Lawv Yuav Kov Tsis Yeej; Peb Yeej Yuav Tsis Poob

Peb tus yaj saub, Thawj Tswj Hwm Russell M. Nelson, nyob hauv lub tuam rooj sab laj tas los hais tias: “Nyob hauv lub caij nyoog txaus ntshai no uas tus Thwj Tim Povlauj tau qhia txog, Dab Ntxwg Nyoog tsis sim npog nws txoj kev tawm tsam Vajtswv txoj hau kev. Kev phem uas muaj zog nyob txhua qhov chaw. Yog li ntawd, tib txoj kev uas nej sab ntsuj plig tiv taus yog kev txiav txim siab cia Vajtswv yeej hauv peb lub neej, kawm mloog Nws lub suab, thiab siv zog pab muab Ixayees sau los ua ke.”¹

Thaum peb xav txog tus yaj saub tej lus caw peb kawm mloog Vajtswv lub suab, peb puas rau siab los sis ua siab tawv? Thov kom peb cia li nco txog tej lus ntuas nyob hauv Yakhauj 6:6: “Muaj tseeb tiag, hnub no, yog nej xav hnov nws lub suab, nej tsis txhob ua nej lub siab tawv qhawv; vim li cas nej ho yuav tuag?” Thov kom peb yuav rau siab cia Vajtswv yeej hauv peb lub neej.

Peb yuav ua li cas cia Vajtswv yeej hauv peb lub neej thiab tsis txhob cia tus yeeb ncuab? Nyob hauv phau Lus Qhuab Qhia thiab Kev Khi Lus 6:34 peb nyeem hais tias, “Yog li ntawd, tsis txhob ntshai, pab me nyuam yaj; cia li ua tej uas zoo; cia lub ntiaj teb thiab ntuj txiag teb tsaus los koom ua ke tawm tsam neb, vim yog neb cog rau saum kuv lub pob zeb, ces lawv yuav kov tsis yeej.” Nov yog ib lo lus cog tseg tseem ceeb. Txawm yog neeg ntiaj teb thiab ntuj txiag teb tsaus yuav los koom ua ke tawm tsam peb, lawv yuav kov tsis yeej peb yog peb xaiv cia Vajtswv yeej thaum peb muab peb lub neej tsa saum lub Nws lub pob zeb.

Hais txog Nws cov thwj tim, Yexus Khetos tau qhia txog ib tug neeg muaj tswv yim thiab ib tug neeg tsis muaj tswv yim, raws li sau hauv phau Mathais tshooj 7 ntawm Phau Tshiab. Nej feem coob tau hnov txog zaj nkauj uas lub Koom Haum Me Nyuam Yaus hu nkauj hais tias “Tus Neeg Muaj Tswv Yim thiab tus Neeg Tsis Muaj Tswv Yim.”² Yog tias nej tau siv sij hawm muab plaub nqe hauv zaj nkauj no sib piv, nej yuav kawm tias nqe 1 thiab 2 yeej zoo li nqe 3 thiab 4. Tus neeg muaj tswv yim thiab tus neeg tsis muaj tsev yim ua ib lub tsev. Nkawd xav ua ib lub tsev zoo thiab nyab xeeb rau nkawd tsev neeg nyob. Nkawd xav muaj kev zoo siab nrog nkawd tsev neeg mus ib txhis li, ib yam li peb. Qhov xwm txheej los zoo ib yam: “Los nag xob nag cua, ces tej dej nyab los.” Peb hu li ntawd rau zaus thaum peb hu zaj nkauj ntawd. Qhov txawv tsuas yog qhov uas tus neeg muaj tswv yim tau ua tsev rau saum lub pob zeb thiab nws lub tsev ruaj khov, tiam sis tus neeg tsis muaj tswv yim ua nws lub tsev rau saum cov xuab zeb es cov dej nplawm nws lub tsev puas tsuaj tas. Yog li ntawd, peb lub hauv paus nyob qhov twg los yeej tseem ceeb, thiab muaj nqis rau qhov uas peb yuav nyob thaum kawg thiab mus ib txhis li.

