Ua Ncaj, Hlub Tshua, thiab Txo Hwj Chim rau Vajtswv

Vim peb yog cov uas coj raws li Yexus Khetos, thiab peb yog Tsoom Haiv Neeg Ntseeg hauv Hnub Nyoog Kawg, peb siv zog—thiab Vajtswv xav kom peb siv zog—ua zoo dua ntxiv tas li.¹ Tej zaum nej tau xav li kuv tau xav hais tias, “Kuv puas ua txaus?” “Kuv yuav tsum ua li cas ntxiv?” los sis “Kuv, uas yog ib tug neeg tsis zoo, yuav ua li cas kom tsim nyog ‘nrog Vajtswv nyob hauv qhov chaw uas muaj kev zoo siab uas tsis muaj qhov kawg li’?”²

Phau Qub tus yaj saub Mikhas tau nug li no hais tias: “Thaum kuv mus pe hawm tus Tswv uas yog Vajtswv tus uas kav saum qaum ntuj, kuv yuav coj dab tsi mus rau nws?”³ Mikhas tso dag xav paub seb tej yam uas nws foom pub puas txaus them nqi rau nws tej kev txhaum, hais tias, “Tus Tswv puas yuav txaus siab, yog hais tias kuv coj ib txhiab tus yaj los sis tej roj txiv ntoo uas txhawv li tus dej tsis tu mus rau nws? Puas yog kuv yuav tau muab kuv tus tub hlob mus tua … thiaj theej tau kuv lub txhoj?”⁴

Tsis yog. Tej yam zoo peb ua yeej tsis txaus. Kev cawm seej tsis yog ib yam uas peb khwv tau.⁵ Tsis hais tej kev txi loj uas Mikhas hais yuav txhiv peb tej kev txhaum me. Yog tias nyob ntawm peb xwb, ces peb tsis muaj kev cia siab rov qab mus nrog Vajtswv nyob.⁶

Yog tsis muaj cov koob hmoov los ntawm Leej Txiv Saum Ntuj Ceeb Tsheej thiab Yexus Khetos, peb yeej yuav ua tsis txaus nyob peb tus kheej. Tiam sis txoj moo zoo yeej yog qhov uas vim muaj Yexus Khetos thiab dhau los ntawm Nws, peb yeej yuav hloov los ua zoo txaus.⁷ Vajtswv txoj kev tshav ntuj ua rau txhua tus neeg txais kev cawm seej dim kev tuag ntawm sab cev nqaij daim tawv, los ntawm Yexus Khetos txoj kev tuag thiab txoj Kev Sawv Rov Los.⁸ Thiab yog peb muab peb lub siab tig mus rau Vajtswv, txhua tus dim tau txoj kev tuag ntawm sab ntsuj plig “los ntawm Khetos txoj Kev Theej Txhoj, … los ntawm kev ua raws li tej kev cai thiab kab ke ntawm txoj Moo Zoo.”⁹ Peb dim tau kev txhaum thiab yuav ua neeg dawb huv nyob rau ntawm Vajtswv xub ntiag. Ib yam li Mikhas piav hais tias, “[Vajtswv] twb qhia yam zoo rau peb lawm. Tej uas nws xav kom peb ua yog li no: ua lub siab ncaj, cog kev sib hlub kom ruaj khov, thiab ua lub neej txo hwj chim nrog peb tus Vajtswv sib raug zoo.”¹⁰f

Mikhas cov lus kom peb muab peb lub siab tig rau Vajtswv thiab ua neeg tsim nyog txais tau kev cawm seej muaj peb yam. Ua lub siab ncaj txhais tias yus ua ncaj rau Vajtswv thiab rau lwm tus neeg. Peb ua ncaj rau Vajtswv thaum peb txo hwj chim rau Nws. Peb ua ncaj rau lwm tus thaum peb hlub tshua lawv. Ua lub siab ncaj thiaj li yog kev ua raws li thawj ob txoj lus txib tseem ceeb, kom “hlub tus Tswv uas yog [nej] tus Vajtswv kawg siab kawg ntsws, kawg plab kawg plawv thiab kawg lub dag lub zog, … thiab hlub [nej] tej kwv tij zej zog ib yam li [nej] hlub [nej] lub cev.”¹¹

Kev ua ncaj thiab kev txo hwj chim rau Vajtswv yog kev txhob txwm tsis ua phem, ua raws li Nws tej kev cai, thiab ua tseeb.¹² Ib tug neeg ncaj ncees tig ntawm kev txhaum mus thiab tig mus rau Vajtswv, khi lus rau Nws, thiab ua raws nraim li tej kev khi lus ntawd. Ib tug neeg ncaj yuav xaiv ua raws li Vajtswv cov lus txib, hloov siab lees txim thaum nws ua txhaum, thiab sim ua ntxiv.

