Nej Yuav Raug Tso Dim

Kuv cov kwv tij thiab cov muam, kuv zoo siab heev uas muaj lub cib fim hais lus pub rau nej tuaj Afikas teb tuaj. Yog ib txoj koob hmoov uas peb muaj tej tshuab xa xov niaj hnub nim no thiab peb peb siv tej ntawd kom ncav rau nej txawm nej nyob qhov twg los xij.

Thaum lub Cuaj Hlis Ntuj xyoo 2019, tus Muam Mutombo thiab kuv, thaum wb ua hauj lwm pab ua thawj coj rau Qhov Chaw Tshaj Tawm Txoj Moo Zoo Maryland Baltimore, wb muaj lub cib fim mus xyuas lub Koom Txoos tej qhov chaws tshwj xeeb hauv Palmyra, New York, thaum wb mus koom kev sib sab laj ped. Qhov chaw kawg uas wb mus xyuas yog Koog Ntoo Dawb Ceev. Wb lub ntsiab mus xyuas Koog Ntoo Dawb Ceev tsis yog vim wb xav tau kev tshwm sim tshwj xeeb los yog ua yog toog pom dab tsi, tsis yog li ntawd, tiam sis wb kuj hnov tau hauv wb lub nruab siab hais tias Vajtswv nyob hauv qhov chaw dawb ceev ntawd. Wb ob lub siab ris tus Yaj Saub Joseph Smith txiaj heev.

Thaum wb tab tom tsav tsheb rov qab los mus tsev, tus Muam Mutombo pom tias kuv luag nyav ntau, ces nws nug kuv hais tias, “Yog vim li cas koj zoo siab heev ua luaj?”

Kuv teb nws hais tias, “Kuv tus hlub Nathalie, qhov tseeb yeej yuav kov yeej qhov cuav, thiab qhov tsaus ntuj yuav tsis muaj txuas ntxiv mus hauv lub ntiaj teb vim yog Yexus Khetos txoj moo zoo tau txum tim rov qab los lawm.”

Vajtswv Leej Txiv thiab Yexus Khetos nqis los xyuas tus tub hluas Joseph Smith kom nqa qhov kaj ci rau qhov uas npog lawm, kom peb yuav txais tau “kev paub tej yam uas tab tom muaj, … thiab tej yam uas tseem yuav muaj los” (Lus Qhuab Qhia thiab Kev Khi Lus 93:24).

Tom qab 200 xyoos, neeg coob tseem nrhiav qhov tseeb uas yuav tsum muaj kom thiaj dim tau tej kab lis kev cai thiab kev dag ntxias uas tus yeeb ncuab ncha tawm thoob plaws lub ntiaj teb. “Tib neeg txoj kev txawj ntxias ua rau [neeg coob] dig muag” (Lus Qhuab Qhia thiab Kev Khi Lus 123:12). Hauv nws Tsab Ntawv rau cov Neeg Efexus, Pov Lauj qhia hais tias: “Tus neeg uas pw tsaug zog koj cia li tsim, thiab sawv hauv qhov tuag rov qab los, thiab cia Yexus Khetos ci rau koj pom kev” (Efexus 5:14). Tus Cawm Seej cog lus tias Nws yuav ua ib qho kaj rau tag nrho lawv cov uas hnov Nws cov lus (saib 2 Nifais 10:14).

Peb caug tsib xyoos dhau los, kuv niam thiab txiv kuj pom tsis tau qhov tseeb thiab yeej xav paub qhov tseeb thiab rau rau siab nrhiav kom paub saib lawv yuav nrhiav tau qhov tseeb qhov twg. Kuv niam thiab txiv nkawd yug los hauv ib lub zos, es nyob ntawd txhua tus neeg thiab tsev neeg ua raws li tej kab lis kev cai uas coj ua ib tiam dhau ib tiam. Nkawd tso nkawd lub zos tseg thaum nkawd tseem hluas thiab mus nyob tom lub nroog, nrhiav kom tau ib lub neej zoo dua.

Nkawd sib yuav thiab pib ua neej zoo hauj sim. Hauv peb lub me nyuam tsev peb muaj yuav luag yim leej tag nrho—kuv niam kuv txiv, kuv ob tug muam thiab kuv, thiab ib tug npawg uas qee zaum los nrog peb nyob. Kuv pheej xav paub saib peb puas yog ib tse neeg tiag, vim peb cov uas yog me nyuam nrog peb niam peb txiv noj tsis tau ib pluag mov ntawm tib lub rooj noj mov ua ke. Thaum peb txiv lawb hauj lwm los tsev, thaum nws nkag lub tsev kiag, kuv niam hais kom peb tawm mus nraum zoov. Txhua hmo ntuj luv heev, peb tsaug zog zoo tsis tau vim peb niam peb txiv nkawd tsis sib haum thiab sib hlub. Peb lub tsev tsis yog me me xwb, tiam sis yog ib qho chaw tsaus ntauj. Ua ntej peb ntsib cov tub txib, peb mus xyuas tej koom txoos sib txawv txav txhua hnub Sunday. Yeej muaj tseeb tias peb niam peb txiv nkawd nrhiav ib yam uas lub ntiaj teb tsis muaj hlo li.

