Vim Li Cas Yuav Taug txoj Kev Ua Raws Li Kev Khi Lus

Qhov thib ib yog vim li cas peb mloog Vajtswv lus. Tsis yog peb tsuas xav ua zoo xwb, peb cog lus tias peb yuav ua neej raws li txhua lo lus uas tawm hauv Vajtswv lub qhov ncauj los. Peb coj raws li Yexus Khetos tus yam ntxwv, vim Nws ua kev cai raus dej, “nws tseem ua qhia rau noob neej tias, raws li sab cev nqaij daim tawv nws tseem txo nws lub hwj chim rau Leej Txiv, thiab ua pov thawj rau Leej Txiv tias nws yuav mloog Leej Txiv lus kom ua raws li Leej Txiv tej lus txib.”⁶

Thaum peb khi lus, peb tsis xav ua kom txhob ua yuam kev los sis ua raws li kev txawj ntse thaum peb txiav txim xwb. Peb yeej lav ris rau Vajtswv rau tej yam uas peb xaiv thiab peb lub neej. Peb ris Yexus Khetos lub npe. Peb tsom ntsoov rau Khetos—peb hais lus tim khawv txog Yexus thiab coj raws li Khetos tus cwj pwm.

Hais txog tej kev khi lus, kev ua raws li txoj moo zoo cov ntsiab cai yeej yuav nyob rau hauv peb lub siab lub ntsws. Kuv paub txog ib khub niam txiv, thaum nkawd sib yuav, tus poj niam tsis muaj siab ntseeg lub Koom Txoos thiab nws tus txiv yeej tsis yog ib tug mej zeej hauv lub Koom Txoos. Kuv yuav hu nkawd ua Mary thiab John, tsis yog nkawd lub npe tiag tiag. Thaum nkawd muaj me nyuam, Mary xav tias nws yuav tsum tu lawv, zoo li cov vaj lug kub hais tias, “raws li Vajtswv Txoj Lus qhia.”⁷ John pom zoo txhawb nqa qhov no. Mary tau hloov ob peb yam kom nws yuav nyob hauv tsev qhia txoj moo zoo rau lawv tsis tu tsis tseg. Nws ua tib zoo kom nws tsev neeg mus teev tiam thiab ua tej yam hauv lub Koom Txoos. Mary thiab John yeej yog leej niam thiab leej txiv uas coj yam ntxwv zoo, thiab nkawd cov me nyuam (txhua tus yog me tub) tau loj hlob muaj kev ntseeg thiab ua raws li txoj moo zoo cov ntsiab cai thiab tej kev cai.

John niam thiab txiv, uas yog cov tub yawg thiab pog, zoo siab vim nkawd cov tub xeeb ntxwv ua neej zoo thiab ua tau zoo, tiam sis vim nkawd tsis tshua nyiam lub Koom Txoos, nkawd xav hais tias yog vim John thiab Mary txawj ua niam tsev txiv tsev zoo xwb. John, txawm nws tsis yog ib tug mej zeej ntawm lub Koom Txoos, tsis tau cia nkawd xav li ntawd. Nws hais tias nkawd pom tej txiv ntawm kev qhia txog txoj moo zoo—tej yam uas nws cov tub kawm hauv lub koom txoos thiab tej yam uas ua hauv tsev.

John tau txais tus Ntsuj Plig txoj kev tshoov siab, nws tus poj niam txoj kev hlub thiab tus yam ntxwv, thiab nws cov tub txoj kev txhawb nqa. Thaum kawg, nws tau ua kev cai raus dej, ua rau pawg ntseeg thiab cov phooj ywg xyiv fab heev.