Thaum tus Khetos uas sawv rov los mus xyuas cov Neeg Nifais, Nws tau piav tias muaj ib txoj kev cai siab dua uas tau pauv Mauxes txoj kev cai. Nws tau qhia kom lawv tsis txhob ua “nej tej kev txi thiab nej tej kev hlawv tsiaj” ntxiv, tiam sis cia li muab “lub siab puas tas thiab lub siab xav ua zoo ua kev txi rau [nws].” Nws kuj cog lus tias, “Thiab tus uas yuav los cuag kuv nrog lub siab puas tas thiab lub siab xav ua zoo, kuv yuav muab tus ntawd ua kev cai raus ntawm hluav taws thiab ntawm tus Vaj Ntsuj Plig Dawb Huv.”¹³ Thaum peb txais thiab siv lub txiaj ntsim Vaj Ntsuj Plig Dawb Huv tom qab peb ua kev cai raus dej, ces peb yuav muaj tus Vaj Ntsuj Plig Dawb Huv nrog peb nyob thiab Nws yuav qhia peb txhua yam peb yuav tsum ua,¹⁴ tsis hais kev txo hwj chim rau Vajtswv.

Yexus Khetos txoj kev txi rau peb tej kev txhaum kom peb dim kev tuag ntawm sab ntsuj plig los yuav muab rau txhua tus uas muaj ib lub siab puas tas thiab ib lub siab xav ua zoo.¹⁵ Ib lub siab puas tas thiab ib lub siab xav ua zoo yuav ua rau peb xav hloov siab lees txim txhua hnub kom hloov los ua neeg zoo li peb Leej Txiv Saum Ntuj Ceeb Tsheej thiab Yexus Khetos ntxiv. Thaum peb ua li ntawd, peb txais tau tus Cawm Seej lub hwj chim uas ntxuav peb huv, kho peb, thiab txhawb peb dag zog. Tsis yog peb ua ncaj thiab txo hwj chim rau Vajtswv xwb; peb kuj kawm kom hlub tshua lwm tus ib yam li Leej Txiv Saum Ntuj Ceeb Tsheej thiab Yexus Khetos hlub.

Vajtswv zoo siab rau kev hlub tshua thiab tsis chim siab thaum peb txais hlo txoj kev hlub tshua ntawd. Raws li Mikhas hais rau Yehauvas tias, “Tus Tswv, yeej tsis muaj ib tug vaj tswv zoo npaum li koj, koj zam txim rau [kev txhaum], … koj yuav rov hlub peb dua ib zaug ntxiv,” thiab “yuav muab peb tej kev txhaum … mus pov rau puag hauv qab thu hiav txwv.”¹⁶ Kev hlub tshua lwm tus ib yam li Vajtswv hlub yeej tsis nyob sib nrug ntawm kev ua ncaj rau lwm tus thiab tsis txhob ua phem rau lawv.

Muaj ib zaj dab neeg uas qhia txog qhov uas yuav tsum tsis txhob ua phem rau lwm tus, zaj no hais txog Hillel tus Txwj Laug, ib tug xib hwb nyob ib puas xyoo ua ntej Yexus yug los. Hillel ib tug tub kawm ntawv poob siab vim phau Torah—Mauxes tsib phau vaj lug kub uas muaj 613 txoj lus txib thiab cov ntawv uas lwm tus xib hwb sau—yog ib phau nyuaj rau nws nco qab txhua yam. Tus tub kawm ntawv twv Hillel kom piav txog phau Torah ntev npaum li Hillel sawv tau nrog ib txhais ko taw xwb. Tej zaum Hillel tsis txawj sawv ncaj zoo li ntawd tiam sis nws kam ua li ntawd. Nws tau hais ib nqe los ntawm phau Levis Kev Cai, hais tias, “Tsis txhob ua phem pauj rau ib leeg tus twg los sis pheej ntxub nws, tiam sis yuav tsum hlub koj tej kwv tij zej zog ib yam li koj hlub koj lub cev.”¹⁷ Ces Hillel xaus lus sai sai hais tias: “Qhov uas koj ntxub los tsis txhob ua qhov ntawd rau koj tus kwv tij zej zog. Hais li ntawd xwb yog tag nrho phau Torah; lwm yam yog cov lus hais txog qhov ntawd xwb. Cia li mus thiab kawm.”¹⁸

