Vajtswv Nrog Peb

Thaum kuv xav txog lo lus nug no, ua rau kuv xav txog cov tub txib Amelikas uas pab peb thaum lub sij hawm ntawd. Lawv twb tawm lawv tej tsev nyab xeeb mus rau ib qho chaw deb li ib nrab lub ntiaj teb no mus rau Yelemes Teb—ib thaj av uas lawv cov yeeb ncuab tau nyob—xwv kom muab kev cia siab rau peb cov neeg. Lawv tsis tau los liam, thuam los sis qhuab ntuas. Lawv txaus siab siv lawv lub sij hawm thaum tseem hluas es tsis xav txog nyiaj txiag, lawv tsuas xav pab lwm tus nrhiav kev xyiv fab thiab kev kaj siab lug uas lawv muaj lawm.

Raws li kuv xav, cov tub hluas thiab ntxhais hluas no yeej zoo tag nrho. Kuv paub lawv muaj qhov yuam kev thiab, tiam sis tam li kuv xav mas lawv tsis muaj. Kuv yeej yuav xav txog lawv hais tias lawv yog neeg zoo tshaj hauv lub ntiaj teb no—cov tim tswv uas ci ntsa iab thiab muaj yeeb koob, cov neeg txhawb pab uas khuv leej, ua zoo, thiab qhia qhov tseeb.

Txawm yog neeg ntiaj teb muaj kev tu siab, kev ntxub, thiab kev ntshai, cov neeg hluas tus yam ntxwv thiab tej lus qhia ua rau kuv muaj kev cia siab. Txoj moo zoo uas lawv qhia yeej tseem ceeb tshaj kev kav teb kav chaw, keeb kwm, kev sib ntxub, kev tsis zoo siab, thiab tej uas yus xav tau ntawm yus tus kheej. Txoj moo zoo no tau teb tej lus nug tseem ceeb uas peb muaj thaum lub sij hawm nyuaj li no.

Zaj lus uas lawv hais yog qhov uas Vajtswv muaj txoj sia nyob thiab hlub peb, tsis hais thaum muaj kev ntxhov hnyo, kev ua xyem xyav, thiab kev puas tsuaj. Qhov uas Nws tau tshwm sim nyob hauv peb lub caij nyoog kom muab qhov tseeb thiab txoj kev kaj txum tim rov qab los—Nws txoj moo zoo thiab lub Koom Txoos. Qhov uas Nws hais lus rau cov yaj saub; Vajtswv nrog peb—thiab Nws xav pab peb lub neej thiab Nws siv zog coj Nws cov me nyuam mus.

Yeej xav tsis thoob txog tej yam peb kawm tau thaum peb xav txog peb Leej Txiv Saum Ntuj Ceeb Tsheej txoj hau kev cawm seej thiab kev tsa nto, txoj hau kev zoo siab, rau Nws cov me nyuam. Thaum peb xav tias peb tsis tseem ceeb, peb raug tso tseg, thiab tsis muaj leej twg nco peb, peb kawm tias Vajtswv yeej nco ntsoov peb—muaj tseeb tiag, Nws muab ib yam xav tsis tawm rau tag nrho Nws cov me nyuam: los ua “cov uas … txais Vajtswv qub txeeg qub teg thiab koom nrog Yexus txais.”²

Qhov no txhais li cas?

Txhais tias peb yuav muaj txoj sia tas mus li, txais kev xyiv fab puv npo,³ thiab muaj peev xwm “yuav tau tej rooj theej kiab, tej nceeg vaj, tej nom tswv, thiab tej lub hwj chim, tej kev kav.”⁴

Ua rau peb txo hwj chim kom paub tias yuav muaj kev zoo kawg nkaus no los tau—tsis yog vim peb yog neeg tiam sis yog vim Vajtswv yeej zoo.

Vim peb paub li no, ces peb yuav ua li cas xav yws yws los sis chim siab? Vim li cas peb yuav saib hauv av xwb thaum cov vaj ntxwv tus Vaj Ntxwv caw peb los txais tau kev zoo siab rau yav tom ntej.⁵

Vim Vajtswv hlub peb zoo tag nrho thiab Yexus Khetos tau ua kev txi mus ib txhis, peb tej kev txhaum—tsis hais cov me thiab cov loj—thiaj yuav raug ploj mus thiab yuav tsis muaj neeg nco qab.⁶ Peb yuav sawv ntawm Nws lub xub ntiag ua neeg dawb huv thiab tsim nyog.

