb, Nws txib Nws Tib Leeg Tub, Yexus Khetos, los ua peb tus Cawm Seej thiab tus Txhiv Dim. Kuv ua tim khawv txog Yexus Khetos, tus uas muaj hwj chim tag nrho,¹⁹ thiab ua li no los ntawm Yexus Khetos lub npe, amees.