Kev ua siab zoo rau lwm tus yeej yog ib feem ntawm kev hlub tshua. Cia li xav txog kev sib tham uas kuv tau hnov thaum yav tas los nyob hauv chaw pab xwm txheej ceev ntawm lub Tsev Kho Mob Johns Hopkins nyob hauv Baltimore, Maryland, nyob hauv Teb Chaws Amelikas. Ib tug neeg mob, Yawg Jackson, yog ib tug txiv neej paub cai uas cov neeg ua hauj lwm hauv lub tsev kho moab paub zoo. Nws tau los nyob hauv lub tsev kho mob ntau zaus vim nws pheej raug mob los ntawm kev haus cawv. Thaum lub sij hawm no, Yawg Jackson tau rov qab los rau lub tsev kho mob vim nws haus cawv ntau dhau ua rau nws tus txiav o o.

Thaum txog sij hawm uas tus Kws Kho Mob Cohen yuav luag ua hauj lwm tas, nws ntsuam xyuas Yawg Jackson thiab txiav txim siab yuav tsum cia nws pw hauv lub tsev kho mob. Tus Kws Kho Mob Cohen txib tus Kws Kho Mob Jones, uas yuav pauv nws ua hauj lwm hmo ntawd, ua ntawv cia Yawg Jackson nkag los thiab saib xyuas nws txoj kev kho mob.

Tus Kws Kho Mob twb kawm hauv ib lub tsev kawm ntawv qhia kev kho mob uas zoo thiab pib kawm kev cob qhia uas muaj tom qab kawm ntawv tiav. Kev cob qhia no yeej ua rau tib neeg pw tsis tsaug zog pes tsawg ntshe ua rau Kws Kho Mob Jones txoj kev xav tsis zoo no. Vim tus txiv neej no yog tus thib tsib nkag los hmo ntawd, nws yws yws nrov rau Kws Kho Mob Cohen. Nws xav tias tsis ncaj uas nws yuav tsum siv sij hawm ntau saib xyuas Yawg Jackson thaum nws tus mob yog los ntawm nws tus kheej.

Kws Kho Mob Cohen hais lus yau yau yuav luag ntxhi lus. Nws hais tias, “Kws Kho Mob Jones, koj tau los ua ib tug kws kho mob kom saib xyuas cov neeg thiab pab kho lawv zoo. Koj tsis tau los ua ib tug kws kho mob kom txiav txim rau lawv. Yog koj tsis to taub ob qho no sib txawv li cas, ces koj tsis muaj cai kawm hauv lub tsev kho mob no.” Tom qab ntawd, tus Kws Kho Mob Jones rau siab saib xyuas Mr. Jackson thaum nws nyob hauv lub tsev kho mob.

Yawg Jackson twb tas sim neej lawm. Kws Kho Mob Jones thiab Kws Kho Mob Cohen tau ua hauj lwm zoo tau ntev. Tiam sis nyob hauv ib lub sij hawm tseem ceeb, tus Kws Kho Mob Jones yuav tsum nco qab kom ua ncaj, hlub tshua lwm tus, thiab saib xyuas Yawg Jackson tsis txhob txiav txim rau nws.¹⁹

Tau ntau xyoo, kuv nco qab qhov ntawd. Kev hlub tshua tsis txhais hais tias peb txais tau kev hlub tshua uas Vajtswv pub rau peb; peb zoo siab uas Vajtswv hlub tshua lwm tus ib yam li peb. Thiab peb coj raws li Nws tus yam ntxwv. “Txhua tus yeej zoo tib yam rau Vajtswv,”²⁰ thiab peb txhua tus xav tau kev pab thiab kev kho mob ntawm sab ntsuj plig. Tus Tswv tau hais tias, “Nej tsis txhob saib ib tug neeg siab dua lwm tus, los sis ib tug tsis txhob xav tias nws zoo dua lwm tus.”²¹

Yexus Khetos tau coj yam ntxwv kom peb paub tias kev ua ncaj thiab kev hlub tshua zoo li cas. Nws tau nrog cov neeg txhaum, ua zoo rau lawv thiab saib lawv rau nqi. Nws tau qhia txog kev xyiv fab uas los ntawm kev ua raws li Vajtswv cov lus txib thiab Nws qhia txog kev xav txhawb nqa tsis txhob foom phem rau cov neeg txhaum. Nws tsis tau pom zoo cov uas hais tias Nws ua yuam kev vim Nws txhawb pab cov neeg uas lawv xav tias yog neeg tsis tsim nyog.²² Qhov uas tib neeg xav tias lawv ncaj ncees li ntawd ua rau Nws tu siab.²³