Kuv lub siab ris kuv Leej Txiv Saum Ntuj Ceeb Tsheej txiaj heev. Kuv paub tias Nws tsis tau rau txim rau Nws cov me nyuam kom lawv ua neej hauv lub ntiaj teb no es tsis muaj kev cia siab txog yav tom ntej uas ci ntsa iab. Nws tau qhia peb ua li cas kom rov qab mus cuag Nws. Thiab tus tseem ceeb tshaj plaws yog Nws Leej Tub, Yexus Khetos,⁷ thiab tej yam uas Nws muab txi kom pab peb.

Tus Cawm Seej txoj Kev Theej Txhoj uas mus ib txhis hloov peb txoj kev xav txog peb tej kev txhaum thiab tej yam peb ua yuam kev. Peb tsis tas xav txog tej no thiab xav tias peb tsis tsim nyog txais kev txhiv dim, tiam sis peb kawm tau thiab muaj kev cia siab.⁸ Lub txiaj ntsim uas yog kev hloov siab lees txim cia peb tso peb tej kev txhaum tseg thiab hloov los ua neeg tshiab.⁹

Vim muaj Yexus Khetos, tej yam peb ua tsis zoo tsis yog lub ntsiab ntawm peb lub neej tas li. Tej ntawd pab tau peb.

Ib yam li ib tug kws ntaus nkauj xyaum tas li, peb pom tau tej yam peb ua tsis yog thiab peb tej kev txhaum yog tej cib fim rau peb paub txog peb tus kheej zoo dua, muaj kev hlub ntxiv rau lwm tus, thiab hloov ua neeg zoo dua los ntawm kev hloov siab lees txim.

Yog peb hloov siab lees txim, ces tej yam uas peb ua yuam kev tsis muaj nqis. Tej ntawd yog ib feem ntawm peb txoj kev vam meej.

Peb txhua tus yeej yog me nyuam mos liab thaum piv rau cov zoo tshaj plaws uas muaj yeeb koob, cov uas Vajtswv xav kom peb hloov los ua. Tsis muaj ib tug neeg uas pib nkag ces taug kev ces khiav mus es nws tsis dawm taw, raug doog ntshav. Peb yeej kawm li no.

Yog peb rau siab xyaum, sim coj raws li Vajtswv tej lus txib tas mus li, thiab rau siab hloov siab lees txim, nyiaj mus kom txog thaum kawg, thiab ua raws li peb kawm, ib kab rau ib kab, ces peb yuav muaj qhov kaj hauv peb sab ntsuj plig.¹⁰ Thiab txawm peb tsis to taub peb yuav hloov los ua neeg zoo npaum li cas tam sim no, “peb paub hais tias thaum Yexus Khetos rov qab los,” peb yuav pom Nws txoj kev kaj nyob hauv peb, thiab “peb yuav pom tseeb hais tias nws zoo li cas tiag.”¹¹

Yog ib lo lus cog tseg zoo kawg nkaus!

Muaj tseeb tiag, lub ntiaj teb no ntxhov hnyo. Thiab peb yeej muaj tej kev qaug zog. Tiam sis peb tsis tas poob siab nthav, vim peb tso siab rau Vajtswv, peb thiaj li yuav tso siab rau Nws Leej Tub, Yexus Khetos, ces peb tais tau lub txiaj ntsim uas yog tus Ntsuj Plig txoj kev coj peb hauv txoj kev no mus rau ib lub neej uas muaj kev xyiv fab thiab kev zoo siab.¹²

Kuv yeej xav paub seb, Yexus yuav qhia dab tsi yog tias Nws nyob nrog peb niaj hnub no?

Tom qab Nws Sawv Rov Los, Yexus Khetos tau ua raws li Nws cog lus kom mus xyuas Nws “lwm cov yaj.”¹³

Phau Ntawv Maumoos: Ib zaj Tim Khawv Ntxiv txog Yexus Khetos hais txog ib lub sij hawm thaum Nws tshwm sim rau neeg pom nyob hauv Amelikas teb. Peb muaj phau zoo kawg no uas yog ib phau tim khawv txog tus Cawm Seej txoj hauj lwm.