Muaj li no mus txog thaum peb ntsib Txwj Laug thiab Muam Hutchings, thawj thawj khub niam txiv ua tub txib hauv teb chaws Zaire (uas niaj hnub nim no yog DR of Congo los sis Congo-Kinshasa). Thaum peb pib nrog khub niam txiv ua tub txib no sib ntsib ua ke, es nkawd zoo li tim tswv uas los ntawm Vajtswv los, kuv pom tias peb tsev neeg pib hloov thiab. Tom qab peb ua kev cai raus dej, peb lub neej hloov zuj zus mus rau qhov zoo vim yog txoj moo zoo txum txim rov qab los. Khetos cov lus pib ua rau peb lub siab lub ntsws loj tuaj. Khetos cov lus pib ua rau peb to taub zoo dua thiab yeej qab qab rau peb lub siab lub ntsws, vim tej qhov tseeb uas peb txais ntawd yeej meej meej thiab ua rau peb pom tau qhov kaj, thiab qhov kaj no ci zus ci zus tuaj txhua txhia hnub.

Qhov uas peb to taub yog vim li cas thiaj muaj txoj moo zoo yeej pab peb rais los mus ua neeg zoo li tus Cawm Seej. Peb lub tsev tseem me me; thiab peb lub neej tsis tshua hloov hais txog tej yam peb muaj. Tiam sis kuv pom tias kuv niam kuv txiv nkawd lub siab hloov thiab peb thov Vajtswv txhua hnub, yav sawv ntxov thiab yav tsaus ntuj. Peb kawm Phau Ntawv Maumoos ua ke; peb ua tsev neeg hmo ua ke; peb rais los mus ua ib tse neeg tiag tiag. Txhua hnub Sunday peb sawv thaum 6:00 teev sawv ntxov npaj mus tshawj, thiab peb taug kev ntev teev kom thiaj koom lub Koom Txoos tej kev sib sab laj txhua txhia lub lim tiam tsis yws yws hlo li. Yeej yog ib yam zoo heev uas kuv ua tim khawv pom. Peb, cov uas yav nram ntej taug kev hauv qhov tsaus ntuj, tau ntiab qhov tsaus ntuj ntawd tawm mus (saib Lus Qhuab Qhia thiab Kev Khi Lus 50:25) thiab peb pom “ib txoj kev kaj loj heev” (2 Nephi 19:2).

Kuv nco tau tias muaj ib hnub thaum kuv tsis tshua kam sawv ntxov ntxov kom nrog tsev neeg thov Vajtswv ua ke, kuv yws yws rau kuv ob tug muam hais tias, “Tsis muaj dab tsi peb ua tau hauv lub tsev no, tsuas yog thov Vajtswv, thov Vajtswv, thov Vajtswv nkaus xwb.” Kuv txiv hnov cov lus kuv hais ntawd. Kuv nco tau tias saib nws teb li cas kuv ua tib zoo qhuab qhia kuv hais tias, “Koj nyob hauv lub tsev no ntev npaum li cas, ces koj yuav thov Vajtswv, thov Vajtswv, thov Vajtswv.”

Txhua txhia hnub kuv hnov kuv txiv cov lus hauv kuv lub paj hlwb. Es niaj hnub nim no nej xav hais tias tus Muam Mutumbo thiab kuv ua li cas nrog wb cov me nyuam? Peb thov Vajtswv, thov Vajtswv, thiab thov Vajtswv. Nov yog wb qhov tsim tau tseg rau wb cov neeg raws wb qab.

Tus neeg uas yug los es yog dig muag thiab uas Yexus Khetos tau kho kom pom tau kev, tom qab uas tus ntawd cov neeg zej zog thiab cov Falixais yaum nws, tus neeg ntawd hais tias:

“Tus txiv neej uas npe hu ua Yexus ua ib co av nkos los pleev kuv ob lub qhov muag thiab hais kom kuv mus ntxuav muag ntawm lub pas dej Xilau-as. Yog li ntawd, kuv thiaj mus, thiab thaum kuv ntxuav muag tas, ces kuv qhov muag txawm pom kev lawm.

“… Kuv [tsuas] paub [tias], kuv ib txwm dig muag, tiam sis nim no kuv pom kev [lawm] xwb” (Yauhas 9:11, 25).

Peb los dig muag thiab tiam sis niaj hnub nim no peb pom kev lawm thiab. Txoj moo zoo txum tim rov qab los tau pab peb tsev neeg txij thaum ntawd los thiab. Qhov uas peb to taub yog vim li cas thiaj muaj txoj moo zoo tau foom koob hmoov rau peb tiam neeg ntawm kuv tsev neeg thiab yeej meem yuav foom koob hmoov rau ntau tiam ntxiv thiab.