Yog peb xav ua neeg zoo li Khetos, ib tug neeg ua ncaj, rau Vajtswv thiab rau lwm tus neeg. Ib tug neeg ncaj yeej hais lus zoo thiab ua zoo thiab paub tias qhov uas lwm tus tsis xav li peb los sis tsis ntseeg li peb los peb tseem ntaus phooj ywg thiab ua siab zoo nrog lawv los tau. Cov uas ua ncaj “yuav tsis muaj ib lub siab xav ua kom lwm tus raug mob, tiam sis yuav xav nyob kaj siab lug”²⁴ ib leeg nrog ib leeg

Yog xav ua neeg zoo li Khetos, yus yuav hlub tshua lwm tus. Tib neeg uas hlub tshua tsis txiav txim rau lwm tus; lawv muaj kev khuv leej rau lwm tus, qhov tseem ceeb yog cov uas haj yam tsis muaj; lawv ua siab dawb siab zoo thiab ua ncaj. Cov neeg no yuav hlub thiab sim to taub txhua tus, tsis hais lawv yog haiv neeg twg, poj niam los txiv neej, ntseeg kev teev ntuj li cas, nyiam poj niam los txiv neej, pluag los sis nplua nuj, thiab yog xeem neeg los sis tuaj teb chaws twg tuaj. Tej no los Khetos txoj kev hlub kov yeej tag nrho.

Yog xav ua neeg zoo li Khetos, ib tug neeg yuav xaiv Vajtswv,²⁵ txo hwj chim rau nws, xav ua kom Nws zoo siab, thiab khi lus rau Nws. Cov neeg uas txo hwj chim rau Vajtswv nco ntsoov tias Leej Txiv Saum Ntuj Ceeb Tsheej thiab Yexus Khetos tau ua li cas rau lawv.

Kuv puas ua txaus? Kuv yuav tsum ua li cas ntxiv? Tej yam uas peb ua kom teb tej lus nug no yeej tseem ceeb rau peb txoj kev zoo siab hauv lub neej no thiab nyob mus ib txhis. Tus Cawm Seej tsis xav kom peb saib tsis taus peb txoj kev cawm seej. Tom qab uas peb ua kev khi lus, tej zaum peb yuav “poob ntawm txoj kev tshav ntuj thiab khiav tawm ntawm tus Vajtswv uas muaj sia zees nyob mus.” Yog li ntawd peb yuav tsum “ua zoo xyuas thiab thov Vajtswv tas mus li” kom tsis txhob “poob mus rau txoj kev ntxias.”²⁶

Tiam sis, peb Leej Txiv Saum Ntuj Ceeb Tsheej thiab Yexus Khetos tsis xav kom peb raug meem txom vim peb tsis paub tseeb txog peb lub neej hauv lub ntiaj teb no, vim peb pheej xav paub seb peb puas tau ua txaus kom txais kev cawm seej thiab kev tsa nto. Nkawd yeej tsis xav kom peb raug tsim txom los ntawm tej yam uas peb twb hloov siab lees txim lawm, thiab peb xav tias tej ntawd yog tej qhov txhab uas kho tsis taus,²⁷ los sis pheej txhawj xeeb tias peb yuav rov qab ua txhaum dua.

Peb muaj peev xwm ntsuas peb txoj kev vam meej. Peb muaj peev xwm paub tias “lub neej [uas peb] ua, yog raws li Vajtswv lub siab nyiam”²⁸ thaum peb ua ncaj, hlub tshua lwm tus, thiab txo hwj chim rau Vajtswv. Peb yuav muaj Leej Txiv Saum Ntuj Ceeb Tsheej thiab Yexus Khetos tej cuj pwm thiab peb ib leeg yuav hlub ib leeg.

Thaum nej ua tej yam no, nej yuav ua raws li nej tej kev khi lus thiab ua neeg tsim nyog “nyob hauv qhov chaw uas muaj kev zoo siab uas tsis muaj qhov kawg li.”²⁹ Nej tus ntsuj plig yuav muaj Vajtswv lub yeeb koob thiab txoj kev kaj ntawm txoj sia kav ib txhis.³⁰ Nej yuav muaj kev xyiv fab uas tsis paub kawg.³¹ Kuv ua tim khawv tias Vajtswv muaj txoj sia nyob thiab Yexus yog tus Khetos, peb tus Cawm Seej thiab tus Txhiv Dim, thiab Nws muab Nws txoj kev hlub tshua rau txhua leej txhua tus. Nej yeej nyiam qhov no puas yog? Los ntawm Yexus Khetos lub npe, amees.