Cov neeg hauv Phau Ntawv Maumoos tau ua neej nyob rau lwm sab ntawm lub ntiaj teb no—lawv zaj keeb kwm, kab lig kev cai, thiab kev kav teb kav chaw yeej txawv ntawm cov neeg uas Yexus qhia thaum nws ua hauj lwm qhuab qhia hauv lub ntiaj teb. Tiam sis Nws qhia lawv ntau yam uas Nws qhia lawv nyob hauv Thaj Av Dawb Huv.

Vim li cas Nws yuav ua il ntawd?

Tus Cawm Seej yeej qhia tej yam tseeb mus ib txhis li. Nws hais tej lus qhia no rau txhua leej txhua tus.

Nws zaj lus yog ib zaj lus txog kev cia siab—ib zaj lus tim khawv hais tias Vajtswv peb Leej Txiv Saum Ntuj Ceeb Tsheej tsis tau tso nws cov me nyuam tseg.

Vajtswv yeej nrog nraim peb.

Ob puas xyoo tas los, tus Cawm Seej rov qab los rau hauv lub ntiaj teb. Ua ke nrog Vajtswv Leej Txiv Nws tau tshwm sim rau Joseph Smith uas muaj 14 xyoos thiab qhib kev muab txoj moo zoo thiab Yexus Khetos lub Koom Txoos txum tim rov qab los. Txij thaum hnub ntawd los, lub ntuj tau qhib phlo, thiab cov tub xa xov saum ntuj ceeb tsheej tau nqis los muaj yeeb koob uas tsis txawj tuag li. Txoj kev kaj thiab kev txawj ntse tau tawm hauv lub rooj zaum saum ntuj xilethi-aus los.

Tus Tswv Yexus Khetos rov qab hais dua ntxiv rau neeg ntiaj teb.

Es Nws tau hais dab tsi?

Peb tau koob hmoov vim muaj Nws cov lus nyob hauv phau Lus Qhuab Qhia thiab Kev Khi Lus—uas txhua tus txais tau yog lawv xav nyeem thiab kawm. Tej lus no muaj nqis heev rau peb niaj hnub no!

Thiab peb tsis tas xav vim li cas tus Cawm Seej tau rov qab qhia lub ntsiab tseem ceeb ntawm Nws txoj moo zoo: “[Nej] yuav tsum hlub tus Tswv [nej] tus Vajtswv kom kawg [nej] lub siab thiab [nej] lub dag lub zog; thiab [nej] yuav tsum ua hauj lwm rau nws los ntawm Yexus Khetos lub npe.”¹⁴ Nws hais kom peb nrhiav Vajtswv¹⁵ thiab ua raws li tej lus qhia uas Nws tau tshwm sim rau Nws cov tub qhe, cov yaj saub.¹⁶

Nws qhia kom peb ib leeg hlub ib leeg¹⁷ thiab “muaj txoj kev siab hlub puv nkaus rau txhua tus neeg.”¹⁸

Nws caw peb ua li Nws txhais tes, thiab mus ua zoo.¹⁹ “Peb tsis txhob hlub luag ntawm lub ncauj lo lus xwb; tiam sis peb yuav tsum pab lawv, sawv daws thiaj pom hais tias peb muaj lub siab hlub tiag tiag.”²⁰

Nws hais kom peb ua raws li Nws txib: kom hlub, muab faib, thiab caw txhua tus ua raws li Nws txoj moo zoo thiab Nws lub Koom Txoos.²¹

Nws txib peb ua tej lub tuam tsev dawb huv thiab nkag mus hauv thiab ua hauj lwm haud.²²

Nws qhia kom peb ua Nws cov thwj tim—xwv kom peb yuav tsum tsis txhob xav tau lub hwj chim, nyiaj txiag, kev pom zoo, los sis lub luag hauj lwm rau peb tus kheej. Nws qhia kom peb “muab tej yam ntawm lub ntiaj teb no tso tseg, thiab nrhiav tej yam ntawm ib qhov chaw uas zoo dua.”²³

Nws hais kom peb nrhiav kev xyiv fab, tswv yim, kev kaj siab lug, qhov tseeb, kev zoo siab,²⁴ thiab txais kev cog lus tias yuav tau txoj sia nyob mus ib txhis.²⁵

Cia peb kawm ntxiv me ntsis. Yog tias Yexus tau los rau nej pawg ntseeg, ceg ntseeg, los sis rau nej lub tsev hnub no. Ces yuav zoo li cas?