Kuv cia siab thiab thov Vajtswv tias peb yuav nrhiav tau thiab nyob saum lub hauv paus tseeb thaum peb ua peb lub neej thaum yav tom ntej. Peb nyeem nyob hauv Hilamas 5:12 hais tias, “Thiab nim no, kuv ob tug tub es, nco ntsoov, nco ntsoov tias twb yog nyob rau saum lub pob zeb uas yog peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb lub hauv paus; xwv kom thaum tus dab phem yuav xa nws tej cua muaj zog, muaj tseeb tiag, nws tej xub nyob hauv tej khaub zig cua, muaj tseeb tiag, thaum tag nrho nws tej lawg thiab nws tej cua daj cua dub uas muaj zog yuav los raug neb, tej ntawd yuav tsis muaj hwj chim kov yeej neb kom cab tau neb mus rau hauv tus kwj tob tob ntawm kev nyuaj siab thiab kev txom nyem uas tsis muaj qhov kawg, vim yog lub pob zeb uas neb tau cog rau saud, uas yog lub hauv paus ruaj nrees, ib lub hauv paus uas yog neeg cog rau saud lawv yuav tsis vau.”

Cov lus ntawd yog qhov uas Vajtswv cog lus! Yog peb cia Yexus Khetos ua peb lub hauv paus, peb yeej yuav tsis poob! Thaum peb rau siab ntseeg nyiaj mus kom txog thaum kawg, Vajtswv yuav pab peb ua peb lub neej nyob rau saum Nws lub pob zeb, thiab tej qhov rooj ntawm ntuj txiag teb tsaus yuav kov tsis yeej peb (Lus Qhuab Qhia thiab Kev Khi Lus 10:69). Tej zaum peb yuav tsis muaj peev xwm hloov tag nrho tej yam uas peb yuav raug thaum yav tom ntej, tiam sis peb muaj peev xwm xaiv yuav npaj li cas rau tej ntawd.

Peb ib txhia tej zaum yuav xav tias, “Txoj moo zoo yeej zoo heev, yog li ntawd peb yuav tsum ua raws li txoj moo zoo hauv peb lub neej, tej zaum ib zaug ib lub lim tiam.” Qhov uas peb mus koom lub koom txoos ib zaug ib lub lim tiam yeej tsis txaus kom cog saum lub pob zeb. Peb yuav tsum ua raws li Yexus Khetos txoj moo zoo txhua lub sij hawm kom tas peb lub neej. Txoj moo zoo tsis yog ib feem ntawm peb lub neej, tiam sis peb lub neej yeej yog ib feem ntawm Yexus Khetos txoj moo zoo. Cia li xav txog qhov no. Qhov no muaj tseeb yom? Peb lub neej hauv lub ntiaj teb no yog ib feem xwb ntawm tag nrho Vajtswv txoj hau kev cawm seej thiab kev tsa nto.

Vajtswv yog peb Leej Txiv Saum Ntuj Ceeb Tsheej. Nws hlub peb txhua leej txhua tus. Nws paub tej kev uas peb yuav taug zoo tshaj peb paub peb tus kheej. Tsis yog nws paub txhua yam ntawm peb lub neej xwb. Vajtswv paub txhua yam txog txhua yam ntawm peb lub neej.

Thov ua raws li peb tus yaj saub Thawj Tswj Hwm Nelson tej lus ntuas uas muaj tswv yim. Raws li hais nyob hauv phau Lus Qhuab Qhia thiab Kev Khi Lus 21:5–6:

“Vim peb yuav tau txais nws txoj lus, zoo ib yam li los kiag ntawm tus Tswv lub qhov ncauj los, nrog tag nrho txoj kev ua siab ntev thiab kev ntseeg.

“Vim los ntawm kev ua tej yam no ces tej qhov rooj ntawm ntuj txiag teb tsaus yuav kov tsis yeej nej; muaj tseeb tiag, thiab tus Tswv Vajtswv yuav ua kom tej hwj chim ntawm txoj kev tsaus ntuj yaj ploj ntawm nej mus, thiab ua kom lub ntuj co nto kom zoo rau nej, thiab nws lub npe lub yeeb koob.

Yog li ntawd, lawv yuav kov tsis yeej, thiab peb yuav tsis swb!

Kuv ua tim khawv rau nej tias Yexus Khetos yuav rov los zaum ob ib yam li Nws tau los zaum thib ib, tiam sis zaum no nws yuav los muaj yeeb koob thiab meej mom loj heev. Kuv cia siab thiab thov Vajtswv tias kuv yuav npaj siab txais Nws, tsis hais nyob sab no ntawm daim ntaub thaiv los sis nyob sab tid. Thaum peb ua koob tsheej nyob hauv lub caij nyoog Easter no, dhau los ntawm Yexus Khetos txoj Kev Theej Txhoj thiab lub hwj chim ntawm Nws txoj Kev Sawv Rov Los (saib Maulaunais 7:41), kuv yuav muaj cib fim mus cuag tus uas tau tsim kuv thiab hais rau Nws tias, “Ua tsaug.” Los ntawm Yexus Khetos lub npe, amees.