Txawm yog lawv tseem muaj teeb meem hauv lawv lub neej los, Mary thiab John qhia tseeb tias yeej yog kev khi lus ntawm txoj moo zoo yeej yog lub hauv paus ntawm lawv cov koob hmoov rau lawv tsev neeg thiab lawv txhua tus. Nkawd pom tias tau muaj raws li tus Tswv tej lus rau Yelemis nyob hauv nkawd cov me nyuam lub neej thiab nkawd lub neej ib yam thiab: “Kuv yuav ua kom lawv nco ntsoov kuv tej kev cai rau nruab siab, thiab kuv yuav ua lawv tus Vajtswv thiab lawv yuav ua kuv haiv neeg.”⁸

Ib yam ntxiv hais txog txoj kev ua raws li kev khi lus yog peb txoj kev txheeb ze Vajtswv. Tej kev khi lus uas Vajtswv khi nrog Nws cov me nyuam yeej tsis coj peb txoj kev mus xwb. Tej kev khi lus yeej khi peb rau Nws, yog li ntawd, peb thiaj kov yeej tau txhua yam.⁹

Muaj ib hnub kuv nyeem ib zaj los ntawm ib tug kws sau xov xwm uas xav hais tias thaum peb ua kev cai raus dej rau cov neeg tuag ces peb muab cov duab uas siv kaw tej ntaub ntawv raus rau hauv dej. Ces tag nrho tej npe uas tau muab kaw rau cov duab ntawd twb ua kev cai raus dej lawm. Ua li tus txheej txheem no ntshe yuav sai heev, tiam sis ua li no tsis quav ntsej txog qhov uas txhua tus muaj nqis heev thiab qhov uas yus khi lus nrog Vajtswv tseem ceeb npaum li cas.

“[Yexus] hais tias … : Cia li nkag mus hauv lub rooj vag nqaim; vim lub rooj vag yeej nqaim, thiab txoj kev yeej ti uas coj neeg mus rau txoj kev tsa nto thiab kev muaj neej mus ntxiv, thiab tsawg tus thiaj nrhiav tau txoj kev ntawd.”¹⁰ Hais txog lub cim no, lub rooj vag no nqaim heev yog li ntawd tsuas pub ib tug nkag mus haud thaum ib lub sij hawm. Ib tug cog lus rau Vajtswv, ces vim nws ua li ntawd Vajtswv ua kev khi lus rau nws, raws nws lub npe, hais tias nws yuav muaj cuab kav tso siab rau Vajtswv hauv lub neej no thiab mus ib txhis li. Nrog rau cov kab ke thiab tej kev khi lus, “pom tau Vajtswv lub hwj chim” nyob hauv peb lub neej.¹¹

Ces ua rau peb xav txog ib yam koob hmoov tshwj xeeb thib peb ntawm txoj kev ua raws li kev khi lus. Vajtswv muab ib lub txiaj ntsim uas zoo tshaj qhov peb xav tawm kom pab cov neeg uas ua kev khi lus ua raws li lawv tej kev khi lus: lub txiaj ntsim Vaj Ntsuj Plig Dawb Huv. Lub txiaj ntsim no yog txoj cai kom muaj tus Vaj Ntsuj Plig Dawb Huv ua yus tus khub tas li, pov hwm, thiab coj yus kev.¹² Nws kuj hu ua tus Nplij Siab, es tus Ntsuj Plig Dawb Huv ua rau yus “muaj kev cia siab thiab kev hlub dawb pawg.”¹³ Nws “paub txhua yam, thiab ua tim khawv txog Leej Txiv thiab Leej Tub,”¹⁴ zoo li peb xav ua tim khawv txog Nkawd.¹⁵

Nyob ntawm txoj kev ua raws li kev khi lus peb kuj nrhiav tau cov koob hmoov uas yog kev zam txim thiab kev ntxuav huv kom tsis muaj kev txhaum. Qhov no yog ib txoj kev pab uas tsuas yog los ntawm Vajtswv txoj kev tshav ntuj uas tus Vaj Ntsuj Plig Dawb Huv muab rau peb. Tus Tswv hais tias, “Nov yog txoj lus txib: Cia li hloov siab lees txim, nej txhua tus uas nyob thoob plaws lub ntiaj teb, thiab los cuag kuv thiab ua kev cai raus dej los ntawm kuv lub npe, xwv kom qhov uas nej tau txais tus Vaj Ntsuj Plig Dawb Huv yuav muab nej hloov ua neeg dawb huv, xwv kom nej yuav sawv tsis muaj qhov ceb rau ntawm kuv xub ntiag thaum txog hnub kawg.”¹⁶