Nws yuav saib hauv nej lub siab. Tej yam ntawm sab nraud yuav tsis tseem ceeb. Nws yuav paub nej tiag tiag. Nws yuav paub nej lub siab xav tau dab tsi.

Nws yuav txhawb nqa cov uas muaj siab mos siab muag thiab cov uas txo hwj chim.

Nws yuav kho cov neeg mob.

Nws yuav muab kev ntseeg thiab kev ua siab loj rau tus uas ua xyem xyav.

Nws yuav qhia peb kom qhib peb lub siab rau Vajtswv thiab pab lwm tus.

Nws yuav paub thiab saib taus kev siab ncaj, kev txo hwj chim, kev ncaj ncees, kev rau siab ntseeg, kev khuv leej, thiab kev siab hlub.

Ntsia hauv Nws qhov muag ib zaug xwb ces peb yeej yuav tsis zoo ib yam li qub. Peb yuav hloov tas mus li. Hloov los ntawm qhov uas peb paub tiag tiag hais tias Vajtswv nyob nrog peb.

Kuv rov qab xav txog kuv tus kheej thaum kuv yog ib tug tub hluas. Yog tias kuv muaj peev xwm rov qab mus rau yav tas los, kuv yuav nplij nws lub siab thiab hais kom nws taug txoj kev zoo thiab nrhiav mus ntxiv. Thiab kuv yuav hais kom nws caw Yexus Khetos los rau hauv nws lub neej, vim Vajtswv nyob nrog peb!

Kuv hais rau nej, kuv cov kwv tij thiab cov muam, kuv cov phooj ywg zoo, thiab rau tag nrho nej cov uas nrhiav tej lus teb, thiab nrhiav kev zoo siab, kuv qhia nej zoo ib yam: cia li nrhiav mus ntxiv nrog kev ntseeg thiab kev ua siab ntev.²⁷

Thov, ces nej yuav tau txais Khob, ces yuav qhib rau nej.²⁸ Tso siab rau tus Tswv.²⁹

Nyob hauv peb lub neej txhua hnub peb tej hauj lwm thiab lub cib fim zoo kawg nkaus yog kev ntsib Vajtswv.

Thaum peb tso kev muab hlob tseg thiab mus cuag Nws lub rooj zaum nrog ib lub siab mob thiab lub siab xav ua zoo,³⁰ Nws yuav txav los ze peb.³¹

Thaum peb nrhiav kom coj raws li Yexus Khetos thiab taug txoj kev ua cov thwj tim, ib kab rau ib kab, ces yuav txog hnub thaum peb txais lub txiaj ntsim uas yog kev xyiv fab puv npo.

Kuv cov phooj ywg zoo, nej Leej Txiv Saum Ntuj Ceeb Tsheej hlub nej nrog ib txoj kev hlub uas zoo tag nrho. Nws tau qhia nej txog Nws txoj kev hlub uas tsis tu tsis tseg, tiam sis qhov tseem ceeb tshaj Nws tau txib Nws Tib Leeg Tub los ua ib txoj kev txi thiab ib lub txiaj ntsim rau Nws cov me nyuam kom lawv thiaj li yuav rov qab mus rau peb leej txiv thiab leej niam saum ntuj ceeb tsheej.

Kuv ua tim khawv tias peb Leej Txiv Saum Ntuj Ceeb Tsheej muaj txoj sia nyob, Yexus Khetos coj Nws lub Koom Txoos, thiab Thawj Tswj Hwm Russell M. Nelson yog Nws tus yaj saub.

Kuv foom koob hmoov rau nej nyob hauv lub caij nyoog Easter xyiv fab no. Cia li qhib nej lub siab rau tus Cawm Seej thiab tus Txhiv Dim, txawm nej raug xwm txheej, kev sim siab, kev txom nyem, los yog ua yuam kev dab tsi los, nej yuav paub tias Nws muaj txoj sia nyob, Nws hlub nej, thiab vim muaj Nws, nej yeej yuav tsis nyob nej ib leeg.

Vajtswv yeej nrog nraim peb.

Kuv ua tim khawv txog qhov no los ntawm Yexus Khetos lub npe dawb ceev, amees.