Zaj Lus Txais Tos Sawv Daws
Zoo siab txais tos nej rau lub tuam rooj sab laj thiab rau lub cib fim no hnov tus Tswv lub suab.
Kuv cov kwv tij thiab cov muam thiab cov phooj ywg nyob thoob plaws lub ntiaj teb, kuv txais tos nej sawv daws tuaj koom lub tuam rooj sab laj no. Peb sib sau ua ke ua ib tse neeg nyob thoob ntuj kom pe hawm peb tus Tswv thiab Cawm Seej, Yexus Khetos. Ua tsaug ntau rau nej sawv daws uas koom nrog peb.
Xyoo tas los no yeej yog ib xyoos uas yuav sau tseg hauv cov ntawv liv xwm. Muaj tseeb tiag peb txhua tus tau kawm tej yam uas peb tsis paub ua ntej no. Tej yam uas kuv twb paub ua ntej lawm los tau rov qab nkag hauv kuv lub siab ua rau kuv kawm tej yam tshiab.
Piv txwv hais tias, kuv paub tseeb tiag hais tias tus Tswv coj Nws lub Koom Txoos tej dej tej num. Nws hais tias, “Kuv yuav ua rau [nej] paub tias kuv yeej ua tau kuv txoj hauj lwm.”1
Feem ntau, kuv ob tug pab cuam thiab kuv tau los kua muag thaum peb pom tias tus Tswv tau pab daws ib qhov xwm txheej nyuaj heev tom qab uas peb tau ua zoo npaum li peb ua tau thiab ua tsis tau ntxiv. Peb kuj xav tsis thoob li thiab.
Kuv kuj to taub zoo dua tam sim no saib tus Tswv txhais li cas thaum Nws hais tias, “Saib seb, kuv yuav khiav kuv txoj hauj lwm nrawm nroos thaum lub sij hawm tsim nyog.”2 Ntau zaus lawm kuv zoo siab heev uas tus Tswv tau coj thiab khiav txoj kev ua Nws tej hauj lwm nrawm nroos—txawm hais tias peb raug ib phaum mob uas kis thoob ntiaj teb no.
Kuv cov kwv tij thiab cov muam, lub dag zog ntawm lub Koom Txoos los ntawm tej hauj lwm zoo thiab tej zaj lus tim khawv ntawm nws cov mej zeej. Cov lus tim khawv no loj hlob tuaj zoo tshaj plaws hauv ib tsev neeg. Xyoo tas los no, nej feem coob tau kawm txoj moo zoo ntau ntxiv nyob hauv nej vaj tse. Kuv ua nej tsaug, thiab nej cov me nyuam yuav ua nej tsaug.
Peb tseem ua lub txheej xwm loj heev uas yog kev kho lub Tuam Tsev Salt Lake ua tshiab. Los ntawm kuv chav hauj lwm kuv pom tau cov neeg ua hauj lwm kho lub tuam tsev.
Thaum kuv pom cov neeg ua hauj lwm dawj kom tau tej cag ntoo qub, tej kav dej, tej xaim fais fab, thiab ib lub txhawv dej uas xau dej, kuv tau xav hais tias tsim nyog uas peb txhua tus ua ke nrog tus Cawm Seej kev pab dawj tej yam phem tawm ntawm peb lub neej mus.
Yexus Khetos txoj moo zoo yog ib txoj moo zoo ntawm kev hloov siab lees txim.3 Vim yog tus Cawm Seej txoj Kev Theej Txhoj, Nws txoj moo zoo caw peb kom yeej meem hloov, loj hlob tuaj, thiab rais los mus ua neeg dawb huv dua. Yog ib txoj moo zoo ntawm kev cia siab, kev kho mob, thiab kev ua zoo zuj zus mus. Yog li ntawd, txoj moo zoo yog ib zaj lus txog kev xyiv fab! Peb sab ntsuj plig zoo siab thaum peb tshais ib ruam mus tom ntej rau qhov zoo.
Ib feem ntawm txoj kev sau tsev neeg Ixayees ua ke, thiab kuj yog ib feem tseem ceeb heev, yog txoj lus txib kom peb ua ib haiv neeg tsim nyog thiab kam pab npaj lub ntiaj teb rau thaum tus Tswv Los Zaum Ob.
Thaum peb mloog tej zaj lus uas peb cov thawj coj tau ua tib zoo npaj lawm raws li tus Vaj Ntsuj Plig Dawb Huv hais, kuv caw nej kom thov Vajtswv pab nej txheeb xyuas tej yam phem uas nej yuav tsum tshem tawm ntawm nej lub neej kom nej thiaj ua tau neeg dawb huv dua.
Kuv hlub nej, kuv cov kwv tij thiab cov muam, thiab kuv ua tim khawv hais tias peb Leej Txiv Saum Ntuj Ceeb Tsheej thiab Nws Leej Tub paub nej thiab hlub nej ib leej dhau ib leej. Nkawd npaj pab nej tshais ruam mus lawm tom ntej. Zoo siab txais tos nej rau lub tuam rooj sab laj thiab rau lub cib fim no hnov tus Tswv lub suab. Los ntawm Yexus Khetos lub npe, amees.