Qhov thib plaub, cov uas taug txoj kev ua raws li kev khi lus nrhiav tau cov koob hmoov thaum lawv sib sau ua ke raws li Vajtswv pom zoo. Nyob hauv cov vaj lug kub tag nrho muaj tej lus uas qhia txog qhov uas tej xeem neeg Ixayees yuav sib sau ua ke nyob hauv lawv tej thaj av uas yog lawv qub txeeg qub teg.¹⁷ Tam sim no twb pib muaj raws li tej lus cog tseg no vim tau pib muab cov neeg khi lus sau los ua ke nyob hauv lub Koom Txoos, uas yog Vajtswv lub nceeg vaj hauv lub ntiaj teb. Thawj Tswj Hwm Nelson piav tias, “Thaum peb hais txog kev sib sau, peb tsuas hais qhov tseeb no hais tias: txhua tus ntawm Leej Txiv Saum Ntuj Ceeb Tsheej cov me nyuam … tsim nyog hnov txog Yexus Khetos txoj moo zoo.”¹⁸

Tus Tswv txib cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg kom “Cia li sawv thiab ci mus, kom nej lub teeb yuav ua ib tug chij rau tej haiv neeg; … kom txoj kev sib sau los ua ke rau hauv thaj av Xi-oos, thiab rau hauv nws tej ceg txheem ntseeg, yuav tiv thaiv, thiab ua ib qho chaw nkaum ntawm kob cua daj cua dub, thiab ntawm txoj kev npau taws thaum yuav muab nchuav tawm los tsis tseg hlo li rau hauv lub ntiaj teb tag nrho.”¹⁹

Kuj muaj cov neeg khi lus uas koom ua ke txhua lub lim tiam nyob lub tsev thov Vajtswv nyob rau tus Tswv hnub, xwv kom peb yuav “ceev [peb] tus kheej txhij zog kom tej yam ntawm lub ntiaj teb txhob ua rau [peb] ceb.”²⁰ Yog kev koom ua kev kom txais cov mov mog thiab cov dej kom nco txog Yexus Khetos txoj Kev Theej Txhoj thiab ib lub sij hawm “ua kev cai yoo mov thiab thov Vajtswv, thiab tuaj sib tham ib leeg nrog ib leeg ntsig txog txoj kev nyob zoo ntawm [peb] tus ntsuj plig.”²¹ Thaum kuv yog ib tug tub hluas, kuv yog tib tug mej zeej hauv lub Koom Txoos nyob hauv kuv lub tsev kawm ntawv qib siab. Kuv nyiam koom nrog cov phooj ywg zoo thaum kuv kawm ntawv, tiam sis kuv paub tias kuv tso siab rau txoj kev koom ua ke thaum Hnub Caiv kom txhawb nqa kuv sab ntsuj plig, thiab kuv lub cev nqaij daim tawv. Peb yeej nco txog txoj kev koom ua ke kom rov qab khi lus thaum muaj phaum mob no, thiab peb tos ntsoov rau lub sij hawm thaum peb yuav rov qab los koom ua ke zoo li yav tas los.