Yexus Khetos yog txoj kev kaj uas ci hauv kev tsaus ntuj Cov uas ua raws li Nws hais “yuav tsis taug txoj kev uas tsaus ntuj nti, tiam sis nws yuav tau lub neej tshav ntuj nrig” ( Yauhas 8:12).

Rau lub sij hawm yuav luag ib xyoos, ntawm xyoo 2016 mus rau 2017, cov neeg Kasai raug kev kub ntxhov loj heev. Yog ib lub sij hawm tsaus ntuj nti rau cov neeg vim yog muaj kev sib tawm tsam nyob ntawm ib pawg tub rog coj kev cai qub thiab tseem fwv pawg tub rog. Tej kev kub ntxhov no nchuav tawm ntawm cov zos hauv lub Xeev Kasai Nruab Nrab mus rau cheeb tsam Kasai loj. Neeg coob heev tau khiav tawm ntawm lawv tej vaj tse thiab mus tsiv nraim hauv tej koog ntoo. Lawv tsis muaj khoom noj los yog dej haus, tsis muaj dab tsi tiag, thiab nyob hauv pawg neeg thoj nam no yog ib co mej zeej ntawm Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg hauv lub cheeb tsam Kananga. Yeej muaj ob peb tug mej zeej ntawm lub Koom Txoos uas pawg tub rog phem muab tua tuag.

Tij Laug Honoré Mulumba ntawm Pawg Ntseeg Nganza hauv cheeb tsam Kananga thiab nws tsev neeg tau nkaum hauv lawv lub tsev, vim lawv tsis paub tias yuav mus qhov twg vim yog cov tub rog sib tua sib tawm tsam ntawm kev. Muaj ib hnub ib co tub rog phem tau pom Tij Laug Mulumba thiab nws tsev neeg thaum lawv mus de zaub tom lawv lub vaj los hau noj. Ib pawg tub rog txawm tuaj rau hauv lawv lub tsev thiab muab lawv luag tawm rau ntawm kev thiab txib kom lawv ua raws li lawv tej kab lis kev cai tsis li ces yuav muab lawv tua pov tseg.

Tij Laug Mulumba ua siab loj hais tias, “Kuv yog ib tug mej zeej ntawm Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Kuv thiab kuv tsev neeg tau txais yuav Yexus Khetos thiab muaj siab ntseeg rau ntawm Nws. Peb yuav rau siab ntseeg ua raws li peb tej kev khi lus thiab yog tias tuag ces tuag los tau.”

Cov tub rog phem hawv qaws hais tias, “Vim nej xaiv Yexus Khetos, peb yuav muab nej tua pov tseg,” thiab lawv hais tias lawv yuav rov qab tuaj. Tiam sis cov tub rog phem ntawd yeej tsis rov qab tuaj, tsev neeg ntawd nyob twj ywm hauv lawv lub tsev rau ob lub hli tiam sis tsis pom cov tub rog phem ntxiv li lawm. Tij Laug Mulumba thiab nws tsev neeg tau tuav raws lawv txoj kev ntseeg. Lawv nco ntsoov lawv tej kev khi lus thiab Vajtswv pov hwm lawv.

Yexus Khetos yog txoj kev kaj uas peb yuav tsum tsa txawm tias yeej muaj tej lub sij hawm tsaus ntuj nti hauv peb lub neej no (saib 3 Nifais 18:24). Thaum peb xaiv los ua raws li Khetos, peb xaiv los hloov siab los ntseeg tiag. Ib tug neeg uas hloov siab los ntseeg Khetos yuav yog Khetos coj nws kev, thiab yuav nug, ib yam li Pov Lauj nug, hais tias, “Tus Tswv, koj xav kom kuv ua dab tsi?” (Tes Hauj Lwm 9:6). Peb yuav “coj raws li nws tus yam ntxwv” (1 Petus 2:21). Peb yuav “taug kev, ib yam li nws taug kev” (1 Yauhas 2:6). (Saib Ezra Taft Benson, “Born of God,” Tambuli, Kaum Hli Ntuj 1989, 2, 6.)

Kuv ua tim khawv txog Nws uas tuag, raug faus, thiab sawv rov qab los hnub thib peb thiab nce mus saum ntuj xwv kom koj thiab kuv yuav txais tau tej koob hmoov ntawm kev tsis txawj tuag thiab kev tsa nto. Yexus yog “txoj kev kaj, … txoj sia, thiab yog qhov tseeb” (Ethaws 4:12). Nws yog tshuaj kho tej kev kub ntxhov hauv lub ntiaj teb. Nws yog tus yam ntxwv zoo tshaj plaws rau kev tsa nto, twb yog Yexus Khetos. Los ntawm Yexus Khetos lub npe, amees.