Cov neeg khi lus yeej sib sau ua ke nyob rau hauv lub tuam tsev, tus Tswv lub tsev, kom txais tau cov kab ke, cov koob hmoov, thiab kev tshwm sim uas tsuas muaj haud xwb. Tus Yaj Saub Joseph Smith qhia hais tias: “Lub ntsiab rau txoj kev sib sau ua ke yog dab tsi … txoj kev muab Vajtswv haiv neeg sau los ua ke hauv ib tiam neeg twg hauv ntiaj teb no? … Lub ntsiab twb yog kom ua ib lub tsev rau tus Tswv uas nyob hauv Nws yuav qhia tau Nws haiv neeg txog tej kab ke ntawm Nws lub tsev thiab tej yeeb koob ntawm Nws lub nceeg vaj, thiab yuav qhia haiv neeg ntawd txog txoj kev cawm seej; vim muaj tej yam kab ke thiab tej ntsiab cai uas, thaum yuav qhia tawm thiab ua, yuav tsum ua hauv ib qho chaw los sis ib lub tsev uas tau ua kom thiaj ua tau raws li lub ntsiab ntawd nkaus xwb.”²²

Thaum kawg, tsuas yog peb taug txoj kev ua raws li kev khi lus xwb peb thiaj li yuav txais tau Anplaham, Ixaj, thiab Yakhauj cov koob hmoov, yog tej koob hmoov ntawm kev cawm seej thiab kev tsa nto uas Vajtswv tib leeg muaj peev xwm pub rau peb.²³

Cov vaj lug kub uas hais txog cov neeg khi lus feem ntau txhais tias yog Anplaham cov xeeb leej xeeb ntxwv tiag tiag los sis “tsev neeg Ixayees.” Tiam sis cov neeg khi lus kuj yog tag nrho cov uas txais Yexus Khetos txoj moo zoo.²⁴ Povlauj piav tias:

“Nej twb ua kev cai raus dej rau sawv daws pom lawm hais tias, nej yog cov uas nrog Yexus Khetos koom ib txoj sia, nej thiaj coj tau nej tus yam ntxwv zoo ib yam li Yexus Khetos tus. …

“Nej txhua tus uas ntseeg Yexus Khetos, nej puav leej yog Anplaham cov xeeb ntxwv, nej yeej yuav tau tej uas Vajtswv cog lus tseg lawm hais tias, nws yuav muab pub rau nej.”²⁵

Cov uas ua raws li lawv tej kev khi lus “yuav sawv los nyob hauv txoj kev sawv rov los ntawm cov ncaj ncees.”²⁶ Lawv “hloov ua neeg zoo tag nrho los ntawm Yexus uas yog tus nruab nrab ntawm kev khi lus tshiab. … Cov no yog cov muaj lub cev xilethi-aus, lawv lub yeeb koob yog zoo li lub hnub, ib yam li Vajtswv lub yeeb koob, qhov siab tshaj txhua qhov.”²⁷ “Yog li ntawd, txhua yam yog lawv li, txawm yog txoj sia los yog kev tuag, los sis tej yam nyob lub sij hawm no, los sis tej yam tseem yuav muaj los, tag nrho yog lawv li thiab lawv yog Khetos li, thiab Khetos yog Vajtswv li.”²⁸

Cia peb ua raws li tus yaj saub cov lus uas hais kom peb taug txoj kev ua raws li kev khi lus. Nifais tau pom peb lub caij nyoog thiab sau hais tias: “Kuv, Nifais, pom Vajtswv tus Me Nyuam Yaj lub hwj chim, pom tias lub hwj chim ntawd tau nqis los rau cov ntseeg ntawm tus Me Nyuam Yaj lub koom txoos, thiab rau tus Tswv cov neeg khi lus, cov uas tau tawg khiav ri niab mus thoob plaws hauv lub ntiaj teb; thiab lawv tau muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv.”²⁹

Zoo li Nifais, “kuv tus ntsuj plig kuj zoo siab rau tus Tswv tej kev khi lus uas nws tau khi tseg.”³⁰ Hnub Caiv Easter no, kuv ua tim khawv txog Yexus Khetos, tus uas peb cia siab txog Nws txoj Kev Sawv Rov Los thiab yog kev nplij siab txog tag nrho tej yam uas Nws cog lus peb yuav txais los ntawm txoj kev ua raws li kev khi lus. Los ntawm Yexus Khetos lub npe, amees.